Tusi o le Tusi Paia Numera 19—Salamo
Ē na Tusia: Tavita ma isi
Nofoaga na Tusia Ai: Lē mailoa
Māeʻa Ona Tusia: Pe tusa o le 460 T.L.M.
1. O le ā le tusi o Salamo, ma o ā mea o loo aofia ai?
O LE tusi o Salamo o le tusipese faagaeeina a tagata sa tapuaʻi moni ia Ieova i taimi anamua, o se aotelega o pese paia po o salamo e 150, sa faatulagaina i musika ma faaaogā mo le tapuaʻiga a le lautele ia Ieova le Atua i lona malumalu i Ierusalema. O nei salamo o ni pese o viiga ia Ieova, ma e lē gata i lena, o loo aofia ai foʻi tatalo o olega mo le alofa mutimutivale ma se fesoasoani, atoa ai ma faaupuga o le talitonuina ma le maufaatuatuaina. O loo faatumulia i faafetai ma le fiafia atoa ma alaga o le olioli tele, ioe, e silisili lava. O nisi o nei salamo o loo toe taʻua ai le talafaasolopito, e toe manatunatu ai i le alofa agalelei o Ieova ma mea mataʻina na ia faia. O loo faatumulia i valoaga, o le tele o nei valoaga sa matilatila lo latou faataunuuga ua uma ona iai. O loo aofia ai le tele o aʻoaʻoga lea e matuā aogā lava ma atiina aʻe ai, e faamatagofieina uma nei manatu i se gagana e maoaʻe lona mamalu ma faafaatusa lea e faagaeeina loloto ai le tagata faitau. O ia salamo o se faigaʻai faaleagaga lava saunia, ua matagofie lona sauniaina ma ua laulauina mai i se tulaga faaosonaunau i o tatou luma.
2. (a) O ā igoa sa faatatau atu i Salamo, ma o ā o latou uiga? (e) O le ā le salamo?
2 O le ā le mea mataʻina e uiga i le igoa o le tusi, ma o ai na tusia ia Salamo? I le Tusi Paia Eperu, e taʻua le tusi o le Seʹpher Tehil·limʹ, o lona uiga “Le Tusi o Viiga,” ia pe a faafaigofie o le Tehil·limʹ, o lona uiga, o “Viiga.” O le taʻu numera tele lena o le Tehil·lahʹ, o lona uiga “O se Viiga” po o “le Pese o Viiga” e pei ona maua i le ulutala o le Salamo 145. O le igoa “Viiga” e sili ona talafeagai, auā o loo faamatilatila e le tusi viiga ia Ieova. O le igoa “Salamo” e sau mai le Septuagint faa-Eleni, lea e faaaogā ai le upu Psal·moiʹ, e faaalia ai pese e usuina faatasi ai ma meafaifaaili. O loo maua foʻi le upu i nisi mau i Tusitusiga Kerisiano Eleni, e pei o le Luka 20:42 ma le Galuega 1:20. O se salamo o se pese paia po o se solo paia e faaaogā i le viiaina ma le tapuaʻiga i le Atua.
3. O le ā ua taʻu mai e ulutala e faatatau i ē na tusia?
3 O le tele o salamo e iai o latou ulutala, po o se faamatalaga pito i luga, ma e masani ona taʻua ai lē na tusia. E fitusefulu tolu ulutala o loo taʻua ai le igoa o Tavita, “le faipese malie o Isaraelu.” (2 Samu. 23:1) E leai se faalētonu o le Salamo 2, 72, ma le Sala. 95 na tusia foʻi e Tavita. (Tagaʻi i le Galuega 4:25, Salamo 72:20, ma le Eperu 4:7.) E lē gata i lena, e foliga mai o le Salamo 10 ma le 71, o le faaauauina mai lea o le Salamo 9 ma le 70 ma o lea la e ao ona manatu i ai na tusia e Tavita. E sefululua salamo o loo faasino atu ia Asafo, e mautinoa e faasino i le aiga o Asafo, auā o nisi o nei salamo o loo tautala i mea na tutupu mulimuli ane ina ua mavae le taimi o Asafo. (Sala. 79, 80; 1 No. 16:4, 5, 7; Esera 2:41) E sefulutasi salamo e faasino tuusaʻo i le fanauga a Koru. (1 No. 6:31-38) E foliga mai o le Salamo 43 o le faaauauina lea o le Salamo 42, o lea la e mafai foʻi ona manatu o le fanauga a Koru e āna. E lē gata ina taʻua o “le fanauga a Koru,” ae o loo faasino atu foʻi le ulutala o le Salamo 88 ia Hemana, ma o loo taʻua Etano o lē na tusia le Salamo 89 i lona ulutala. O le Salamo 90 e ā Mose, ma e foliga mai o Mose foʻi na tusia le Salamo 91. O le Salamo 127 na tusia e Solomona. E sili atu i le lua o vae tolu o salamo o loo taʻua patino tusitala eseese sa tusia.
4. O le ā le vaitaimi o loo aofia ai i le tusitusiga?
4 O le tusi o Salamo o le tusi lea e tasi aupito i telē i le Tusi Paia. E pei ona aliali mai i Salamo 90, 126, ma le Sala. 137, sa umi se taimi na tusia ai, atonu pe amata mai i le taimi na tusia ai e Mose (1513-1473 T.L.M.) seʻia oo ina ua mavae le toe faafoʻisiaina mai Papelonia ma atonu i aso o Esera (537 e oo i le pe tusa o le 460 T.L.M.). O lea la, e foliga mai na tusia le tusi i se vaitaimi pe tusa o le afe tausaga. Peitaʻi, e sili atu ona umi le taimi o loo aofia ai i mea na tutupu o loo taʻua i le tusi, e amata mai i le taimi o le foafoaga ma aotele ai le talafaasolopito o feutagaʻiga a Ieova ma ana auauna seʻia oo mai lava i le tusiaina o le salamo mulimuli.
5. (a) Ua faapefea ona atagia mai le faamaopoopoina i le tusi o Salamo? (e) O ā nisi faamatalaga o loo saunia atili mai e ulutala? (i) Aiseā e lē manaʻomia ai ona faaleo le upu “Selā” pe a faitauina salamo?
5 O loo atagia mai i le tusi o Salamo ia le faamaopoopoina. O loo faasino Tavita i “le afio atu [“i se solo,” NW] o loʻu Atua, ma loʻu Tupu i le malumalu. Ua muamua o e pepese, ua mulimuli o e ta laaupese; ua i le va taupou ta topa. Ia faafetaia le Atua i faapotopotoga.” (Sala. 68:24-26) Ua manino mai ai iinei le māfuaaga e aliali soo mai ai i ulutala le faaupuga “Mo le taʻitaʻi,” (NW ) faapena foʻi ma le tele o faaupuga i solo atoa ma musika sa fatuina. O nisi ulutala o loo faamatala ai le faaaogāina po o le fuafuaga o se salamo ia po o le aumaia ai o faatonutonuga tau musika. (Tagaʻi i ulutala o le Salamo 6, 30, 38, 60, 88, 102, ma le Sala. 120.) A itiiti mai, pe tusa o le 13 o salamo a Tavita, e pei o le Salamo 18 ma le 51, o loo faamatala puupuu mai ai mea tutupu na māfua ai ona tusia. O le tolusefulu fā o salamo e leai ni ulutala. O le tamaʻi upu “Selā,” lea e aliali mai faa-71 i le tusitusiga autū (e lē aofia ai ma ulutala), e masani ona manatu i ai ua na o se faaupuga patino e fesootaʻi i musika pe e mo le faitauina leotele, e ui lava e lē o iloa lona uiga moni. O nisi e faapea mai sa faaalia ai se mālōlōga e manatunatu lē leoa ai i pesega ia po o pesega ma leo o meafaifaaili. O lea la, e lē manaʻomia ona faaleoina pe a faitau.
6. (a) I ā tusi eseese ua vaevaeina i ai le tusi o Salamo? (e) O ai e foliga mai na faatulagaina le tusi o Salamo i le tulaga ua iai nei?
6 Mai i taimi anamua, na vaevaeina ai le tusi o Salamo i vaega po o tusi e lima, e pei ona faaalia iinei: (1) Salamo 1-41; (2) Salamo 42-72; (3) Salamo 73-89; (4) Salamo 90-106; (5) Salamo 107-150. E foliga mai o le uluaʻi aoaoina lava o nei pese sa faia e Tavita. E manino mai e faapea o Esera, le ositaulaga ma “o le tusiupu poto foi o ia i le tulafono a Mose” o ia lea sa faaaogāina e Ieova e faatulaga le tusi o Salamo i le tulaga ua iai nei.—Esera 7:6.
7. O ā nisi vaega o le Salamo e ao ona mātauina?
7 O le auauaʻi ona tuufaatasia o le aoaoina o lenei tuufaatasiga o pese, atonu o le māfuaaga lena o le toe taʻua o nisi salamo i isi vaega, e pei o le Salamo 14 ma le 53; 40:13-17 ma le Sala. 70; 57:7-11 ma le Sala. 108:1-5. O vaega taʻitasi uma lava e lima e faaiʻu i se faaleoina o se faamanū ia Ieova, ia po o se viiga tau tapuaʻiga—o vaega muamua e fā o loo aofia ai tali mai a tagata ma o le vaega mulimuli o le Salamo atoa lea e Sala. 150.—Sala. 41:13, faaopoopoga i lalo, NW.
8. Faamatala ma faataʻitaʻi le auala sa tusia ai le faatulagaina i le faasologa o le alafapeta (acrostic).
8 O se auala faapitoa tau i tusitusiga o loo faaaogāina i salamo e iva; e taʻua o le acrostic e māfua ona o lona faatulagaga e faatulaga i le faasologa o le alafapeta. (Salamo 9, 10, 25, 34, 37, 111, 112, 119, ma le Sala. 145) I lenei faatulagaga o le fuaiupu muamua po o fuaiupu o le vaega muamua, e amata i le mataʻitusi muamua o le alafapeta (pī) Eperu,ʼaʹleph (א), o le fuaiupu po o fuaiupu e sosoo ai e amata i le mataʻitusi lona lua, behth (ב), ona faasolo ai lava lea faapena, i nei mataʻitusi uma ia po o le toetoe lava o mataʻitusi uma o le alafapeta faa-Eperu. Atonu sa avea lenei faiga o se fesoasoani i le manatuaina—seʻi tau ina manatunatu i tagata pepese i le malumalu ae manaʻomia ona manatua pese uumi e pei o le Salamo 119! O le isi mea mataʻina, o le tusiaina faasolosolo o le suafa o Ieova lea o loo maua i le Salamo 96:11. O le ʻafa muamua o lenei fuaiupu i le faa-Eperu e aofia ai upu e fā, ma o mataʻitusi amata o nei upu, pe a faitau mai i le taumatau agaʻi i le agavale, o konesane Eperu ia e fā o le Tetakalamatone, YHWH (יהוה).
9. (a) Ona o le ā le talaaga e māfua ai ona faatosina tuusaʻo mai i o tatou mafaufau ma le ia le tele o salamo? (e) O ā isi mea e saosaolaumea i lo latou uigā ma le matagofie?
9 O nei fatuga paia, ua faatulagaina i ni solo e mafai ona usuina ia o loo tusia i fuaiupu faa-Eperu e lē o faafetauia faaleoga o latou faaiʻuga, ua faaalia ai le matagofie lē mafaatusalia o le auala ma le faagasologa faasolosolo o manatu. O loo talanoa tuusaʻo mai lava i le mafaufau ma le loto. O loo latou faaali maia ni ata manino. O le matagofie o le loloto ma le lautele, e lē gata i le tulaga i mataupu ae atoa ma faalogona malolosi o loo faaupu ai, e māfua mai i se isi itu, ona o mea mataʻina ma le uiga ese na tutupu i le olaga o Tavita, lea e faapogaia ai talaaga o le tele o salamo. E lē toʻatele ni tamaloloa ua oo i ai ni mea eseese faapenei i le olaga—sa avea ma tama leoleo mamoe, na alu toʻatasi e tau ma Koliata, o se fatupese i le maota o le tupu, sa ola sulufaʻi e lē gata a o faatasi ma ana lava uō faamaoni ae faapena foʻi ma ē faalata, o se tupu ma o sē na oo i le tulaga manumalo, o se tamā alofa sa mafatia i fevaevaeaʻiga i lona lava aiga, o se tasi e faalua ona oo i āuga matuitui o agasala matuiā, peitaʻi sa avea pea o ia ma tagata tapuaʻi maelega ia Ieova ma o sē naunau i Lana Tulafono. Pe a fua i lenei ituaiga talaaga, e lētioa lava la a aofia ai i le tusi o Salamo ia ituaiga uma o faalogona faaletagata! E faaopoopo atu i le uigā ma le matagofie o lenei tusi, o le auala lea e fatu ai ia solo i faaupuga uiga tutusa atoa ai ma faaeseesega e pei ona masani i solo faa-Eperu.—Sala. 1:6; 22:20; 42:1; 121:3, 4.
10. O le ā e faamaonia ai le moni aʻiaʻi o Salamo?
10 O le moni aʻiaʻi o nei pese aupito i leva o viiga ia Ieova e matuā faamaonia lava i lo latou ōgatusa atoatoa ma isi vaega uma o le Tusi Paia. E anoanoaʻi taimi o loo sii mai ai le tusi o Salamo e tusitala o Tusitusiga Kerisiano Eleni. (Sala. 5:9 [Roma 3:13]; Sala. 10:7 [Roma 3:14]; Sala. 24:1 [1 Kori. 10:26]; Sala. 50:14 [Mata. 5:33]; Sala. 78:24 [Ioa. 6:31]; Sala. 102:25-27 [Epe. 1:10-12]; Sala. 112:9 [2 Kori. 9:9]) Na taʻua e Tavita lava ia i lana pese mulimuli e faapea: “O aʻu na fetalai ane ai le Agaga o Ieova; o lana afioga foi sa i loʻu laulaufaiva.” O le agaga lava lea sa galue ia te ia talu mai lava le aso na faauuina ai o ia e Samuelu. (2 Samu. 23:2; 1 Samu. 16:13) E lē gata i lea, sa sii mai foʻi e aposetolo manatu mai i Salamo. Sa faasino atu Peteru i “Tusi . . . sa muai fetalai mai e le Agaga Paia i le fofoga o Tavita,” ma i le tele o manatu sii mai i Salamo, o loo faasino atu ai lē na tusia le tusi i uso Eperu i nei faaupuga a lē o ni faamatalaga na fetalai i ai le Atua pe ua faatomua mai i upu nei, “pei ona fetalai mai ai le Agaga Paia.”—Galu. 1:16; 4:25; Epe. 1:5-14; 3:7; 5:5, 6.
11. Ua faapefea i faamaoniga e lagolago ai ona matuā faamaonia aʻiaʻi e fetalaiga a Iesu lava ia?
11 Pe a oo mai i le faamaoniga sili ona malosi o le moni aʻiaʻi, tatou te sii maia le fetalaiga a Iesu, le Alii ua toe faatūina, na fetalai ai i ona aposetolo e faapea: “O upu ia na ou fai atu ai ia te outou . . . e tatau ona taunuu o mea uma ua tusia ia te au i le tulafono a Mose, ma le au perofeta, ma salamo.” Sa faavasegaina e Iesu iinā ia Tusitusiga Eperu atoa i le auala sa talia e tagata Iutaia ma sa latou masani ai. O lona taʻua o Salamo e aofia atoa ai le vaega lona tolu o Tusitusiga Paia, e taʻua o le Hagiographa (po o Tusitusiga Paia), lea o lona tusi muamua o le Salamo. Na faamautinoa mai lenei mea i lana fetalaiga i ni nai itula muamua atu i tagata e toʻalua a o latou agaʻi atu i Emau, ina ua ia “faamatala . . . ia te i laua o mea ua tusia ia te ia i Tusi uma.”—Luka 24:27, 44.
LE POGAI E AOGĀ AI
23. (a) O le ā le feʻau ola o loo aofia ai i Salamo? (e) O faapefea ona faaeaina ai le suafa o Ieova ma lona silisili ese?
23 Ona o lo latou lelei atoatoa i le matagofie ma le auala o loo tusia ai, e mafai ona faaaofia ai salamo o loo i le Tusi Paia i tusi aupito i saunia lelei i so o se gagana. Peitaʻi, e avea ia salamo ma mea e sili atu na i lo na o ni tusitusiga ua saunia lelei. O le feʻau ola mai le Pule Silisili Ese i le aoao o mea, o Ieova le Atua lava ia. O loo aumaia ai le malamalamaga loloto i aʻoaʻoga faavae o le Tusi Paia, ma o loo matilatila ona taʻua ai e uiga ia Ieova, o ia na Māfua ai manatu o iai. O loo faaalia manino ai Ieova o Lē na Foafoaina le vateatea ma mea uma o iai. (8:3-9; 90:1, 2; 100:3; 104:1-5, 24; 139:14) O loo viiviia moni ai lava le suafa o Ieova i le tusi o Salamo, lea o loo aliali mai ai faa-700. E faaopoopo atu i lena, o le taʻu faapuupuu o “Ioa” o loo maua ai faa-43, o lona uiga a tuufaatasi o loo taʻua le suafa tauatua pe tusa o le faa-5, i se fuafaatatau, i Salamo taʻitasi. E lē gata i lena, o loo taʻua ai Ieova faa-350 i le taʻu ʼElo·himʹ, po o le Atua. O loo faaalia le pule silisili ese a Ieova i faamatalaga e faatatau ia te ia e faapea o ia o le “Alii Pule Silisili Ese “ i le tele o salamo.—Tagaʻi i le 68:20; 69:6; 71:5; 73:28; 140:7; 141:8 i le New World Translation.
24. O le ā o loo taʻua i Salamo e faatatau i tagata e mafai ona oti, ma o ā fautuaga talafeagai o loo i ai?
24 I se faaeseesega ma le Atua e soifua e faavavau, o loo faaalia ai le tagata lea e mafai ona oti e faapea, e fanau mai i le agasala ma e manaʻomia se togiola, ma ua faaalia ai e oti le tagata ma liua “ia momomo,” e alu ifo i Seoli le tuugamau o le fanau a tagata. (6:4, 5; 49:7-20; 51:5, 7; 89:48; 90:1-5; 115:17; 146:4) O loo faamamafa i le tusi o Salamo le manaʻoga o le utagia o le tulafono a le Atua ma faalagolago ia Ieova. (1:1, 2; 62:8; 65:5; 77:12; 115:11; 118:8; 119:97, 105, 165) O loo lapataʻi mai e faatatau i le faamaualuga ma “agasala lilo” (19:12-14; 131:1) ma faalaeiauina ai aumea lelei ma faamaoni. (15:1-5; 26:5; 101:5) O loo faaalia ai e faapea o amioga saʻo e aumaia ai le faamaoniga a Ieova. (34:13-15; 97:10) O loo ofoina mai ai foʻi le faamoemoe pupula i le faapea mai “o loo ia Ieova le faaolataga” ma i le tulaga o i latou e matataʻu ia te ia, o le a ia “laveai ia te i latou ai le oti.” (3:8; 33:19) O lea la ua tatou oo mai nei i le tulaga faavaloaga.
25. (a) O ā mea o loo toetoe lava aofia atoa ai le tusi o Salamo? (e) Na faapefea ona faaaogā e Peteru ia Salamo e faailoa ai po o ai le Tavita Sili?
25 E toeitiiti lava aofia atoa le tusi o Salamo i valoaga e faasino atu i luma ia Iesu Keriso, le “atalii o Tavita,” atoa ma le matafaioi o le a ia faatino i le avea ai ma Lē Faauuina a Ieova ma o le Tupu.a (Mata. 1:1) A o amataina le faapotopotoga Kerisiano i le aso Penetekoso 33 T.A., sa amata ai ona faamalamalamaina e le agaga paia le ʻauaposetolo e faatatau i le faataunuuina o nei valoaga. I le aso lava lena, sa sii mai ai pea lava pea e Peteru upu mai Salamo i le talanoaina o le matua o lana lauga taʻutaʻua. Sa faatatau atu lea i se tagata e toʻatasi: “O Iesu le Nasareta.” O le vaega mulimuli o lana finauga o loo faavae mai toeitiiti lava o manatu sii uma mai i Salamo e faamaonia ai o Iesu Keriso o le Tavita Sili lea ma o le a lē tuua e Ieova Iesu i Seoli ae o le a toe faatūina o ia mai le oti. Leai, “e lei alu ae Tavita i le lagi,” peitaʻi e pei ona ia valoia mai i le Salamo 110:1, sa faia faapea e lona Alii. O ai le Alii o Tavita? Sa pāʻia e Peteru le tumutumuga o lana lauga ma tali atu ma le maumauaʻi e faapea: “O Iesu lava lena na faasatauroina e outou”!—Galu. 2:14-36; Sala. 16:8-11; 132:11.
26. Sa faapefea ona faamaonia le aogā o le lauga a Peteru?
26 Pe sa aogā ea le lauga a Peteru, lea sa faavae mai i Salamo? O le papatisoina o le 3,000 i le aso lava lena e faaopoopo i le faapotopotoga Kerisiano e mafai ona fai ma molimau i lena mea.—Galu. 2:41.
27. Na faapefea ona faamatalaina e “le agaga paia” le Salamo 2?
27 E leʻi leva lava mulimuli ane ai, i se faatasiga faapitoa, sa alalaga atu ai le ʻausoo ia Ieova ma sii mai le Salamo 2:1, 2. Na latou faapea mai ua faataunuuina lenei Salamo e ala i le aufaatasi o pule e tetee atu i ʻ le auauna paia [a le Atua] o Iesu, ua faauuina [e le Atua].’ Ma ua faaauau le faamatalaga i le faapea mai “ua tutumu foi i latou uma i le Agaga Paia.”—Galuega 4:23-31.
28. (a) E ala i le faaaogāina o Salamo, o le ā le finauga sa faia e Paulo i le Eperu mataupu 1 e oo i le 3? (e) O faapefea ona saunia mai i le Salamo 110:4 se faavae mo le talanoaina e Paulo o le tulaga ositaulaga faa-Mekisateko?
28 Tagaʻi nei i le tusi i Eperu. I uluaʻi mataupu e lua, tatou te maua ai ni nai manatu sii mai i Salamo e faatatau i le tulaga faaeaeaina o Iesu, i le avea ma Alo faanofotupuina o le Atua i le lagi, e sili aʻe i agelu. Sa faaalia e Paulo mai le Salamo 22:22 atoa ma isi faasinoga e faapea e iai le faapotopotoga o “uso” o Iesu, o se vaega o le fanau a Aperaamo ma “e ua tofutofusia i le valaau mai le lagi.” (Epe. 2:10-13, 16; 3:1) Ona amata mai lea i le Eperu 6:20 ma faaauau i le Eperu mataupu e 7, sa faamatalaina atili ai e le aposetolo le isi tofiga ua maua e Iesu i le avea ma “ositaulaga sili e faavavau, e uiga faatasi ma Mekisateko.” O loo faatatau atu lea i le folafolaga na tautō ai le Atua i le Salamo 110:4, lea o loo fai ma faasino soo atu i ai Paulo e faamaonia ai le maualuga o le tulaga ositaulaga o Iesu i lo Arona. Sa faamatala e Paulo e faapea e ala i le tautoga a Ieova ua avea Iesu Keriso ma ositaulaga, e lē i le lalolagi, ae i le lagi, ma e “tumau o ia o le ositaulaga e faavavau”—o le a faavavau faamanuiaga o lana auaunaga faaositaulaga.—Epe. 7:3, 15-17, 23-28.
29. O le ā le faaaʻoaʻoga mataʻina o le tuutoina atu e ao ona tatou utagia, e pei ona taʻua i Salamo ma faamatalaina i le Eperu 10:5-10?
29 E lē gata i lena, i le Eperu 10:5-10, ua taʻu mai ai ia i tatou e faatatau i le talisapaia lelei sa faaalia e Iesu mo le ala faataulagaina, lea o le finagalo o le Atua mo ia, atoa ai ma lona maumauaʻi e faataunuuina lena finagalo. E faavae lenei mea i upu a Tavita o loo i le Salamo 40:6-8. O lenei agaga e mafai ona faaaʻoaʻo i ai o le tuutoina atu e matuā aogā tele mo i tatou uma ona iloilo ma faaaʻoaʻo i ai ina ia maua ai le finagalo malie o le Atua.—Tagaʻi foʻi i le Salamo 116:14-19.
30. Sa faapefea ona valoia mai auʻiliʻili i Salamo le ala na uia e Iesu, ma sa faapefea ona ia maua mai ai le faamāfanafanaga i nei Salamo?
30 O le ala na uia e Iesu, sa faatumutumu lava i mafatiaga ogaoga sa ia onosaia i luga o le laau faaoosala, ia sa valoia mai i Salamo i se tulaga mataʻina i ona auʻiliʻiliga uma. E aofia ai i lenei le ofo atu ia te ia o le vineta e inu ai, le faia o le vili i lona ofu tino, o faiga sauā na latou faia i ona vae ma ona lima, o tauemuga, ae sili atu ai le matuitui ma le mafatia o le mafaufau i lona alaga atu ma le tigā: “Loʻu Atua e, loʻu Atua e, se a ea le mea ua e tuulafoai mai ai ia te au?” (Mata. 27:34, 35, 43, 46; Sala. 22:1, 7, 8, 14-18; 69:20, 21) E pei ona faaalia mai i le Ioane 19:23-30, e faapea a o faagasolo lava foʻi na itula, sa maua mai e Iesu se faamāfanafanaga tele atoa ma se taʻitaʻiga mai i Salamo, i lona silafiaina lea e tatau ona faataunuuina nei mau seʻia oo lava i lona auʻiliʻiliga mulimuli. Sa silafia e Iesu o loo taʻua foʻi i Salamo e faatatau i lona toetū mai atoa ma lona faaeaina. E lē taumatea le iai o na mea i lona finagalo a o ia taulamua e ‘fai pese,’ po o salamo, faatasi ai ma ona aposetolo i le pō mulimuli a o lumanaʻi lona maliu.—Mata. 26:30.
31. O le ā sa valoia mai i le tusi o Salamo e faatatau i le Suli o le Malo atoa ai ma le faapotopotoga a Iesu?
31 I lea la auala, ua manino ona faailoa mai ai i Salamo ia le “atalii o Tavita” ma le Suli (Seed) o le Malo e faapea o ia lea o Keriso Iesu, o lē ua faaeaina nei e lē gata o se Tupu ae o se Ositaulaga i Siona faalelagi. E lē lava le avanoa e faamatalatala auʻiliʻili ai vaega uma o Salamo ia sa sii mai i Tusitusiga Kerisiano Eleni, ua faataunuuina ia te ia lenei o Lē ua Faauuina e Ieova, ae o nisi nei o faaaʻoaʻoga ua taʻua atili iinei: Sala. 78:2—Mata. 13:31-35; Sala. 69:4—Ioa. 15:25; Sala. 118:22, 23—Mare. 12:10, 11 ma le Galu. 4:11; Sala. 34:20—Ioa. 19:33, 36; Sala. 45:6, 7—Epe. 1:8, 9. E lē gata i lena, o loo valoia mai foʻi i Salamo le faapotopotoga a Iesu o soo moni, e lē i o latou tulaga taʻitoʻatasi, ae i lo latou tulaga o se vaega ua tuuina atu i le finagalo malie o le Atua mai i atunuu uma ina ia auai i le galuega o le viiaina o le suafa o Ieova.—Sala. 117:1—Roma 15:11; Sala. 68:18—Efe. 4:8-11; Sala. 95:7-11—Epe. 3:7, 8; 4:7.
32. (a) O le ā ua faaalia i le suʻesuʻeina o Salamo e faatatau i le faaeaeaina o Ieova atoa ma ana fuafuaga o le Malo? (e) I le talisapaia o lona tulaga tautupu, e faapefea ona tatou faaalia le faamaoni ma le lotofaafetai?
32 O lo tatou suʻesuʻeina o Salamo ua tele sona sao i lo tatou talisapaia o le tulaga tautupu o Ieova le Atua, lea o loo Ia faatinoina e ala i le Fanau folafolaina, o ia foʻi o le Suli o le Malo, mo le faamamaluina ma le faaeaeaina o Ieova. Tau ina ia tatou iai pea i le ʻaufaamaoni o ē o loo faaneenee i le ‘matagofie o le viiga o le mamalu o Ieova,’ ma o ē o loo taʻua i le Salamo 145, lea o loo faasino i ai “o le vii a Tavita”: “E tautalatala atu i latou i le mamalu o lou malo, ma taʻutaʻu atu i lou mana; ina ia faailoa atu i le fanau a tagata ana mea mamana, ma le mamalu matagofie o lona malo. O lou malo o le malo lea e faavavau lava; ma lau pule e āu tupulaga lava lea.” (Sala. 145:5, 11-13) Ua moni lava e pei ona taʻua i le salamo faavaloaga, o le matagofie o le Malo o le Atua ua faavaeina nei e ala ia Keriso ua faalauiloa atu nei i le fanau a tagata i atunuu uma. Maʻeu lo tatou lotofaafetai e ao ona iai mo lena Malo ma lona Tupu! Ua matuā talafeagai lava la, upu o loo faaiʻu mai ai Salamo: “Ia vivii atu ia Ioa o mea uma lava e manava. Ia outou vivii atu ia Ioa!”—150:6.
[Faaopoopoga i lalo]