Luka

2 I na aso, na oo mai ai le poloaʻiga+ a Kaisara Aokuso ina ia tusia igoa o tagata uma o le lalolagi; 2 (o lenei uluaʻi tusigāigoa, na faia a o avea Kurenio ma kovana i Suria;) 3 ma na faimalaga atu tagata uma i o latou aai ina ia tusia+ o latou igoa. 4 Ua alu aʻe foʻi Iosefa mai i Nasareta le aai o Kalilaia e agaʻi i Iutaia, i le aai o Tavita ua taʻua o Peteleema,+ auā o ia o se tasi o le aiga o Tavita,+ 5 ina ia tusia o la igoa faatasi ma Maria,+ o lē ua ia faaipoipo atu i ai,+ ma o loo mamafa o ia i lana tama.+ 6 A o iai i laʻua i inā, ua oo i le aso e fanau ai o ia. 7 Ua fanaua e ia lana tama tama, o le ulumatua lea.+ Ua ia faapulupulu o ia i ʻie ma faataoto i le mea e tuu ai meaʻai a manu,+ auā e leai se avanoa mo i latou i le fale talimālō.

8 Ua iai foʻi i lenā nuu o leoleo mamoe, o loo nonofo i fafo i le pō ma vaavaai a latou lafu. 9 Ona faafuaseʻi lea ona tū mai o le agelu+ a Ieova i o latou luma, ua pupula faataaliʻoliʻo iā i latou le mamalu+ o Ieova ma ua latou matuā fefefe ai. 10 A ua fai atu le agelu iā i latou: “Aua tou te fefefe. Faauta! Ou te faailoa atu iā te outou le tala lelei e olioli ai tagata uma,+ 11 auā ua fanau mai i le asō i le aai o Tavita,+ le Faaola,+ o Keriso le Alii.+ 12 O le faailoga lenei mo outou: O le a outou maua le pepe o faapulupulu i ʻie ma o loo taoto i le mea e tuu ai meaʻai a manu.” 13 Ona faafuaseʻi lea ona faatasi ane i le agelu o le ʻau e toʻatele mai le lagi,+ ua latou vivii atu i le Atua+ e faapea: 14 “Ia tuu atu le viiga i le Atua o i le lagi,+ ma le filemu+ i le lalolagi i tagata ua ia finagalo malie i ai.”+

15 Ina ua toe foʻi agelu i le lagi, ona talatalanoa lea o leoleo mamoe e faapea: “Tatou ō loa i Peteleema ma vāai i le mea ua tupu e tusa ai ma le mea ua faailoa mai e Ieova+ iā i tatou.” 16 Ua latou faanatinati atu ma maua ai Maria ma Iosefa, faapea foʻi ma le pepe o loo taoto i le mea e tuu ai meaʻai a manu. 17 Ina ua latou vāai i le pepe, ona latou faailoa atu lea o upu a le agelu e faatatau iā te ia. 18 Ua ofo i latou uma ua faalogo i ai i mea ua taʻu atu e leoleo mamoe, 19 a ua taofimau e Maria nei upu uma, ma ua manatunatu i ai i lona loto.+ 20 Ona toe foʻi lea o leoleo mamoe, ua faamamalu ma vivii i le Atua ona o mea uma ua latou faalogo ma vāai i ai, e pei ona taʻuina mai iā i latou.

21 Ua atoa aso e valu+ e tatau ona peritome+ ai o ia, ma ua faaigoa o ia iā Iesu,+ o le igoa foʻi lea na taʻu atu e le agelu a o leʻi iai o ia i le manava o lona tinā.+

22 Ina ua atoa aso mo le faamamāina+ o i laʻua e tusa ai ma le tulafono a Mose, ona la aumaia lea o ia i Ierusalema ma tuu atu i luma o Ieova, 23 e pei ona tusia i le tulafono a Ieova: “O tama ulumatua uma lava, e paia i latou iā Ieova,”+ 24 ma ia ofo atu taulaga e tusa ma le tulafono a Ieova: “O ni manutagi se lua po o ni tamaʻi lupe se lua.”+

25 Faauta! ua iai se tagata amiotonu ma amioatua e igoa iā Simeona i Ierusalema, o loo faatalitali atu i le faamāfanafanaina o Isaraelu,+ ma ua i ona luga foʻi le agaga paia. 26 Ua faailoa atu foʻi e le Atua iā te ia e ala i le agaga paia, e lē oti o ia seʻia vaai muamua i le Keriso+ ua auina mai e Ieova. 27 Ona o le taʻitaʻiga a le agaga,+ ua sau ai o ia i le malumalu, ma ua aumai le tamaitiiti o Iesu e ona mātua, ina ia faia iā te ia e tusa ai ma tū masani o le tulafono.+ 28 Ua sapai e ia le tamaitiiti ma faamanū atu i le Atua ma faapea atu: 29 “O lenei, le Alii Pule Silisili Ese e, ua e tuu atu lau pologa e alu ma le filemu+ e tusa ma lau folafolaga; 30 auā ua vaai oʻu mata i lē e aumaia le faaolataga+ 31 lea ua e saunia ina ia iloa atu e tagata uma,+ 32 o le malamalama+ e aveesea ai le ufiufi+ mai i atunuu,+ ma o le mamalu foʻi lea o lou nuu o Isaraelu.” 33 A ua taumānatu pea lona tamā ma lona tinā i mea ua taʻuina mai e faatatau i le tamaitiiti. 34 Ua faamanuia atu Simeona iā i latou, ae ua faapea atu iā Maria lona tinā: “Faauta! Ua tofia le tama e paʻuʻū+ ma toe tutū ai le toʻatele i Isaraelu,+ ua fai foʻi o ia ma faailoga e inosia ai+ 35 (ioe, e tuia foʻi lou lava loto ia ati i le pelu),+ ina ia faaalia ai manatunatuga o loto o tagata e toʻatele.”+

36 Ua iai Ana le perofeta fafine, o le afafine o Fanuelu o le ituaiga o Asera (ua afu lona soifua, ma sa la nonofo ma lana tane i tausaga e fitu mai lava i lona taupou, 37 ua oti lana tane+ ma e valu sefulu fā ona tausaga,) e iai pea o ia i le malumalu e fai le auaunaga paia i le pō ma le ao,+ faatasi ma anapogi ma tatalo faatauanau. 38 I lenā lava itula, ua faalatalata atu ai o ia ma faafoʻi atu le faafetai i le Atua, ma talanoa atu e uiga i le tamaitiiti iā i latou uma o loo faatalitali mo le laveaʻiina o Ierusalema.+

39 Ua uma ona la faia mea uma e tusa ma le tulafono+ a Ieova, ona toe foʻi lea i Kalilaia i lo laʻua aai o Nasareta.+ 40 Ua tuputupu aʻe le tamaitiiti ma faasolo ina malosi,+ ua tumu o ia i le atamai, ma ua alofaina+ pea o ia e le Atua.

41 E masani ona ō atu ona mātua i Ierusalema+ i lea tausaga ma lea tausaga, mo le tausamiga o le paseka. 42 Ina ua sefulu lua ona tausaga, ona latou ō aʻe ai lea e tusa ma le tū masani+ o le tausamiga 43 ma nonofo ai i inā seʻia oo ina māeʻa. Peitaʻi, ina ua toe foʻi i laʻua, a ua nofo ai pea le tama o Iesu i Ierusalema ae e leʻi iloa e ona mātua. 44 Ua manatu i laʻua ai o faimalaga faatasi atu o ia ma le ʻaumalaga. Ae pe tusa ma le aso talu ona ō ese mai,+ ona la saʻili lea o ia i o la aiga ma ē masani. 45 Peitaʻi, e leʻi maua o ia, ona la toe foʻi atu lea i Ierusalema, ma matuā saʻili iā te ia. 46 Ua mavae aso e tolu, ona la maua ai lea o ia i le malumalu,+ o loo nonofo faatasi ma aʻoaʻo, o loo faalogologo ma tuufesili atu iā i latou. 47 A ua matuā ofo i latou uma o ē ua faalogologo iā te ia i lona malamalama ma ana tali ua fai atu.+ 48 Ua maofa i laʻua ina ua vāai mai iā te ia, ma ua faapea mai lona tinā iā te ia: “Laʻu tama e, o le ā le mea ua e faapea mai ai iā i maʻua? Ua ma fiu ma lou tamā e suʻe oe.” 49 Ae ua faapea atu o ia iā i laʻua: “Aiseā na lua suʻeina ai aʻu? Pe lua te lē iloa ea e tatau ona ou iai i le fale o loʻu Tamā?”+ 50 Ae peitaʻi, la te leʻi malamalama i mea ua ia fai atu ai iā i laʻua.+

51 Ona latou ō lea ma ona mātua i Nasareta, ma ua gauaʻi+ pea o ia iā i laʻua. A ua taofimau pea i le loto o lona tinā nei mea uma.+ 52 Ua tupu le atamai+ ma le tino o Iesu, ma ua alofaina o ia e le Atua atoa ma tagata.+