FIANARA 6

Miboaky Soa ty Fanoriha Andinin-teny

Jaona 10:33-36

INO TY IANARA ATO? Ka avy le mifindra amy hevitsy hafa laha vo baka namaky andinin-teny. Ataovo mazava soa amy mpijanjy anao hoe ino ty ifandrambesani-andinin-teny iny amy ty hevitsy teanao horesahy.

AKORY TY ANAOVA AZY?

Avaho ty safà manan-danja. Lafa baka namaky andinin-teny, le tindrio ze safà mifandramby mivanta amy ty hevitsy bevata teanao haboaky. Azonao atao, ohatsy, ty mampimpoly ani-safà reo ndraiky na mametraky fanontanea mandrisiky ty mpijanjy hila ani-safà reo.

Laha aboakinao amy safà hafa hevitsy baka amy andinin-teny iny, le ampeo ty mpijanjy anao mba hahita mazava soa hoe manino ro mifandramby amy hevitsy bevata resahinao iny safà amy Baiboly ao reo.
Hamafiso ty hevitsy teanao ho tiaro. Laha fa naboakinao hoe ino ty antony hamakia ani-andinin-teny iny talohani-namakianao azy, le ampifandrambeso amy safà manan-danja ao reo antony zay.

Engao hivoha avao ty Baibolinao lafa manazava andinin-teny iha. Ho mora hitani-mpijanjy anao amy zay ty ifandrambesani-fanazavanao noho ty andinin-teny nivakinao.
Anovo mora orihy. Ka miresaky tsipiriany tsy ilà noho tsy mampiboaky ani-hevitsy bevata iny. Diniho tse hoe ino ty raha fa haini-mpijanjy anao mikasiky ani-foto-kevitsy io, bakeo filio mifanaraky amy zay hoe ino iaby ty fanazavà tena mila resahinao mba hazava noho mora azo ty fomba hanoriha azy.