Ampeo ty ‘Olo Mana Fo Soa’

1. Mety hanao akory ty olo lafa maharè ty vaovao soa? (Asan’ny Apostoly 13:47, 48; 16:14, 15)

MARO ty olo naneky ty fahamarina tamy taonjato voalohany, laha vo naharè an’ny hafatsy mikasiky an’ny Fanjakà iny. (Vakio Asan’ny Apostoly 13:47, 48; 16:14, 15.) Manahaky ani-zay koa, fa falifaly ty olo sisany henanizao laha vo maharè ty vaovao soa. Ndre ty olo tsy nidary an’ny hafatsy mikasiky an’ny Fanjakà iny aza, mety hijanjy avao lafa mandeha ty fotoa. Ino zany ty tokony hataontsika lafa mahita ‘olo mana fo soa’ tsika amy fanompoa eny?

2. Manino ro azo ampitovizy amy raha ataon’olo mpamboly voankazo ty asa fanaova mpianatsy?

² Azo ampitovizy amy raha ataon’ny mpamboly voankazo io ty asa fanaova mpianatsy ataontsika. Lafa misy masaky, ohatsy, voan’ny hazo namboleny rey, le avy le avoriny. Fe tondrahiny noho karakaràny avao koa hazo sisany mbo tsy misy masaky rey. Manahaky ani-zay koa, fa lafa mahita olo parè haneky ty vaovao soa mikasiky an’ny Fanjakà iny tsika, le ampeantsika malaky rozy mba ho lasa mpianatsin’i Kristy. Fe ndre eo zay, le miezaky avao koa tsika manampy ani-azy mbo tsy parè hijanjy ty vaovao soa rey mba hianatsy mikasiky a-Ndranahary. (Jaona 4:35, 36) Lafa haintsika hoe parè hianatsy ty fahamarina ty olo raiky na tsy parè, le ho haintsika ty fomba soa azo ampea azy. Hodinihintsika ato hoe ino ty azontsika atao mba hanampea ani-azy parè hianatsy ty fahamarina rey, laha vo mifampiresaky amin-drozy tsika. Hodinihintsika koa ty raha azontsika atao mba hanampea an-drozy handroso avao.

LAFA PARÈ HIANATSY FAHAMARINA TY OLO

3. Ino ty tokony hataontsika lafa mahita olo kinto amy fahamarina? (1 Korintianina 9:26)

³ Lafa mahita olo kinto amy fahamarina tsika, le ampeantsika malaky rozy mba handeha amy lala mana amy fiaina any iny. Tsy tokony hisalasala tsika hanasa an-drozy hianatsy Baiboly noho hivory laha vo mifampiresaky amin-drozy.​—Vakio 1 Korintianina 9:26.

4. Miresaha tantaran’olo avy le parè hianatsy Baiboly.

⁴ Asao hianatsy Baiboly ie. Avy le parè hianatsy Baiboly ty olo sisany iresahantsika. Ndraiky Kamisy zay ohatsy, nisy somonjara a Kanada any zay namonjy tablô fitoria, le nangalaky bokikely Ho Azonao Tavy! teo ie. Nivola ranabavy tamy tablô teo iny hoe afaky mianatsy Baiboly maimaim-poana amy bokikely iny ie. Nitean’ny somonjara iny raha zay, ka nifanome nimerô telefony rozy. Harivan’ny andro iny avao, le nandefa mesazy tamy ranabavy iny somonjara iny hoe ombia rozy manomboky mianatsy. Lafa nivola taminy ranabavy iny hoe amy faran’ny herinandro ie ho avy aminy any, le zao ty nivolaniny: “Ka manino laha ataontsika hamaray?” Nanomboky nianatsy amy zay rozy Zoman’iny. Nivory koa somonjara iny faran’ny herinandron’iny, sady nandroso avao ie nanomboky tamy zay.

5. Ino ty azontsika atao laha mbo tsy parè hianatsy Baiboly ty olo? (Henteo koa sary reo.)

⁵ Mazava ho azy, fa tsy avy le hianatsy Baiboly manahaky an’ny somonjara io, ze olo maharè ty hafatsy torintsika. Mety ho elaela ty olo sisany vo parè hianatsy. Mety mila miresaky foto-kevitsy mahakinto an-drozy tse tsika amy voalohany. Fe mety ho afaky hanomboky fampianara Baiboly avao tsika, laha mifantoky amy raha soa noho mila ze hahasoa an-drozy avao. Ino ty azontsika volany lafa manasa olo hianatsy Baiboly? Retoa misy soso-kevitsy baka amy rahalahy noho anabavy za-draharaha amy raha zay.

6. Ino ty azontsika atao mba hitohy avao ty resaky ataontsika amin’olo kinto?

⁶ Zao ty nivolanin’ny rahalahy noho anabavy reo lafa nanontanea mikasiky ty fanomboha fampianara Baiboly: Amy tany sisany, le tsy soa ty mampiasa safà hoe “fianara,” “fianara Baiboly,” na “hampianatsy anao”, lafa manasa olo hianatsy Baiboly. Hitan-drozy fa ty hoe “hiresadresaky” noho “hiaraky handiniky ty raha resahin’ny Baiboly” ro tena mety. Mba hitohizan’ny resakinareo iny amy manaraky, le afaky mivola iha hoe: “Fa nihainao va hoe mamaly ty fanontanea bevata amy fiainantsika ty Baiboly?” na “Fa nihainao va hoe tsy boky ara-pivavaha avao ty Baiboly, fa misy torohevitsy mahasoa antsika koa?” Bakeo afaky mivola koa iha hoe: “Tsy mandany fotoa ty fandinihantsika ani-zay, fa 10 na 15 minity eo avao le fa ahaizantsika raha bevata.” Aleo mivola ani-zay tozay hanao ani-zao hoe “saky herinandro” na “saky zao ty fotoantsika” mba tsy hahatsapany hoe forosevantsika hiamby antsika ie.

7. Tamy alalan’ino ty nahaizan’olo sisany ty fahamarina amy Baiboly ao? (1 Korintianina 14:23-25)

⁷ Asao hivory ie. Tamy andron’ny apostoly Paoly, le atao raha tamy alalan’ny fivoria Kristiana ro nahaizan’olo sisany ty fahamarina. (Vakio 1 Korintianina 14:23-25.) Manahaky ani-zay koa ty raha miseho henanizao. Mandroso malaky ty ankamaroan’ny mpianatsy Baiboly, lafa manomboky mivory. Ombia zany iha ro tokony hanasa an-drozy hivory? Marina fa mampirisiky ty mpianatsy hivory ty fianara faha-10 amy boky Ho Azonao Tavy!, fe tsy voatery ho avy any ty fianaranareo zay iha vo hanasa azy. Vo manomboky mifampiresaky nareo, le fa afaky manasa azy hanatriky fivoria faran’ny herinandro iha. Azonao resahy ty foto-kevitsin’ny lahateny hatao any na miresaky hevitsy raiky baka amy Tilikambo hianara amy herinandro iny.

8. Ino ty raha azontsika resahy amin’olo asàntsika iny mikasiky ty fivoriantsika? (Isaia 54:13)

⁸ Lafa manasa olo kinto hivory iha, le hazavao fa tsy mitovy amy ty raha atao amy fivavahany any ty raha atao am-pivoriantsika any. Lafa nanatriky fianara Tilikambo tam-pivoria any mpianatsy Baiboly raiky zay, le nanontaneany mpampianatsy azy iny hoe: “Hain’ny mpitariky io iaby va ty anaran’olo ato?” Nihazavaniny mpampianatsy azy iny hoe zahay iaby ato mihintsy ro samby miezaky mba hifankahay anara, manahaky fianakavia raiky mifankahay anara io. Nivola mpianatsy iny hoe tsy mifankahay anara manahaky ani-zay ty olo am-piangonan-drozy any. Manahaky ani-zay koa, fa azontsika resahy amin’olo asàntsika iny ty raha mampiavaky ty fivoriantsika. (Vakio Isaia 54:13.) Mivory tsika mba hanompo an’i Jehovah, hianatsy mikasiky azy, noho hifampahery. (Heb. 2:12; 10:24, 25) Voalamy soa zany ty fivoriantsika sady natao hianara, fa tsy fombafomba avao. (1 Kor. 14:40) Tsotra koa ty pilasy fivoriantsika sady natao hahafahantsika mianatsy soa. Tsy manao politiky koa tsika, ka tsy mandramby anjara amy alihevitsy politiky na miresaky ty hevitsintsika mikasiky ani-zay. Soa koa laha atoronao an’ny mpianatsy iny mialoha ty video hoe Ino ty Raha Atao amy Efitrano Fanjakà Any? Tsy ho tampoky azy amy zay ty raha atao any.

9-10. Lafa manasa olo hivory tsika, ino ty azontsika resahy aminy mba hahavy azy tsy hisalasala hanatriky fivoria? (Henteo koa sary io.)

⁹ Misalasala hanatriky fivoria ty olo sisany satria matahotsy “hiova fivavaha.” Ameo toky olo iny hoe tena falifaly tsika lafa misy vahiny, sady afaky mijanjy soa avao ie lafa any, fa tsy voatery handramby anjara. Rambesy soa ze olo avy ao, anisani-zay azy manan’anaky kelikely rey. Tsy ampianary mitoka koa ty ajà am-pivorianay any, fa miaraky mipetraky noho miaraky mianatsy amy ray aman-dreniny. Voara-mason’ny ray aman-dreny amy zay ty anakiny, sady ho hain-drozy ty raha ampianary an’ny anakin-drozy rey. (Deot. 31:12) Tsy mitanty rakitsy koa zahay na mizara anvelopy itakia drala. Raha nivolanin’i Jesosy toy ro orihinay: “Nahazo maimaim-poana nareo, le manomeza maimaim-poana.” (Mat. 10:8) Azonao resahy koa olo iny hoe tsy voatery manisy siky lafovily ie lafa mivory. Ty raha am-pon’olo ao ro hentea-Ndranahary fa tsy ty poziny.​—1 Sam. 16:7.

¹⁰ Lafa mivory olo iny, le ataovo ze hahavy azy tsy hihafahafa. Ataovo ze hahavy azy hifankahay amy anti-panahy noho ty mpiara-manompo. Lafa tsapany hoe nirambesintsika soa ie, le mety ho tamà, ka himpoly ndraiky amy manaraky. Laha tsy mana Baiboly ie, le iarahonareo manenty baka amy Baibolinao ao ze andinin-teny vakỳ, sady ampeo ie mba haharaky ty raha volanin’ny mpandahateny iny noho ty raha ianara any.

LAFA MANOMBOKY FAMPIANARA BAIBOLY

11. Akory ty ampisehoanao hoe manaja ty fotoan’olo ampianarinao iny iha?

¹¹ Ino ty raha tokony ho tiarovintsika lafa mampianatsy Baiboly? Hajao ty fotoan’olo iny satria maro raha atao koa ie. Lafa nifanao fotoa, ohatsy, nareo, le miezaha ho avy ara-potoa ndre tsy zatsy manaja fotoa aza ty olo mbaminareo mbeny. Ankoatsini-zay, soa laha ataonao boribory tse ty fianaranareo voalohany. Nisy mpitory za-draharaha sisany nivola hoe soa laha atao boribory tse fianara iny amy voalohany, ndre mbo ta hanohy aza mpianatsy iny. Ka be resaky koa, fa engao mpianatsy iny hiresaky ty hevitsiny noho ty raha tsapany.​—Ohab. 10:19.

12. Ino ty raha kendrentsika laha vo manomboky mampianatsy Baiboly tsika?

¹² Laha vo manombotomboky mianatsy nareo, le ampeo mpianatsinao iny mba hahay an’i Jehovah noho Jesosy sady ho tea an-drozy. Manao ani-zay iha, laha mampifantoky ty sainy amy Safà-Ndranahary fa tsy amy ty hevitsinao. (Asan’ny Apostoly 10:25, 26) Lafa nampianatsy, ohatsy, apostoly Paoly, le nampifantoky ty fampianarany tamy Jesosy Kristy, azy nirahy hanampy antsika mba hahay noho ho tea an’i Jehovah iny. (1 Kor. 2:1, 2) Nampeany koa mpianatsy vaovao rey mba hahay hoe tena ilà ty mana toetsy soa. Nampitoviziny tamy volamena, volafoty, noho vatosoa toetsy reo. (1 Kor. 3:11-15) Anisan’ny toetsy lafovily rezay ty finoa, ty fahendrea, ty fahaiza mandiniky noho ty fatahora an’i Jehovah. (Sal. 19:9, 10; Ohab. 3:13-15; 1 Pet. 1:7) Tahafo Paoly lafa mampianatsy iha, ka ampeo ty mpianatsinao mba hanatanjaky ty finoany noho hifandramby marìny amy babany be fitiava an-danitsy any iny.​—2 Kor. 1:24.

13. Akory ampisehoantsika hoe manam-pahareta noho mahay mandanjalanja tsika lafa manampy ty mpianatsy Baiboly? (2 Korintianina 10:4, 5) (Henteo koa sary io.)

¹³ Tahafo Jesosy lafa mampianatsy iha, ka miezaha hanam-pahareta noho hahay handanjalanja. Miezaha mba tsy hametraky fanontanea hafahafa amin’olo iny. Laha misy hevitsy hitanao hoe tsy takatsiny, le tohizo avao tse fianara iny, bakeo impolianonareo ndraiky raha tsy niazony iny. Ka foroseva haneky ty raha ianarany ie laha mbo tsy resy lahatsy, satria mitaky fotoa ty fandiniha ty fahamarina noho ty fanaova fiovà. (Jaona 16:12; Kol. 2:6, 7) Ampitovizin’ny Baiboly amy fandravà raha mafy fototsy, ty fandravà fampianaran-diso. (Vakio 2 Korintianina 10:4, 5) Mety ho sarotsy zany ty handrava ty raha fa ninoan’ny mpianatsy iny tanatin’ny tao maro, ka aleo ampea ie mba hifandramby soa amy Jehovah.​—Sal. 91:9.

LAFA MIVORY MPIANATSY INY

14. Akory ty tokony hanandesantsika ty olo vo sambany mivory?

¹⁴ Tean’i Jehovah ho soa fanahy amin’olo iabiaby tsika, ndre baka aia ie ndre baka aia, ndre ino ndre ino ty kolontsainy, ndre mahantra ie ndre mpanarivo. (Jak. 2:1-4, 9) Akory zany ty ampisehoantsika hoe tea an’olo vo sambany mivory rey tsika?

15-16. Ino ty azontsika atao mba tsy hampihafahafa ty olo vo sambany mivory?

¹⁵ Avy am-pivoriantsika any ty olo sisany satria ta hahay ty raha ataontsika any, na koa nisy olo nampirisiky azy hanatriky fivoria. Tsy tokony hisalasala zany tsika hiresaky amin’olo vo sambany mivory. Rambeso soa ie, le ka atao ze hampihafahafa azy. Asao hiaraky hipetraky aminao ie. Ampanenteo amy Baibolinao na amy boky noho gazety ianara iny ie, na anomezo mihintsy. Ankoatsini-zay, henteo koa ty raha hafa mbo azonao atao mba tsy hampihafahafa azy. Nisy lahilahy vo sambany nivory zay, nivola tamy rahalahy nandramby azy iny hoe mahamenatsy azy ty fisikinany satria tsy mitovy amy ty ahin’olo iaby. Fe nataon’ny rahalahy iny ze tsy hampihafahafa azy sady nihazavaniny hoe ndre manao fisikina milamy noho malio soa aza zahay lafa mivory, le mitovy amin’olo iaby avao. Nandroso lahilahy io, le natao batisa tafara atoy. Fe tsy nihalinony mihintsy fandrambesan’ny rahalahy iny azy iny. Fe ndre zay, le mila mitandrina tsika lafa miresaky amin’olo vo sambany mivory, mba tsy hametraky fanontanea mety hahamenatsy azy na hilitsy amy fiainany manoka.​—1 Pet. 4:15.

¹⁶ Manao ze tsy hampihafahafa ty olo vo sambany mivory koa tsika, laha asehontsika amy resaky ifanaovantsika, amy valin-tenintsika, na amy anjara ataontsika hoe manaja ty olo tsy Vavolombelo na ty raha inoany tsika. Ka mampiasa safà mety hampeloky na manambanimbany an-drozy. (Titosy 2:8; 3:2) Tsy tokony handratiraty ty raha inoan’olo tsy mitovy finoa amintsika mihintsy ohatsy tsika. (2 Kor. 6:3) Ty rahalahy manao lahateny ro mila mitandrina soa mba tsy hanao ani-zay. Mila tiarovin-drozy koa hoe misy olo tsy Vavolombelo manatriky eo, ka tsy tokony hampiasa safà na fanazavà sarotsy azo rozy.

17. Ino ty tokony hataonsika lafa tsika mahita ‘olo mana fo soa’ amy fanompoa eny?

¹⁷ Vomaiky mihamalisa ty asa fanaova mpianatsy ataontsika henanizao, ka miezaky avao tsika mila ‘olo mana fo soa’, zany hoe ty olo ta hianatsy mikasiky a-Ndranahary noho ty Safàny. (Asan’ny Apostoly 13:48) Manao ani-zay tsika, laha tsy misalasala manasa an-drozy hianatsy Baiboly noho hivory. Laha manao ani-zay tsika, le hanampy an-drozy hanomboky handeha amy ‘lala mana amy fiaina any’ iny.​—Mat. 7:14.