O le Tusi iā Tito

1 O aʻu o Paulo, o se pologa a le Atua ma o se aposetolo a Iesu Keriso e tusa ai ma le faatuatua o ē ua filifilia e le Atua, ma le poto saʻo i le upu moni lea e ōgatusa ma le faamaoni i le Atua 2 e faavae i le faamoemoe o le ola e faavavau+ lea na folafola mai i aso anamua e le Atua, e lē mafai ona tala pepelo;+ 3 ae i lana taimi e tatau ai, na ia faaalia mai ai lana afioga e ala i le talaʻiga lea na tuuina mai iā te aʻu,+ e tusa ma le faatonuga a le Atua lo tatou Faaola; 4 o le tusi lenei iā Tito le atalii moni, e tusa ai ma le faatuatua ua tatou talitonu uma i ai:

Tau ina ia iā te oe le agalelei faifua ma le filemu mai i le Atua le Tamā, ma lo tatou Faaola o Keriso Iesu.

5 Na ou tuua oe i Kereta ina ia e faasaʻoina mea sa faalētonu, ma tofia toeaina i lea aai ma lea aai e pei ona ou faatonu atu ai iā te oe: 6 e lē tatau ona taʻuleagaina se toeaina o le faapotopotoga,* o se tane e tasi le avā, e talitonu lana fanau ma e lē tuuaʻia foʻi i latou i amioga valea* po o le fouvale.+ 7 I le avea ai o se auauna pule a le Atua, e lē tatau ona taʻuleagaina se ovasia,* e lē lotomaaa,+ e lē maitaita,+ e lē o sē e onā, e lē sauā,* e lē o sē e matapeʻapeʻa i mea e maua e ala i faiga faapiʻopiʻo, 8 ae e talimālō,+ e fiafia i amioga lelei, e mafaufau lelei,+ e amiotonu, e faamaoni,+ e amio pulea,+ 9 e taofimau i upu faamaoni* e tusa ai ma lona tomai e aʻoaʻo atu,+ ina ia mafai ona ia faalaeiau* atu e ala i aʻoaʻoga e aogā,*+ ma aʻoaʻi+ i ē e tetee mai.

10 Auā e toʻatele tagata fouvale, o ē e tautatala i mea e lē aogā, ma ē e taufaasesē, aemaise i latou e tausisi i le peritomeina.+ 11 E tatau ona punitia o latou gutu, auā o tagata na ua latou faaleagaina pea le faatuatua o aiga atoa, i lo latou aʻoaʻo atu o mea e lē tatau ona aʻoaʻoina atu ona o le fia maua o mea e ala i faiga faapiʻopiʻo. 12 Ua faapea mai se tasi o i latou, o lo latou lava perofeta: “E pepelo i taimi uma tagata Kereta, o ni manufeʻai mataʻutia, o ni ē e paiē ma soona aai.”

13 E moni lenei molimau. O le mea lea, ia e matuā aʻoaʻi atu pea iā i latou, ina ia latou malolosi i le faatuatua, 14 ma aua neʻi uaʻi atu i tala o le vavau a tagata Iutaia, ma poloaʻiga a tagata o ē ua liliuese mai i le upu moni. 15 E mamā mea uma i tagata e mamā o latou mafaufau;+ ae e leai se mea e mamā i tagata e palapalā o latou mafaufau ma e lē faatuatua, auā ua palapalā o latou mafaufau ma lotofuatiaifo.+ 16 Ua latou taʻutino atu i luma o tagata ua latou iloa le Atua, ae ua latou faafitia o ia e ala i a latou galuega,+ auā ua inosia i latou ma ua lē usiusitaʻi, ma ua lē taliaina mo so o se galuega lelei.