Le Luʻi: Lē Mafai Ona Suia Tulaga ua Tutupu

PO O e aafia i se maʻi faaumiumi, tatala lau faaipoipoga, pe maliu sē e pele iā te oe? Pe a feagai ma tulaga e lē mafai ona suia, e te ono lagona ua leai se mea e mafai ona e faia, ma moomoo talosia ia suia le tulaga ua tupu iā te oe. E mafai faapefea ona e toe pulea lou olaga?

FAAAʻOAʻOGA FAALE-TUSI PAIA: PAULO

Sa tele ina faimalaga solo le aposetolo o Paulo o se misionare maelega i le uluaʻi senituri. Peitaʻi, na muta ana faigāmalaga ina ua molia ma le lē tonu o ia, ma nofo vaavaaia i se fale mo le lua tausaga a o leoleo e ni fitafita. E leʻi faavaivai ai Paulo, ae sa taulaʻi atu o ia i mea na mafai ona ia faia. Sa ia faamāfanafana ma avatu le fesoasoani faaleagaga i ē uma na asiasi atu iā te ia. Sa ia tusia foʻi nisi o tusi ia o loo iai i le Tusi Paia.​—Galuega 28:30, 31.

MEA UA FAIA E ANJA

Na taʻua i le mataupu ua mavae ua faataotolia Anja i le fale ona o le maʻi. Ua faapea mai o ia: “Ua aafia vala uma o loʻu olaga ona o le kanesa. E lē mafai ona ou faigaluega pe alu e tafao ma fai mea ou te fiafia i ai, ona ou te popole ina neʻi faateteleina loʻu maʻi.” Ua faapefea ona onosaia e Anja nei tulaga e lē mafai ona suia? Ua ia taʻua: “Ua matuā fesoasoani le fetuunaʻi o laʻu faasologa. Ou te faamuamua mea e sili ona tāua, ma fai se faasologa e tusa ai ma mea e mafai ona ou faia. O le faia faapea ua mafai ai ona ou pulea loʻu olaga.”

MEA E MAFAI ONA E FAIA

Pe afai e foliga mai ua pulea lou olaga e tulaga ua tutupu e lē mafai ona suia, ia taumafai e fai mea nei:

• Ia taulaʻi atu i mea e mafai ona e pulea. O se faaaʻoaʻoga, atonu e lē mafai ona e pulea atoatoa le tulaga o lou soifua mālōlōina, ae pe e mafai ona fai ni au faamalositino, taumafa i meaʻai e maua ai le soifua mālōlōina lelei, ma lava le mālōlō?

• Filifili po o ā sini e te manaʻo e faataunuu. Vaai po o ā mea e mafai ona e faia faasolosolo ina ia ausia ai na sini. Taumafai e faaalu sina taimi i aso taʻitasi e galue ai ina ia faataunuu ou sini.

• Taumafai e fai ni feʻau faigofie e pei o le solo o le laulauʻai ma fufulu ipu, ma e lagona ai o loo mafai pea ona e faia nisi mea. Ia mamā ou lavalava, ma ia fai muamua i le taeao feʻau e sili ona tāua.

• Manatu i aogā o loo e maua mai i tulaga ua tutupu iā te oe. O se faaaʻoaʻoga, po ua avea le tulaga ua tupu iā te oe, ma itu ua atili ai ona e malamalama i auala e onosaia ai tulaga faigatā? Pe e mafai ona faaaogā lou malamalama lenā e te fesoasoani atu ai i isi?

Manatu Autū: Atonu e lē mafai ona e pulea tulaga ua tutupu iā te oe, ae atonu e mafai ona e pulea le auala e te tali atu ai i na tulaga.