Matokisa fa Tea Anao Jehovah

1. Manino iha ro nanokam-bata ho an’i Jehovah? (Henteo koa sary io.)

TIARONAO va ty fotoa nanokananao ty vatanao ho an’i Jehovah? Nanokam-bata ho azy iha satria lasa nahay azy noho tea azy. Nampitamà azy iha hoe ty fanompoa azy ro ataonao vatan-draha amy fiainanao. Nampitamà azy koa iha hoe ho tea azy amy fonao iaby, ty vatanao iaby, ty sainao iaby, noho ty herinao iaby. (Marka 12: 30) Nanomboky tamy zay, le vomaiky nitombo avao ty fitiavanao azy. Fe ino ty havalinao laha misy olo manontany anao hoe: “Tena tea an’i Jehovah vatany va iha?” Azo antoky fa tsy hisalasala hamaly iha hoe: “Tena tea azy aho, sady tsy misy olo na raha hafa teako mandilatsy azy!”

2-3. Tean’i Jehovah ho resy lahatsy amin’ino tsika, le ino ty hodinihintsika ato? (Jeremia 31:3)

² Fe ino ty havalinao laha misy olo manontany anao hoe: “Matoky va iha fa tea anao Jehovah?” Hisalasala hamaly va iha satria mety mieritseritsy hoe Jehovah va le ho tea ty olo manahaky ahy? Zao ty nivolanin’ny ranabavy raiky sahira niteza ty anany zay: “Tea an’i Jehovah aho. Azoko antoky raha zay. Fe misalasala avao aho hoe: Mba tea ahy avao va Jehovah?” Ka ino ty hanampy anao hatòky hoe tea anao vatany Jehovah?

³ Tean’i Jehovah ho resy lahatsy iha hoe tea anao ie. (Vakio Jeremia 31:3.) Laha ty marina, nitaomin’i Jehovah hamonjy azy iha. Lafa nanokam-bata noho natao batisa iha, le nahazo raha tena lafovily baka amy Jehovah, tsy ino zay fa ty hoe tea anao mandrakizay ie. Midika raha zay fa tena tea anao ie sady tsy hiala anao mihintsy. Tean’i Jehovah ty mpanompony tsy mivaliky, ka “lafovily” aminy, anisani-zay iha. (Mal. 3:17, f.a.p.) Tean’i Jehovah hatòky iha hoe tea anao ie manahaky ty nitsapan’ny apostoly Paoly. Tsy nisalasala Paoly nivola hoe: “Matoky aho hoe ndre fahafatesa, ndre fiaina, ndre anjely, ndre fanjakà, ndre raha henanizao, ndre raha ho avy, ndre hery, ndre ty anabo, ndre ty ambany, ndre zavaboary hafa, le tsy hisy hahavita hampisaraky antsika amy Ndranahary ka hahavy azy tsy ho tea antsika sasy.” (Rom. 8:38, 39) Hodinihintsika amy lahatsoratsy toy ato hoe manino tsika ro mila resy lahatsy fa tea antsika Jehovah, le ino ty hanampy antsika hatòky ani-zay.

MATOKISA FA TEA ANAO JEHOVAH

4. Ino ty azontsika atao mba hahavitantsika hanohitsy an’i Satana?

⁴ Lafa matoky tsika hoe tea antsika Jehovah, le ho vitantsika ty hanohitsy ty ‘tetiky ratin’i Satana.’ (Efes. 6:11) Hanao ze azony atao Satana mba tsy hanompoantsika an’i Jehovah sasy. Zao ty tetiky raiky ampiasany: Manaparitaky vandy ie hoe tsy tea antsika Jehovah. Fe ka halino fa mahay manararaotsy Satana. Matetiky ie ro manafiky antsika amy fotoa mampalemy antsika rey. Ohatsy hoe lafa kivy tamy raha niainantsika taloha tany tsika, na amy raha sarotsy mahazo antsika henanizao, na amy raha mampisalasala antsika mikasiky ty hoavy. (Ohab. 24:10) Ty liona, ohatsy, lafa mahita hoe tsy misy mpiaro ty biby raiky teany ho hany zay vo iambotrahany. Manahaky ani-zay koa Satana. Hararaotiny tsika lafa kivy, na reraky, na malahelo, amy zay tsy hanompo an’i Jehovah sasy. Fe laha miezaky mafy tsika mba hatòky hoe tea antsika Jehovah, le vomaiky tsika ho parè hanohitsy an’i Satana noho ty tetiky raty ampiasany.​—1 Pet. 5:8, 9; Jak. 4:7.

5. Manino tsika ro mila mahatsapa hoe tena tea antsika Jehovah?

⁵ Lafa matoky tsika hoe tea antsika Jehovah, le hifandramby marìny aminy tsika. Manino tsika ro mivola ani-zay? Lafa namoro antsika Jehovah, le nataony hampiseho fitiava amin’olo tsika sady maniry ho tiavin’olo. Lafa misy olo mampiseho fitiava amintsika zany, le voatosiky ho tea an-drozy koa tsika. Dikani-zay, lafa mahatsapa tsika hoe tena tea antsika Jehovah, le vomaiky tsika ho tea azy koa. (1 Jaona 4:19) Ka lafa mitombo ty fitiavantsika azy, le vomaiky ie ho tea antsika. Zao ty resahin’ny Baiboly amintsika: “Mamonjea a-Ndranahary, le hamonjy anareo ie.” (Jak. 4:8) Fe ino ty hanampy antsika hatòky hoe tea antsika Jehovah?

INO TY HANAMPY ANAO HATÒKY HOE TEA ANAO JEHOVAH?

6. Ino ty azonao atao laha tsy matoky iha hoe tea anao Jehovah?

⁶ Manampy anao hahatsapa ty fitiavan’i Jehovah anao ty vavaky. (Lioka 18:1; Rom. 12:12) Mivavaha amy Jehovah sanandro, le ataovo matetitetiky raha zay mba hahaizanao ty fahitàny anao. Lafa miatriky raha sarotsy iha, le mety tsy ho mora aminao ty hatòky hoe tea anao Jehovah. Fe tiarovo fa bevata mandilatsy ty fonao ie. (1 Jaona 3:19, 20) Tena mahay soa anao Jehovah. Hitany ty toetsy soa anananao, ndre tsy ambinao aza raha zay. (1 Sam. 16:7; 2 Tant. 6:30) Ka misalasala zany miresaky ty fihetseham-ponao amy Jehovah, le angataho ie mba hanampy anao hatòky hoe tea anao vatany ie. (Sal. 62:8) Afarani-zay, le manaova raha mifanaraky amy vavaky ataonao, ka orihy soso-kevitsy manaraky retoa.

7-8. Akory ty anomezan’ny Salamo toky antsika hoe tea antsika Jehovah?

⁷ Atokiso ty raha resahin’i Jehovah. Namean’i Jehovah ty fanahiny masy ty mpanoratsy Baiboly, ka afaky matoky tsika fa marina ty raha resahin-drozy mikasiky an’i Jehovah. Diniho moa fomba soasoa nivolanan’i Davida mpanao salamo mikasiky an’i Jehovah toy: “Anilani-ze torotoro fo Jehovah sady manavotsy ani-ze kivy.” (Sal. 34:18, f.a.p.) Lafa kivy iha, le mety hieritseritsy hoe tsy misy olo mahatsapa ty raha mahazo anao. Fe mampitamà Jehovah fa ho anilanao eo avao ie lafa kivy iha, satria hainy fa tena mila azy iha. Zao koa ty nivolanin’i Davida: “Avorio anaty sininao ao ty ranomasoko.” (Sal. 56:8) Hitan’i Jehovah iha lafa malahelo noho mijaly. Tena mikarakara anao ie sady tsy teany ty mahita anao mijaly. Aminy, le sahala rano lafovily natao anaty siny ty ranomasonao noho ty raha mahazo anao. Zao ty resahin’ny Salamo 139:3: ‘Hain’i Jehovah soa ty lalako iaby.’ Mahita ty lalanao iaby Jehovah, fe ty raha soa ataonao ro ifantohany. (Heb. 6:10) Ino ty antony? Satria vatan-draha aminy ty ezaky iaby ataonao mba hanaova raha mahafalifaly azy.a

⁸ Mampiasa andinin-teny mampahery manahaky ani-reo Jehovah mba hanomeza toky antsika hoe tena tea noho mikarakara antsika ie. Fe nihitantsika taloha teo fa manaparitaky vandy Satana hoe tsy tea anao Jehovah. Ka laha misalasala zany iha kindraiky hoe tea anao va Jehovah sa tsy tea anao, le eritsereto zao: ‘Ia ty hinoako, “baban’ny vandy” iny sa “Ndranaharin’ny fahamarina” iny?’​—Jaona 8:44; Sal. 31:5.

9. Ino ty toky amean’i Jehovah ty olo tea azy? (Eksodosy 20:5, 6)

⁹ Diniho hoe ino ty tsapan’i Jehovah mikasiky ty olo tea azy. Diniho moa ty raha nivolanin’i Jehovah tamy Mosesy noho Israelita rey. (Vakio Eksodosy 20:5, 6.) Mampitamà Jehovah hoe ho teany mandrakizay ty olo tea azy. Manome toky antsika safà reo hoe tsy halay ty olo tea azy mihintsy Ndranaharintsika tsy mivaliky iny. (Neh. 1:5) Ka laha teanao ho azo antoky zany kindraiky hoe tea anao va Jehovah sa tsy tea anao, le eritsereto hoe: ‘Tea an’i Jehovah va aho?’ Bakeo diniho toy: Laha tea azy iha sady miezaky mafy manao raha mahafalifaly azy, le matokisa fa tena tea anao ie. (Dan. 9:4; 1 Kor. 8:3) Ka laha tsy misalasala iha hoe tea an’i Jehovah, le ka misalasala koa fa tea anao ie!

10-11. Ino ty tean’i Jehovah ho tiarovinao mikasiky ty vilim-panavota? (Galatianina 2:20)

¹⁰ Vetsevetseo ty vilim-panavota. Ty vilim-panavota ro fanomeza farani-ze bevata namean’i Jehovah ty olombelo. (Jaona 3:16) Natao ho anao koa va fanomeza io? Eka! Diniho moa ty raha niainan’ny apostoly Paoly. Nanao fahotà bevata ie talohan’ny naha Kristiana azy sady ndre fa nilasa Kristiana aza ie, le mbo niezaky mafy nandresy ty toetsy ratiny avao. (Rom. 7:24, 25; 1 Tim. 1:12-14) Fe nihevitsy ie hoe fanomeza nataon’i Jehovah ho azy ty vilim-panavota. (Vakio Galatianina 2:20.) Tiarovo fa nampanoratin’i Jehovah an’i Paoly amy Baiboly ao safà reo. Sady ty raha iaby amy Baiboly ao, le natao hampianara antsika. (Rom. 15:4) Hita amy safan’i Paoly reo fa tean’i Jehovah hihevitsy koa iha hoe fanomeza natao ho anao ty vilim-panavota. Ka lafa rambesinao sahala fanomeza ho anao ty vilim-panavota, le vomaiky iha ho resy lahatsy hoe tea anao vatany Jehovah.

¹¹ Misaotsy an’i Jehovah tsika fa nalefany an-tany etoy Jesosy mba ho maty ho antsika. Fe misy antony hafa koa niavian’i Jesosy tan-tany etoy, tsy ino zay fa ty hanambara ty marina mikasiky an’i Jehovah. (Jaona 18:37) Anisani-zay ty hoe tena tea ty anany Jehovah.

NAMPEAN’I JESOSY TSIKA MBA HATÒKY HOE TEA ANTSIKA JEHOVAH

12. Manino tsika ro afaky matoky ty raha nivolanin’i Jesosy mikasiky an’i Jehovah?

¹² Nazoto nanambara mikasiky an’i Jehovah, Jesosy tamy ie tan-tany etoy. (Lioka 10:22) Matoky ty raha iaby nivolanin’i Jesosy mikasiky an’i Jehovah tsika. Ino ty antony? Satria fa niaraky niay amy Jehovah an-tapitrisany tao ie, talohan’ny niaviany tan-tany etoy. (Kol. 1:15) Hain’i Jesosy hoe tena tea azy Babany. Tsy zay avao, fa hitany koa hoe tena tea ty anakiny tsy mivaliky Jehovah, zany hoe ty anjely noho ty mpanompony an-tany etoy. Ino ty nataon’i Jesosy mba hanampea ty hafa hatòky hoe tea an-drozy Ndranahary?

13. Ino ty raha tean’i Jesosy ho haintsika mikasiky an’i Jehovah?

¹³ Tean’i Jesosy ho haintsika hoe tena tea antsika Jehovah. Amy Filazan-tsara ao, le in-160 Jesosy ro nikaiky an’i Jehovah hoe “Baba.” Nampiasa ty safà hoe “Babanareo” na “Babanareo an-danitsy any” koa ie lafa niresaky tamy mpanori-dia azy rey. (Mat. 5:16; 6:26) Talohan’ny niavian’i Jesosy tan-tany etoy, le nikaiky an’i Jehovah hoe ‘Farani-ze Mahery,’ ‘Faran’ny Anabo,’ noho ‘Mpamoro Be Voninahitsy’ ty mpanompony tsy mivaliky. Fe matetiky Jesosy ro nikaiky an’i Jehovah hoe ‘Babantsika.’ Asehon’ny safà reo hoe tean’i Jehovah hifandramby marìny aminy ty mpanompony, manahaky fifandrambesan’ny baba noho anaky io. Hita baka amy zay, fa tean’i Jesosy laha rambesintsika sahala amy Baba soa fanahy noho tea anaky Jehovah. Ndao tsika handiniky ohatsy roe nampiasàn’i Jesosy ty safà hoe “Baba.”

14. Akory ty nampisehoan’i Jesosy hoe lafovily amy Babantsika an-danitsy any iny tsika kiraidraiky? (Matio 10:29-31) (Henteo koa sary io.)

¹⁴ Voalohany, ndao hodihintsika ty raha nivolanin’i Jesosy amy Matio 10:29-31. (Vakio.) Tsy afaky ho tea na hanompo an’i Jehovah mihintsy ty voro. Fe lafovily amy Jehovah ndre ty voro kelikely raiky latsaky amy tany aza. Ka laha ty voro kelikely aza lafovily amy Jehovah, handraky moa ty mpanompony tea azy noho tsy mivaliky aminy! Nivola koa Jesosy hoe voaisakin’i Jehovah ty volondohantsika. Midika raha zay, fa hain’i Jehovah ndre ty raha kelikely amintsika eny, ka afaky matoky tsika hoe tena mikarakara antsika ie. Tean’i Jesosy hatòky zany tsika hoe lafovily amy Babantsika an-danitsy any iny tsika kiraidraky.

15. Ino ty ianaranao mikasiky an’ny Babanao an-danitsy any iny laha hentea safàn’i Jesosy amy Jaona 6:44 reo?

¹⁵ Ndao tsika hanenty ohatsy faharoe nampiasàn’i Jesosy ty safà hoe “Baba.” (Vakio Jaona 6:44.) Nitaomin’ny Babanao an-danitsy any iny iha mba hahay azy noho ho tea azy. Manino ie ro nanao ani-zay? Satria hitany hoe mana toetsy soa iha. (Asan’ny Apostoly 13:48) Lafa nivola an’ny safà amy Jaona 6:44 reo Jesosy, le mety safàn’i Jehovah amy Jeremia 31:3 ao iny ro teany hovolany. Zao ty nivolanin’i Jehovah tamy vahoakiny: “Tea anao aho sady ho tea anao mandrakizay.” (Jer. 31:3; ampitovizo amy Hosea 11:4.) Midika raha zay, fa mahita ty toetsy soa anananao avao Babanao be fitiava an-danitsy any iny, ndre mety tsy hainao aza raha zay.

16. a) Ino ty raha nivolanin’i Jesosy tamintsika, le manino tsika ro tokony hatòky azy? b) Ino ty azonao atao mba ho resy lahatsy soa iha hoe Babanao vatany Jehovah? (Henteo ty efajoro hoe “Jehovah ro Baba Ilàntsika Iaby.”)

¹⁶ Lafa nivola Jesosy hoe Babantsika Jehovah, le zao ty teany hovolany amintsika: “Tsy Babako raiky avao Jehovah, fa Babanareo koa. Sady manome toky anareo koa aho fa teany nareo sady tena mikarakara anareo kiraidraiky ie.” Ka laha tsy matoky zany iha kindraiky hoe tea anao Jehovah, le eritsereto zao: ‘Jesosy ro tena mahay an’ny Babantsika iny sady tsy navandy mihintsy ie. Ka laha zay ie, tsy tokony hatòky ty raha nivolaniny mikasiky azy va aho?’​—1 Pet. 2:22.

ATAOVO ZE AZONAO ATAO MBA HAHAVY ANAO HATÒKY AVAO HOE TEA ANAO JEHOVAH

17. Manino tsika ro tsy maintsy miezaky avao mba ho resy lahatsy hoe tea antsika Jehovah?

¹⁷ Mila miezaky avao tsika mba ho resy lahatsy hoe tea antsika Jehovah. Nihitantsika taloha teo, fa manao ze azony atao avao Satana, azy fahavalontsika iny, mba tsy hanompoantsika an’i Jehovah sasy. Ataon’i Satana avao ze hahavy antsika tsy hatòky hoe tea antsika Ndranahary. Fe tsy tokony hino ty vandiny mihintsy tsika!​—Joba 27:5.

18. Ino ty azonao atao mba hatòky vatany hoe tea anao Jehovah?

¹⁸ Mba hahavy anao hatòky vatany hoe tea anao Jehovah, le mivavaha avao amy zay ho hainao ty antony itiavany anao. Diniho ty raha resahin’ny Baiboly mikasiky ty fomba ikarakaran’i Jehovah ty olo tea azy. Tiarovo fa ho tean’i Jehovah avao ty olo tea azy. Ka halino mihintsy hoe fanomeza namean’i Jehovah anao ty vilim-panavota. Matokisa koa fa Babanao Jehovah araky ty nivolanin’i Jesosy. Ka laha misy olo manontany anao hoe: “Matoky va iha fa tea anao Jehovah?”, le azo antoky fa tsy hisalasala hamaly iha hoe: “Eka, tea ahy ie! Le zaho koa manao ze azoko atao avao sanandro mba hampisehoako hoe tea azy aho!”