Mandehana amy Finoa Avao

1. Manino apostoly Paoly ro nahatiaro afa-po lafa nandiniky ty fiainany?

FA NIHAIN’NY apostoly Paoly tamy fotoa zay hoe fa marìny ty andro hamonoa azy. Fe lafa nieritseritsy ty fiainany ie le nahatiaro afa-po. Zao ty nivolaniny: “Fa nahavita an’ny korsa iny zisiky farany aho, nanaraky ty finoa avao aho.” (2 Tim. 4:6-8) Nahay nanapa-kevitsy Paoly, ka nampiasàny hanompoa an’i Jehovah ty fiainany, sady niazony antoky fa nifalifaly taminy Jehovah. Teantsika koa laha mahay manapa-kevitsy noho mahazo hatò amy Jehovah tsika. Akory ty hanaovantsika ani-zay?

2. Ino ty dikan’ny hoe mandeha amy finoa?

² Zao ty nivolanin’i Paoly mikasiky azy noho ty Kristiana hafa tsy nivaliky: “Mandeha amy finoa tsika, fa tsy amy hitan’ny maso.” (2 Kor. 5:7) Ino ty tean’i Paoly hovolany? Ty fomba ampiasàn’olo raiky ty fiainany kindraiky ro tean’ny Baiboly hovolany amy hoe “mandeha.” Mandeha amy hitan’ny maso ty olo raiky laha mianky amy ty raha hitany, reny, noho tsapany avao ty fanapahan-kevitsy ataony. Mifanohitsy amy zay, fa mandeha amy finoa ie laha matoky an’i Jehovah Ndranahary lafa hanapa-kevitsy. Hita amy ty raha ataony fa resy lahatsy ie hoe hamaly soa azy Jehovah, sady handramby soa ie laha manoriky ty torohevitsin’i Jehovah amy Safàny ao.​—Sal. 119:66; Heb. 11:6.

3. Ino iaby ty soa ho azontsika laha mandeha amy finoa tsika? (2 Korintianina 4:18)

³ Mazava ho azy fa mianky amy raha hitantsika, rentsika, noho tsapantsika ty fanapahan-kevitsy sisany ataontsika. Fe laha miantehitsy amy reo avao tsika lafa handramby fanapahan-kevitsy bevata, le hahita problemo. Ino ty antony? Satria mamitaky raha reo kindraiky. Ndre atao hoe tsy zay aza, le mety tsy hidary ty sitrapo-Ndranahary na ty torohevitsiny tsika laha mandeha amy hitan’ny maso. (Mpito. 11:9; Mat. 24:37-39) Fa laha mandeha amy finoa tsika, le hanao fanapahan-kevitsy “tean’i Tompo.” (Efes. 5:10) Hilamin-tsay tsika sady tena ho falifaly laha manoriky ty torohevitsi-Ndranahary. (Sal. 16:8, 9; Isa. 48:17, 18) Laha mandeha amy finoa avao koa tsika, le hiay mandrakizay.​—Vakio 2 Korintianina 4:18.

4. Akory ty ahaiza hoe mandeha amy finoa ty olo raiky sa amy hitan’ny maso?

⁴ Akory ty ahaizanao hoe mandeha amy finoa iha na amy hitan’ny maso? Soa laha eritseretinao hoe mianky amin’ino ty fanapahan-kevitsy hataonao: mianky amy raha hitanao avao va, sa mianky amy fatokisanao an’i Jehovah noho ty torohevitsiny? Ndao hodinihintsika raha bevata telo retoa mba hahità hoe akory ty handehanantsika amy finoa avao: lafa hifily asa, lafa hifily valy, noho lafa mahazo toromariky baka amy fandamina. Hodinihintsika kiraidraiky amy raha reo hoe ino iaby ty raha mila eritseretintsika mba hahavy antsika handramby fanapahan-kevitsy soa.

LAFA HIFILY ASA

5. Ino ty raha tokony hodinihintsika lafa hifily asa?

⁵ Teantsika iaby laha mahazo ty raha ilàntsika noho ty fianakaviantsika tsika. (Mpito. 7:12; 1 Tim. 5:8) Be karama ty asa sisany, ka afaky manome ze raha iaby ilàn’ny fianakaviantsika tsika sady afaky manajary drala. Fa ty asa sisany, zara laha misy karama, ka ze raha tena ilàn’ny fianakaviantsika avao ro vitany. Mazava ho azy, fa dinihintsika tse ty karama ho azontsika lafa tsika hanapa-kevitsy hanao asa raiky. Fe laha zay avao ro dinihintsika lafa tsika hanapa-kevitsy, le mandeha amy hitan’ny maso tsika.

6. Akory ty ampisehoantsika hoe mandeha amy finoa tsika lafa hifily asa? (Hebreo 13:5)

⁶ Laha mandeha amy finoa tsika, le hodinihintsika koa hoe ino ty vokatsin’ny asa iny amy fifandrambesantsika amy Jehovah. Eritsereto zao: ‘Mety hahavy ahy hanao raha halan’i Jehovah va asa io?’ (Ohab. 6:16-19) ‘Mety hanelingely ty fanompoako va asa io, na hahavy ahy hisaraky amy fianakaviako anatin’ny fotoa maharitsy?’ (Fil. 1:10) Laha misy “eka” ty valin’ny fanontanea reo, le soa laha tsy manao an’ny asa iny iha, ndre sarotsy aza ty mila asa. Mandeha amy finoa tsika, le asehontsika amy fanapahan-kevitsy ataontsika fa matoky tsika hoe hikarakara ze raha ilàntsika Jehovah.​—Mat. 6:33; vakio Hebreo 13:5.

7-8. Ino ty nataon’ny rahalahy raiky baka an’Ameriky Antimo any iny mba hahavy azy handeha amy finoa? (Henteo koa sary io.)

⁷ Tsapan’ny rahalahy Javier,a mipetraky an’Ameriky Antimo any, fa tena ilà ty mandeha amy finoa. Zao ty nivolaniny: “Nameno fangataha hanao asa raiky be karama zay aho. Indroen’ny karamako taloha teo ty karaman’ny asa iny, sady teako hatao.” Fe ta hanao mpisava lala koa Javier. Zao ty nanohizany ty resany: “Nampandehany amy birôn’ny direktera any aho. Nivavaky tse aho alohan’ny handehanako any, le natoky aho hoe Jehovah ro mahay ze tena mety amiko. Ta hana asa soa noho be karama aho, fe tsy teako koa laha hahavy ahy tsy hahatratsy ty raha kendreko raha zay.”

⁸ Nitantara Javier hoe: “Lafa nifampiresaky tamy direktera iny aho, le nivola ie fa tsy maintsy hiasa amy lera tsy fiasà matetiky aho. Nihazavaniko am-panajà taminy fa tsy ahafahako manao ani-zay ty fanompoako.” Nanapa-kevitsy tsy hanao an’ny asa iny Javier. Nanomboky nanao mpisava lala ie roe herinandro tafarani-zay. Nahita asa tapa-potoa koa ie vola vitsivitsy tafara atoy. Hoy ty asany: “Nijanjy ty vavaky nataoko Jehovah, ka nameany asa ahafahako manao mpisava lala aho. Tena falifaly aho satria ahafahako manompo an’i Jehovah soa asako iny. Manam-potoa hiaraha amy mpiara-manompo koa aho.”

9. Ino ty ianaranao baka amy tantaran’i Trésor?

⁹ Manao akory laha tsapantsika hoe tsy manampy antsika handeha amy finoa ty asa ataontsika amy zao? Diniho ty raha niainan’i Trésor, baka a Congo any. Zao ty nitantaraniny: “Tena soa asa aho. Intelon’ny karamako taloha teo ty karamako, sady nihajàn’olo aho.” Fe nanapatampaky fivoria Trésor satria niasa avao ie ndre tamy lera tsy fiasà. Nivolanin’ny mpiaraky miasa aminy rey koa ie mba tsy hivolambola ty raha tsy mety ataon-drozy am-piasà ao. Nieritseritsy hiala tamy asany iny Trésor, fe natahotsy tsy hahita asa. Ino ty nanampy azy? Zao ty nivolaniny: “Nanampy ahy ty Habakoka 3:17-19 mba hahatakatsy hoe ndre ho very asa aza aho, le hahita fomba hikarakarà ahy avao Jehovah. Farany aho niala tamy asako iny.” Zao ty raha nivolaniny farany: “Maro ty mpampiasa mieritseritsy hoe tsy maintsy mahafoy raha maro iha, anisani-zay ty fotoa ho an’ny fianakavianao noho ty fivavahanao, laha ta hanan’asa be karama. Falifaly aho fa voaro ty fifandrambesako amy Jehovah noho ty fianakaviako. Nampean’i Jehovah hahita asa hahavelomako ty fianakaviako aho tao raiky tafara atoy, ka lasa nanam-potoa soa hanompoa azy. Mety ho sahira drala aloha tsika kindraiky lafa ataontsika amy pilasy voalohany Jehovah. Fe hikarakara antsika avao ie.” Laha matoky ty raha ampitamanin’i Jehovah noho ty torohevitsiny tsika, le handeha amy finoa avao sady hitahy antsika ie.

LAFA HIFILY VALY

10. Ino ty raha mety hahavy antsika handeha amy hitan’ny maso lafa hivily valy?

¹⁰ Fanomeza baka amy Jehovah ty fanambalea, ka ara-dalàna tsika laha ta hanambaly. Lafa mieritseritsy hanambaly rahalahy raiky ty ranabavy raiky, le mety hanenty ty toetsiny ie, ty hatovolahiny, ty lazany, ty dralany, ty andraikitsiny ara-pianakavia, noho ty hoe hampifalifaly azy va ie.b Raha bevata mila dinihy iaby reo. Fe laha reo avao ro dinihiny lafa hanapa-kevitsy ie, le mandeha amy hitan’ny maso ie.

11. Akory ty ampisehoantsika hoe mandeha amy finoa tsika lafa hifily valy? (1 Korintianina 7:39)

¹¹ Tena falifaly Jehovah satria manoriky ty torohevitsiny ty rahalahy noho anabavy lafa hifily valy! Orihin-drozy, ohatsy, ty torohevitsy hoe lafa lisatsy “ty fotoa fivelaran’ny fahatanorà” zay vo mampiaraky. (1 Kor. 7:36) Ty toetsy volanin’i Jehovah hoe mila ananan’ny lahilahy na ampela maeva valỳ ro tena henteany lafa mandiniky ty olo ho valiny ie. (Ohab. 31:10-13, 26-28; Efes. 5:33; 1 Tim. 5:8) Orihin-drozy koa ty torohevitsy hoe hanambaly “amy Tompo ao avao” resahin’ny 1 Korintianina 7:39. (Vakio.) Ka laha misy olo tsy Vavolombelo tea azy, le tsy maneky hampiaraky aminy ie. Mandeha amy finoa avao rozy, ka matoky hoe Jehovah raiky avao ro tena afaky manome ty raha ilàn-drozy ara-pihetseham-po.​—Sal. 55:22.

12. Ino ty ianaranao baka amy ohatsin’i Rosa?

¹² Diniho ty raha niainan’i Rosa, ranabavy mpisava lala a Colombỳ any. Nifankahita matetiky tamy lahilahy raiky tsy Vavolombelo tam-piasany any ie. Nitea azy lahilahy io, le lasa nitea azy koa Rosa. Zao ty nivolanin’i Rosa: “Tena olo soa ty fahitako azy. Tea nanampy olo ie, tsy nitroky sigara, sady mahay mandanjalanja lafa minon-toaky. Nisoa fanahy tamiko ie. Hitako taminy iaby ze toetsy teako hananan’ny lahilahy ho valiko, fe le ie tsy Vavolombelo zao avao.” Zao ty nanohizany ty resany: “Tsy mora amiko ty nivola taminy hoe tsy hiaraky aminy aho satria teako ty fomba nanandesany ahy. Zaho koa tamy zay nangiky sady fa ta hanambaly, kanefa mbo tsy nahita ranadahy mety amiko avao.” Fe tsy nifantoky tamy hitan’ny maso avao Rosa. Nivetsevetseny hoe ino ty ho vokatsin’ny fanapahan-kevitsiny amy fifandrambesany amy Jehovah. Bakeo nitampahiny tanteraky ty fifandrambesany tamy lahilahy iny, le nifantoky tamy fanompoa an’i Jehovah ie. Nahazo fanasà hanatriky Sekolin’ny Mpitory Fanjakà Iny ie tsiela tafarani-zay, le mpisava lala manoka ie henanizao. Zao ty nivolaniny: “Tena maro ty fitahia namean’i Jehovah ahy, ka tsy haiko sasy ty hivola ty hafaleako.” Tsy mora aloha ty hoe mandeha amy finoa, sirtò lafa raha tena teantsika ro voakasiky. Fe laha manoriky ty tari-dalan’i Jehovah avao tsika, le tsy haneny mihintsy.

LAFA MAHAZO TOROMARIKY BAKA AMY FANDAMINA

13. Ino ty raha mety hahavy antsika handeha amy hitan’ny maso lafa mahazo toromariky baka amy fandamina?

¹³ Matetiky tsika mahazo toromariky baka amy fandamina. Mety ho baka amy anti-panahy, mpiandraikitsin’ny faritsy, birôn’ny sampana, na Filan-kevi-pitantana toromariky rey. Fe manao akory laha tsy azontsika ty antony nanomeza an’ny toromariky iny? Mety sarotsy amintsika vasa ty manoriky an’ny toromariky iny, le lasa zay ro ifantohantsika. Mety hanomboky hifantoky amy tsy fahalavorarian’ny rahalahy nanome an’ny toromariky iny mihintsy aza tsika.

14. Ino ty hanampy antsika handeha amy finoa lafa mahazo toromariky baka amy fandamina? (Hebreo 13:17)

¹⁴ Laha mandeha amy finoa tsika, le hatòky hoe Jehovah ro mitari-dala ty fandaminany sady hainy ty raha iainantsika. Tsy hisalasala hanoriky toromariky tsika amy zay, sady hana toe-tsay soa. (Vakio Hebreo 13:17.) Lafa manoriky toromariky koa tsika, le hiharo raiky ty fiangona. (Efes. 4:2, 3) Matoky tsika hoe ndre tsy lavorary aza rahalahy mitariky antsika reo, le hitahy antsika Jehovah laha manoriky safà tsika. (1 Sam. 15:22) Matoky koa tsika, fa hahitin’i Jehovah amy fotoa mety ze toromariky mila ahity.​—Mik. 7:7.

15-16. Ino ty nanampy rahalahy raiky handeha amy finoa ndre nampisalasala azy aza ty toromariky niazony? (Henteo koa sary io.)

¹⁵ Toy misy tantara raiky mampiseho hoe mahasoa ty hoe mandeha amy finoa. Maro olo manao fivolana Espagnioly ty a Peroa any, fe maro koa ty mampiasa fivolanan’olo an-tanà eo, anisani-zay ty fivolana quechua. Fa an-taony maromaro ty mpiara-manompo manao fivolana quechua ro nila olo manao an’ny fivolana io. Fe ho fanoriha ty lalàna naboakin’ny Fanjakà, le novà ty fomba hilà olo amy faritany eny. (Rom. 13:1) Lasa nisalasala amy zay ty mpiara-manompo sisany hoe tsy ho mety fanovà iny, fa vomaiky hanasarotsy raha. Fe hitan’ny rahalahy noho anabavy reo fa lafa norihin-drozy fanovà iny, le nitahin’i Jehovah ty ezaky nataon-drozy amy filà olo manao fivolana quechua.

¹⁶ Anisan’ny mpitory nisalasala rey Kevin, anti-panahy amy fiangona mampiasa fivolana quechua. Zao ty fanazavany: “Nieritseritsy aho hoe manao akory henanizay ty hahitanay olo manao fivolana quechua!” Ino ty nataon’i Kevin? Nivola ie hoe: “Tiaroko ty Ohabolana 3:5. Nieritseritsy an’i Mosesy aho. Lafa ie nitariky ty Israelita hiala baka Ejipta any, le nivolanin’i Jehovah mba handay an-drozy ho amy Riaky Mena any. Fe tampi-dala rozy lafa niavy teo, kanefa Ejipsianina rey mania an-drozy baka afara ao. Hafahafa toromariky namean’i Jehovah azy iny, fe norihiny avao, ka nitahy azy Jehovah le nanao fahagagà mba hanavotà an-drozy.” (Eks. 14:1, 2, 9-11, 21, 22) Parè hanoriky an’ny fanovà iny Kevin. Ino ty vokany? Hoy ty asany: “Tena nahatseriky ahy ty fomba nitahian’i Jehovah anay. Mandeha an-tomboky ela zahay taloha vo mahita olo raiky na roe manao fivolana quechua. Fe henanizao zahay mifantoky amy faritany maro olo manao fivolana quechua. Lasa mahita olo maro azonay itoria, hotsidihy, noho ampianary Baiboly zahay. Nihamaro koa ty olo nanatriky fivoria.” Lafa mandeha amy finoa vatany tsika, le hamaly soa antsika avao Jehovah.

17. Ino ty nianaranao tamy lahatsoratsy toy tato?

¹⁷ Nisy raha bevata telo nidinihintsika tato azontsika ampisehoa hoe mandeha amy finoa avao tsika. Fe tsy amy raha telo reo avao ro anaovantsika ani-zay, fa amy lafiny iaby amy fiainantsika mihintsy. Ohatsy hoe lafa hifily fialam-boly, na lafa hanapa-kevitsy mikasiky ty fianara hatao, na ty fomba hitezantsika ty anantsika. Ndre ino ndre ino ty fanapa-kevitsy ataontsika, le tsy tokony hianky amy hitan’ny maso avao ty fanapahan-kevitsy ataontsika. Mila dinihintsika koa ty fifandrambesantsika amy Jehovah noho ty torohevitsiny. Tsy tokony halinontsika koa fa nampitamà ie hoe hikarakara antsika. Laha manao ani-zay tsika, le ho vitantsika ty “handeha amy anaran’i Jehovah Ndranaharintsika, mandrakizay mandrakizay.”​—Mik. 4:5.