“O Loo Fesoasoani Mai le Atua ia Matou Onosaia Tigā”

SA NOFO i lalo Natalya ma fusi lana tama tama e iva tausaga o Aslan, i autafa o Zarina ma lana tama teine e sefulu lua tausaga o Anzhelika. E silia i le 1,000 tamaiti ma tagata matutua na iai i inā, a o siʻomia e tagata faatupu faalavelave i latou.

I le Aso Lulu o Setema 1, 2004, sa tumutumu fanau ma mātua i le malae e sauni se fiafia mo le aso muamua o le aʻoga i Beslan, o se tamaʻi taulaga i Alania i Rusia. Ae na faafuaseʻi ona ō atu le ʻau faapā pomu ma a latou fana, ma faapāpā fana i le ʻea ma feʻei. Sa taʻitaʻia e le silia ma le 30 o le ʻaufaatupu faalavelave, tagata na iai i le malae i totonu o le fale taalo a le aʻoga, ma tatao faataamilo pomu i le fale taalo.

Taimi o Feutagaʻiga ma le Vevesi

Sa amata loa feutagaʻiga a le ʻaufaatupu faalavelave ma fitafita mo aso e tolu. Sa faapea mai Natalya o lē sa suʻesuʻeina le Tusi Paia ma Molimau a Ieova, “O le taimi muamua lea ua sosoo ai aʻu tatalo.”

Ua lata ina iʻu le tau māfanafana, ma ua matuā vevela le fale taalo. I le taeao o le aso lona lua, e leʻi tuuina atu e le ʻaufaatupu faalavelave ni meaʻai po o ni vai i ē na latou taofia, ma e oo ane i le aso lona tolu, o le Aso Faraile lea, ua amata ona inu e nisi tagata a latou feʻau vai, ma ʻai fugālaau mai i teu fugālaau a faiaʻoga. Na faapea mai Natalya, “Sa tuu mai e se tamaitiiti sa i oʻu autafa se laulaau i loʻu lima, ona ou vaelua lea ma ave le isi ʻafa iā Anzhelika ae ave le isi iā Aslan.”

Mulimuli ane i le aso lona tolu, ae amata loa fetauaʻiga. Na faamatala e Natalya, “Na ou sulu ina ua pā se pomu. Sa asu totonu o le fale ma ua amata taugāfana.” A o tau fana fitafita ma le ʻaufaatupu faalavelave, sa fetolofi i fafo Natalya ma Aslan. Sa toso ese atu e se tamāloa Ossetia e igoa iā Alan i laʻua i fafo ma saogalemu ai. O le toʻatele o isi e leʻi mafai ona sao mai i lenei faalavelave.

Aafiaga o le Faalavelave

E faitau selau tamaiti ma tagata matutua na maliliu, e aofia ai ma Anzhelika. E tele vaiaso o lagona pea fetagisiga i Beslan. E iloa atu le aʻoga mai i le fale o Natalya, ma e ui na toe fausia se isi aʻoga fou e lata ane, ae na matuā lē toe fia alu Aslan i se aʻoga. E leʻi toe alu foʻi o ia i fafo e taalo. Na faapea mai Natalya, “Sa matou ʻaiʻoi atu iā Ieova e fesoasoani iā te ia e aveesea lona fefe.” A o faagasolo taimi, na maua e Aslan le lototele e toe alu ai i le aʻoga.

Sa avea ma luʻi iā Natalya le auai i sauniga faa-Kerisiano i le Maota mo Sauniga. Na faapea mai o ia: “E so o se taimi lava ou te faatasi ai ma ni tagata se toʻatele i se potu, e iai loʻu faalogona o le a osofaʻia i matou. Ou te tatalo ia aua neʻi tupu se mea faapena. E leʻi umi ae ou lē toe auai i sauniga. Sa ou tauivi foʻi ma faalogona mafatia, i le iloaina na faasaoina i maʻua ae maliliu le toʻatele.”

Maua le Fesoasoani

Sa faapea mai Natalya: “Ou te lotofaafetai i tagata o le faapotopotoga na faaauau ona fesoasoani mai iā te aʻu. E taʻitolu aso ma asiasi mai se Molimau e igoa iā Tatyana. E leʻi umi, ae ō mai Tatyana ma se isi Molimau e igoa iā Ulyana, o sē e agalelei, magafagafa, leo mālū, ma e tele lona tomai i le Tusi Paia. Na ia faamālō mai mo aʻu taumafaiga, ma e matuā uaʻi mai lava pe a ou talanoa atu.”

“Sa faitau mai e Ulyana upu a le aposetolo Kerisiano o Paulo o loo i le 2 Korinito 1:9. Ina ua māeʻa se faafitauli i Asia, na faapea mai Paulo: ʻNa matou manatu ua faasalaina i matou i le oti.’ Na faitau mai foʻi e Ulyana le Isaia 40:31: ʻO ē e faamoemoe iā Ieova e toe malolosi i latou. E latou te ō aʻe e pei ua iā i latou ni apaʻau o aeto.’ O mau faapena, faatasi ai ma le fesoasoani mai a Ulyana ma isi i le itu tau faalogona, na ou toe maua ai le malosi e auai i sauniga faa-Kerisiano faatasi ma laʻu fanau. Ae e fai lava ma ou popole pe a ou iai i totonu o se maota.”

Na mulimuli ane avea Zarina ma Molimau a Ieova, ma o loo ia tulimataʻia le taimi e toe feiloaʻi ai ma Anzhelika i se lalolagi matagofie ma filemu, lea o le a pulea e le Malo o le Atua. (Mataio 6:9, 10; Galuega 24:15) Sa papatiso Natalya ma lana fanau i le 2009. O loo latou nonofo latalata pea i le fale taalo na tupu ai le faalavelave, ae ua latou taumafai e lē toe mafaufau i le faalavelave. Na faapea mai Natalya: “Ua mafai ona ou talanoa e faatatau i lenā aso e aunoa ma faalogona tigā po o le fefe. O loo fesoasoani mai le Atua ia matou onosaia tigā.”