O le Tusi Lona Lua o Tupu
8 Ua fai atu Elisaia i le fafine o lē na ia toe faatūina* lana tama:+ “Tulaʻi ia ma e alu, o oe ma lou aiga, ma aumau o ni tagata ese i so o se mea e mafai ona outou aumau ai, auā ua faailoa mai e Ieova o le a tuuina mai se oge,+ ma e fitu tausaga e oo mai ai le oge i le nuu.” 2 Ona tulaʻi lea o le fafine ma faia e pei ona fai atu ai le tagata o le Atua moni, ua latou ō ma lona aiga, ma ua aumau i le nuu o Filisitia+ mo tausaga e fitu.
3 I le faaiʻuga o tausaga e fitu, na toe foʻi mai ai le fafine mai i le nuu o Filisitia, ua alu atu ma talosaga atu i le tupu mo lona fale ma lona fanua. 4 O le taimi lea ua fai atu ai le tupu iā Kiasi le auauna a le tagata o le Atua moni, e faapea: “Faamolemole, seʻi e faamatala mai iā te aʻu mea mataʻina uma na faia e Elisaia.”+ 5 A o ia faamatala atu i le tupu le tagata oti na toe faatūina e Elisaia,+ ona sau ai lea o le fafine e ana le tama na ia toe faatūina, ma talosaga atu i le tupu mo lona fale ma lona fanua.+ Ona faapea mai lea o Kiasi: “Loʻu alii e, le tupu, o le fafine lenei, ma o lana tama lenei na toe faatūina e Elisaia.” 6 Ua fesili atu le tupu i le fafine, ona ia faamatala mai lea iā te ia o le tala. Ona tofia lea e le tupu se tagata aloaʻia e fesoasoani i le fafine, ua faapea atu: “Ia toe faafoʻi atu iā te ia ana mea uma, ma mea uma o le fanua e amata mai i le aso na ia tuua ai le nuu, seʻia oo mai i le aso lenei.”
7 Ua alu atu Elisaia i Tamaseko,+ a o maʻi Peniata+ le tupu o Suria. Ua ta‘u atu iā te ia le tala, e faapea: “O lea ua sau i inei le tagata o le Atua moni.”+ 8 Ona fai atu lea o le tupu iā Asaeli:+ “Ia ave se meaalofa ma e alu e faafetaui le tagata o le Atua moni.+ Ia e fesili atu iā Ieova e ala iā te ia, e faapea, ‘Po ou te toe malosi ea mai i lenei maʻi?’” 9 Ona alu lea o Asaeli e faafetaui o ia ma ave le meaalofa, o mea lelei uma o Tamaseko, o avega a kamela e 40. Ua sau o ia ma tū i luma o Elisaia, ua faapea mai: “Ua auina mai aʻu iā te oe e lou atalii o Peniata le tupu o Suria, ua faapea mai, ‘Po ou te toe malosi ea mai i lenei maʻi?’” 10 Ona fai atu lea o Elisaia iā te ia: “Inā alu ia ma fai atu iā te ia, ‘E te toe malosi lava,’ ae ua faailoa mai e Ieova iā te aʻu, o le a oti lava o ia.”+ 11 Ua pulatoʻa atu pea o ia, ma iʻu ai ina mā Asaeli. Ona tagi ai lea o le tagata o le Atua moni. 12 Ua fesili mai Asaeli: “Aiseā ua tagi ai loʻu alii?” Ua ia tali atu: “Auā ua ou iloa lelei mea leaga o le a e faia i le fanauga a Isaraelu.+ E te susunu i le afi o latou aai malupuipuia, e te fasiotia i le pelu o latou tane ua filifilia, e te tuʻimomomo a latou fanau, ma e te faatiau foʻi o latou fafine totō.”+ 13 Ua fai mai Asaeli: “E faapefea i lau auauna, o lē ua na o se taʻifau, ona faia lenā mea mataʻutia?” Ae ua fai atu Elisaia: “Ua faaali mai e Ieova iā te aʻu, o le a fai oe ma tupu o Suria.”+
14 Ona alu ese lea o ia mai iā Elisaia, ma ua toe foʻi i lona alii, o lē na faapea mai iā te ia: “O le ā se tala a Elisaia iā te oe?” Ua ia faapea atu: “Na fai mai o ia o le a e toe malosi lava.”+ 15 Ae i le aso e sosoo ai, ua ave ai e Asaeli se ʻie ma fufui i le vai, ua tuu i foliga o le tupu ma pupuni ai lana mānava ina ia oti ai.+ Ona avea lea o Asaeli ma tupu e sui iā te ia.+
16 O le tausaga lona lima o le nofoaiga a Ioramo+ le atalii o Aapo le tupu o Isaraelu, a o fai Iosefatu ma tupu o Iuta, na fai ai Ioramo+ le atalii o Iosefatu ma tupu o Iuta. 17 E 32 ona tausaga ina ua fai o ia ma tupu, ma e valu tausaga na ia pule ai mai i Ierusalema. 18 Na savali o ia i le ala o tupu o Isaraelu,+ e pei ona faia e i latou i le aiga o Aapo;+ auā na fai le afafine o Aapo ma ana avā,+ ma na ia faia pea mea leaga i le silafaga a Ieova.+ 19 Ae e leʻi finagalo Ieova e faaoo mai le faaumatiaga iā Iuta ona o Tavita lana auauna,+ auā na ia folafola mai iā te ia, e na te tuuina mai pea se lamepa iā te ia+ ma lana fanau.
20 O aso o Ioramo, na fouvale ai Etoma iā Iuta+ ma faia so latou lava tupu.+ 21 Ona alu atu lea o Ioramo faapea ma ana kariota uma i Seila, ma ua siʻosiʻomia o ia ma alii e pule i kariota, e tagata Etoma. Ae ua tulaʻi o ia i le pō ma faatoʻilaloina i latou, ona sosola lea o le nuu i o latou faleʻie. 22 Ae o loo fouvale pea Etoma iā Iuta e oo mai i le aso nei. O le taimi lenā na fouvale ai foʻi ma le nuu o Lipena.+
23 A o le olaga uma o Ioramo ma mea uma na ia faia, po ua lē o tusia ea i le tusi o talafaasolopito o tupu o Iuta? 24 Ona taoto lea o Ioramo faatasi ma ona augātamā, ma ua tanu faatasi ma ona augātamā i le Aai a Tavita.+ Ona avea lea o Aasaia+ lona atalii ma tupu e sui iā te ia.
25 O le tausaga lona 12 o le nofoaiga a Ioramo le atalii o Aapo le tupu o Isaraelu, na avea ai Aasaia le atalii o Ioramo le tupu o Iuta ma tupu.+ 26 E 22 tausaga o Aasaia ina ua fai o ia ma tupu, ma e tasi le tausaga na ia pule ai mai i Ierusalema. O le igoa o lona tinā, o Atalia+ le afafine o le atalii o Omeri+ le tupu o Isaraelu. 27 Ua savali o ia i ala o le aiga o Aapo,+ ma faia pea mea leaga i le silafaga a Ieova e pei o le aiga o Aapo, auā e tau o ia i le aiga o Aapo.+ 28 Ua la ō ma Ioramo le atalii o Aapo, e siitaua iā Asaeli le tupu o Suria i Ramota-kiliata,+ ae ua faamanuʻalia Ioramo e ʻautau a Suria.+ 29 Ona toe foʻi lea o le tupu o Ioramo i Isereelu+ e togafiti ona manuʻa, na faamanuʻalia ai o ia e Suria i Rama, ina ua tau o ia ma Asaeli le tupu o Suria.+ Ua alu ifo Aasaia le atalii o Ioramo le tupu o Iuta, e vaai Ioramo le atalii o Aapo i Isereelu, auā ua faamanuʻalia o ia.*