Tsy Maintsy ho Tanteraky ty Raha Tamaninao

1. Manino Abrahama ro mbo nitamà avao hoe hanan’anaky?

NAMPITAMÀ ani-Abrahama namany Jehovah fa hanan’anaky ie, le baka amy ty taranakiny ro hahazoani-firenena iaby fitahia. (Gen. 15:5; 22:18) Tena niresy lahatsy Abrahama hoe ho tanteraky fampitamana-Ndranahary zay satria natoky tanteraky a-Ndranahary ie. Fe mbo tsy nanan’anaky avao Abrahama ndre fa 100 tao aza, le Saraha valiny fa 90 tao. (Gen. 21:1-7) Fe ndre zay, le mivola ty Baiboly hoe: “Mbo nitamà avao Abrahama ... nino [ie] hoe mety ho lasa babani-firenena maro ie, araky ty fa nivolany.” (Rom. 4:18) Hainao moa fa tena nitanteraky vatany raha nitamanini-Abrahama iny. Lasa baban’Isaka ie. Io azy anaky fa nilinisany avao bakany bakany zay iny. Nanino Abrahama ro natoky fa tsy maintsy hanatanteraky ty raha nampitamaniny avao Jehovah?

2. Manino Abrahama ro niresy lahatsy hoe tsy maintsy ho tanteraky ty raha nampitamanini-Jehovah?

² Tena nifandramby marìny tamy Jehovah Abrahama. Zay ro nahavy azy “nieky tanteraky” fa hanatanteraky ty raha nampitamaniny ie. (Rom. 4:21) Nanam-pinoa Abrahama ka nahazo hatò tamy Jehovah sady nambarany hoe olo marina. (Jak. 2:23) Mivola ty Romanina 4:18 fa sady nanam-pinoa Abrahama no nana raha tamany. Ndao moa tsika handiniky ty Romanina toko faha-5 fa ho hitantsika ao ty raha nivolanini-apostoly Paoly mikasiky fanantenà.

3. Ino ty raha nihazavanini-Paoly mikasiky fanantenà?

³ Manino tsika ro afaky matoky fa ‘tsy handiso fanantenà antsika mihintsy ty fanantenantsika’? Manazava ani-zay Paoly. (Rom. 5:5) Ampeany koa tsika mba hahay hoe ino ty azontsika atao mba hahavy antsika hatòky tanteraky ty raha tamanintsika. Misy raha nivolanini-Paoly zay amy Romanina 5:1-5 ao. Lafa mandiniky ani-raha io iha le diniho ty raha iainanao. Laha manao ani-zay iha, le lasa ho hainao hoe akory ty hahavy anao hatòky tanteraky ty raha tamaninao mikasiky ty hoavy. Marina hoe fa matoky ty raha tamaninao iha, fe hanampy anao vomaiky hatòky ani-zay ty raha hianarantsika ato. Fe ndao tse hodinihintsika hoe ino fanantenà soasoa volanini-Paoly hoe tsy handiso fanantenà antsika io.

TY RAHA SOASOA TAMANINTSIKA

4. Ino ty raha resahini-Romanina 5:1, 2?

⁴ Vakio Romanina 5:1, 2. Nisoratini-Paoly ho ani-fiangona ta Roma any safà reo. Nahay ani-Jehovah noho Jesosy, rahalahy noho anabavy tany rey. Lasa nanam-pinoa koa rozy, le nilasa Kristiana. ‘Nambara-Ndranahary hoe olo marina amy zay rozy satria nino’ azy, sady nihosorany tamy fanahy masy. Nahazo ani-fanantenà soasoa iny rozy le natoky hoe tena ho azon-drozy raha io.

5. Ino ty raha tamanini-Kristiana voahosotsy?

⁵ Nanoratsy tamy Kristiana voahosotsy ta Efesosy any rey Paoly tafarani-zay, le niresaky amin-drozy mikasiky ty fampitamana namea-Ndranahary an-drozy. Hahazo ty “lovan’olo masy” rozy. (Efes. 1:18) Nivolanini-Paoly tamy Kolosianina reo koa hoe aia ty hahazoan-drozy ani-raha tamanin-drozy iny. “Nihajarỳ ho anareo an-danitsy any” hoasany fanantenà io. (Kol. 1:4, 5) Midika zay fa mitamà hovelomy mandrakizay an-danitsy any ty Kristiana voahosotsy, le hiaraky manjaka amy Kristy.​—1 Tes. 4:13-17; Apok. 20:6.

6. Ino ty nivolanini-rahalahy raiky voahosotsy mikasiky ty raha tamaniny?

⁶ Tena lafovily amy Kristiana voahosotsy raha tamanin-drozy io. Anisani-zay, ohatsy, Rahalahy Frederick Franz. Fa nanompo ani-Jehovah tanatini-tao maro ie, le zao ty nivolaniny lafa ie niresaky ty raha tsapany mikasiky ani-fanantenà io, tamy 1991: “Azo antoky ty fanantenantsika, sady tsy maintsy hahazo ani-raha io ty kiraidraiky amintsika anisani-144 000. Tena ho soa biby mandilatsy ty nieritseretantsika azy raha io ... Tena mbo lafovily amintsika avao fanantenantsika io ... Vomaiky mankasitraky ani-raha io tsika arakaraky ty andinisantsika azy. Tena maeva handinisa raha io, ndre ho an-tapitrisany tao aza vo ho tanteraky. Lafovily amiko mandilatsy ty bakany zay ty fanantenantsika.”

7-8. Mitamà ino ty ankamaroantsika? (Romanina 8:20, 21)

⁷ Mana raha tamany hafa koa ty ankamaroani-mpanomponi-Jehovah henanizao. Mitamà rozy fa hiay mandrakizay an-tany etoa lafa manjaka ty Fanjakà-Ndranahary. Zay moa raha nitamanini-Abrahama iny. (Heb. 11:8-10, 13) Niresaky mikasiky fanantenà soasoa io Paoly. (Vakio Romanina 8:20, 21.) Lafa iha nahay ty raha ampitamanini-Baiboly amy hoavy, ino amy raha rey ro tena fa tsy lininao? Nanao akory lafa nihainao hoe ho lasa lavorary iha ndraiky andro any? Nifalifaly va iha lafa nahay hoe hovelomy ndraiky longonao fa nimaty rey le hiay amy paradisa an-tany eto? Azo antoky fa maro amy raha ampitamani-Ndranahary rey ro fa tsy lininao.

⁸ Samby mana fanantenà soasoa tsika, ndre mitamà hiay mandrakizay an-danitsy any ndre mitamà ho an-tany etoy. Mahavy antsika ho falifaly fanantenantsika io. Vomaiky koa tsika lasa matoky tanteraky ani-raha io. Ino ty hanampy antsika? Miresaky ani-zay Paoly. Ndao moa hodinihintsika ty raha nisoratiny mikasiky ani-fanantenantsika io. Hanampy antsika raha zay mba hatòky hoe tena ho tanteraky ty raha tamanintsika.

INO TY HANAMPY ANTSIKA HATÒKY HOE TENA HO TANTERAKY TY RAHA TAMANINTSIKA?

9-10. Ino ty raha fa ampoizini-Kristiana laha hentea ty raha nahazo ani-Paoly? (Romanina 5:3) (Henteo koa sary reo.)

⁹ Vakio Romanina 5:3. Nivola Paoly fa lafa mijaly tsika, le vomaiky matoky ty raha tamanintsika. Mety hahatseriky antsika raha zay. Fe fa ampoizini-mpanori-dia ani-Kristy iabiaby hoe hiatriky raha sarotsy rozy. Diniho moa ty tantarani-Paoly. Nivola tamy Tesalonianina rey ie hoe: “Tamy zahay mbo taminareo teo, le matetiky zahay ro nivola mialoha taminareo hoe tsy maintsy miaritsy fijalea tsika. Le zay vatany ty niseho.” (1 Tes. 3:4) Zao koa ty nivolaniny tamy Korintianina rey: “Teanay ho hainareo, rahalahy, ty raha sarotsy natrehinay ... Tsy nitamà ho velo sasy [zahay].”​—2 Kor. 1:8; 11:23-27.

¹⁰ Kristiana koa tsika ka fa ampoizintsika hoe hiaritsy raha sarotsy sankarazany. (2 Tim. 3:12) Ka manao akory iha? Nenjehy va iha satria nino ani-Jesosy sady nanori-dia azy? Mety nikizakizahini-namanao noho ty fianakavianao vasa iha. Mety nampijalijalin-drozy mihintsy aza iha ka. Na mety lasa niazon-draha iha am-piasà any satria manao ty marina. (Heb. 13:18) Na mety manenjiky anao ty fanjakà satria iha miresaky ty raha tamaninao amin’olo. Fe ndre ino ndre ino ty raha sarotsy mahazo antsika, le tokony ho falifaly avao tsika hoasani-Paoly. Fa manino?

11. Manino tsika ro tokony ho tapa-kevitsy hiaritsy avao ndre ino ino raha sarotsy mahazo antsika?

¹¹ Afaky ho falifaly avao tsika ndre miatriky raha sarotsy satria haintsika fa manampy antsika hana ani-toetsy raiky tena soa zay raha io. Mivola ty Romanina 5:3 hoe: “Ty fijalea mahavy fiareta.” Samby hiatriky raha sarotsy iaby lafa atao Kristiana. Tokony ho tapa-kevitsy hiaritsy avao zany tsika ndre ino ino raha sarotsy mahazo antsika. Laha manao ani-zay avao tsika vo afaky hahita ty fahatanterahani-raha tamanintsika rey. Tsy teantsika ty hanahaky olo tan-tsaini-Jesosy ao rey lafa ie niresaky mikasiky voa latsaky amy tany be vato rey. Nifalifaly tse rozy tamy voalohany naneky ty raha nivolany tamin-drozy, fe “lafa tratsini-raha sarotsy na fanenjeha” rozy le nihemotsy. (Mat. 13:5, 6, 20, 21) Tsy mora aloha ty miatriky fanenjeha na raha sarotsy, fe laha miaritsy avao tsika le handramby soa. Amy fomba akory?

12. Ino ty soa azontsika lafa tsika miaritsy raha sarotsy?

¹² Niresahini-Jakoba mpianatsy hoe ino ty soa azontsika lafa miaritsy raha sarotsy tsika. Hoy ty asany: “Engao hamita ty asany ty fiareta, amy zay nareo ho lasa lavorary noho tsy hisy tsiny amy lafiny iaby, ka tsy hisy tsy ampy aminareo ao.” (Jak. 1:2-4) Nivola Jakoba fa misy asany, na raha kendrè ty fiareta. Ino zay? Manampy anao hahavita hiaritsy kokoa raha io, hana finoa matanjaky, sady hiantehitsy amy Ndranahary. Fe tsy reo avao fa mbo misy raha soa bevata ho azontsika koa lafa tsika miaritsy.

13-14. Ino ty vokany lafa miaritsy tsika, le lasa manao akory ty fanantenantsika? (Romanina 5:4)

¹³ Vakio Romanina 5:4. Mivola Paoly fa ty fiareta le mahavy antsika “hankasitraha-Ndranahary.” Lafa miaritsy zany iha le lasa mahazo hatò amy Jehovah. Midika va zay hoe falifaly Jehovah lafa misy raha sarotsy na problemo mahazo anao? Aha, tsy zay. Iha mihintsy ro ankasitraha-Ndranahary. Falifaly ie satria tsy mivaliky iha. Tena mampahery ty mahay hoe mampifalifaly ani-Jehovah tsika lafa miaritsy!​—Sal. 5:12.

¹⁴ Tiarovo fa niaritsy raha sarotsy Abrahama, ka lafa tsy nivaliky ie le nahazo hatò tamy Jehovah. Nirambesini-Jehovah ho namany ie le olo marina ty fahitany azy. (Gen. 15:6; Rom. 4:13, 22) Afaky hanahaky ani-zay koa tsika. Tsy mianky amy ty hamaroani-asa ataontsika na ty tombotsoa ananantsika ro hahavy antsika hankasitraha-Ndranahary. Falifaly Jehovah lafa tsika miaritsy noho tsy mivaliky avao ndre misy raha sarotsy. Ka ndre firy tao tsika, ndre ino ino ty raha iainantsika, na fahaizantsika, le samby afaky miaritsy iaby tsika. Fa nisy fotoa va iha niatriky raha sarotsy le tsy nivaliky tamy Jehovah mihintsy? Laha zay ie, le hampahery anao ty mahay hoe mampifalifaly ani-Jehovah iha. Misy vokany bevata amintsika ty fahaiza ani-zay. Vomaiky lasa matoky amy zay tsika hoe ho tanteraky ty raha tamanintsika.

RAHA TAMANY AZO ANTOKY

15. Ino ty nivolanini-Paoly amy Romanina 5:4, 5 ao?

¹⁵ Falifaly Jehovah lafa tsy mivaliky tsika sady miaritsy lafa miatriky raha sarotsy. Henteo moa ty nanohizani-Paoly ani-raha nivolaniny iny. Hoy ty asany: “Ty fankasitraha-Ndranahary mahavy antsika hana fanantenà, le ty fanantenà tsy mba mandiso fanantenà.” (Rom. 5:4, 5) Fa nivola Paoly amy Romanina 5:2 ao, fa natoky Kristiana ta Roma any rey fa hahazo “ty fanantenà ty voninahitsi-Ndranahary” rozy. Ka ndre fa natoky ty raha tamanin-drozy aza Kristiana ta Roma any reo, le mbo nisy raha hanampy an-drozy vomaiky tena hatòky ani-raha zay.

16. Lafa manao akory ty olo raiky ro manomboky mitombo ty fanantenany? (Henteo koa sary reo.)

¹⁶ Tiaronao va tamin’iha vo naharè voalohany ani-raha soasoa ampitamany amy Safà-Ndranahary ao rey? Mety nieritseritsy iha tamy zay hoe nofinofy avao fiaina mandrakizay amy paradisa an-tany eto zao fa tsy tena hisy. Fe lafa iha nihanahay soa ani-Jehovah noho raha ampitamany amy Baiboly ao rey, le lasa niresy lahatsy iha hoe tena hisy vatany raha io.

17. Akory ty hahavy ty fanantenanao hitombo ndre fa vita fanokanam-bata noho natao batisa iha?

¹⁷ Ndre fa vita fanokanam-bata noho natao batisa aza iha, le vomaiky nitombo ty raha hainao mikasiky ani-Jehovah sady vomaiky lasa nitea azy iha. Lasa tena natokisanao amy zay raha tamaninao rey. (Heb. 5:13–6:1) Mety ho tsapanao ty raha resahini-Romanina 5:2-4. Niatriky raha sarotsy sankarazany iha, fe niaritsy avao ka lasa nahazo hatò amy Ndranahary. Vomaiky amy zay iha mitamà fa hahazo ani-raha nampitamaniny rey satria hainao hoe tea anao ie sady falifaly aminao. Vomaiky zany iha mana fanantenà mandilatsy ty nanananao tamy voalohany iny. Atokisanao hoe ho tanteraky vatany raha zay. Tena misy vokany aminao raha zay, zany hoe misy vokany amy fiainanao iaby mihintsy ka lasa miova ty fomba anandesanao ty fianakavianao, noho ty raha ataonao lafa iha hanapa-kevitsy. Lasa hainao koa aza ty mampiasa soa ty fotoanao.

18. Ino ty fanomezan-toky nameani-Jehovah?

¹⁸ Niresaky hevitsy raiky bevata mikasiky ani-fanantenà azonao iny Paoly, lafa iha ankasitraha-Ndranahary. Manome toky anao ie fa ho tanteraky ty raha tamaninao. Manino iha ro afaky matoky ani-zay? Niresahini-Paoly ty fanomezan-toky namea-Ndranahary antsika Kristiana: “Ty fanantenà tsy mba mandiso fanantenà, satria fa natao am-pontsika ao ty fitiava-Ndranahary, tamy alalani-fanahy masy namea antsika.” (Rom. 5:5) Afaky matoky zany iha fa tsy maintsy ho tanteraky ty raha nampitamanini-Jehovah anao.

19. Ino ty raha tena azonao atokisa mikasiky ty raha tamaninao?

¹⁹ Vetsevetseo ty raha nampitamanini-Jehovah ani-Abrahama noho ty antony nahavy ani-Jehovah nankasitraky azy. Tsy zay avao fa nirambesini-Jehovah ho namany koa ie. Tena nitanteraky vatany raha nitamanini-Abrahama rey. Mivola ty Baiboly hoe: “Nahazo ani-fampitamana zay Abrahama lafa baka nampiseho fahareta.” (Heb. 6:15; 11:9, 18; Rom. 4:20-22) Tena tsy nidiso fanantenà ie. Afaky matoky koa iha fa laha tsy mivaliky mihintsy, le hahazo ani-fitahia tamaninao rey. Mana antony maro hifalifalea zany iha, satria hainao fa tsy maintsy ho tanteraky ty raha tamaninao sady tsy ho diso fanantenà iha! (Rom. 12:12) Hoy Paoly: “Enga anè azy Ndranahary manome raha tamany iny hameno fifalea noho fiadana ty fonareo, satria matoky azy nareo! Amy zay le vomaiky ho azo antoky ty raha tamaninareo vokatsy ty herini-fanahy masy.”​—Rom. 15:13.