Mpisorobe Tena Miferinay Antsika Jesosy

1-2. a) Manino Jehovah ro nandefa an’ny Anany iny ho an-tany etoy? b) Ino ty hodinihintsika amy lahatsoratsy toy ato? (Hebreo 5:7-9)

FA 2 000 tao lasa eo ho eo zay, le nandefa an’ny Anany tena teany iny ho an-tany etoy Jehovah Ndranahary. Ino ty antony? Maro ty antony nandefasany azy tetoy, anisani-zay ty hoe hanafaky ty olombelo amy ota noho fahafatesa sady handrava ty raha raty iaby nataon’i Satana. (Jaona 3:16; 1 Jaona 3:8) Hain’i Jehovah koa hoe ho Mpisorobe miferinay antsika Jesosy satria fa niay tan-tany etoy. Lafa nivita batisa Jesosy tamy tao 29, le nanomboky ty asany amy maha Mpisorobe azy.a

² Hodinihintsika amy lahatsoratsy toy ato hoe manino ty raha niainan’i Jesosy tan-tany etoy ro nanampy azy ho Mpisorobe tena miferinay antsika. Tena vatan-draha ty ahaizantsika ani-zay satria mahavy antsika tsy hisalasala hivavaky amy Jehovah sirtò lafa kivy tsika vokatsin’ny hadisoa nataontsika.​—Vakio Hebreo 5:7-9.

NIAVY AN-TANY ETOY ANAKI-NDRANAHARY TEANY INY

3-4. Ino ty fiovà bevata natrehin’i Jesosy lafa tan-tany etoy?

³ Tsy maintsy fa nandalo fiovà iaby ty ankamaroantsika, ohatsy hoe tsy maintsy niala tamy ty trano teantsika, na nanenga ty fianakaviantsika noho ty namantsika. Mety tsy nimora amintsika fiovà reo. Fe mbo tsy nisy olo niatriky fiovà mandilatsy an’i Jesosy. Ie ro nana pilasy anabo amy anakin’i Jehovah an-danitsy any reo. Tea an’i Jehovah ie satria niaraky niasa nivanta taminy. (Sal. 16:11; Ohab. 8:30) Fe mivola ty Filipianina 2:7 hoe ‘parè hamoy ty raha iaby’ ie, ka nanenga ty pilasy nananany tan-danitsy any mba hiaraky hiay amin’olombelo an-tany etoy.

⁴ Diniho koa moa ty raha niainany lafa nateraky ie. Fianakavia mahantra ty niteraky an’i Jesosy. Mivola ani-zay tsika satria lafa nateraky ie, le voro roe kelikely ro nataon’ny ray aman-dreniny fanatitsy. (Lev. 12:8; Lioka 2:24) Lafa nihain’i Heroda Mpanjaka raty fanahy koa hoe teraky ty Mesia, le nila fomba hamonoa azy ie. Mba hiarova ty ain’i Jesosy, le nandesin’ny ray aman-dreniny nilay nana a Ejipta any tse ie. (Mat. 2:13, 15) Tena tsy mitovy tanteraky tamy fiainan’i Jesosy tan-danitsy any ty fiainany tan-tany etoy!

5. Ino ty raha nihitan’i Jesosy tamy ie tan-tany etoy, le manino raha zay ro manampy azy ho lasa Mpisorobe mahay miferinay? (Henteo koa sary io.)

⁵ Nahita ty fijalean’olo manodidy azy Jesosy tamy ie tan-tany etoy. Azo antoky fa hainy soa hoe manao akory maty longo zao satria fa nimaty longo ie. Mety ho anisani-zay Josefa, azy babany niteza azy iny. Lafa nanao ty fanompoany koa Jesosy, le nahita olo boka, jiky, kombo, noho nimaty anaky. Niferinesany olo rey. (Mat. 9:2, 6; 15:30; 20:34; Marka 1:40, 41; Lioka 7:13) Nahita ty fijalea mahazo ty olo Jesosy tamy ie tan-danitsy any. Fe lafa niay tan-tany etoy ie, le vomaiky nitsapany hoe manao akory ty olo lafa mijaly. (Isa. 53:4) Hainy soa ty fijalea nahazo an-drozy. Niainany mihintsy ty raha nahazo ty olo, anisani-zay ty hareraha, fiasan-doha, noho ty alahelo.

NASEHON’I JESOSY HOE MIFERINAY OLO IE

6. Ino ty ianarantsika mikasiky an’i Jesosy baka amy sarin-teny nampiasan’Isaia mpaminany reo? (Isaia 42:3)

⁶ Tamy fanompoan’i Jesosy tan-tany etoy, le niferinesany ty olo tsy misy mpidary noho nampijalijalỳ rey. Nanatanteraky faminania ie lafa nanao ani-zay. Matetiky ty olo mana finoa matanjaky ro ampitovizin’ny Soratsy Hebreo amy baibò azon-drano soa na amy hazo bevata. (Sal. 92:12; Isa. 61:3; Jer. 31:12) Fa ty olo mahantra noho ailikilikin’olo, le ampitovizy amy bararata folaky noho lamesin-jiro fa ho maty io. (Vakio Isaia 42:3; Mat. 12:20) Lafa nahazo fanahy masy Isaia mpaminany, le nampiasa an’ny sarin-teny reo mba hivolana mialoha hoe hampiseho fitiava noho hiferinay an’olo ailikilikin’olo rey Jesosy.

7-8. Akory ty nanatanterahan’i Jesosy ty faminanian’Isaia?

⁷ Nasehon’i Matio mpanoratsy Filazantsara fa Jesosy ro tean’Isaia ho volany amy hoe: “Tsy ho tampahiny ty bararata folaky sady tsy ho vonoany ty lamesin-jiro fa ho maty.” Nahasoa ani-azy nailikilikin’olo manahaky bararata folaky rey na ty olo tsy nana fanantenà sahala amy lamesin-jiro fa ho maty rey ty fahagagà sisany nataon’i Jesosy. Anisani-zay lahilahy raiky boka zay. Fa tsy mitamà ho janga na hiaraky ho falifaly amy fianakaviany noho ty namany sasy lahilahy io. (Lioka 5:12, 13) Nifankahita amy lahilahy raiky mareny noho tsy mahay mivola soa koa Jesosy. Mba eritsereto moa ty raha nitsapan’ny lahilahy io lafa nahita olo nifampiresaky ie, kanefa tsy misy raha azony ty raha volanin-drozy. (Marka 7:32, 33) Fe tsy reo avao fa mbo misy hafa koa toy.

⁸ Maro ty Jiosy nino tamy andron’i Jesosy hoe kanao marary na kilemaina ty olo raiky, le nivoasazy vokatsin’ny fahotà nataony na ty fahotà nataon’ny ray aman-dreniny ie. (Jaona 9:2) Vokatsin’ny hevitsy diso zay, le matetiky olo marary na kilemaina rey ro nampijalin’olo ka nahatiaro tsy misy ilà azy. Tanteraky ty faminanian’Isaia, ka nitaha an-drozy Jesosy sady nataony ze hahaizan-drozy hoe midary an-drozy Ndranahary. Ino ty toky ananantsika baka amy raha zay?

9. Akory ty ampisehoan’ny Hebreo 4:15, 16 hoe tena miferinay ty olombelo tsy lavorary Mpisorobentsika an-danitsy any iny?

⁹ Vakio Hebreo 4:15, 16. Afaky matoky tsika fa hiferinay antsika avao Jesosy. Ty safà grika nadika hoe “miferinay”, le midika hoe tena mahatsapa ty alahelo noho ty fijalea mahazo ty hafa. Mariho fa mitovy amy safà zay avao koa ty safà nampiasan’i Paoly amy Hebreo 10:34 ao. Hita tamy fahagagà nataon’i Jesosy rey hoe tena nahatsapa ty fijalea nahazo ty hafa ie. Tsy hoe nitaha olo ie satria nieritseritsy hoe adidiny ty manao ani-zay. Fa ty antony nitahany an-drozy le hoe tena ferinesany rozy ka teany hampea. Afaky nanao fahagagà baka lavitsy eny avao, ohatsy, ie lafa nitaha an’ny lahilahy boka iny. Fe tsy nanao ani-zay ie, fa nikasihiny lahilahy iny sady mety ie ty olo voalohany nikasiky an’ny lahilahy boka tanatin’ny tao maro iny! Lafa nitaha an’ny lahilaly mareny iny koa Jesosy, le nandesiny niala lavidavitsy an’olo maro nitabataba rey ie. Diniho koa moa ty raha niseho lafa nisy ampela raiky mpanota fe nibebaky. Nanao ze hahalontsiky ty tombon’i Jesosy tamy ranomasony noho nanamaiky azy tamy volon-dohany ampela iny. Nisy Fariseo raiky nitsaratsara an’ny ampela iny, fe niaro azy Jesosy. (Mat. 8:3; Marka 7:33; Lioka 7:44) Hita hoe tsy nanilikiliky ty olo nijaly vokatsin’arety na ty olo nanao fahotà bevata Jesosy. Mifanohitsy amy zay fa nirambesiny soa rozy sady nasehony hoe teany. Afaky matoky zany tsika fa miferinay antsika koa ie.

MIEZAHA HANAHAKY AN’NY MPISOROBENTSIKA INY

10. Ino iaby ty fitaova ara-panahy azontsika ampiasà henanizao mba hanampea ty olo mareny noho jiky? (Henteo koa sary reo.)

¹⁰ Miezaky manahaky an’i Jesosy tsika mpanori-dia azy, ka mampiseho fitiava noho miferinay olo. (1 Pet. 2:21; 3:8) Marina fa tsy afaky mitaha ty olo mareny noho jiky tsika, fe ndre zay le afaky manampy an-drozy hifandramby soa amy Jehovah tsika. Misy amy tenin’ny tanana 100 mahery, ohatsy, ty boky noho video ara-baiboly naboakintsika. Mba hahavy ty olo tsy de mahita soa handramby soa koa, le nampiboaky boky noho gazety amy soratsy braille amy fivolana 60 mahery tsika noho video misy feo manazava sary amy fivolana 100 mahery. Manampy ty olo jiky noho mareny hifandramby soa amy Jehovah noho Anany iny fitaova reo.

11. Akory ty ampisehoan’ny fandaminan’i Jehovah hoe miferinay ty olo iaby manahaky an’i Jesosy ie? (Asan’ny Apostoly 2:5-7, 33) (Henteo koa sary reo.)

¹¹ Miezaky mafy manampy ty olo iaby hifandramby marìny amy Ndranahary ty fandaminan’i Jehovah. Tiarovo fa tafaran’ny nameloma an’i Jesosy tamy maty, le nandatsaky fanahy masy tamy mpianatsiny rey ie mba hahafahan-drozy mitory amy ‘fivolanan’olo iaby’ nanatriky an’ny fetin’ny Pentekosta iny. (Vakio Asan’ny Apostoly 2:5-7, 33.) Manoriky ty tari-dalan’i Jesosy ty fandamina henanizao, ka mampiboaky boky noho gazety ara-baiboly amy fivolana 1 000 mahery, anisani-zay safà tsy de maro mampiasa rey. Misy fivolana sisany an’Ameriky avaratsy noho antimo any zay, ohatsy, vitsivitsy ty olo mampiasa azy. Fe nampiboaky boky noho gazety 160 mahery amy safà reo ty fandamina, mba hahavy ty olo mampiasa an’ny fivolana reo haharè ty vaovao soa. Misy amy fivolana Romany 20 mahery koa ty boky noho gazetintsika. An’arivony amin’olo mampiasa an’ny fivolana reo ro maneky ty fahamarina.

12. Ino koa ty raha ataon’ny fandaminan’i Jehovah henanizao mba hanampea ty olo?

¹² Tsy hoe manampy ty olo haharè ty vaovao soa avao ty fandaminan’i Jehovah, fa manampy ty olo tratsin’ny loza arakin’ny natiora koa. Mba hahavità ani-zay, le an’arivony ty mpiasa an-tsitrapo parè hanampy ty rahalahy noho anabavy sahira. Mamboatsy trano tsotsotra natao hivoria koa ty fandamina, mba hahafahan’olo hianatsy mikasiky ty fitiava-Ndranahary an-drozy.

AFAKY MANAMPY ANAO MPISOROBENTSIKA INY

13. Ino iaby ty fomba sisany anampean’i Jesosy antsika?

¹³ Mpiarakandro tena soa Jesosy, ka ataony azo antoky hoe mahazo ze raha ilàntsika amy lafiny ara-panahy tsika mba hahavy antsika hifandramby amy Jehovah. (Jaona 10:14; Efes. 4:7) Kindraiky mety hahavy antsika hahatsapa sahala amy lamesin-jiro fa ho maty na bararata folaky io ty raha sarotsy mahazo antsika. Mety ho kivy tsika satria marary mafy na nanao raha tsy mety na mety tsy mifanaraky amy mpiara-manompo. Mety hifantoky amy problemo mahazo antsika na amy raha mampijaly antsika henanizao tsika, fa tsy hifantoky amy ty raha tamanintsika amy hoavy. Fe tiarovo fa hitan’i Jesosy ty raha mahazo anao sady hainy ty raha tsapanao. Ferinesany iha, ka teany hampea. Afaky mampiasa ty fanahy masy, ohatsy, ie mba hampahereza anao lafa kivy iha. (Jaona 16:7; Titosy 3:6) Afaky mampiasa ty anti-panahy noho ty mpiara-manompo amy fiangona eo koa Jesosy, mba hampahereza noho hanampea anao.​—Efes. 4:8.

14. Ino ty azontsika atao lafa kivy tsika?

¹⁴ Lafa kivy iha, le vetsevetseo ty asan’i Jesosy amy maha Mpisorobentsika azy. Tiarovo fa tsy hoe hanome ty ainy ho vilim-panavota avao ty nandefasan’i Jehovah azy ho an-tany etoy, fa mba hanampea azy hahatakatsy soa ty raha sarotsy mahazo ty olombelo koa. Parè hanampy antsika amy “fotoa mety” ie lafa tsika kivy vokatsin’ny fahotà nataontsika na ty fahalemeantsika.​—Heb. 4:15, 16.

15. Ino ty nanampy ty rahalahy raiky himpoly amy fiangona eo ndraiky?

¹⁵ Mitariky ty vahoakiny koa Jesosy mba hila noho hanampy ani-azy niala tamy Jehovah rey himpoly ndraiky. (Mat. 18:12, 13) Diniho moa ty raha niainan’i Stefano.b Nanapa-kevitsy hivory ndraiky ie, 12 tao tafaran’ny nangalà azy tsy ho anisan’ny fiangona. Zao ty nivolaniny: “Tsy mora tamiko raha zay, fe teako laha manompo an’i Jehovah miaraky amy rahalahy noho anabaviko reo ndraiky aho. Nandramby soa ahy ty anti-panahy. Nisy fotoa aho tena nikivy tanteraky, ka tsy ta himpoly amy Jehovah sasy. Fe nivola amiko anti-panahy rey hoe tean’i Jehovah noho Jesosy aho laha tsy kivy, fa hanohy ty ezaky ataoko avao. Lafa nivoaramby ndraiky aho, le nandramby soa ahy noho ty fianakaviako ty fiangona. Naneky hianatsy Baiboly valiko tafara atoy, le miaraky manompo an’i Jehovah zahay trano raiky henanizao.” Azo antoky fa tena falifaly Mpisorobentsika be fitiava iny, lafa mahita ty olo iaby amy fiangona eo manampy ani-azy mibebaky iny himpoly ndraiky!

16. Manino ty fananantsika Mpisorobe mahay miferinay antsika manahaky ani-zay ro tena ankasitrahanao?

¹⁶ Nanampy olo maro Jesosy tamy ie tan-tany etoy sady tamy fotoa tena nilan-drozy azy ty nanaovany ani-zay. Afaky matoky tanteraky koa tsika henanizao fa hanampy antsika ie lafa mila fanampea tsika. Tsy ho ela koa, zany hoe amy tontolo vaovao ao, le hanampy ty olo manoriky safà ho afaky tanteraky amy vokatsin’ny ota noho tsy fahalavoraria ie. Misaotsy bevata an’i Jehovah Ndranahary tsika, satria tena tea antsika noho soa fanahy amintsika ie, ka nanendry an’ny Anany iny mba ho Mpisorobe mahay miferinay antsika!