O Sauniga e “Faatupu ai le Alofa ma Galuega Lelei”

A O FAAGASOLO mai le tele o senituri, na faapotopoto faatasi ai tagata o Ieova i se auala maopoopo. I Isaraelu anamua, na malaga ai tane uma i Ierusalema mo ni tausamiga tetele se tolu sa faia ai. (Teu. 16:16) I le uluaʻi senituri, sa masani ona faapotopoto e lē aunoa Kerisiano, o le tele lava o taimi i fale o aiga. (File. 1, 2) O loo tatou maua foʻi i aso nei le olioli i faatasitasiga i sauniga, fonotaga ma tauaofiaga. Aiseā e faapotopoto ai auauna a le Atua? O le māfuaaga autū lava, ona o se vaega tāua lea o la tatou tapuaʻiga.​—Sala. 95:6; Kolo. 3:16.

² E aogā foʻi sauniga iā i latou e auai ai. Sa faia le Tausamiga o Fale Lauvao i Isaraelu i tausaga taʻitasi. Ae e tusa ai ma le tausaga lona fitu o lenā tausamiga, ua faatonuina e le Tusi Paia: “Ia faapotopoto le nuu, o tane, o fafine, o fanau iti ma le tagata ese e aumau iā te oe i ou aai, ina ia latou faalogo ma latou aʻoaʻo ai, auā e ao ona latou matataʻu iā Ieova lo outou Atua, ma ia toʻaʻaga e tausia upu uma o lenei tulafono.” (Teu. 31:12) Ua manino mai la i inei, o le isi māfuaaga tāua e faapotopoto faatasi ai, ina ia “aʻoaʻoina e Ieova.” (Isa. 54:13) O le auai i sauniga e maua ai foʻi le avanoa e faamasani ai le isi i le isi, maua ai faalaeiauga ma le malosi mai i faatasitasiga ma isi.

SAUNIGA A LE FAAPOTOPOTOGA

³ Na uaʻi totoʻa atu soo na faapotopoto faatasi ina ua mavae le Penetekoso 33 T.A., i aʻoaʻoga mai i le ʻauaposetolo, ma na “iai pea i latou ma le lotogatasi i le malumalu i lea aso ma lea aso.” (Galu. 2:42, 46) Mulimuli ane, ina ua faapotopoto faatasi Kerisiano mo le tapuaʻiga, na latou faitauina ai tusitusiga faagaeeina lea e aofia ai ma tusi na tusia e le ʻauaposetolo faapea isi soo Kerisiano. (1 Kori. 1:1, 2; Kolo. 4:16; 1 Tesa. 1:1; Iako. 1:1) Na latou tatalo faatasi foʻi i le faapotopotoga. (Galu. 4:24-29; 20:36) I nisi taimi, na faamatala ai foʻi tala o mea na tutupu i le galuega faamisionare. (Galu. 11:5-18; 14:27, 28) Na iloiloina ai foʻi nisi o aʻoaʻoga faale-Tusi Paia ma le faataunuuga o valoaga faagaeeina. Na avatu ai foʻi faatonuga e faatatau i amioga tatau faa-Kerisiano ma le faamaoni i le Atua. Na faalaeiauina ai foʻi tagata uma ina ia avea ma ē e folafola atu ma le maelega le tala lelei.​—Roma 10:9, 10; 1 Kori. 11:23-26; 15:58; Efe. 5:1-33.

⁴ O loo faia sauniga faa-Kerisiano i aso nei, i le auala na faatulaga ai i taimi o le ʻauaposetolo. O loo tatou usitaʻia le timaʻiga faagaeeina o loo maua i le Eperu 10:24, 25: ʻIa tatou manatunatu le tasi i le isi, aua neʻi tuulafoaʻiina le faapotopotoina o i tatou e pei o le masani a isi, a ia fefaalaeiauaʻi, ia sili foʻi ona faia faapea auā ua outou iloa ua matuā latalata mai lava le aso.’ A o faagasolo nei aso e gata ai ua sili ona faigatā, e tatou te manaʻomia faalaeiauga e maua mai i le faapotopoto faatasi e lē aunoa, ina ia faatumauina ai lo tatou malosi faaleagaga ma le faamaoni o ni Kerisiano. (Roma 1:11, 12) I le avea ai ma Kerisiano, o loo tatou ola faatasi ma se tupulaga faapiʻopiʻo ma le taufaasesē. Ua tatou teena amioga faalēmataʻu ma tuʻinanauga o le lalolagi. (Fili. 2:15, 16; Tito 2:12-14) O fea se isi mea sili e tatou te iai nai lo o le faapotopoto faatasi ma tagata o Ieova? (Sala. 84:10) O le ā foʻi se isi mea e sili ona aogā nai lo o le suʻesuʻeina ma le iloiloina o le Afioga a le Atua? Seʻi o tatou tilofaʻia sauniga eseese ua faatulagaina, ina ia tatou maua ai le tele o aogā.

SAUNIGA FAAIʻU O LE VAIASO

⁵ O le vaega muamua o le sauniga i faaiʻuga o vaiaso, e faia ai se lauga faale-Tusi Paia e fuafua faapitoa lava mo tagata lautele. O nisi o i latou na, o le taimi muamua lea ua auai ai i se sauniga. E tāua tele lenei lauga, auā le faamalieina o manaʻoga faaleagaga o tagata fou faatoʻā auai, faapea le ʻautalaʻi a le faapotopotoga.​—Galu. 18:4; 19:9, 10.

⁶ Na faia e Iesu, o ona aposetolo, ma ē na latou auaumea faatasi ni sauniga mo le lautele, e talitutusa ma sauniga o loo faia e faapotopotoga o tagata o Ieova i aso nei. E mautinoa o Iesu o ia o le failauga silisili na soifua mai i le lalolagi. Na faapea mai se faamatalaga e faatatau iā te ia: “E leai lava se tagata ua tautala e pei o lenei tagata.” (Ioa. 7:46) Na fetalai atu Iesu e pei o sē ua iai le pule, ma na matuā ofo ai lana ʻaufaalogologo. (Mata. 7:28, 29) E tele aogā na maua e i latou na teulotoina lana feʻau. (Mata. 13:16, 17) Na mulimuli le ʻauaposetolo i le faaaʻoaʻoga a Iesu. I le Galuega 2:14-36, e tatou te faitau ai i le lauga aasa a Peteru i le Penetekoso 33 T.A. E faitau afe i latou na uunaʻia e faia ni gaoioiga, ona o mea na latou faalogo i ai. Mulimuli ane, na avea foʻi nisi ma tagata talitonu ina ua latou faalogo i le lauga a Paulo i Atenai.​—Galu. 17:22-34.

⁷ I aso nei, e faitau miliona ua maua aogā mai i lauga i le lautele i vaiaso taʻitasi i faapotopotoga, faapea foʻi lauga i le lautele e faia i taimi o fonotaga ma tauaofiaga. E fesoasoani nei lauga iā i tatou ina ia piiama atu ai pea i aʻoaʻoga faa-Kerisiano, ma tutumau ai i le auaunaga mo le Malo. E ala i le valaaulia o tagata fiafia ma tagata lautele i lenei sauniga, e ono tele ai sa tatou vaega e faia i le faailoaina atu i tagata o mataupu faavae o le Tusi Paia.

⁸ E eseese mataupu e talanoaina i lauga i le lautele. E aofia ai lauga e faatatau i aʻoaʻoga ma valoaga o le Tusi Paia. O lauga e faatatau i mataupu silisili faale-Tusi Paia ma fautuaga faale-Tusi Paia i olaga faaleaiga, o mataupu e faatatau i faaipoipoga, o amioga faa-Kerisiano ma tulaga o loo fesagaʻia e talavou. E taulaʻi atu nisi lauga i galuega ofoofogia a Ieova o le foafoaga. E faamatilatila i isi lauga faaaʻoaʻoga mataʻina o le faatuatua, lototele, ma le faamaoni o tagata o loo taʻua i le Tusi Paia, ma taulaʻi atu i lesona e tatou te maua mai ai mo o tatou aso.

⁹ Ina ia maua atoatoa aogā mai i lauga i le lautele, e matuā tāua mo i tatou ona uaʻi totoʻa atu i taimi o sauniga, suʻe mau o loo taʻua e le failauga, ma mulimuli atu a o faitau ma faamatala e le uso na mau. (Luka 8:18) A o tatou faamautinoa mea o loo talanoaina, o le a tatou maumauaʻi ai e taofimau i na mea ua aʻoaʻoina ma faatatauina.​—1 Tesa. 5:21.

¹⁰ Pe afai e lava failauga, o le a faia pea nei lauga lautele i le faapotopotoga i vaiaso taʻitasi. O le tele o taimi, ina ia faia lauga lautele i vaiaso taʻitasi, e mafai ona valaaulia failauga asiasi mai i isi faapotopotoga e lata ane. Ae afai e lē lava failauga, e ono faia nei lauga i le tele e mafai ai.

¹¹ O le vaega lona lua o le sauniga i le faaiʻuga o le vaiaso o le Suʻesuʻega o Le Olomatamata. O lenei suʻesuʻega o se talanoaga e faafesili ma tali, e iloiloina ai mataupu ua lomia i le lomiga o Le Olomatamata mo suʻesuʻega. E ala i Le Olomatamata, ua saunia mai ai e Ieova meaʻai faaleagaga mo i tatou i le taimi tatau.

¹² E tele ina taulaʻi atu mataupu mo suʻesuʻega, i le auala e faatatauina ai mataupu silisili o le Tusi Paia i le olaga i aso taʻitasi. E faamalosia ai Kerisiano e tetee atu i “le agaga o le lalolagi” ma amioga lē mamā. (1 Kori. 2:12) O loo auala mai foʻi i Le Olomatamata le faamalamalamaina atili mai o aʻoaʻoga a le Tusi Paia faapea valoaga, lea ua mafai ai e tagata uma ona piiama atu pea i le upu moni, ma tumau ai i le ala o ē amiotonu. (Sala. 97:11; Faata. 4:18) O le auai i le Suʻesuʻega o Le Olomatamata ma faia ai se sao, o le a fesoasoani iā i tatou e olioli ai i le faamoemoe o le lalolagi fou amiotonu a Ieova. (Roma 12:12; 2 Pete. 3:13) E fesoasoani a tatou faatasitasiga faa-Kerisiano e tatou te atiaʻe ai le fua o le agaga, ma faateleina ai lo tatou naunau e auauna iā Ieova ma le maelega. (Kala. 5:22, 23) E faamalosia ai i tatou e tumau i taimi o faigatā, ma atiaʻe ai se “faavae lelei mo le lumanaʻi” ina ia tatou ʻtaofimau ai i le ola moni.’​—1 Timo. 6:19; 1 Pete. 1:6, 7.

¹³ E faapefea ona tatou maua atoatoa aogā mai i lenei faatulagaga mo le fafagaina faaleagaga? E tatau ona tatou muaʻi sauniuni i le mataupu, tilofaʻia mau o loo sii mai, ma sauni e fai tali i a tatou lava upu. E tatou te sauniuni faatasi o se aiga pe sauniuni foʻi le tagata lava ia. O le faia faapea, o le a goto ifo ai le upu moni i o tatou loto, ma o le a maua ai foʻi e isi aogā a o tatou faaleo atu lo tatou faatuatua. Pe a tatou faalogologo lelei i sao o isi, e mautinoa o le a tatou maua ai aogā i vaiaso taʻitasi.

SAUNIGA AMATA O LE VAIASO

¹⁴ I vaiaso taʻitasi, e faatasitasi ai le faapotopotoga i le Maota mo Sauniga mo se sauniga e taʻua o La Tatou Faiva ma le Olaga Faa-Kerisiano. O lenei sauniga e tolu ona vaega, ma ua fuafuaina ina ia fesoasoani iā i tatou e “agavaa” ai o ni faifeʻau a le Atua. (2 Kori. 3:5, 6) O le a maua mai le faasologa ma mataupu o le a faaaogā i lenei sauniga, i La Tatou Faiva ma le Olaga Faa-Kerisiano​—Polokalame mo le Sauniga, lea o le a maua i masina taʻitasi. O le a maua foʻi i lenei Polokalame mo le Sauniga o le Faiva ma le Olaga Faa-Kerisiano nisi o taulimaga faataʻitaʻi e faaaogā i le faiva.

¹⁵ O le vaega muamua o le sauniga e taʻua o le: ʻOa Tautele Mai i le Afioga a le Atua. O lenei vaega o le a fesoasoani ina ia faamasani ai i talaaga o mea na tutupu, ma manatu o loo siʻomia ai se fuaiupu po o ni fuaiupu o le Tusi Paia, ma aʻoaʻo ai pe e faapefea ona faatatauina nei manatu. E aofia i le vaega muamua lenei o le sauniga se lauga, le faitauina o le Tusi Paia, ma se talanoaga e faavae mai i le faitau Tusi Paia o le vaiaso. E iai foʻi ni fesoasoani vaaia ma ni avanoa mo faamaumauga i le Polokalame mo le Sauniga o le Faiva ma le Olaga Faa-Kerisiano, e fesoasoani e aʻoaʻo atu ai nei tusi o le Tusi Paia. O le iloiloga loloto lenei o le Tusi Paia e aogā i o tatou olaga i aso faisoo faapea la tatou aʻoaʻo atu, “ina ia matuā agavaa ai le tagata o le Atua, e lava saunia mo galuega lelei uma.”​—2 Timo. 3:16, 17.

¹⁶ O le vaega lona lua o le sauniga e taʻua o le: Toleniga mo le Faiva i le Fanua, ua faatulagaina lenā avanoa atoa e faataʻitaʻi ai mea e faia i le talaʻiga ma faaleleia ai tomai e talaʻi ma aʻoaʻo atu ai. E faaopoopo atu i tofiga mo le ʻau aʻoga, e manaʻomia foʻi ona talanoaina vitiō o taulimaga faataʻitaʻi. O le a fesoasoani lenei vaega o le sauniga, e tatou te maua ai ni “laulaufaiva o ē ua aʻoaʻoina” ina ia “iloa le tala e fai atu i lē ua vaivai.”​—Isa. 50:4.

¹⁷ O le vaega lona tolu o le sauniga e taʻua o le: Auala e Ola ai o se Kerisiano. E iloiloina i lenei vaega faatatauga aogā o mataupu silisili o le Tusi Paia i le olaga i aso fai soo. (Sala. 119:105) O se tasi o vala autū o lenei vaega o le sauniga, o le Suʻesuʻega Faale-Tusi Paia a le Faapotopotoga. E pei lava o le Suʻesuʻega o Le Olomatamata, e faafesili ma tali ona faia le Suʻesuʻega Faale-Tusi Paia a le Faapotopotoga.

¹⁸ E iloilo totoʻa e le sooupu a le ʻautoeaina po o se toeaina foʻi o loo fesoasoani iā te ia, le Polokalame mo le Sauniga o le Faiva ma le Olaga Faa-Kerisiano pe a maua mai i masina taʻitasi, ma faia aʻe ai le faasologa mo le sauniga. I vaiaso taʻitasi, e avea ai ma taʻitaʻifono i le sauniga se toeaina e lelei lana aʻoaʻo atu ma ua faamaonia e le ʻautoeaina. O le tiute a lē o le a avea ma taʻitaʻifono, o le faamautinoa lea e amata ma faaiʻu le sauniga i le taimi faatulagaina, avatu se faamālō ma fautuaga i tagata aʻoga o le a faia ni vaega.

¹⁹ A o tatou sauniuni e lē aunoa, auai ma faia se sao i le Sauniga o le Faiva ma le Olaga Faa-Kerisiano, e tatou te maua ai le poto i le Tusi Paia, malamalamaga i mataupu silisili o le Tusi Paia, toʻa e talaʻi atu le tala lelei faapea tomai i le faia o isi ma soo. O i latou e leʻi avea ma Molimau papatisoina e auai i lenei sauniga, o le a maua aogā mai i faatasitasiga māfana ma vaega e faia mai i le pulelaa lea e faamalosia ai faaleagaga. Ina ia fesoasoani iā i tatou e sauniuni mo lenei sauniga ma isi vala, e mafai ona tatou faaaogā lelei le Watchtower Library, JW Library^® po o le vaega o Lomiga Faale-Tusi Paia I LE INITANETI^™ (pe a maua i la outou gagana), po o le potu tusi foʻi a le faapotopotoga. E tatau ona iai i le potu tusi i le Maota mo Sauniga lomiga a Molimau a Ieova ua maua i le taimi nei. E tatau foʻi ona iai le Watch Tower Publications Index, po o le Tusi Taʻiala mo Saʻiliʻiliga a Molimau a Ieova, o faaliliuga eseese o le Tusi Paia, o se tusi faasino mau ma isi tusi mo saʻiliʻiliga. E mafai ona faaaogā le potu tusi i le Maota mo Sauniga, a o leʻi amata ma pe a māeʻa foʻi le sauniga.

FAATASIGA MO LE TALAʻIGA

²⁰ A o faagasolo le vaiaso ma le faaiʻuga o le vaiaso, e faatasitasi ai vaega o tagata talaʻi i taimi eseese mo se taimi puupuu, e sauniuni ai mo le auaunaga i le fanua. O nei faatasitasiga e tele lava ina fai i fale o aiga, po o nisi nofoaga talafeagai. E ono faaaogā foʻi le Maota mo Sauniga mo lea faatasiga. O le feiloaʻi i ni vaega toʻaitiiti i nofoaga eseese i le oganuu, o le a faigofie ai mo le ʻautalaʻi ona ō atu i faatasiga mo le talaʻiga ma le oganuu. O le a vave ai ona faamaopoopo le ʻautalaʻi, ma ō atu saʻo loa i le oganuu e aunoa ma le faatuai. O le a faigofie ai foʻi i le ovasia o le vaega, ona uaʻi atu i sui taʻitasi o i lana vaega. E ui e tele aogā o le feiloaʻi i vaega, ae e ono faatulaga e feiloaʻi faatasi nisi o vaega ona o nisi o māfuaaga. O se faataʻitaʻiga, i talaʻiga i le ogatotonu o le vaiaso lea e tele ina toʻaitiiti ai le ʻautalaʻi, e ono tele atu aogā e maua pe a feiloaʻi faatasi ni vaega, po o le faapotopotoga atoa a lē i le Maota mo Sauniga po o se isi nofoaga talafeagai. O lea fuafuaga o le a maua ai pea e le ʻautalaʻi ni paga e latou te galulue faatasi. E ono filifili foʻi le faapotopotoga e talafeagai pe a feiloaʻi faatasi i le Maota mo Sauniga, i taimi o aso mālōlō a le lalolagi. E ono fuafua foʻi e feiloaʻi faatasi le faapotopotoga, i le faatasiga mo le talaʻiga lea e fai pe a māeʻa le Suʻesuʻega o Le Olomatamata.

²¹ Pe afai e feiloaʻi i vaega mo le talaʻiga i nofoaga eseese, o le ovasia o le vaega e taʻimua i le faatasiga mo le talaʻiga. E mai i lea taimi i lea taimi, e ono faatulaga ai e le ovasia o le vaega lona fesoasoani, po o se isi uso agavaa e taʻimua i lea faatasiga. E tatau i lē o loo taʻimua ona sauniuni e talanoaina ni manatu o le a aogā, ma fesoasoani mo le faiva i le fanua i lenā aso. Pe a uma ona faatulaga fuafuaga mo le faiva i le fanua, ona faia lea e se tasi o le vaega le tatalo. A māeʻa lenā ona ō atu saʻo loa lea i le oganuu i le taimi lava lenā. O le faatasiga mo le talaʻiga e tatau ona 5 i le 7 minute le umi. Ae pe a māeʻa se sauniga, o lenā faatasiga e tatau ona faapuupuu atu nai lo o le taimi faatulagaina. E tatau i nei faatasiga ona maua mai ai faalaeiauga, faatonuga aogā, ma taʻiala mo ē o le a ō atu i le galuega talaʻi. O tagata talaʻi fou ma isi tagata talaʻi e ono manaʻomia se fesoasoani, e mafai ona galulue faatasi ma ē ua lava le tomai, ina ia mafai ai ona fesoasoani atu iā i latou.

FAATULAGAGA MO SAUNIGA I FAAPOTOPOTOGA FOU PE E TOʻALAITI

²² A o faatoʻateleina ē ua avea ma soo, o le faatupulaʻia foʻi lea o le aofaʻi o faapotopotoga. E masani lava e faaoo atu e le ovasia o le matagaluega se talosaga mo se faapotopotoga fou. I nisi o tulaga, e ono sili atu ona lelei mo se vaega toʻaitiiti ona aufaatasi atu i se faapotopotoga e latalata ane.

²³ I nisi taimi, e na o tuafāfine lava e faia aʻe ai faapotopotoga e toʻalaiti. Pe afai o le tulaga lea, o le tuafafine e faia tatalo pe faafoeina sauniga, e tatau ona fai sona ufiulu ina ia ōgatusa ai ma faatulagaga faale-Tusi Paia. (1 Kori. 11:3-16) I le tele lava o tulaga, e nofo pea o ia i lalo ma faasaga atu i le aofia. E lē tu atu se tuafafine i luma o se aofia ma lauga atu. Nai lo o lea, e latou te faitauina atu mataupu ua saunia mai e le faalapotopotoga, ma fai i ai ni o latou manatu. E ono mafai foʻi ona latou iloiloina e ala i le faatalanoa o le mataupu po o le faia o se faataʻitaʻiga. O le a faatulaga e le ofisa o le lālā se tasi o tuafafine e gafa ma tusi mai le ofisa ma faia sauniga a le faapotopotoga. Mulimuli ane pe a agavaa ni uso e tofia o ni auauna o le faiva po o ni toeaina, o i latou ia o le a vaavaaia nei tiute tauave.

FONOTAGA MATAGALUEGA

²⁴ E faia faatulagaga mo faapotopotoga o loo faia aʻe ai se matagaluega, ina ia faapotopoto faatasi mo ni fonotaga matagaluega e taʻitasi aso, ae faalua ona fai i tausaga taʻitasi. O nei faatasiga e olioli ai, e maua ai e i latou uma e auai le avanoa e ʻfaalautele atu ai o latou loto’ a o faatasitasi ma isi Kerisiano. (2 Kori. 6:11-13) A o taulaʻi atu i se manaʻoga faapitoa, e faatulaga ai e le faalapotopotoga se matua faale-Tusi Paia ma vaega eseese o le polokalame e faatatau i lenā manaʻoga. E faaoo atu le feʻau e ala i lauga, faataʻitaʻiga, le toe faaataina mai o se mea moni na tupu, se tagata o loo talanoa iā te ia lava po o ni faatalanoaga. O na faatonuga e maua mai i le taimi tatau, o le a faamalosia ai i latou uma o le a auai. I nei fonotaga, o le a maua ai foʻi le avanoa mo soo fou e faailogaina ai lo latou tuuina atu iā Ieova e ala i le papatisoga.

TAUAOFIAGA ITUMALO

²⁵ E faatasi i le tausaga ona faia ni tauaofiaga tetele. O nei tauaofiaga itumalo e masani lava ona faia mo le tolu aso, ma e auai ai faapotopotoga mai i matagaluega eseese. I nisi o lālā lāiti, e ono filifili e lelei mo faapotopotoga uma o loo i le oganuu a lea lālā ona tauaofia i se nofoaga se tasi. I nisi o atunuu, e ono eseese faatulagaga mo nei tauaofiaga, e fua i le tulaga o le atunuu po o taʻiala foʻi mai i le faalapotopotoga. E faatulaga foʻi mai i lea taimi i lea taimi tauaofiaga faavaomalo, po o tauaofiaga faapitoa i nisi o atunuu, lea e mafai ona auai ai le faitau sefulu afe o Molimau mai i atunuu eseese. A o faagasolo mai tausaga, e toʻatele na latou aʻoaʻoina le tala lelei o le Malo, ona o faasalalauga na faia e faalauiloa ai nei tauaofiaga tetele a Molimau a Ieova.

²⁶ E manatu tagata tuuina atu iā Ieova i nei tauaofiaga o ni faatasiga e olioli ai i le tapuaʻiga autasi. O nei tauaofiaga o loo faasusuluina atili mai ai le malamalama o le upu moni. E tatalaina ai foʻi nisi o lomiga fou mo suʻesuʻega a le tagata lava ia, suʻesuʻega a le faapotopotoga, ma lomiga e faaaogā i le faiva i le fanua. E faia ai foʻi papatisoga. E tāua tele nei tauaofiaga i le tuputupu aʻe faaleagaga. Ua faamaonia i nei tauaofiaga o tagata o Ieova, o se ʻauuso i le lalolagi aoao o Kerisiano tuuina atu ua iai le faailoga o soo o Iesu Keriso.​—Ioa. 13:35.

²⁷ E ala i le auai i sauniga a le faapotopotoga, faapea fonotaga ma tauaofiaga a tagata o Ieova, ua faamalosia ai i tatou e faia le finagalo o Ieova. Ua puipuia ai foʻi i tatou mai i taaʻiga a le lalolagi, lea e ono faavaivaia ai lo tatou faatuatua o ni Kerisiano. O nei faatasiga uma e faamamaluina ma viia ai Ieova. (Sala. 35:18; Faata. 14:28) E tatou te lotofaafetai ona o nei faatasiga ua saunia mai e Ieova, mo le faafouina faaleagaga o ona tagata tuuina atu i lenei taimi o le iʻuga.

LE TALISUAGA AFIAFI A LE ALII

²⁸ E faatasi i le tausaga i le aso tonu na maliu ai Iesu Keriso, e faapotopoto ai faapotopotoga uma a Molimau a Ieova i le lalolagi aoao, mo le Faamanatuga o le maliu o Keriso po o le Talisuaga Afiafi a le Alii. (1 Kori. 11:20, 23, 24) O le sauniga lenei e pito sili ona tāua o le tausaga mo tagata o Ieova. Na poloaʻiina faapitoa i tatou ina ia faia lenei Faamanatuga.​—Luka 22:19.

²⁹ E tutusa le aso mo le Faamanatuga ma le aso o le Paseka faale-Tusi Paia lea o loo taʻua i le Tusi Paia. (Eso. 12:2, 6; Mata. 26:17, 20, 26) Na avea le Paseka ma aso faamanatu faaletausaga, o le ō ese mai o le nuu o Isaraelu mai i Aikupito i le 1513 T.L.M. O le taimi lenā na faailogaina ai e Ieova le aso 14 o le masina faa-Iutaia o Nisani, mo le nuu e aai ai i le tamaʻi mamoe o le Paseka, ma latou tuua ai loa Aikupito lea na nofo pologa ai. (Eso. 12:1-51) E iloa le aso e paʻū ai Nisani 14, e ala i le faitauina o le 13 aso mai i le masina faatoʻā vaaia (new moon) e latalata i le spring equinox (o le aso e tutusa ai le umi o le ao ma le pō, e 12 itula i le ao, 12 itula i le pō lea e pe tusa o Mati 21/22), e pei ona vaaia ai i Ierusalema. E tele lava ina paʻū le aso o le Faamanatuga i tausaga taʻitasi, i le aso e atoa ai le masina pe a mavae le spring equinox.

³⁰ O loo taʻua i le Mataio 26:26-28 faamatalaga a Iesu lava ia i le auala e faia ai le Faamanatuga. E lē o se sauniga e liua faavavega ai le areto ma le uaina i le toto ma le tino o Iesu. Nai lo o lenā, o le Faamanatuga o se tausamiga faafaatusa, e faia e i latou ua valaauina o ni suli faatasi ma Iesu Keriso i lona Malo i le lagi. (Luka 22:28-30) E faalaeiauina foʻi Kerisiano tuuina atu uma, faapea tagata fiafia e auai, e maimoaina le faamanatuina o le Talisuaga Afiafi a le Alii. O lo latou auai e faaalia ai lo latou lototalisapaia mo lenei sauniuniga na faia e Ieova le Atua, mo le lelei o le fanau uma a tagata e ala mai i lona Alo, o Iesu Keriso. A o leʻi oo i le aso o le Faamanatuga, o le a faia se lauga faapitoa lea e fuafua e faagaee ai le fiafia o tagata e auai i lenei faatasiga ma faaosofia le naunau e suʻesuʻe le Tusi Paia.

³¹ E tulimataʻia ma le olioli e Molimau a Ieova avanoa e faapotopoto faatasi ai i sauniga, lea e ʻmanatunatu ai le tasi i le isi ina ia faatupu ai le alofa ma galuega lelei.’ (Epe. 10:24) O loo mataalia le pologa faamaoni ma le faautauta, i le saunia mai o nei sauniga e talafeagai lelei ma o tatou manaʻoga faaleagaga. Ua uunaʻia auauna uma a Ieova ma tagata fiafia, ina ia faaaogā atoatoa nei sauniuniga uma e faapotopoto faatasi ai e lē aunoa. O le faaalia o le agaga talisapaia mo sauniuniga a Ieova o loo ala mai i lana faalapotopotoga, ua fusia faatasi ai auauna a le Atua i le autasi. E sili atu i lenā, o loo tatou viia ma faamamaluina ai Ieova.​—Sala. 111:1.