Tiaronao Va?

Nivakinao soa va gazety Tilikambo Fiambena tamy tao toy rey? Henteo moa vasa hainao ty mamaly ani-fanontanea manaraky retoa:

Ino ty tafilitsy amy hoe ‘manavao ty say’? (Rom. 12:2)

Tsy ampy ty hoe manao raha soa avao. Tsy maintsy mandiniky ty am-pontsika ao tsika, bakeo manova ze tokony hovà mba hahafahantsika manaraky ty fitsipikini-Jehovah.​—w23.01, p. 8-9.

Akory ty ampisehoantsika hoe mahay mandanjalanja tsika lafa mandiniky ty raha miseho maneran-tany?

Teantsika ty manaraky vaovao malaza mikasiky ty raha miseho maneran-tany satria manatanteraky ty faminaniani-Baiboly raha rey. Fe tsy tokony haminavina raha tsika satria mety hampisaratsaraky ty fiangona raha zay. Soa laha ataontsika miory amy fanazavà aboakini-fandaminani-Jehovah ty resadresaky ataontsika. (1 Kor. 1:10)​—w23.02, p. 16.

Ino ty tsy mampitovy ty batisani-Jesosy amy ty batisani-mpanori-dia azy?

Tsy nila nanoka ty vatany ho ani-Jehovah Jesosy, satria nateraky tamy firenena raiky fa voatoka ho a-Ndranahary. Olo lavorary Jesosy, zany hoe tsy nanota. Tsy nanota ie ka tsy nila nibebaky.​—w23.03, p. 5.

Ino ty azontsika atao mba ho afaky hanome valin-teny ty olo hafa?

Afaky ataontsika boribory avao ty valin-tenintsika, amy zay mba afaky mamaly koa ty olo hafa. Miezaha koa mba tsy hiresaky ty hevitsy iaby amy fehintsoratsy iny. Hahita hevitsy horesahy amy zay ty hafa.​—w23.04, p. 23.

Manondro ino “Lalani-Fahamasina” amy Isaia 35:8 ao io?

Mampiseho ty lala nandehanani-Jiosy rey baka Babylona nana amy tanindrazan-drozy any, lalambe an’ohatsy io. Ka manao akory tafarani-zay? Taonjato maro talohani-1919, le nisy asa natao mba hanomàna ani-lala io, anatini-zay ty fandikà noho fanaova printy Baiboly noho fitaova fianara. Nandeha amy “Lalani-Fahamasina” eo vahoaki-Ndranahary amy paradisa ara-panahy ao reo, mba hahazo ty fitahia handesini-Fanjakà iny.​—w23.05, p. 15-19.

Ia ampela roe an’ohatsy manome torohevitsy amy Ohabolana toko faha-9 ao reo?

Miresaky mikasiky “ampela tsy ampy say” noho “ampela hendry” ty Ohabolana. Manday amy “Fasana” any ty fanasàni-“ampela tsy ampy say” iny, fa ‘mitariky antsika amy fahihira’ noho fiaina ty fanasà baka amy ampela hendry iny, zany hoe ty “tena fahendrea.” (Ohab. 9:1, 6, 13, 18)​—w23.06, p. 22-24.

Ino ty mampiseho hoe niambany noho nahay nandanjalanja Ndranahary lafa nifandramby tamy Lota?

Nivolanini-Jehovah Lota mba hiala baka a Sodoma ao le hilay amy faritsy be vohitsy any. Fe lafa nisoloho taminy Lota hoe hilay a Zoara ao, le naneky ty fangatahany Ndranahary.​—w23.07, p. 21.

Ino ty azoni-ampela atao laha manenty sary tiva valiny?

Tokony hotiaroviny hoe tsy ie ro nahavy ani-zay. Tokony hifantoky amy fifandrambesany amy Ndranahary ie sady hametsivetsy tantarani-ampela niasa loha noho nahazo fampahereza tamy Jehovah, voaresaky amy Baiboly ao rey. Azony atao koa ty manampy ani-valiny hanalavitsy ze raha mety hahavy azy hanenty sary tiva.​—w23.08, p. 14-17.

Manino ty fahaiza mandiniky ro manampy antsika ho soa fanahy lafa misy olo mikinokino ty raha inoantsika?

Lafa misy olo manontany, le afaky dinihintsika fanontaneany iny mba hahaizantsika ty raha am-pony any noho ty raha mampiasa loha azy. Laha manao ani-zay tsika, le ho soa fanahy avao lafa mamaly ty fanontaneany.​—w23.09, p. 17.

Ino ty ianarantsika baka amy Maria laha ta hahazo hery tsika?

Lafa nihaini-Maria hoe ie ro ho renini-Mesia, le nahazo hery ie satria nisy olo nampahery azy. Nivola raha baka amy Soratsy Masy ao Gabriela noho Elizabeta mba hampahereza azy. Afaky hahazo hery baka amy mpiara-manompo koa tsika.​—w23.10, p. 15.

Akory ty amaleani-Jehovah ty vavaky ataontsika?

Mampitamà Jehovah fa hojanjininy ty vavaky ataontsika sady dinihiny hoe ino ty ifandrambesani-raha iny amy ty fikasàny. (Jer. 29:12) Mety tsy hitovy ty fomba amaleany ty vavaky ataontsika ndre mitovy aza ty raha angatahintsika, fe hanampy antsika avao ie.​—w23.11, p. 21-22.

Miresaky “fanantenà” ty Romanina 5:2, manino raha io ro mbo niresahy ndraiky amy andininy faha-4 eo?

Lafa maharè vaovao soa ty olo raiky, le mety hitamà hoe hiay mandrakizay amy paradisa an-tany eto. Fe lafa miatriky raha sarotsy ie, miaritsy, sady mahazo hatò amy Ndranahary, le vomaiky ie matoky hoe ho tanteraky ty raha tamaniny sady ho azony.​—w23.12, p. 12-13.