O Fea se Atunuu O loo Aunoa ma ni Solitulafono?

O lona falelauasiga o se tasi o falelauasiga tele ua molimauina e tagata Moscow talu mai le tele o tausaga. E faitau afe tagata sa laina i alatetele mo a latou toe faaaloaloga mo le talavou Rusia o lē na maliufasia ia Mati 1, 1995, i pulufana a tagata na totogi faapitoa e nisi e faia le faalavelave. Na fanaina Vladislav Listyev ma maliu ai lava i faasitepu o le faitotoa o lona fale, o lē na filifilia o le tagata tusitala aloaia o le tausaga e 1994, sa matuā aloaia ma tausaafia lona tulaga a o galue ai i le televise.

A O LEI atoa le tolu vaiaso mulimuli ane ai, ia Mati 20, na taia ai le auala lea e eli atu i lalo mo nofoaafi i Tokyo, i se kasa oona i le taimi o le pisi o tagata o loo usu i galuega. E iai tagata na maliliu ai; e toatele foi isi na matuā manunuʻa tigaina.

Ona oo mai lea ia Aperila 19, na taulai atu ai le matamata a tagata maimoa o le televise, i le aai o Oklahoma. Na latou maimoa atu ma le gatete a o ave ese mai e tagata galulue laveai, tino ua matuā faaleagaina mai vaega o le fale o le malo lea na faaleagaina e le pomu a le ʻau faatupu faalavelave. O le aofai o tagata na maliliu ai e 168.

I le faaiuga o Iuni o le tausaga ua teʻa, na tupu ai foi le isi osofaiga faapena, i tafatafa ane o Dhahran, i Saudi Arabia, na fasiotia ai tagata Amerika e 19 ae manunuʻa le 400.

O nei mea e fa na tutupu ua faataitaia mai ai le laasaga fou ua oo i ai le solitulafono. O solitulafono e “masani ai” ua faateleina pea ona faaopoopo atu i ai ia gaoioiga sauā a tagata faatupu faalavelave. Ma o mea uma ia e fa na tutupu atoa ma auala eseese na faataunuu ai—ua faaalia ai le faigofie tele ona aafia tagata uma i osofaiga solitulafono. Pe o e i le fale, i le galuega, po o luga foi o le auala, e mafai ona e aafia ai ona o solitulafono. O le mea moni, i se suesuega na faia i Peretania na faaalia ai e toetoe lava o le tolu kuata o tagata Peretania e manatu e telē se ono aafia o latou i le taimi nei ona o solitulafono, nai lo o le sefulu tausaga ua mavae. E ono faapena le tulaga i le mea o e soifua ai.

O tagatanuu tausi tulafono o loo moomoo mo se malo e mafai ona ia faia ni mea e sili atu i le na ona pulea o le solitulafono. Latou te mananao i se malo na te faamutaina solitulafono. Ma a o mātauina le lelei o nisi malo i le pulea o le solitulafono nai lo isi e ala i le faaitiitia o solitulafono, ae o le tulaga aoao tetele lava ia ua faaalia ai ua lē taulau faiga malo a tagata i le tauiviga e tetee i solitulafono. Ae, e lē o se mea ua lē talafeagai pe lē fetaui le talitonu e faapea ua lē o toe umi ae faamutaina e se faiga malo solitulafono. Peitai o lē fea faiga malo? Ma o afea?

[Pusa i le itulau 4]

SE LALOLAGI E TUMU I SOLITULAFONO

EUROPA: Na taʻua e se tusi Italia (“The Opportunity and the Thief”) e faapea i se taimi puupuu lava, na oo ai le aofai o solitulafono i mea totino i Italia i ni “tumutumuga na manatu e faigata ona ausia.” I Ukraine, o se atunuu na muai avea ma vaega o le Soviet Union, na lipotia ai le 490 solitulafono i le aofai o tagata e 100,000 i le 1985 ae 922 solitulafono i le 1992. O loo faatupulaia pea le fuainumera. E lētioa ona tusia e le nusipepa Rusia (“Arguments and Facts”): “Ua tatou faanaunau ia ola—ia ola pea—ia sao mai lenei vaitaimi ua tumu i le fefe . . . le fefe e malaga i se nofoaafi—e ono lavea pe faaleaga e nisi; le fefe e malaga i se vaalele—ua taatele le ʻave faamalosia o vaalele e tagata faatupu faalavelave pe paʻū foi le vaalele; le fefe e uia auala o nofoaafi o loo taʻi i lalo o le palapala—neʻi fetoʻai pe pa foi; le fefe e savali i alatetele—e te ono lavea i ni tauga fana pe gaoi e se isi au mea totino, tosoina faamalosi, fasi oe, pe fasiotia foi; le fefe e malaga i se taavale—e ono mu, pe pa, faaleagaina, pe gaoia foi; le fefe e ui atu i auala i totonu o fale tetele, faleʻaiga, po o faleoloa—e ono faamanuʻalia oe pe fasiotia i totonu o so o se tasi o na nofoaga.” Na faatusa e le nusipepa Hugakeri o le HVG se aai e suluia pea e le la i totonu o Hugakeri i le “Ofisaulu o le Mafia,” i le faapea mai i le tolu tausaga ua tuanai atu, na avea ma “nofoaga e amata ai so o se ituaiga solitulafono fou . . . O le fefe i mea tutupu ua faateteleina a o vaaia e tagata le lē lava saunia o leoleo e tauivi ma le Mafia.”

AFERIKA: Na lipotia mai e le Daily Times i Nigeria e faapea o “nofoaga o aʻoga maualuluga” i atunuu i Aferika i Sisifo ua tutupu ai ni “mea e faamataʻuina ai, e faapogaia e ni tagata o se vaega faalilolilo o lotu taufaasese; ua tauāu ina lē toe mafai ai ona faia ni aʻoga.” Na faaauau mai le lipoti e faapea: “Ua oo lava ina matuā faateteleina nei faiga, ma ua iu ina maumau ai ola atoa ma meatotino.” I le isi atunuu Aferika, na lipotia mai e le Star a Aferika i Saute e faapea: “E lua ituaiga o faiga sauā: o feteenaiga i totonu lava o le lotoifale, ma faiga sauā solitulafono ua masani ai. O le faiga sauā muamua ua matuā faaitiitia lava, ae o lona lua ua matuā oso maualuga aʻe lava.”

OSIANA: Na fuafuaina faatatau e le Vaega e Taulimaina Solitulafono i Ausetalia e faapea “pe tusa ma le $27 piliona i tausaga taitasi e faaalu ona o solitulafono, pe toeitiiti $1600 mo tamaloloa taitasi, fafine ma tamaiti.” Pe tusa lea “o le 7.2 pasene o tupe maua a le atunuu.”

AMERIKA: Na lipotia mai e le Globe and Mail a Kanata se faatelega o solitulafono o faiga sauā i Kanata i se vaitaimi e 12 tausaga faalausosoo na mavae atu nei, o lenei tulaga o se “vaega o le oso maualuga i le 50 pasene o faiga sauā i le sefulu tausaga ua teʻa.” I le taimi e tasi na lipotia ai e le El Tiempo a Kolomepia e faapea i Kolomepia, e 1,714 faiga e ʻave faamalosia ai tagata na tutupu i se tausaga lata mai nei, “o se fuainumera ua sili atu nai lo le faaluaina o le aofaiga o faiga uma faapena na lipotia mai i isi vaega o le lalolagi i le vaitaimi lava e tasi.” E tusa ai o le faamatalaga mai le Ofisa o Faamasinoga i Mekisikō, o le solitulafono i faiga faaleituaiga na faia i lo latou laumua pe tusa e tasi i totonu o itula taifa i se tausaga e lei leva tele atu. Na taʻua e se sooupu tamaitai e faapea ua faailogaina le senituri lona 20 i le faaitiitia o le tāua o tagata taitoatasi. Na faaiu lana faamatalaga i lona faapea mai: “O loo tatou ola nei i se tupulaga a uma loa ona faaaogā se mea ona tiaʻi loa lea.”

LALOLAGI AOAO: Ua taʻua e le tusi The United Nations and Crime Prevention se “faatelega faifai pea o soligatulafono i le lalolagi aoao mai le 1970 e oo i le 1989.” Ua taʻua: “O le aofai o solitulafono ua faamauina na oso aʻe mai le 330 miliona i le 1975 e oo atu toetoe 400 miliona i le 1980 ma e fuafua e pāʻia le ʻafa piliona i le 1990.”

[Ē Ana le Ata]

Map and globe: Mountain High Maps® Copyright © 1995 Digital Wisdom, Inc.

[Ē Ana le Ata i le itulau 3]

Earth on pages 3, 6, and 9: NASA photo