Manino Tsika ro Tokony Hila Torohevitsy?

1. Ino ty hanampy antsika handramby fanapahan-kevitsy soa? (Ohabolana 13:10; 15:22)

SAMBY ta handramby fanapahan-kevitsy soa tsika iaby, sady teantsika laha misy vokany soa ty fanapahan-kevitsy ataontsika. Mba hahatanteraky ani-zay, le resahin’ny Safà-Ndranahary hoe mila mangataky torohevitsy tsika.​—Vakio Ohabolana 13:10; 15:22.

2. Mampitamà hanao ino amintsika Jehovah?

² Mazava ho azy, fa Jehovah Babantsika ro tena afaky manome torohevitsy soa noho fahendrea antsika. Mampitamà ie fa hanampy antsika, le hoy ty asany: “Hanoro hevitsy anao aho, sady hijilo anao ty masoko.” (Sal. 32:8) Asehon’ny andininy io, fa tsy hoe manome torohevitsy antsika avao Jehovah, fa mikarakara antsika manoka koa sady manampy antsika hanoriky ty torohevitsiny.

3. Ino ty hodinihintsika amy lahatsoratsy toy ato?

³ Hamaly an’ny fanontanea efatsy retoa tsika amy lahatsoratsy toy ato: 1) Ino ty toetsy mila ananako laha teako hahasoa ahy ty torohevitsy soa azoko? 2) Ia ty afaky manome torohevitsy soa ahy? 3) Akory ty ampisehoako hoe tena mila torohevitsy aho? 4) Manino aho ro tsy tokony hangataky ty hafa mba hanapa-kevitsy ho ahy?

INO TY TOETSY MILA ANANAKO?

4. Laha teantsika hahasoa antsika ty torohevitsy ameantsika, ino ty toetsy mila ananantsika?

⁴ Mila miambany tsika laha teantsika hahasoa antsika ty torohevitsy amea antsika. Mila mieky tsika hoe mila fanampea baka amin’olo hafa mba hahavy antsika handramby fanapahan-kevitsy soa satria tsy voatery ananantsika traikefa na ho haintsika ty raha iaby. Tsy hanampy antsika Jehovah laha tsy miambany tsika. Laha tsy miambany koa tsika, le tsy ho hitantsika ty antony anorihantsika ty torohevitsy ameany antsika amy Baiboly ao. (Mik. 6:8; 1 Pet. 5:5) Fa laha miambany tsika, le parè hijanjy noho hanoriky ty torohevitsy ara-baiboly amea antsika.

5. Ino iaby ty raha nivitan’i Davida Mpanjaka, ka mety ho nampirengirengy azy?

⁵ Ndao hodinihintsika ty raha azontsika ianara baka amy Davida Mpanjaka. Maro ty raha soa nivitany, fe tsy nampirengirengy azy raha zay. Nalaza tamy fahaiza moziky ie tao maro talohan’ny naha lasa mpanjaka azy. Nasà mihintsy aza ie mba hanao fampisehoa ho an’ny mpanjaka. (1 Sam. 16:18, 19) Lafa nivoatendry ho mpanjaka Davida, le nanome hery azy ty fanahin’i Jehovah. (1 Sam. 16:11-13) Nirengen’olo ie satria naharesy ty fahavalon-drozy, anisani-zay Filistinina be noho abo mana anara Goliata zay. (1 Sam. 17:37, 50; 18:7) Laha olo nirengirengy Davida, le mety tsy ho nila torohevitsy amin’olo hafa. Fe tsy nanao ani-zay ie.

6. Akory ty ahaizantsika hoe nijanjy torohevitsy Davida? (Henteo koa fonony eo.)

⁶ Lafa nilasa mpanjaka Davida, le nila nama afaky hanoro hevitsy azy. (1 Tan. 27:32-34) Ndre mbo tsy nimpanjaka aza Davida, le fa nijanjy ty torohevitsy soa namean’olo azy. Tsy hoe ty torohevitsy baka amy lahilahy avao ro norihiny, fa ty torohevitsy baka amin’ampela koa, anisani-zay Abigaila. Lahilahy tsy nanaja olo, tsy nahay nankasitraky, sady tsy azo nifanaraha ty valiny, tsy ia zay fa Nabala. Fe niambany Davida ka nanoriky ty torohevitsy soa namean’i Abigaila, ka tsy nanao fahadisoa bevata.​—1 Sam. 25:2, 3, 21-25, 32-34.

7. Ino ty ianarantsika baka amy Davida? (Mpitoriteny 4:13) (Henteo koa sary reo.)

⁷ Afaky mandramby fianara vitsivitsy baka amy Davida tsika. Mety mana talenta na mana fahefà, ohatsy, tsika. Fe tsy tokony hieritseritsy mihintsy tsika hoe haintsika ty raha iaby sady tsy mila torohevitsy tsika. Manahaky an’i Davida, le tokony ho parè hijanjy ty torohevitsy soa baka amin’olo tsika, ndre ia ndre ia ty manome azy. (Vakio Mpitoriteny 4:13.) Laha manao ani-zay tsika, le azo inoa fa tsy hanao hadisoa bevata mety hanahira antsika noho ty olo hafa.

IA TY AFAKY MANOME TOROHEVITSY SOA AHY?

8. Manino Jonatana ro afaky nanome torohevitsy soa an’i Davida?

⁸ Ndao tsika handiniky ty raha sisany azontsika ianara baka amy Davida. Nijanjy ty torohevitsy baka amin’olo nifandramby soa tamy Jehovah noho nahay soa ty raha sarotsy nahazo azy ie. Lafa tean’i Davida ho nihay, ohatsy, hoe mbo hilamy avao ty fifandrambesan-drozy amy Saoly Mpanjaka, le nijanjy ty torohevitsin’i Jonatana anan’i Saoly ie. Manino Jonatana ro afaky nanome torohevitsy soa azy? Satria nifandramby soa tamy Jehovah ie sady nahay soa an’i Saoly koa. (1 Sam. 20:9-13) Ino ty fianara ho antsika baka amy raha zay?

9. Ia ty tokony ilàntsika torohevitsy? Manomeza ohatsy. (Ohabolana 13:20)

⁹ Lafa mila torohevitsy tsika, le soa laha olo mifandramby soa amy Jehovah noho mahay soa an’ny raha mahazo antsika iny ro ilàntsika torohevitsy.a (Vakio Ohabolana 13:20.) Ndao atao hoe misy rahalahy tanora raiky ta hahita valy mety aminy. Ia ty afaky manome torohevitsy soa azy? Laha mila torohevitsy amin’olo mbo tsy manambaly ie, le mety hahazo torohevitsy soa laha baka amy Baiboly ao torohevitsy amean’olo iny. Fa laha mpivaly matotsy noho mahay soa azy, sady fa niaraky nanompo an’i Jehovah fa ela ro ilàny torohevitsy, le azo inoa fa hahazo torohevitsy voafaritsy soa noho tena ilàny rahalahy tanora iny.

10. Ino ty raha hodinihintsika henanizao?

¹⁰ Fa nihitantsika henanizay hoe ino ty toetsy mila ananantsika, le ia ty afaky manome torohevitsy soa antsika. Ndao hodinihintsika koa henanizao hoe akory ty ampisehoantsika fa tena mila torohevitsy tsika, le manino tsika ro tsy tokony hangataky ty olo hafa hanapa-kevitsy ho antsika.

AKORY TY AMPISEHOAKO HOE TENA MILA TOROHEVITSY AHO?

11-12. a) Ino ty raha tsy tokony ataontsika? b) Ino ty nataon’i Rehoboama Mpanjaka lafa nandramby fanapahan-kevitsy bevata?

¹¹ Atao raha tena mila torohevitsy vatany ty olo raiky kindraiky. Fe laha ty marina fa mana ty fanapahan-kevitsiny manoka ie, fa mila olo hitovy hevitsy aminy avao. Tsy tena mila torohevitsy ie laha manao ani-zay. Tokony handramby fianara tamy raha nahazo an’i Rehoboama Mpanjaka ie.

¹² Lasa mpanjakan’Israely Rehoboama lafa nimaty Solomona. Nilamindamy ty firenenan’Israely tamy fotoa nahalasa mpanjaka an’i Rehoboama. Fe nahatsapa ty vahoaky hoe nampiasa mafy an-drozy Solomona. Niavy tamy Rehoboama eo ty olo sady nangataky taminy mba hampihena ty asan-drozy. Fe nangataky fotoa tamin-drozy Rehoboama mba handinihany ty fanapahan-kevitsy hataony. Nangataky torohevitsy tamy olobe nanampy an’i Solomona rey tse ie tamy voalohany. Soa raha nataony zay. (1 Mpanj. 12:2-7) Fe tsy norihiny ty torohevitsy namean’olobe reo azy. Ino ty antony? Mety fa nana ty fanapahan-kevitsiny manoka va ie, le nila olo hanoha an’ny hevitsiny iny avao? Laha zay ie, le ty torohevitsy baka amy tanora namany rey ro hitany hoe manoha an’ny hevitsiny iny. (1 Mpanj. 12:8-14) Azo antoky, fa torohevitsy baka amy namany rey ro navaliny an’ny vahoaky iny. Nizizo ty ankamaroan’ny vahoaky rey vokatsini-zay sady nifily mpanjaka hafa rozy. Lasa nikoronta ty fanjakàn’i Rehoboama nanomboky teo.​—1 Mpanj. 12:16-19.

13. Akory ty ahaizantsika laha tena mila torohevitsy vatany tsika?

¹³ Ino ty azontsika ianara baka amy Rehoboama? Lafa mangataky torohevitsy tsika, le tokony hoe mila torohevitsy vatany. Akory ty ahaizantsika hoe tena mila torohevitsy tsika? Eritsereto zao: ‘Mangataky torohevitsy va aho, fe tsy orihiko raha iny lafa tsy mifanaraky amy eritseritsiko?’ Diniho moa ohatsy raiky toy.

14. Ino ty tokony ho tiarovintsika lafa mahazo torohevitsy tsika? Manomeza ohatsy. (Henteo koa sary io.)

¹⁴ Eritsereto hoe misy rahalahy raiky amean’olo asa be karama. Alohan’ny hanekeany an’ny asa iny, le mangataky torohevitsy amy anti-panahy raiky ie. Miresaky rahalahy iny hoe mety hahavy azy hisaraky amy fianakaviany anatin’ny fotoa elaela asa iny. Ampahatiarovin’ny anti-panahy iny azy ty torolalan’ny Baiboly hoe ty fikarakarà ty fianakaviany amy lafiny ara-panahy ro andraikitsiny voalohany. (Efes. 6:4; 1 Tim. 5:8) Manao akory laha tsy mahafa-po an’ny rahalahy iny torohevitsin’ny anti-panahy iny, le mila torohevitsy amy rahalahy hafa ndraiky ie zisiky hahitany olo mitovy hevitsy aminy? Tena mila torohevitsy va rahalahy iny, sa fa mana ty fanapahan-kevitsiny ie, ka mila olo hitovy hevitsy aminy avao? Tokony ho tiarovintsika hoe mamitaky ty fo. (Jer. 17:9) Mety hahazo torohevitsy tsy azoazontsika tsika, fe torohevitsy manahaky ani-zay mihintsy kindraiky ro ilàntsika.

MANINO AHO RO TSY TOKONY HANGATAKY TY HAFA MBA HANAPA-KEVITSY HO AHY?

15. Ino ty tokony ho tandremantsika, le ino ty antony?

¹⁵ Tean’i Jehovah laha tsika avao ro manao fanapahan-kevitsy ho antsika manoka. (Gal. 6:4, 5) Fa niresahintsika hoe hendry tsika laha mila torohevitsy amy Safà-Ndranahary noho amy Kristiana matotsy alohan’ny hanapa-kevitsy. Fe mila mitandrina tsika mba tsy hangataky ty hafa hanapa-kevitsy ho antsika. Ty olo sisany zao mety hanontany ty olo atokisany hoe: “Ino ty ho nataonao laha iha tamy pilasiko?” Mety tsy ta hieritseritsy raha maro ty olo sisany, ka ze fanapahan-kevitsy ataon’olo avao koa ro ataony.

16. Ino ty raha niseho ta Korinto any mikasiky an’ny hena natao soro ho an’ny sampy iny, le anjaran’ia ty manapa-kevitsy na hihina na tsy hihina? (1 Korintianina 8:7; 10:25, 26)

¹⁶ Diniho moa ty Kristiana ta Korinto tany. Tsy maintsy nanapa-kevitsy rozy hoe hihina sa tsy hihina ty hena natao soro ho an’ny sampy. Nivola tamy Kristiana reo Paoly hoe: “Haintsika fa tena tsy misy dikany ty sampy, sady tsy misy Ndranahary laha tsy raiky avao.” (1 Kor. 8:4) Lafa nieritseritsy ani-zay ty olo sisany tamy fiangona eo, le nanapa-kevitsy hoe afaky mihina hena natao soro ho an’ny sampy rozy lafa navily am-bazary eny hena iny. (1 Kor. 10:25, 26) Fe nanapa-kevitsy tsy hihina an’ny hena iny ty olo sisany satria tsy mety amy feon’ny fieritseretan-drozy raha zay. (Vakio 1 Korintianina 8:7; 10:25, 26.) Fanapahan-kevitsin’ny kiraidraiky ty hoe hihina sa tsy hihina. Tsy nampirisiky ty Korintianina mihintsy Paoly mba hanapa-kevitsy ho an’olo hafa na hanao ze fanapahan-kevitsy ataon’olo avao. Samby “hatao-Ndranahary ankety rozy” kiraidraiky.”​—Rom. 14:10-12.

17. Ino ty raha mety hiseho laha ze fanapahan-kevitsy ataon’olo avao ro ataontsika? Manomeza ohatsy. (Henteo koa sary reo.)

¹⁷ Misy raha mitovitovy amy zay koa va henanizao? Diniho moa ty resaky fampilira lio. Ty Kristiana kiraidraiky ro tsy maintsy manapa-kevitsy hoe haneky hampilira ty raha baka amy laron-dio fototsy va ie sa tsy haneky.b Mety tsy hazava soa amintsika raha zay, fe tsika avao ro tsy maintsy manapa-kevitsy ho antsika. (Rom. 14:4) Laha ze fanapahan-kevitsy ataon’olo avao ro ataontsika, le mety tsy hiasa soa ty feon’ny fieritseretantsika. Fa laha mampiasa ty feon’ny fieritseretantsika tsika, le mampiofana noho manatanjaky azy. (Heb. 5:14) Ka lafa manao akory zany tsika ro tokony hangataky torohevitsy amy Kristiana matotsy? Lafa tsika baka nanao fikaroha, fe mbo mila fanampea mba hahatakarantsika ty torolalan’ny Baiboly mikasiky an’ny raha manahira antsika iny.

KA MIENY MILA TOROHEVITSY

18. Ino ty raha nataon’i Jehovah ho antsika?

¹⁸ Nasehon’i Jehovah hoe tena matoky antsika ie, ka nengàny hanapa-kevitsy ho antsika manoka tsika. Ameany antsika ty Safàny, zany hoe ty Baiboly. Ameany nama hendry afaky manampy antsika hahay hanoriky ty torolalan’ny Baiboly koa tsika. Hita baka amy zay hoe mikarakara antsika manahaky Baba be fitiava io Jehovah. (Ohab. 3:21-23) Akory ty ampisehoantsika hoe mankasitraky azy tsika?

19. Ino ty tokony ataontsika mba hahafalifaly an’i Jehovah avao?

¹⁹ Diniho zao: Tena falifaly ty ray aman-dreny lafa mihamatotsy, mahay mandiniky, hendry, noho lasa mpanompon’i Jehovah tea manampy olo ty anany. Manahaky ani-zay koa, fa falifaly Jehovah lafa mahita antsika mihamatotsy ara-panahy, mila torohevitsy, noho mandramby fanapahan-kevitsy manome voninahitsy azy.