E Tāua le Tātā Lelei o Lou Fatu

● O lou fatu o loo autū i ai le faataamilosaga o le toto i lou tino, ma o se totoga e galue mamafa. E sili atu ma le 100,000 taimi i le aso e tātā ai le fatu o le tagata matua. E tusa lava pe e te nofonofo, ae o loo galulue mamafa pea maso o lou fatu, e faaluaina i maso o ou vae i le taimi e te tamoʻe ai. Pe a manaʻomia e le tino, e faaluaina le topetope o le tātā o lou fatu i totonu o le lima sekone. I tagata mātutua, e i le va o le 5 lita (10 paina) e oo i le 20 lita le tele o le toto e pamu e le fatu i le minute, a o fai se faamalositino. E tusa ma le 5 lita le tele o le toto i le tino o le tagata.

E ofoofogia le faiga o loo faagaoioi ai e neura le tātā o lou fatu. O lenei faiga, e memeʻi muamua i totonu vaega i luga o le fatu e taʻua o atria, ona memeʻi ai lea o vaega i lalo e taʻua o ventricles, e na o se vaega o se sekone e va aʻi. O tātā o le fatu lea e lagona e fomaʻi i a latou mea faalogo, e māfua pe a tapuni alātoto o le fatu (valves), ae e lē o le tātā o maso o le fatu.

E Faa-piliona Ona Tatā

O le tulaga masani, e fua le tātā o le fatu o le manu i le telē o lona tino, o lona uiga, o le telē o le manu, o le gese foʻi lea o le tātā o lona fatu. O se faataʻitaʻiga, o le fatu o le elefane, e tātā faa-25 i le minute, a o le tamaʻi manulele, (segasegamauu) e faa-1,000 ona tātā i le minute! O le fatu o le tagata, e tātā faa-130 i le minute i le taimi e fanau mai ai, e oo i le 70 tātā i le minute pe a matua.

E faa-piliona ona tātā fatu o manuvaefa i o latou olaga atoa. O lea la, o le isumu, e 550 tātā o lona fatu i le minute, ma e latalata i le tolu tausaga e ola ai, a o le tafolā lanu moana, faa-20 tātā o lona fatu i le minute, ma e mafai ona ola e sili atu i le 50 tausaga. Ae e ese ai tagata. Pe a fua i le tātā o o tatou fatu, e na o le 20 tausaga e tatau ona tatou ola ai. Peitaʻi, o le fatu o se tagata e mālōlōina, e ono sili atu i le tolu piliona taimi e tātā ai, ma ola ai mo le sili atu i le 70 i le 80 tausaga!a

E ui i lea, e leai se tasi o i tatou e manaʻo e faatapulaa o tatou olaga i se aofaʻiga maʻoti o tātā o o tatou fatu, auā i totonu o o tatou loto e tatou moomoo ina ia ola e faavavau. O lenei faanaunauga, o se mea masani, auā na tuu e le Atua i totonu o i tatou. A o le mea sili, ua lata mai lava le taimi o le a soloiesea ai le agasala lea ua pogai ai le oti. (Roma 5:12) O le iʻuga, ua faapea mai le Faaaliga 21:3, 4: “o le a lē toe iai se oti.”

[Faaopoopoga i lalo]

[Siata/Ata i le itulau 23]

(Tagaʻi i le lomiga mo le ata atoa)

ATA O LE FATU

Atrium taumatau

Atrium agavale

Ventricle taumatau

Ventricle agavale