Salamo

1 E fiafia+ le tagata e lē savali i fautuaga a ē e amioleaga,+

E lē tū o ia i le ala o ē e agasala,+

E lē nofo foʻi i le nofoa o ē e tauemu.+

 2 Ae e naunau o ia i le tulafono a Ieova,+

E faitau lē leoa o ia i lana tulafono i le ao ma le pō.+

 3 E avea o ia e pei lava o se laau ua totō i tafatafa o vaitafe,+

E fua mai ona fua i ona lava tau+

E lē mamae foʻi ona lau,+

Ae e taulau manuia mea uma e na te faia.+

 4 E lē faapena o ē e amioleaga,

Ae peitaʻi, e pei i latou o aputi o saito ua lelea i le matagi.+

 5 O le mea lea e lē tutū ai o ē e amioleaga i le faamasinoga,+

E lē tutū foʻi o ē e agasala i le faapotopotoga o ē e amiotonu.+

 6 Auā ua silafia e Ieova le ala o ē e amiotonu,+

Ae e faaumatia lava le ala o ē e amioleaga.+