O le Tusi Lona Lua o Tupu

7 Ona fai atu lea o Elisaia, “Ia outou faalogologo mai i le afioga a Ieova. O le mea lenei ua fetalai mai ai Ieova: ‘O taeao i le taimi faapenei, e faatau atu ai i le faitotoʻa* o Samaria le sea* o le falaoamata lelei i le sekeli,* ma sea e lua o karite i le sekeli.’”+ 2 Ona faapea mai lea o le auauna maufaatuatuaina a le tupu i le tagata o le Atua moni: “E tusa pe e tatalaina e Ieova faitotoʻa o vai i le lagi, pe e mafai ona tupu o lenei mea?”+ Ona fai atu lea o Elisaia: “O le a e vaaitino i ai,+ ae e te lē ʻai ai.”+

3 Na iai ni lepela se toʻafā i le faitotoʻa o le pā o le aai;+ ua latou fai ane foʻi o le tasi i le isi: “Aiseā ua tatou nonofo ai i inei e tatou te feoti ai? 4 Afai e tatou te faapea ane, ‘Seʻi o tatou ō atu i le aai,’ ae o loo iai le oge i le aai,+ o le a tatou feoti ai i inā. Ae afai e tatou te nonofo i inei, e tatou te feoti foʻi. O lenei, seʻi o tatou ō atu i le togālauapi a tagata Suria. Afai e latou te faasaoina i tatou, ona tatou feola ai lea; ae afai e latou te fasiotia i tatou, ona tatou feoti ai lea.” 5 Ua tutulaʻi i latou i le afiafipō ma ō atu i le togālauapi a Suria. Ina ua latou oo atu i le faatausiʻusiʻuga o le togālauapi a Suria, faauta! e leai se tagata o iai.

6 Auā ua faapogaia e Ieova le ʻautau a Suria e faalogo i le paʻō o kariota tau ma solofanua, o le ʻautau e toʻatele+ lava. Ona latou faapea ane lea o le tasi i le isi: “Faauta! Ua totogi e le tupu o Isaraelu tupu o Heti ma tupu o Aikupito, ina ia siitaua mai iā i tatou!” 7 Ona latou tutū loa lea i luga ma sosola i le pō, ae tuua o latou faleʻie, o solofanua, o asini, ma le togālauapi e pei ona iai, ua sosola i le fia feola.

8 Ina ua oo atu nei lepela i le faatausiʻusiʻuga o le togālauapi, ona latou ulu atu lea i le tasi faleʻie, ua aai, ma feinu, ma ave siliva, o auro, ma ofu, ona ō lea ma nanā. Ua latou toe foʻi mai ma ulu atu i le isi faleʻie, ma ave foʻi mea mai i inā, ua latou ō ma nanā.

9 Mulimuli ane, ua faapea ane le tasi i le isi: “E lē saʻo lenei mea ua tatou faia. O le aso lenei, o le aso o le tala lelei! Afai e tatou te faatuai ma faatali seʻia malama le taeao, o le a faasalaina i tatou. O lenei, se‘i tatou ō e taʻu atu le tala i le aiga o le tupu.” 10 Ona latou ō mai lea ma valaau mai i leoleo faitotoʻa o le aai, ma faamatala mai e faapea: “Na matou ō atu i le togālauapi a Suria, ae e leai ma se tasi o iai i inā, e matou te le‘i lagonaina foʻi se leo o se tagata. E na o solofanua ma asini o loo nonoa ai, o loo iai foʻi faleʻie e pei lava ona iai.” 11 Ona valaau atu lea o leoleo faitotoʻa ma taʻu atu i le aiga o le tupu.

12 Ona tulaʻi loa lea o le tupu i le pō ma faapea atu i ana auauna: “Faamolemole, seʻi oʻu taʻu atu iā te outou le mea ua faia e Suria iā i tatou. Ua latou iloa ua tatou fia aai,+ o lea ua latou ō ai i tua o le togālauapi ma lalafi ai i le fanua, ua faapea ane, ‘Pe a latou ō mai i fafo o le aai, ona tatou pupuʻe ola ai lea o i latou, ma tatou ō atu ai loa i le aai.’”+ 13 Ona faapea mai lea o se tasi o ana auauna: “Faamolemole, seʻi ave e ni tamāloloa ni solofanua se lima o totoe i le aai. Faauta! O le a latou feoti, e pei lava ona o le a feoti o i latou uma o Isaraelu o loo totoe i inei. Faauta! O le a latou feoti foʻi e pei o tagata Isaraelu uma ua feoti. Seʻi o tatou aauina atu i latou ma iloa ai.” 14 Ona latou ave lea o kariota solofanua e lua, ma ua aauina atu i latou e le tupu i le togālauapi a Suria, ua faapea atu: “Inā ō ia ma vaavaai.” 15 Ua latou mulimuli atu i le mea na ui ai tagata Suria, ua oo atu i Ioritana; faauta! ua fola solo i le auala ofu ma ipu na lafoaʻia e tagata Suria a o latou sosola ese. Ona toe foʻi mai lea o avefeʻau ma taʻu mai i le tupu.

16 Ona ō atu lea o le nuu ma faoa mea mai i le togālauapi a Suria; o lea ua faatau atu ai le sea o le falaoamata lelei i le sekeli, ma sea e lua o karite i le sekeli, e tusa ma le afioga a Ieova.+ 17 Ua tofia foʻi e le tupu lana auauna maufaatuatuaina e pule i le faitotoʻa, ae ua soli o ia e le nuu i le faitotoʻa ma ua oti ai, e pei o upu a le tagata o le Atua moni na fai atu i le tupu, ina ua alu ifo iā te ia. 18 O lea, ua taunuu ai le mea na fai atu ai le tagata o le Atua moni i le tupu, e faapea: “E faatau atu sea e lua o karite i le sekeli, e faatau atu foʻi le sea o le falaoamata lelei i le sekeli, i le taimi faapenei a taeao i le faitotoʻa o Samaria.”+ 19 Ae ua faapea mai le auauna maufaatuatuaina a le tupu, i le tagata o le Atua moni: “E tusa pe e tatalaina e Ieova faitotoʻa o vai i le lagi, pe e mafai ona tupu o lenei mea?” Ona fai atu lea o Elisaia: “O le a e vaaitino i ai, ae e te lē ʻai ai.” 20 O le mea tonu lava lenā na tupu iā te ia, auā na solia o ia e le nuu i le faitotoʻa, ma ua oti ai.