Musele—E Matuā Lelei le Fuafuaina

UA FAATUMAUINA le ola e ala i gaoioiga. Mo se faataitaiga, e gaoioi i luga ma lalo lou fatafata i mānava taitasi, ma e tātā lou fatu i se tulaga faifai pea, ma faatumauina ai pea lou ola. O le ā ua faapogaia ai nei gaoioiga? O musele!

O musele o ni tisu e malolosi ma memeʻi lea e mafai ai e vaega o lou tino ona gaoioi ma faailoa mai ou manatu ma faalogona e ala i gaoioiga. Po o gaoioiga o loo faia o le faaalia o laumata fiafia, ʻata, tagi, tautala, savali, tamoe, galue, taalo, faitau, po o le ʻai, o loo aafia ai lava musele. E faigata ona mafaufau i se mea e te faia e aunoa ma le aafia ai o se musele.

E tusa ma le 650 musele o i lou tino. O musele pito i laiti e pipii atu i ponaivi pito sili ona laiti, o loo i le taliga. O musele pito i tetelē o loo i le nofoi, lea e faagaoioia ai vae. O le ʻafa o le mamafa o le tamaloa o loo faia aʻe i musele, a o le fafine e tusa o le tasi vaetolu o ona musele ua fuafuaina mo le faia o galuega. E manatu i ai o ni “masini mo le faatumauina o le ola,” ma e sili atu ona tele lo latou ‘faaliliuina o le malosiaga ina ia mafai ona gaoioi i aso taitasi na i lo masini uma ua faia e le tagata pe a tuufaatasi, e aofia ai ma taavale,’ na faapea ona matauina ai e Gerald H. Pollack, o se tagata atamai faapitoa i le faagaoioia o le tino o le tagata.

E tusa lava po o e mālōlō, o loo tumau pea ona nofo sauni ou musele—e nofo sauni pe a manaomia mo gaoioiga. O nisi alava i totonu o musele taitasi o loo memeʻi i taimi uma. Pe a leai lenei faamemeʻi teisi, o le a matala pea la lou auvae ma o le a itiiti foi se lagolagosua o le a maua e totoga i totonu o lou tino. E tusa foi po o e tu pe nofo, o loo faia e ou musele fesuiaiga laiti e fesoasoani e faatumauina ai lau tu saʻo, po o le taofia ai o oe mai le paʻū mai i lou nofoa.

Ituaiga o Musele

E tolu ituaiga o musele o loo i lou tino. E faia e musele taitasi galuega eseese. O le tasi, o le musele lea o le fatu, lea e pamuina le fatu. O le ʻafa o le olaga o musele o le fatu e mālōlō ai, auā pe a uma ona memeʻi, e tatau lava ona mālōlō seia oo i le isi foi taimi e memeʻi ai.

O le isi ituaiga musele, o musele lamolemole. O musele lamolemole e latou te tāʻaia le tele o ou totoga i totonu, e aofia ai ma alatoto. I le pei o musele o le fatu, lea e faamalosia ona gaoioi, o musele lamolemole e gaoioi e aunoa ma le mafai ona puleaina. E latou te faia gaoioiga tāua e pei o le faaui atu o le suavai i totonu o ou fatugao ma le tagāmimi, uunaia meaʻai i le ala e faamalūina ai, faatonutonuina le tafe o le toto i ou alatoto, suia ou ioimata mo le mauaina o le malamalama, ma le faalapopoaina o pu e alu atu i ai le malamalama i ou tamatamaimata.

O le tele lava o ou musele e 650 o musele o le auivi. O musele ia e latou te faia gaoioiga o loo e manao e fai. E te aʻoaʻoina le puleaina o nei musele mai lava i le taimi e te fanau mai ai. Mo se faataitaiga, e aʻoaʻoina e se pepe le faagaoioia o ona lima ma vae ina ia mafai ai ona ia savali ma faapaleni. Talu ai o musele e na o le memeʻi lava e mafai ona faia, e gaoioi tailua ai la musele o le auivi. A o memeʻi le tasi musele, ae malōlō isi. A lē faia faapena o se ʻau, o taimi uma lava la e valu ai lou ulu, e ao la ona tuu atu i le malosi o le kalave e tosoina lou lima i lalo. Na i lo lena, o le musele o loo i tua o lou ogalima, le musele lea o loo tailua ma le musele o loo i luma o lou ogalima, e memeʻi ma mafai ai ona faasaʻo vave atu lou lima.

E eseese lava musele i o latou lapopoa ma foliga. O nisi e uumi ma manifinifi, e pei o musele o loo i tua o tulivae. O isi e mamafa ma mafiafia, e pei o musele o loo i nofoi. Ua fuafua uma ina ia mafai ai ona e gaoioi. O ivi asoaso o le a malō pe ana leai musele ia e faatumuina ai avanoa i le va o ivi asoaso. Ua mafai e nei musele ona faagaoioia le fatafata e pei o se piano toso, (accordion) ma fesoasoani ai ia te oe e mānava. E tai pei lava o se laupapa lau manifinifi, ua faapena foi ona faatulaga musele o le manava i ni lau i ituaiga o tafa eseese, ina ia puipuia ai totoga o lou manava mai i le paʻūū ese.

Le Fesootaiga a Musele ma Uaua Malolosi

O musele e tosoina ou ivi o loo fepiitai e ala tisu papaʻe malolosi e foliga pei ni faagaau e taʻua o uaua malolosi (tendons). O uaua malolosi e oo atu i totonu o musele ma fesootai atu i tisu ia e siomia ai alava o musele. O tisu ia e fesootai ua mafai ai e le malosi o loo faatupuina i totonu o ou musele ona ia fālō le uaua malosi ma gaoioi ai ou ponaivi. O le uaua e aupito sili ona malosi, o le Achilles, e pipii atu i se tasi o musele pito i malosi o lou tino, o lou atevae. O musele o atevae e gaoioi pei o se sipuligi malosi o le tino. Pe a e savali, tamoe, po o le oso, e mafai ona latou tauaveina se mamafa e sili atu ma le tone.

O so o se itu e mafai ona faagaoioia i ai lou lima o le isi lena faataitaiga o le galulue faatasi o musele ma le uaua malosi. E luasefulu musele tailua o loo iai i lou ogalima o loo pipii atu i le tele o sooga o ponaivi o lou lima ma ou tamatamailima e ala i uaua malolosi uumi ia e taatitia i lalo o alava malolosi o le tapulima. O nei musele faatasi ai ma le sili atu i le 20 musele ia e i lou alofilima ma tamatamailima o loo avatu ai i lou lima le fetuunaiga ofoofogia o loo manaomia e tuufaatasia ai le gaoioiga faaeteetegata i le gaosia o se uati lelei ia po o le uuina o le au o se toʻi e tātā ai fafie.

E Silia ma le 30 Musele o Foliga

Na i lo se isi lava vaega o lou tino, o loo faaalia e ou foliga ou uiga faaletagata. Ina ia faafetaui ma le tele uiga eseese e faaalia atu i foliga, ua tuuina ai e Lē na Foafoaina Mea le tuufaatasiga tele o musele i ou foliga—e sili atu i le 30. Ioe, e manaomia musele e 14 ina ia mafai ai ona faaali atu ou laufofoga fiafia!

O nisi o musele o foliga e malolosi tele, e pei o ia o loo pipii atu i lou auvae, lea e mafai ona oo atu lona malosi i le 200 pauna (75 kilokalama) ina ia lamuina ai au meaʻai. O isi musele e vaivai ae anagata, e pei o musele o loo puleaina ou laumata pe a emo, lea e fufuluina ai ou mata i se suavai e fufulu ese ai palapala ma siama i le silia ma le faa-20,000 i le aso.

E Ofoofogia le Fuafuaina

O musele taitasi ua fuafuaina ina ia sologa lelei ona faamemeʻi. O musele o le auivi e ao ona faatulagaina lo latou memeʻi ina ia lē faaaogaina ai le malosi lava lea e tasi e uu ai i luga se fulufulu manu ma lea e faaaogā e sii ai i luga se mea e 20 pauna (10 kilokalama) le mamafa. Ua mafaia faapefea lenei mea? Seʻi o tatou vāai.

O musele uma o loo faia aʻe i sela taitasi. Ona o sela o musele e lautetele atu, o loo faasino la i ai o alava. O nisi alava e vaivai o latou lanu, o nisi e malolosi lanu. O alava e vaivai o latou lanu e vave ona memeʻi, po o le gaoioi vavave. E faaaogaina nei alava pe a e manaomia ni gaoioiga vave faafuasei, e pei o le sii i luga o se avega mamafa po o le tamoe saosaoa atu i se tuuga e 100 iata. O alava o musele gaoioi vavave e malolosi tele, ma o le masoā, o se suka, o le puna o le malosi lea e faagaoioia ai i latou. Peitai, e vaivaigofie ma oo lava ina gase po o le tiga ona o le faatupulaia o le sua oona paʻepaʻe (lactic acid) i le maso.

O alava o musele e malolosi o latou lanu, e gese la latou memeʻi, pe gese le gaoioi, ma o loo faagaoioia e ala i le fesuiaiga o le okesene. Talu ai o nei alava e sili atu ona tele le sapalai o le toto latou te maua ma le malosi e maua mai le okesene na i lo alava ia e vavave le gaoioi, o alava la e gese le latou memeʻi, o “neula ia e tumau” e lē vaivaigofie.

O le isi ituaiga o alava e tau malosi teisi lona lanu na i lo alava lanu vaivai e vave le memeʻi. O le alava lenei e tali tutusa ma isi alava ae e lē tāitai ona vaivai. Ona o lenei ituaiga e faigofie ona ia faaaogā le suka ma le okesene e fai ma malosiaga, e foliga mai e faia sa latou vaega pe a faia galuega uumi ma le fitā.

O loo fefiloi nei ituaiga o alava i tagata taitoatasi ma totonu lava foi o musele. Mo se faataitaiga o tagata o loo faia ni taufetuliga uumi, e ono iai le 80 o alava e gese le gaoioi i musele o o latou vae, a o tagata e tamomoe televavave i tuuga pupuu e mafai ona ia i latou le sili atu i le 75 pasene o le ituaiga o alava e vave le gaoioi.

Faagaoioia e Neula

O alava uma o musele o loo faagaoioia e neula. Pe a auina atu e nei neula ni faailoilo i musele, e gaoioi musele i se gaoioiga faafuasei, po o le memeʻi. Peitai, e lē o alava uma o musele i se musele patino e memeʻi loa lava. Na i lo lena, o alava o musele o loo faatulagaina faatasi ma sela o neula e uunaia gaoioiga. O sela o neula o loo uunaia gaoioiga, o loo pipii atu i ai se sela se tasi o neula ma taofiaina le tele o alava.

O nisi o sela o neula o loo uunaia gaoioiga, e pei o na o loo i musele o ou vae, o loo faia aʻe i le silia i le 2,000 alava i le neula e tasi. Ae o neula o loo faagaoioia ai o loo i ou mata, e na te faatonutonuina na o alava taitolu i le neula e tasi. O le iai o se vaega itiiti o alava i se vaega se tasi, ma le tele atu o vaega mo se musele se tasi ua avanoa ai isi musele e gaoioi, i gaoioiga faaeteete pei o ia e manaomia i le tuiina o se filo i se nila po o le taina o le piano.

Pe a e uu aʻe i luga se fulufulu manu, e na o ni nai neula o loo uunaia gaoioiga e memeʻi. Pe a e sii aʻe i luga se mea mamafa, e taʻuina atu e totoga faapitoa e lagonaina mea i alava o ou musele lea e pei o le vave o le emo o le uila i lou faiai ma taʻuina atu i isi vaega o gaoioiga ia gaoioi, o lea e faateleina ai le malosi e te faaaogaina e sii ai se avega. Pe a e savali lemū, e na o ni nai vaega e faagaoioia ai e gaoioi; ae i le isi itu, a e tamoe, ua faagaeeina le tele o sela e uunaia gaoioiga ma ua sili atu ona faatopetope.

E ese musele o lou fatu mai musele o le auivi ona e memeʻi po o le faavaivai foi. Pe a faagaeeina se sela se tasi i musele o le fatu, e auina atu se feau i sela uma ma faagaeeina ai sela uma i le taimi lava e tasi, e iu ai i le memeʻi atoa o le musele ma toe faavaivai, i le tusa ma le 72 taimi i le minute e tasi.

E tutusa lava le auala e gaoioi ai musele lamolemole ma musele o le fatu—o le taimi lava e amata ai ona memeʻi, e memeʻi uma ai le totoga atoa. Ae o musele lamolemole e mafai ona memeʻi e aunoa ma le vaivai mo se taimi umi na i lo musele o le fatu. O musele lamolemole e faigata lava ona iloaina o loo gaoioi, seʻi vaganā ua oo ia te oe se tiga tutui i nisi taimi ona o le matelaina i le fia taumafa po o le malosi o le memeʻi o musele i le taimi e fanau ai.

Ia Tausia Pea le Lelei o Ou Musele

“E fesoasoani le faamalositino i le tino atoa, i totonu faapea foi ma fafo. . . . . O musele e faagaoioia i taimi uma, e sili atu ona lelei mea uma latou te faia,” o le faamatalaga lea a le tusi Muscles: The Magic of Motion. O le faamalositino e faaleleia ai musele, lea e lelei ai le lagolagoina o ou totoga i totonu ma fesoasoani i ou musele e teena ai le vaivai.

E lua ituaiga o faamalositino e aogā mo ou musele. O le gaoioi e lē aofia ai le fatu ma le māmā, lea e aofia ai le siiina o mea mamafa mo se taimi puupuu i aso taitasi, e faamalosia ai ou musele. O musele malolosi e lē gata e na te teuina le tele atu o le suka ma oona o gaʻo ae e mafai foi ona faaaogaina lelei nei malosi, ma fesoasoani ai i ou musele e teena ai le vaivai.

O ituaiga o faamalositino e aofia ai le fatu ma le māmā, e pei o le tamoe, aau, viliina o le uila, po o le savali faatopetope, e faaleleia ai le malosi. O lenei ituaiga o faamalositino faigata e faateleina ai le tafe o le toto i musele ma faateleina ai mitochondria, lea e na te faia le ATP, le malosi ua tuufaatasi e manaomia e faamemeʻi ai ou musele. E faapitoa lava ona aogā i lou fatu lenei ituaiga o faamalositino, lea e ono fesoasoani e puipuia ai le oso o le fatu pe.

O le loloʻu ma fālōina o musele a o lei faia ni faamalositino faigata e mafai ona puipuia ai le milosia po o le faaleagaina o ou musele. O na faamalositino e siitia ai le vevela i ou musele, lea e faataamilo atili atu ai le toto i musele, ma o le iuga e fesoasoani ai i polotini mo le mauaina atili o le malosi, ma mafai ai e ou musele ona memeʻi lelei. O le faaumaina i le faia o faamalositino lava lea na e amata ai e fesoasoani e puipuia ai tiga ma le malō e ala i le aveeseina o le sua paʻepaʻe oona ua faatupuina aʻe i maso.

Peitai, e tatau ona matauina faapea e mafai ona faaleagaina musele o le auivi e ala i le soonafai o faamalositino, ae maise lava pe afai sa lei aʻoaʻoina lelei ai oe. E lē gata i lea, afai e soona faamalosia ou musele e ala i le umi ona faamemeʻiina, e pei o lea e fai pe a tuutuu malie ifo i lalo se avega mamafa po o le tamoe foi i lalo i le aʻega, e mafai ona masae ai alava o musele. E oo lava i sina masae i le maso e māfua mai i le milosia e mafai ona faapogaia ai le tiga o le oso o le musele faapea foi ma le fufula.

Ia tausia lelei ou musele. Fai i ai faamalositino saʻo ma faamālōlō ina ia mafai ai ona latou faaauau ona galulue mo oe pei o se masini e lelei ona fuafuaina, o ‘le malosi sili ona lelei o lou tino.’

[Faamatalaga faaopoopo i le itulau 18]

E tusa ma le 650 musele o i lou tino. O musele pito i tetelē o loo i le nofoi, lea e faagaoioia ai vae

[Pusa i le itulau 22]

Musele ma Taumafa

O taumafa lelei o le vala autū lea o le tausia o musele ia maloloina lelei. O meaʻai e tele ai le uamea, e pei o meaʻai e faia mai i le suasusu, ma potassium, e pei o faʻi, faapea ai ma fualaau pei o le moli ma fualaau aina ua faamamago, (dried fruits) fualaau lanu samasama malosi, lama, ma fatu o laau e fesoasoani e pulea ai le memeʻi o musele. O falaoa enaena ma meaʻai e pei o polesi e maua ai le uamea ma le vaitamini B, ae maise lava le B₁, lea e manaomia tele i le suia o le masoā, polotini, ma gaʻo e avea ma malosi lea e manaomia e ou musele. O le tele o vai e inuina e lē gata ina tausia ai lou paleni i electrolyte ae aveesea ai foi le sua oona paʻepaʻe ma isi mea lē aogā lea e ono faalavelavea ai le gaoioiga a musele.

[Pusa/Ata i le itulau 20,21]

LE OFOOFOGIA O LE MEMEʻI O MUSELE

Atonu e foliga mai e faigofie gaoioiga a se musele. Ae o le gaoioiga o le memeʻi e matuā ofoofogia. Ua faapea mai le polofesa o Gerald H. Pollack: “Ua ou tu ma le ofo tele i le matagofie o le fuafuaina o le natura o mea. O le faaliliuina o le malosi o vailaau i le malosi tau gaoioiga ua faia ma le tomai tele—ua faaosoosoina e faapea atu ua faaalia ai le mataisau poto o loo i tua o na mea—ua oo ina maofa ai ia te ia.”

Seʻi o tatou faaaogaina se meavaai faatetelē mea e vaai ai i le lavelave o le faagaoioia o le memeʻi o le musele ma aʻoaʻoina atili e faatatau i lenei galuega mataina o fuafuaga a Lē na Foafoaina Mea.

O sela taitasi o musele, po o alava, o le mea moni o se fusi o ni alava laiti e taʻua o myofibrils o loo faatulagaina i ni tino sasaʻo. O myofibril taitasi e iai le faitau afe o myofilaments manifinifi. O nisi o myofilaments e mafiafia atu, o nisi e manifinifi. O alava mafiafia o loo maua ai myosin, ma o alava manifinifi o loo iai le actin, o polotini ia e fesoasoani i sela o musele e memeʻi ai.

O le laualuga o alava o musele taitasi o loo pu. O le alava o neula, e falala ese mai le tuasivi, e muta ai iina ma ofi atu ai i totonu o le pu. E gaoioi musele pe a tuuina mai e le faiai le faatonuga ma oo atu le feau, i le faitau miliona o sela o neula o le faiga o loo puleaina neula, ma oo atu ai i le faatausiusiuga o le neula. A o faagaoioia faatausiusiuga o neula taitasi, e pāpā ai tamai taga e 100, ma tafe ese ai se vailaau lea e na te faateleina le uunaiga a le neula pe a fesootai ma le afuafu o sela o musele. E amataina ai se gaoioiga faaeletise lea e uunaia ai sela atoa o musele, ma māfua ai ona faamatuu atu e le afuafu o le sela le uamea ua uma ona fafagaina faaeletise, lea e amataina ai le faagasologa o le memeʻi.

Ua salalau atu nei le uamea ua uma ona fafagaina faaeletise i afuafu uma o le musele e ala i se gaoioiga lavelave a uaua ninii ma fetaui ai ma polotini eseese. Po o le ā lava le auala, o le gaoioiga a le uamea i nei polotini ua māfua ai ona aliali le mea o loo iai polotini lea na malu puipuia i le mea manifinifi pei o se filo.

I le taimi e tasi, o mea patupatu lapotopoto tailua, o loo faatumulia i le tele o le malosi e taʻua o le ATP, o loo lālā mai i le vaega mafiafia o le vaega polotini o musele, ua uunaia nei loa mo gaoioiga. O se tasi o mea patupatu o le vaega polotini o musele pei se filo ua pipii atu nei i se tasi o vaega o loo aliali mai o le vaega polotini o le musele pei se filo, ma faia aʻe ai le mea e fesootai ai. O le isi mea patupatu e na te vaeluaina le ATP ma maua atu ai le malosi e le mea o loo fesootai ai e toso pe faasee ai le polotini o le musele pei se filo ia taatia tutusa po o le taatia i luga o le vaega polotini o le musele pei o se filo. I le pei o se ʻau o loo galulue i le tosoina o se maea, o ulu o vaega polotini o musele e latou te faamamulu atu mea o loo latou taofia ma latou toe pipii atili atu i le vaega polotini manifinifi o le musele, o le taimi lea ua uunaia ai le vaega manifinifi polotini o le musele agaʻi i le ogatotonu o le vaega manifinifi o le alava polotini o le musele. E faaauau pea lenei gaoioiga seia uma ona memeʻi. O le gaoioiga atoa, o loo faia i le na o ni nai vae afe o se sekone!

Pe a uma le memeʻi, o le a toe foi le uamea i lona amataga i le afuafu o le sela o le musele, o le a toe ufitia le vaega lea na aliali o le vaega manifinifi polotini o le musele, ma ua vaivai nei alava o le musele seia toe mauaina foi se isi uunaiga. Ioe, ‘na faia tatou e ala ai ona matautia ma ofo tele ai’!— Salamo 139:14.

[Siata]

(Tagaʻi i le lomiga mo le ata atoa)

O le mea moni o o tatou musele o ni tāʻaiga o alava i luga o isi tāʻaiga alava

O myofilaments mafiafia ma manifinifi (matuā faatelēina)

Myofibril

Tāʻaiga myofibril

Alava o musele

Musele

[Ata i le itulau 19]

(Faatelēina faalua)

O musele aupito sili ona laiti o loo pipii atu i ponaivi pito sili ona laiti, o loo i le taliga

[Ata i le itulau 19]

E manaomia musele e 14 ina ia mafai ai ona faaali atu ou laufofoga fiafia!

[Ata i le itulau 19]

O musele ua mafai ai ona emo ou laumata e sili atu ma le faa-20,000 i le aso

[Ata i le itulau 22]

E memeʻi ma toe faavaivai musele o lou fatu i le tusa ma le faa-72 i le minute e tasi,po o le 2.6 piliona i se fuafaatatau i le olaga atoa

[Ata i le itulau 22]

Faamalositino o musele

[Ē Ana le Ata i le itulau 18]

Tagata, itu. 18; mata, itu. 19; fatu, itu. 22: The Complete Encyclopedia of Illustration/ J. G. Heck