Se Manatu Mai le Fogafale 29

PE A e laa ese mai le lifi agaʻi i le fogafale 29 o le maota o Malo Aufaatasi i le Aai o Niu Ioka, e faasino atu e se tamai faailoilo lanumoana le auala agaʻi i le Ofisa o le Sui Komesina mo Aiā Tatau a Tagata (Office of the High Commissioner for Human Rights, [OHCHR]). O lenei ofisa mo fesootaiga o loo fai ma sui o le ofisa ulu o le OHCHR o loo i Sineva, i Suisilani—le taulaiga o gaoioiga a Malo Aufaatasi mo aiā tatau a tagata. O Mary Robinson, le Sui Komesina mo Aiā Tatau a Tagata, e faauluulu iai le OHCHR i Sineva, ae o Elsa Stamatopoulou o lē na fanau mai Eleni o le pule lena o le ofisa i Niu Ioka. I le amataga o le tausaga nei, na taliaina ai ma le agalelei e le Afioga a le faletua o Stamatopoulou se sui tusitala o le Ala Mai! ma toe tepa ai i tua i le limasefulu tausaga o galuega ua tuanai i aiā tatau a tagata. O nisi nei o vaega o le faatalatalanoaga sa faia.

F. O le ā se agaigai i luma e te manatu ua iai i le faaauilumaina o aiā tatau a tagata?

T. O le a ou avatu ia te oe ni faaaoaoga se tolu o le agaigai i luma ua iai: Muamua, i le 50 tausaga ua mavae o le mataupu e uiga i aiā tatau a tagata sa lei aofia ai i mataupu e talanoaina faava-o-malo; i aso nei o loo talanoaina ma faagaoioia i so o se vaipanoa. O malo e lei faalogo lava i aiā tatau a tagata i ni sefulu o tausaga ua teʻa, o lea ua talanoa i ai. Lona lua, o lea ua iai nei se faiga o tulafono faava-o-malo, po o se tusi tulafono, ua faia aʻe i le tele o faaiuga ma maliliega o loo tusia manino atu ai i malo a latou tiute tauave agaʻi i o latou tagatanuu. [Tagai i le pusa “Le Tulafono Faava-o-Malo o Aiā Tatau a Tagata,” i le itulau e 7.] E tele ni tausaga o galuega mamafa sa faaalu i le saunia o lenei tusi tulafono. Ua matou matuā fiafia lava i ai. O le faaaoaoga lona tolu, o le tulaga lea i aso nei ua matuā toatele lava tagata na i lo le taimi muamua ua auai i faalapotopotoga mo aiā tatau a tagata ma o loo mafai ona faailoa atu ma le manino o latou manatu e uiga i aiā tatau a tagata.

F. O ā ni toatuga?

T. Ina ua mavae nei le 17 tausaga talu ona ou galue i le polokalame a Malo Aufaatasi mo aiā tatau a tagata, ua ou matauina nei, e moni o loo feagai i matou ma faafitauli faavaivai loto ona o le lē taulau o le faamoemoe. O le faafitauli telē o le vaaiga lea a faiga malo, e masani ona vaai i aiā tatau a tagata o se mataupu faapolotiki na i lo o se mataupu mo le lelei o le tagata. Atonu latou te mumusu e faataunuu feagaiga o aiā tatau a tagata ona o loo popole i lo latou tulaga faapolotiki. E oo loa i tulaga faapena, ona leai loa lea o se malosi o feagaiga o aiā tatau a tagata. O se tasi lē taulau o le lē mafai lea e Malo Aufaatasi ona taofia le faaleagaina o aiā tatau a tagata i nofoaga e pei o le mea sa taʻua muamua o Sekosolovakia, Rwanda, ma talu ai nei lava i Algeria. O le leai o se malosi o Malo Aufaatasi e taofia ai fasiotiga tagata lē mafaufau sa faia i ia atunuu sa avea o se matuā lē taulau lava. O le tomai e faatino ai aiā tatau a tagata o loo iai, ae e tatau ona iai se tasi na te faagaoioia. O ai se tasi o le a ia faia? Afai o le a lē afaina le lelei o atunuu ia e ono mafai ona tulai mai e aumai se puipuiga, e masani lava ona leai se naunautaiga mai le au faipolotiki e fai ni gaoioiga e taofia ai le faaleagaina o aiā tatau a tagata.

F. O le ā sau silasila i le lumanai?

T. O loo oʻu iloa atu se faamataʻuga ma se faamoemoe i le ala e tau i aiā tatau a tagata mo tagata uma. O le mea o loo faapopoleina ai aʻu o le faamataʻuga lea e sau mai le faafesootaia faava-o-malo o le tulaga i mea tau tupe, lea e aofia ai faiga faapisinisi tetele o le a oo ina faavaeina i atunuu e taugofie ai le totogi o le au faigaluega. I aso nei, pe a manaomia, e mafai ona tatou faitioina atunuu mo le faaleagaina o aiā tatau a tagata ma faamalosia i latou e tausia aiā tatau. Peitai o ai o le a tatou faitioina mo lenei faaleagaina pe afai o loo aveesea e le tele o feagaiga tau faafetauaiga faapisinisi le pule mai i atunuu ma tuu atu i malosiaga tau tupe a le lalolagi? Ona e lē mafai ona matou puleaina nei malosiaga tau tupe, ua faavaivaia ai le tulaga o faalapotopotoga a atunuu e pei o Malo Aufaatasi. A fua la i aiā tatau a tagata, o lenei faiga e matuā matautia lava. Ua matuā tāua i le taimi nei ona faaaofia ai faalapotopotoga tumaoti e pei o faiga pisinisi i aiā tatau a tagata.

F. E faapefea le faamoemoe na e taʻua?

T. O le atinae lea o aganuu o aiā tatau a tagata. O le uiga o laʻu faamatalaga e ala i aʻoaʻoga e ao ona tatou fesoasoani ai i tagata ia amanaia aiā tatau a tagata. O le mea moni lava ia, o se matuā luitau lena mea auā o loo aofia ai le suiga faalemafaufau. O le mafuaaga lena, i le sefulu tausaga ua mavae, sa faia ai se tauiviga i le lalolagi atoa i mataupu e aʻoaʻo ai tagata e faatatau i a latou aiā tatau ma aʻoaʻo atunuu e uiga i o latou tiute tauave. E faaopoopo atu i ai, ua faapitoa e Malo Aufaatasi le tausaga 1995 e oo i le 2004 mo le “Sefulu Tausaga mo le Aʻoaʻoina i Aiā Tatau a Tagata” (Decade for Human Rights Education). O le faamoemoe, atonu e suia ai e aʻoaʻoga mafaufau ma loto o tagata. E ono tutusa ma le mea o fai mai ai le Tala Lelei, peitai a oo loa mataupu i aʻoaʻoga o aiā tatau a tagata, o aʻu le isi e talitonu maumauai i ai. Ou te faamoemoe o le a talia e le lalolagi aganuu o aiā tatau a tagata e avea ma taulaiga o mafaufau i le senituri o loo sosoo mai.

[Pusa i le itulau 7]

Le Tulafono Faava-o-malo o Aiā Tatau a Tagata

E ese mai i le Faalauiloaina Faalauaitele o Aiā Tatau a Tagata, o loo iai foi le Tulafono Faava-o-Malo o Aiā Tatau a Tagata. E faapefea ona fesootai nei mea?

Ia, a faapea e te faatusatusaina le Tulafono Faava-o-Malo o Aiā Tatau a Tagata i se tusi e lima ni ona mataupu, e ono faatusaina le Faalauiloaga Faalauaitele i le mataupu 1. O mataupu e 2 ma le 3 o le Feagaiga Faava-o-Malo mo Aiā Tatau Faapolotiki ma Faatagatanuu ma le Feagaiga Tautupe Faava-o-Malo, ma Aiā Tatau mo Tagata Lautele ma Aganuu. Ma o le mataupu e 4 ma le 5 o loo iai se Feagaiga Tuusaoloto.

A o manatu i le Faalauiloaga Faalauaitele faapea o loo iai tulaga tau amio e aogā, o loo taʻu atu ai i atunuu le mea e manaomia ona fai, o nei faamatalaga tusitusia faaopoopo e fa ua faamaonia faaletulafono, ua taʻu atu ai i atunuu le mea e ao ona latou fai. E ui lava na amata galuega mo nei faamatalaga tusitusia i le 1949, ae faitau sefulu ni tausaga na mavae faatoʻā faagaoioia. I aso nei, o faamatalaga tusitusia nei e fa atoa ma le Faalauiloaga Faalauaitele ua fai aʻe ai le Tulafono Faava-o-Malo o Aiā Tatau a Tagata.

E ese mai i lenei Tulafono Faava-o-Malo, ua faia foi e Malo Aufaatasi le sili atu i le 80 isi feagaiga o aiā tatau a tagata. “E sese la pe a manatu faapea o feagaiga o aiā tatau a tagata o loo i Tulafono Faava-o-Malo o feagaiga ia e sili atu ona tāua,” o le faamatalaga lena a se tagata poto faapitoa i aiā tatau a tagata. “Mo se faaaoaoga, o le Feagaiga i le 1990 i le Aiā Tatau a le Tamaitiiti o se mataupu tusitusia e sili ona faamaonia ma lautele lona talanoaina e le Malo Aufaatasi ae e ui i lea e lē o se vaega o le Tulafono Faava-o-Malo. O le faaupuga ‘Tulafono Faava-o-Malo o Aiā Tatau a Tagata’ na faaupuina mo le fuafuaga tau faasalalauga na i lo se fuafuaga aloaia faaletulafono. Ma e te ioeina, o se faaupuga faatosina.”a

[Faaopoopoga i lalo]

[Ata i le itulau 6]

Elsa Stamatopoulou

[Ē Ana le Ata]

UN/DPI photo by J. Isaac