Po o E Pulea Lou Olaga?

O Ā OU sini sa iai a o e laʻitiiti? Atonu sa e manaʻo e faaipoipo, ia matuā faaleleia sou tomai, pe suʻe se galuega e te fiafia i ai. Peitaʻi, e lē o taimi uma e taunuu ai mea na tatou fuafua i ai i le olaga. E iai tulaga e leʻi faatalitalia e tutupu ma suia atoa ai au fuafuaga. O le mea lenā na tupu iā Anja, Delina, ma Gregory.

• O Anja e sau mai i Siamani. Na maua o ia i le kanesa ina ua 21 ona tausaga, ma o le tele o taimi e faataotolia ai o ia i le fale.

• O Delina mai i le Iunaite Setete, e maua o ia i le maʻi e faalētonu maso o le tino, e taʻu o le dystonia. E na te tausia foʻi nai ona tei e toʻatolu e lē atoatoa le malosi o le tino.

• O loo tauivi Gregory mai i Kanata ma le maʻi o le matuā lē mafai ona fai o se mea pe a oo ina matuā popole.

E ui lava i o latou tulaga, ae ua mafai e Anja, Delina ma Gregory ona pulea o latou olaga. E faapefea?

Ua taʻua i le Faataoto 24:10: “Po ua e lotovaivai ea i le aso o le puapuaga? O le a itiiti lou malosi.” E manino lona faatatauga: E tāua tele le auala e te vaai ai i le tulaga o mea. O tagata e soona popole i o latou tulaga, e lē mafai ona latou faia ni filifiliga ia e semanū e mafai ona fesoasoani iā i latou. Ae o ē e saʻo la latou vaaiga, o le a faigofie ona latou faia ni filifiliga lelei ma maua le fiafia e ui lava i tulaga o loo tutupu.

Seʻi iloilo pe na faapefea ona faamaonia le moni o lenei manatu iā Anja, Delina ma Gregory.