FIANARA 59
Ho Vitanao ty Hiaritsy Fanenjeha
Tsy maintsy hisy hanohitsy ty Kristiana iaby ndre ho ela ndre halaky. Hisy hanenjiky mihintsy aza rozy. Tokony hampatahotsy antsika va raha zay?
1. Manino ro fa ampoizintsika hoe hisy hanenjiky tsika?
Mivola mazava ty Baiboly hoe: “Henjehy koa ze olo iaby ta hampiseho amy ty fiainany hoe mahafoy ty vatany ho a-Ndranahary sady tafiharo amy Kristy Jesosy.” (2 Timoty 3:12) Nisy nanenjiky Jesosy satria tsy niharo amy tontoloni-Satana toy. Tsy miharo amy tontolo toy koa tsika, ka tsy tokony ho tseriky laha manenjiky antsika ty mpanday fanjakà noho ty mpitariky fivavaha.—Jaona 15:18, 19.
2. Ino ty azontsika atao mba ho parè hiatriky fanenjeha?
Mila miezaky matoky ani-Jehovah marerè sandrany tsika henanizao. Mila manoka fotoa sanandro mba hivavaha aminy noho hamakia ty Safàny koa tsika. Miezaha hamonjy fivoria tsy tampaky. Laha manao ani-reo iha, le ho be herim-po sady hana hery hiareta fanenjeha. Ka ndre ty fianakavianao aza ro manenjiky anao, le ho vitanao avao ty hiaritsy. Nitratsini-fanenjeha matetiky ty apostoly Paoly, fe hoy ty asany: “Jehovah ro mpanampy ahy, ka tsy hatahotsy aho.”—Hebreo 13:6.
Hanampy antsika ho be herim-po koa ty fitoria tsy tampaky. Nanino? Satria lafa mitory tsika le mianatsy miantehitsy amy Jehovah sady lasa tsy matahotsy olo. (Ohabolana 29:25) Laha mahasaky mitory iha henanizao, le ho parè hitory avao ndre mandrara anao aza ty mpanday fanjakà.—1 Tesalonianina 2:2.
3. Ino ty tombony azontsika lafa miaritsy fanenjeha?
Mazava ho azy fa tsy mahafalifaly antsika ty hoe enjehy. Fe lasa mihamatanjaky ty finoantsika lafa mahavita miaritsy fanenjeha tsika. Lasa mihamarìny ani-Jehovah koa tsika satria tena tsapantsika hoe nanampy antsika ie, ka nivitantsika avao ty niaritsy ani-fanenjeha rey. (Vakio Jakoba 1:2-4.) Malahelo Jehovah mahita antsika mijaly, fe falifaly ie lafa miaritsy avao tsika. Mivola ty Baiboly hoe: “Laha miaritsy fijalea ... nareo satria manao raha soa, le zay ro ankasitraha-Ndranahary.” (1 Petera 2:20) Hameani-Jehovah ino tsika laha tsy mivaliky fa miaritsy avao? Ho velo zisiky farany amy Paradisa ao tsika. Fa tsy hisy hanohitsy koa ty fivavaha marina amy fotoa zay.—Matio 24:13.
DINIHO LALIKY
Hodinihintsika hoe manino tsika ro hahavita tsy hivaliky amy Jehovah ndre misy manenjiky, le ino ty raha hameani-Jehovah antsika laha miaritsy zisiky farany tsika.
4. Afaky miaritsy ty fanenjehani-fianakavianao iha
Haini-Jesosy hoe mety tsy hazoto amintsika ty fianakaviantsika lafa manapa-kevitsy hanompo ani-Jehovah tsika. Vakio Matio 10:34-36, bakeo iaraho midiniky fanontanea toy:
Ino ty mety hataoni-fianakaviany lafa manapa-kevitsy hanompo ani-Jehovah ty olo raiky?
Hanenty ohatsy raiky amy raha zay tsika. Alefaso VIDEO toy, bakeo iaraho midiniky fanontanea io.
Ino ty hataonao laha misy nama na fianakavia manaka anao tsy hanompo ani-Jehovah?
Vakio Salamo 27:10 noho Marka 10:29, 30. Saky vita vaky ty andinin-teny kiraidraiky, le iaraho midiniky fanontanea toy:
Manino ro afaky manampy anao raha ampitamany amy andinin-teny io lafa manohitsy anao ty nama na ty fianakavianao?
5. Manompoa ani-Jehovah avao ndre misy fanenjeha
Mila herim-po ty fanompoa ani-Jehovah sirtò lafa misy olo malay antsika hanao ani-raha zay. Alefaso VIDEO toy, bakeo iaraho midiniky fanontanea io.
Ino tamy video iny ro mampahery anao?
Vakio Asan’ny Apostoly 5:27-29 noho Hebreo 10:24, 25. Saky vita vaky ty andinin-teny kiraidraiky, le iaraho midiniky fanontanea toy:
Manino ro tena ilà ty mivory noho mitory avao ndre mandrara antsika tsy hanao ani-reo ty manam-pahefà?
6. Hanampy anao hiaritsy Jehovah
Maro amy ty Vavolombeloni-Jehovah ro nisy nanenjiky, fe nahavita nanohy nanompo ani-Jehovah avao. Baka amy firenena sankarazany rozy sady tsy mitovy tao. Ino ty nanampy an-drozy? Alefaso VIDEO toy, bakeo iaraho midiniky fanontanea io.
Manino ro nahavita niaritsy fanenjeha rahalahy noho ranabavy tamy video tao rey?
Vakio Romanina 8:35, 37-39 noho Filipianina 4:13. Saky vita vaky ty andinin-teny kiraidraiky, le iaraho midiniky fanontanea toy:
Manino andinin-teny io ro manome toky anao fa ho vitanao ty hiaritsy ze kila raha sarotsy mahazo anao?
Vakio Matio 5:10-12, bakeo iaraho midiniky fanontanea toy:
Manino iha ro afaky ho falifaly avao ndre misy manenjiky?
Mpanomponi-Jehovah an-tapitrisany ro nahavita niaritsy fanohera. Hahavita hiaritsy koa iha!
MIERITSERITSY TY OLO SISANY HOE: “Tsy mahavita miaritsy fanenjeha zao aho.”
Ino ty andinin-teny mety hanome toky ty olo mieritseritsy ho zay hoe afaky miaritsy ie?
FAMINTINA
Lafovily amy Jehovah ty ezaky ataontsika mba hanompoa azy ndre misy manenjiky aza tsika. Hanampy antsika ie, le hahavita hiaritsy tsika!
Famerena
Manino ro tokony fa hampoizini-Kristiana hoe hisy hanenjiky ie?
Ino ty azonao atao sandrany henanizao mba ho parè hiatriky fanenjeha iha?
Manino iha ro afaky matoky hoe ho vitanao ty hanompo ani-Jehovah ndre misy raha sarotsy aza?
DINIHO KOA RETOA
Ho hitanao ato hoe nampeani-Jehovah ty rahalahy tanora raiky tamy ie tan-gadra any.
Nanompo ani-Jehovah tanatini-tao maro ty mpivaly raiky ndre nisy nanohitsy. Ino ty nanampy an-drozy?
Ino ty hanampy anao ho be herim-po lafa misy fanenjeha?
“Dieny Izao dia Miomàna Hiatrika Fanenjehana!” (Ny Tilikambo Fiambenana Jolay 2019)
Ino ty tokony hotiarovintsika laha manohitsy antsika ty fianakaviantsika? Le ino ty hanampy antsika hahavita hiaritsy avao?