“Ua Maeʻa se Galuega Umi”

I LE limasefulu tausaga talu ai, na talanoa mai ai se tinā agalelei ua pe ā ma le 60 tausaga lona soifua, ma sa faafofoga atu i ai le lalolagi. Sa tupu lenei mea i Pale ia Tesema 10, 1948. Sa tauaofia le Fono Aoao a Malo Aufaatasi i le Palais Chaillot lea faatoʻā uma lava ona fausiaina ae tulai loa le tamaitai taitaifono o le Komisi o Aiā Tatau a Tagata a Malo Aufaatasi e fai lana lauga. I se leo malosi, sa taʻu atu ai e Eleanor Roosevelt, o se tamaitai umi ua maliu lana tane sa avea ma peresitene o Amerika, o Franklin D. Roosevelt, i ē sa tauaofia e faapea: “Ua tatou iai nei i le tauamatamataga o se mea iloga e lē gata i gaoioiga a Malo Aufaatasi ae faapena foi i soifua o tagata, o lena mea o le faamaonia mai lea e le Fono Aoao o le Faalauiloaga Faalauaitele o Aiā Tatau a Tagata.”

Ina ua maeʻa ona ia faitauina le faatomuaga autū o le Faalauiloaga malosi atoa ma mataupu e 30 sa aofia ai, sa taliaina loa e le Fono Aoao ia faamatalaga tusitusia.a Ina ia faamamaluina le taitaiga mataina a le Faletua o le peresitene o Roosevelt, na tutū uma sui o Malo Aufaatasi ma patipati atu mo “le Masiofo a le Lalolagi,” e pei ona sa lauiloa ai ma le tausaafia o ia. I le faaiuga o lena aso, sa ia tusia e faapea: “Ua maeʻa se galuega umi.”

Mai le Tele o Manatu Seia Oo Ina Tasi le Faalauiloaga

I le lua tausaga muamua atu, ia Ianuari 1947, ina ua faatoʻā amata galuega a le komisi o Malo Aufaatasi, na iloa manino ai e faapea o le tusiaina o ni faamatalaga e uiga i aiā tatau a tagata e ioeina uma e sui o Malo Aufaatasi o se gaoioiga e lē faigofie ona fai. E toʻa 18 sui o le komisi sa faaauau ona fefinauai ona o le lē malilie i se manatu e tasi, mai lava i le amataga. Na manatu le sui mai Saina e ao ona faaaofia ai i faamaumauga le filosofia a Confucius, na faatāua e se sui Katoliko o le komisi aʻoaʻoga a Thomas Aquinas, na sili atu i le Iunaite Setete le American Bill of Rights, ae mananao sui mai Rusia ia faaaofia ai ma manatu o Karl Marx—ma ua na o se vaega lenei o manatu malolosi sa faaalia!

O le faaauau ona lē autasi o sui o le komisi sa tofotofoina ai le onosai o le Faletua o le peresitene o Roosevelt. I le 1948, a o faia se lauga i Pale i le Sorbonne, sa ia taʻua ai e faapea sa masani ona ia manatunatu o le faia aʻe o sona aiga toatele sa tofotofoina ai le telē o lona onosai. Peitai, “o le pulea ma faatonutonuina o le Komisi o Aiā Tatau a Tagata e sili atu ona tele le onosai e manaomia ai,” o lana faamatalaga lena, sa faafiafiaina ai lana aufaalogologo.

E ui i lea, na matuā faamaonia lava le aogā o lona poto masani o se tinā. Na tusia e se tasi o tagata tusitala e faapea, o le taulimaina e le Faletua o le peresitene o Roosevelt o sui o le komisi ua faamanatu atu ai ia te ia se tinā o loo “pulea se aiga toatele lava e masani ona pisapisaō, o nisi taimi e faalogogata ai ae i se tulaga faavae o ni tamaiti lelei, o ē mai lea taimi i lea taimi latou te manaomia le maumauai ina ia faasaʻoina ai i latou.” (Eleanor Roosevelt—A Personal and Public Life) O le tuufaatasia o lona agalelei ma lona maumauai sa mafai ai ona ia faatalitonuina nisi e aunoa ma le iai o ni ona fili ia i latou na tetee i ona manatu.

O le iuga na oo i ai, ina ua mavae le lua tausaga o fonotaga, e faitau selau faasaʻoga, faitau afe faamatalaga, ma le 1,400 o faiga palota i upu uma lava ma faaupuga, na fai ai e le komisi se lisi tusitusia o aiā tatau a tagata lea e talitonu, e tatau i tane ma fafine uma i so o se vaipanoa i le lalolagi ona mauaina. Sa faaigoaina o le Faalauiloaga Faalauaitele o Aiā Tatau a Tagata. Na faataunuuina ai iina se tasi o galuega sa manatu i ai i le tele o taimi, e lē mafai ona fai.

Ni Faamoemoega Maualuluga mo Iuga Lelei

O le mea moni lava ia, e lei faatalitalia faapea o le a aunoa ai loa ma ni faiga sauā ina ua uma le uluai faalauiloaga o aiā tatau a tagata. Peitai, ina ua talia lenei Faalauiloaga Faalauaitele sa iai ni faamoemoega maualuluga mo iuga lelei o le a iai. O le peresitene o le Fono Aoao a Malo Aufaatasi i le taimi lena, o Dr. Herbert V. Evatt mai Ausetalia, sa ia valoia e faapea “e faitau miliona tane, o fafine, ma tamaiti i le lalolagi atoa, o ē e faitau maila le mamao mai i Pale ma Niu Ioka, o le a liliu atu mo se fesoasoani, se taitaiga, ma le faagaeeloto mai lenei faamatalaga tusitusia.”

Ua mavae nei le limasefulu tausaga talu ona taʻua e Dr. Evatt na upu. A o faagasolo lena vaitaimi, e toatele sa saili atu i lena Faalauiloaga o se taiala ma faaaogā foi e pei o se fua e fua ai le tele o le tausia o aiā atau a tagata i le lalolagi. A o latou faia faapea, o le ā na latou maua ai? Pe sa taualoa ea e sui o Malo Aufaatasi lenei fua? O le ā le tulaga o aiā tatau a tagata i le lalolagi i aso nei?

[Faaopoopoga i lalo]

[Pusa i le itulau 4]

O ā Aiā Tatau a Tagata?

E faamatalaina e Malo Aufaatasi aiā tatau a tagata e faapea “o aiā ia o loo fananau mai ma i tatou ma a aunoa ma ia aiā e lē mafai ona tatou ola o ni tagata soifua.” E faamatalaina foi aiā tatau a tagata e faapea o le “gagana masani i aga faatagata”—ma e matuā talafeagai lava. O le tomai e aʻoaʻo ma tautala i se gagana o se uiga na fanau mai ma i tatou ma ua avea ai i tatou ma tagata, o loo iai foi manaoga ma uiga na fananau mai ma i tatou ua faapena ona faaesea ai i tatou mai isi meafaiola i le lalolagi. Mo se faaaoaoga, e i le tagata le manaoga mo le fia maua o le poto, le tomai e faamatala atu ai foliga eseese o mea, atoa ma le faaleagaga. O se tagata la e taofia mai i le mauaina o ia manaoga autū ua faamalosia e ola e lē pei o se tagata. Ina ia puipuia tagata mai le oo i lea tulaga, na faapea mai se loia mo aiā tatau a tagata, “ua tatou faaaogā le faaupuga ‘aiā tatau a tagata’ na i lo ‘manaoga o le tagata’ auā i le tulaga moni lava ia o le upu ‘manaoga’ e lē malosi e pei o le upu ‘aiā tatau.’ O lo tatou taʻua la o se ‘aiā tatau’ ua tatou siitia ai le faamalieina o manaoga o le tagata i se mea e tatau ona maua e tagata taitoatasi uma lava e tusa ai i le tulaga tau amio tatau ma faaletulafono.”

[Pusa i le itulau 5]

Le Faalauiloaga Faalauaitele o Aiā Tatau a Tagata

O Aleksandr Solzhenitsyn o se tusitala ma o lē na maua le faailoga o le Nobel Prize sa ia taʻua le Faalauiloaga Faalauaitele o se “tusitusiga sili ona lelei” lea ua tusia e Malo Aufaatasi. E na o sina tepa lava i faasologa o mataupu o loo iai e iloa ai le mafuaaga ua ioe ai le toatele i lea manatu.

O le filosofia autū lava o le Faalauiloaga ua faataatia mai i le Mataupu 1: “O tagata soifua uma na soifua mai e saoloto ma e tutusa uma i le mamalu ma aiā tatau a tagata. Ua ia i latou tomai faalemafaufau ma se loto fuatiaifo ma e ao ona gaoioi le tasi agaʻi i le isi i se agaga faaleuso.”

I luga o lenei faavae, na faamautuina ai e i latou na faatulagaina le Faalauiloaga ni vaega se lua o aiā tatau a tagata. O le vaega muamua o loo faatulaga mai i le Mataupu 3: “O loo i tagata uma le aiā i le ola, le saolotoga ma le saogalemu o le tagata.” Ua faatulaga e le mataupu lenei le faavae mo aiā tatau faatagatanuu ma faapolotiki e pei ona tusia i le Mataupu 4 e oo i le 21. O le vaega lona lua e faavae i le Mataupu 22, lea o loo faapea mai se vaega, e aiā tagata uma taitoatasi i le faatinoina o aiā tatau “e matuā talafeagai mo lona mamalu ma le atiina ae saoloto o ona uiga totino.” E lagolagoina ai le Mataupu 23 e oo i le 27, lea o loo faamanino mai ai aiā a le tagata tautamaoaiga, vafealoai, ma tu ma aganuu. O le Faalauiloaga Faalauaitele o le uluai faamatalaga tusitusia lea faava-o-malo ua amanaiaina lenei vaega lona lua o aiā tatau ia faaaofia i aiā autū a tagata. O le uluai tusitusiga faava-o-malo foi lea ua faaaogaina le faaupuga “aiā tatau a tagata.”

Na faamatala e se tagata poto faapitoa i mataupu tau i le vafealoai mai Pasili e suafa ia Ruth Rocha i se gagana faigofie ma le manino le mea moni o loo taʻu mai ia i tatou e le Faalauiloaga Faalauaitele: “E lē afaina po o le ā lou lanu. E lē afaina po o oe o se tamaloa po o se fafine. E lē afaina po o le ā le gagana e te tautala ai, po o le ā lau tapuaiga, po o ā ou manatu faapolotiki, po o le ā le atunuu e te sau ai po o ai foi lou aiga. E lē afaina pe e te mauoa pe mativa. E lē afaina po o fea le vaega o le lalolagi e te sau ai; po o lou atunuu o se malo e pulea e se tupu pe fai sona peresitene. O nei aiā tatau ma saolotoga ua fuafuaina ina ia maua e tagata uma.”

Talu mai le taimi na talia ai, ua faaliliuina nei le Faalauiloaga Faalauaitele i gagana e sili atu i le 200 ma ua avea ma vaega o tulafono faavae a le tele o atunuu. Peitai, i aso nei, ua manatu nisi taʻitaʻi ua manaomia ona toe tusia le Faalauiloaga. Ae e lē ioe i ai le Failautusi Aoao o Malo Aufaatasi o Kofi Annan. Na sii mai e se tasi ofisa o Malo Aufaatasi le faamatalaga a le failautusi e faapea: “E pei lava ona leai se manaoga e toe tusia le Tusi Paia po o le Koran, e leai foi la se manaoga e toe teuteu ai le Faalauiloaga. O le mea lea e manaomia ona toe teuteu, e lē o mea o tusia i le Faalauiloaga Faalauaitele, ae o amioga a ona tagata.”

Failautusi Aoao a Malo Aufaatasi o Kofi Annan

[Ē Ana le Ata]

UN/DPI photo by Evan Schneider (Feb97)

[Ata i le itulau 3]

Le Faletua o le peresitene o Roosevelt o loo uuina le Faalauiloaga Faalauaitele o Aiā Tatau a Tagata

[Ē Ana le Ata]

Mrs. Roosevelt and symbol on pages 3, 5, and 7: UN photo