Nareo Ranabavy Tanora, Miezaha ho Lasa Kristiana Matotsy

1. Ino ty tokony hataontsika mba ho lasa Kristiana matotsy?

TSY ambiambintsika avao le fa mihabe sahady ty ajà raiky. Mety mahatseriky antsika raha zay satria nihitantsika ty nahakely azy, ka atao raha mandeha ho azy io raha zay. Fe tsy mandeha ho azy manahaky ani-zay ty hoe lasa Kristiana matotsy fa mila ezaky baka amintsika.b (1 Kor. 13:11; Heb. 6:1) Ino ty tokony hataontsika? Mila mifandramby soa amy Jehovah tsika. Mila ty fanampeani-fanahiny masy koa tsika mba hahavy antsika hana toetsy soa, hana ze fahaiza ilàntsika, noho mba hahafahantsika mioma amy ze andraikitsy miamby antsika lafa afarafara ao.​—Ohab. 1:5.

2. Ino ty ianarantsika baka amy Genesisy 1:27, le ino ty hodinihintsika ato?

² Lafa namboatsy olombelo Jehovah, le nasiany lahilahy noho ampela. (Vakio Genesisy 1:27.) Laha manenty ivelany etoy tsika, le moramora amintsika ty mahita hoe tsy mitovy ty lahilahy noho ty ampela. Fe misy raha hafa koa tsy itovizan-drozy. Hafa, ohatsy, ty andraikitsy nameani-Jehovah ty lahilahy, le hafa ty ani-ampela. Midika zay fa misy toetsy noho fahaiza ilàn-drozy mba hahafahan-drozy mamita ty andraikitsin-drozy. (Gen. 2:18) Hodinihintsika amy lahatsoratsy toy ato hoe ino ty azoni-ranabavy tanora atao mba hahavy azy ho lasa Kristiana matotsy. Le ho hitantsika amy lahatsoratsy manaraky ao hoe ino koa ty azoni-rahalahy tanora atao.

MIEZAHA HANA TOETSY SOA

3-4. Aia ty ranabavy tanora ro afaky hahita modely soa azon-drozy tahafy? (Henteo koa sary io.)

³ Maro ty ampela niavaky voaresaky amy Baiboly ao. Tea ani-Jehovah rozy ka nanompo azy.c Nana ani-toetsy voaresaky amy andinin-teny fototsini-fianarantsika toy rey rozy, satria ‘nahay nandanjalanja tamy ze raha nataony’ noho ‘niazo atokisa tamy kila raha iaby.’ Fe tsy reo avao fa mbo afaky mahita ampela kristiana maro azon-drozy atao modely koa ty ranabavy tanora, amy fiangona misy an-drozy eo.

⁴ Soa nareo ranabavy tanora laha mandiniky hoe ia ty ranabavy matotsy azonao tahafy. Henteo hoe ino ty toetsy soan-drozy, bakeo diniho hoe akory ty azonao ampisehoa ani-toetsy rey. Ho hitantsika amy fehintsoratsy manaraky eo moa fa misy toetsy roe tena ilàni-ranabavy, mba hahavy azy ho lasa Kristiana matotsy.

5. Manino ty ampela kristiana ro tena mila miambany laha ta ho matotsy?

⁵ Tena mila miambany tsika laha teantsika ty ho lasa Kristiana matotsy. Hita hoe miambany ty ampela raiky laha mifandramby soa amy Jehovah noho ty olo hafa. (Jak. 4:6) Laha tea ani-Jehovah, ohatsy, ty ampela raiky le miambany ie ka manaraky ty raha volanini-1 Korintianina 11:3. Hazavanini-Jehovah ao hoe ia ty nameany fahefà anivoni-fiangona eo noho amy fianakavia eo.d

6. Ino ty azoni-ranabavy tanora atao mba hiambany manahaky ani-Rebeka rozy?

⁶ Diniho moa ty ohatsini-Rebeka. Ampela hendry noho be herim-po ie ka nahasaky nandramby fanapahan-kevitsy sarotsy. Hainy hoe ino ty tokony hataony le amy fotoa manao akory ie ro mila manao raha. (Gen. 24:58; 27:5-17) Fe nanaja olo koa ie sady parè hanoriky toromariky. (Gen. 24:17, 18, 65) Laha miambany manahaky ani-Rebeka iha sady manoha ani-ze olo nameani-Jehovah fahefà, le ho lasa modely soa ho ani-fianakavianao noho ty olo amy fiangona eo.

7. Akory ty azoni-ranabavy tanora ampisehoa hoe miambany manahaky ani-Estera rozy?

⁷ Samby mila miambany iaby lafa atao Kristiana matotsy. Mivola ty Baiboly fa “ze miambany ro hendry.” (Ohab. 11:2) Tena niambany Estera sady tsy nivaliky tamy Ndranahary. Niaro azy raha zay ka tsy nirengirengy ie lafa nilasa mpanjakavavy. Nijanjy noho nanoriky ty torohevitsy nameani-Mordekay ie. Zokiny Mordekay io satria anakini-rahalahini-babany. (Est. 2:10, 20, 22) Asehonao koa hoe miambany iha laha mangataky torohevitsy soa baka amin’olo, bakeo manoriky ani-raha iny.​—Tit. 2:3-5.

8. Laha hentea ty 1 Timoty 2:9, 10, manino ty fiambanea ro hanampy ty ranabavy hahay hifily soa ty akanjony noho ty poziny?

⁸ Mbo nisy fomba hafa koa nampisehoani-Estera hoe niambany ie. “Soa fitsanga ie sady ampelasoa”, fe tsy nataony ze hahavy ty olo hieky hoe ampelasoa ie. (Est. 2:7, 15) Akory ty azoni-ranabavy anahafa azy? Misy fomba raiky resahini-1 Timoty 2:9, 10. (Vakio.) Nanoro hevitsy ty ampela kristiana apostoly Paoly ao hoe tokony hanao akanjo milamy soa noho maotina rozy, sady tokony handiniky soa. Hita amy safà grika nampiasany io fa tokony hasehoni-ranabavy amy ty akanjony hoe manaja ty fihetseham-pon’olo hafa ie. Falifaly tsika satria manoriky ani-torohevitsy io anabavintsika reo!

9. Ino ty ianarantsika baka amy tantarani-Abigaila?

⁹ Toy koa misy toetsy hafa mila ananani-ranabavy iaby laha tean-drozy ty ho lasa Kristiana matotsy. Tsy ino zay fa ty fahaiza mandiniky. Ino ty atao hoe fahaiza mandiniky? Ty olo mahay mandiniky le mahay manavaky ty mety noho ty tsy mety, bakeo ze mety ro ataony. Diniho moa ty tantarani-Abigaila. Tsy nahay nanapa-kevitsy valiny ka fa ho niazon-doza rozy trano raiky. Fe avy le nanao raha malaky Abigaila. Tena nahay nandiniky ie ka lasa nanavotsy ain’olo maro. (1 Sam. 25:14-23, 32-35) Manampy antsika koa ty fahaiza mandiniky lafa tsika mifampiresaky amin’olo. Lasa hahay handanjalanja tsika ka tsy hanontanintany raha tsy tokony hilirantsika na hanontanintany raha hahamenatsy azy.​—1 Tes. 4:11.

MIEZAHA HIANATSY RAHA HANAMPY ANAO AMY FIAINA ANDAVANANDRO

10-11. Ino ty soa ho azonao noho ty olo hafa laha iha mahay mamaky teny noho manoratsy? (Henteo koa sary io.)

¹⁰ Mila mianatsy raha hanampy azy ty Kristiana matotsy. Misy raha sisany, ohatsy, nianaran’ajà ampela raiky tamy ie mbo nikely. Fe mbo mahasoa azy avao raha iny amy androm-piainany iaby. Retoa misy ohatsy vitsivitsy.

¹¹ Mianara hahay hamaky teny noho hanoratsy. Fa kolontsain’olo sisany ty hoe tsy voatery mianatsy ty ampela satria tsy ilà raha zay. Fe tsy manahaky ani-zay ty Kristiana. Tena mila mahay mamaky teny noho manoratsy rozy.e (1 Tim. 4:13) Ka ndre sarotsy aza raha zay, le miezaha avao hahay mamaky teny noho manoratsy. Ino ty soa ho azonao baka amy zay? Mety hanampy anao hahita asa noho hahazo ze drala ilànao raha zay. Ho moramora aminao koa ty hianatsy Baiboly noho hampianatsy ty olo hafa. Fa ty tena vatan-draha, lasa hifandramby marìny amy Jehovah iha lafa mamaky noho mametsivetsy ty Safàny.​—Jos. 1:8; 1 Tim. 4:15.

12. Ino ty ianaranao baka amy Ohabolana 31:26?

¹² Miezaha hahay hiresaky amin’olo. Tena mila manao ani-zay ty Kristiana. Nanome antsika torohevitsy soa mikasiky ani-zay Jakoba mpianatsy. Hoy ty asany: “Soa ty olo iaby laha parè hijanjy, sady tsy halisa hivola.” (Jak. 1:19) Laha iha mijanjy soa ze raha volanin’olo, le asehonao hoe miferinay an-drozy iha. (1 Pet. 3:8) Laha tsy tena azonao ty raha volanin’olo raiky na ty raha tsapany, le mametraha fanontanea. Bakeo mieritsereta soa tse alohani-hivolana. (Ohab. 15:28, f.a.p.) Eritsereto zao: ‘Marina va raha hovolaniko toy sady hampahery? Soa fanahy noho manaja olo va aho laha mivola ani-toy?’ Tahafo ranabavy matotsy mahay mijanjy noho soa fanahy lafa mivola rey. (Vakio Ohabolana 31:26.) Janjino soa rozy lafa mivola. Laha mahay miresaky amin’olo iha, le ho moramora aminao ty hinama noho hilongo amin-drozy.

13. Akory ty hahaizanao manao raha an-trano ao? (Henteo koa sary io.)

¹³ Mianara manao raha an-trano ao. Amy tany maro, le ty ampela avao ro manao ty ankamaroani-raha an-trano ao. Mety afaky manampy anao hahay soa ani-asa reo reninao na ty ranabavy matotsy. Hoy ranabavy Cindy: “Maro ty raha nianarako baka amy mamako, fa anisani-tena teako ty hoe laha mazoto miasa tena, le ho falifaly avao lafa manao raha. Nampianariny hahay miketriky, manadio, manjaitsy, noho manao bazary aho. Lasa tsy nisarotsy tamiko amy zay ty nikarakara ty vatako. Tsy vitani-zay fa lasa afaky nanao raha maro amy fanompoa ani-Jehovah aho. Nampianarini-mama ho tea mandramby vahiny koa aho ka lasa nifankahay amy ranadahy noho rahavavy maro. Modely soa rozy ka azoko tahafy.” (Ohab. 31:15, 21, 22) Laha mazoto miasa noho tea mandramby vahiny ty ampela raiky, le handramby soa ty fianakaviany noho ty fiangona misy azy.​—Ohab. 31:13, 17, 27; Asa. 16:15.

14. Ino ty ianaranao baka amy Crystal, le ino ty tokony hotiarovinao?

¹⁴ Miezaha hamelom-po. Tokony hiezaky ty Kristiana iaby mba hianatsy hamelom-po noho ho afa-po amy ze raha ananany. Tena vatan-draha raha zay. (Fil. 4:11) Hoy ranabavy Crystal: “Nampirisihini-babako noho mamako aho mba hianatsy ze raha hanampy ahy amy fiainako. Nivolanini-babako aho mba hianatsy mikasiky fahaiza mitanjaky drala amy orinasa rey. Tena nanampy ahy raha zay.” Tsy ampy avao ty hoe mahay mila drala, fa tokony hahay hitanjaky drala koa iha. Tsy handanindany drala fahatany iha amy zay. (Ohab. 31:16, 18) Hahavita raha maro amy fanompoa ani-Jehovah iha laha miezaky ho afa-po amy ze raha anananao sady tsy mivilivily raha tsy ilànao.​—1 Tim. 6:8.

MIOMÀNA AMY TY ANDRAIKITSINAO AFARAFARA AO

15-16. Manino ro tena lafovily ty ranabavy tsy manambaly? (Marka 10:29, 30)

¹⁵ Laha iha miezaky hana toetsy soa noho hana ze fahaiza ilànao, le hanampy anao raha zay mba ho parè amy ze raha hataonao lafa afarafara ao. Ndao moa tsika handiniky ohatsy vitsivitsy amy raha mety hataonao.

¹⁶ Mety hanapa-kevitsy tsy hanambaly tse iha anatini-fotoa elaela. Araky nivolanini-Jesosy iny hoe mety hanapa-kevitsy tsy hanambaly ty ampela sisany, ndre tsy mifanaraky amy kolontsain-drozy aza raha zay. (Mat. 19:10-12) Ty sisany koa mety tsy hanambaly vokatsy ty raha iainany. Fe matokisa fa lafovily amy Jehovah noho Jesosy avao iha ndre tsy manambaly aza. Amy tany toy iaby, le tena modely soa amy fiangona eo ty ranabavy tsy manambaly. Tea olo rozy sady midary olo ka lasa sahala amy reny noho rahavavy ho ahi-ty Kristiana maro.​—Vakio Marka 10:29, 30; 1 Tim. 5:2.

17. Ino ty azoni-ranabavy tanora atao laha ta ho lasa mpanompo manontolo andro?

¹⁷ Mety ho lasa mpanompo manontolo andro iha. Tena mandramby anjara be amy asa fitoria maneran-tany ty ampela kristiana. (Sal. 68:11) Mieritseritsy hanompo manontolo andro va iha? Mety ta hanao mpisava lala iha, na mpiasa an-tsitrapo manao fanorena, na Betelita. Mivavaha mikasiky ani-raha kendrenao zay. Miresaha amy ze olo fa nahatratsy ani-raha teanao ho tratsiry iny, le anontaneo ie hoe ino ty azonao atao mba hahavy anao hahafeno fepetra. Bakeo henteo hoe ino ty raha mila ataonao mba hanampy anao hanatratsy ani-raha kendrenao iny. Laha iha manompo manontolo andro, le ho afaky hanao raha maro amy fanompoa ani-Jehovah.

18. Manino ty ranabavy ro tokony hifily soa ty olo ho valiny? (Henteo koa sary io.)

¹⁸ Mety hanapa-kevitsy hanambaly iha. Hanampy anao ho lasa valy soa toetsy noho fahaiza niresahintsika rey. Mazava ho azy fa mila filinao soa ty olo ho valinao laha iha mieritseritsy hanambaly. Anisani-fanapahan-kevitsy tena bevata hataonao raha zay. Tiarovo fa mila maneky ty fahefàni-ze lahilahy ho valinao iha. (Rom. 7:2; Efes. 5:23, 33) Ka soa zany iha laha mieritseritsy hoe: ‘Kristiana matotsy va olo toy? Jehovah va ro ataony voaloha lista amy fiainany? Mahay mandramby fanapahan-kevitsy va ie? Mieky va ie hoe diso lafa misy raha tsy mety ataony? Manaja ampela va ie? Hahavita hanampy ahy hifandramby soa amy Jehovah avao va ie? Ho vitany va ty hamelo ahy? Ho nama soa ho ahy va ie? Mahavita soa ty andraikitsiny va ie? Lafa misy raha ampanaovini-fiangona azy, ohatsy, akory ty anaovany azy?’ (Lioka 16:10; 1 Tim. 5:8) Mazava ho azy fa laha ta hahita valy soa iha, le mila miezaky sandrany iha amy zao mba ho lasa valy soa.

19. Manino ro voninahitsy ho ahi-ty ampela ty kaihy hoe “mpanampy”?

¹⁹ Mivola ty Baiboly fa ty valy soa le “mpanampy mety soa” ho ani-valiny. (Gen. 2:18) Misy olo sisany diso hevitsy amy raha volanini-Baiboly io. Mieritseritsy rozy fa natao ho mpanampy avao ty ampela sady ambany laha ampitovizy amy valiny. Fe tiarovo zao! Ndre Jehovah koa aza kaihy matetiky hoe “mpanampy” amy Baiboly ao. (Sal. 54:4; Heb. 13:6) Tena voninahitsy ho ahi-ty ampela zany anjara asany io, fa tsy fanambania azy mihintsy. Tena mpanampy ho ani-valiny ty ampela laha manoha azy noho manampy azy hanatanteraky ani-ze fanapahan-kevitsy rambesiny an-trano ao. Tea ani-Jehovah koa ampela iny ka ataony ze hahavy ani-valiny hana laza soa avao. (Ohab. 31:11, 12; 1 Tim. 3:11) Afaky mioma sandrany iha henanizao mba ho lasa valy soa. Ino ty azonao atao? Ampitombò ty fitiavanao ani-Jehovah. Miezaha koa hanampy ty olo an-trano ao noho amy fiangona eo.

20. Ino ty raha soa azoni-renim-pianakavia atao ho ahi-ty fianakaviany?

²⁰ Mety ho lasa reny iha. Lafa iha manambaly, le mety hanan’anaky. (Sal. 127:3) Soa zany ty mieritseritsy sandrany hoe ino ty azonao atao mba ho lasa reny soa. Tena hanampy anao toetsy noho fahaiza niresahintsika tato rey laha iha lasa manambaly noho manan’anaky. Laha be fitiava, soa fanahy noho manam-pahareta iha, le ho sambatsy ty fianakavianao. Tsy zay avao fa tsy hatahotahotsy ty ananao sady hahatsapa hoe misy mpitea.​—Ohab. 24:3.

21. Manao akory ty fahitanao ani-ranabavintsika reo, le ino ty antony? (Henteo sary amy fononi-gazety toy.)

²¹ Nareo ranabavy tanora, tiarovo fa tena teanay nareo. Ankasitrahanay koa ty raha iaby ataonareo ho ani-Jehovah noho ty vahoakiny. (Heb. 6:10) Miezaky mafy nareo mba hana toetsy soa noho hana ani-ze fahaiza ilànareo mba hahafahanareo mahazo ze raha ilànareo amy fiaina noho hanampea ty olo hafa. Tsy vitani-zay fa mbo miezaky koa nareo mioma sandrany amy ze andraikitsy mandiny anareo lafa afarafara ao. Tena lafovily amy fandaminani-Jehovah nareo!