O Faifeʻau o le Tala Lelei

NA SAUNIA e Ieova mo i tatou se faaaʻoaʻo lelei atoatoa, o Iesu Keriso, lea e tatau ona tatou mulimuli i ai. (1 Pete. 2:21) O le taimi lava e avea ai se tasi ma soo o Iesu, e na te talaʻia ai loa le tala lelei o se faifeʻau a le Atua. Ua faailoa mai e Iesu o lenei galuega o le a faafouina ai faaleagaga, e ala i le faapea mai: “Ia outou ō mai iā te aʻu o outou uma ua tigāina ma mafatia i avega, ona ou faafouina lea o outou. Ia outou amoina laʻu amo ma faaaʻoaʻo mai iā te aʻu, auā o aʻu o lē e agamalu ma lotomaulalo, ona faafouina ai lea o outou.” (Mata. 11:28, 29) E leʻi iʻuvale lava lenei folafolaga i ē na tali atu i le valaaulia.

² I le avea ai o Iesu ma Faifeʻau Sili a le Atua, na ia valaauina ai ni tagata patino e avea ma ona soo. (Mata. 9:9; Ioa. 1:43) Na ia toleniina i latou i le faiva ma aauina atu e faia le galuega na ia faia. (Mata. 10:1–11:1; 20:28; Luka 4:43) Mulimuli ane, na ia aauina atu isi e toʻa 70 e fai so latou sao i le folafolaina atu o le tala lelei e faatatau i le Malo o le Atua. (Luka 10:1, 8-11) Ina ua aauina atu e Iesu nei soo, na ia fetalai atu iā i latou: “O lē e faalogo iā te outou, e faalogo foʻi o ia iā te aʻu. O lē e lē ano mai iā te outou, e lē ano mai foʻi iā te aʻu. O lē e lē ano mai iā te aʻu, e lē ano foʻi o ia i lē na auina mai aʻu.” (Luka 10:16) I lenei auala, na faamamafa atu ai e Iesu le tāua o lenei tiute ua tuuina atu i ona soo. Sa avea i latou ma sui o Iesu ma le Atua Silisili Ese. E faapena foʻi i latou uma i aso nei ua tali atu i le valaaulia lenei a Iesu: ʻSau ma mulimuli mai iā te aʻu.’ (Luka 18:22; 2 Kori. 2:17) O i latou uma ua tali atu, ua latou maua se tofiga mai i le Atua e talaʻi atu le tala lelei o le Malo, ma faia isi ma soo.​—Mata. 24:14; 28:19, 20.

³ O lo tatou tali atu i le valaaulia a Iesu ina ia mulimuli atu iā te ia, na tatou maua ai le faamanuiaga o le “iloa” o Ieova le Atua faapea ma Iesu Keriso. (Ioa. 17:3) Na aʻoaʻoina foʻi i tatou i ala o Ieova. E ala i lana fesoasoani, na mafai ai ona suia o tatou mafaufau, oofu i le tagata fou, ma faaōgatusa a tatou amio ma tapulaa amiotonu a Ieova. (Roma 12:1, 2; Efe. 4:22-24; Kolo. 3:9, 10) O lo tatou lototalisapaia na uunaʻia ai i tatou e tuuina atu o tatou ola iā Ieova, ma faailogaina e ala i le papatisoina i le vai. I le taimi o lo tatou papatisoga, ua tofia ai i tatou e avea ma faifeʻau.

⁴ Ia teu pea i o tatou mafaufau, o le auaunaga i le Atua e tatau ona faatinoina i lima e mamā ma se loto e mamā. (Sala. 24:3, 4; Isa. 52:11; 2 Kori. 6:14–7:1) E ala i le faatuatua iā Iesu Keriso, ua tatou maua ai ni lotofuatiaifo mamā. (Epe. 10:19-23, 35, 36; Faaa. 7:9, 10, 14) Na augani atu le aposetolo o Paulo i Kerisiano, ia faia mea uma lava e faamamaluina ai le Atua, ina ia lē tausuai ai isi. Na faamatilatila mai foʻi e Peteru le tāua o faaaʻoaʻoga lelei i amioga, lea e mafai ona tosina mai ai ē e lē talitonu i le upu moni. (1 Kori. 10:31, 33; 1 Pete. 3:1) E faapefea la ona e fesoasoani i se tasi ina ia agavaa e auaufaatasi ma i tatou o ni faifeʻau o le tala lelei?

O TAGATA TALAʻI FOU

⁵ O le taimi lava e te amataina ai se suʻesuʻega faale-Tusi Paia ma se tagata fiafia, ia faalaeiau o ia e faasoa atu i isi mea ua ia aʻoaʻoina. E mafai ona ia molimau lē fuafuaina atu i ona tauʻaiga, o uō, o ē latou te galulue faatasi faapea ma isi. O se laasaga tāua lenei i le aʻoaʻoina o ē e fou, ina ia mulimuli iā Iesu Keriso o ni faifeʻau o le tala lelei. (Mata. 9:9; Luka 6:40) A o tuputupu aʻe faaleagaga le tagata fou ma oo ina masani lelei i le molimau atu lē fuafuaina i isi, e lē taumatea o le a ia faailoa atu se faanaunauga e faia sona sao i le faiva i le fanua.

AUSIAINA O AGAVAA

⁶ A o e leʻi valaauliaina se tagata e te lua ō faatasi i le galuega talaʻi mo le uluaʻi taimi, e tatau ona e faamautinoa ua ia ausia agavaa patino. O se tagata e tatou te galulue faatasi i le faiva i le fanua o le a mātauina o ia e le lautele ua aufaatasi nei ma Molimau a Ieova. O le faia faapea, e faaalia ai ua leva ona ola o ia e ōgatusa ma tapulaa amiotonu a Ieova, ma ua mafai ona avea o se tagata talaʻi e leʻi papatisoina.

⁷ A o faagasolo le lua suʻesuʻega ma se tagata aʻoga ma lua talanoaina faatasi mataupu silisili o le Tusi Paia, atonu o le a oo ina e iloa le auala o loo ola ai o ia. E te ono mātauina ua ola nei o ia e ōgatusa ma mea na ia aʻoaʻoina. Peitaʻi, e iai ni vala o le soifuaga o le tagata aʻoga o le a mananaʻo le ʻautoeaina e tou te talanoa faatasi ai ma le tagata aʻoga.

⁸ O le a faatulaga e le sooupu a le ʻautoeaina ni toeaina se toʻalua (o se tasi o i laʻua o se sui o le Komiti o le Auaunaga a le Faapotopotoga), e talanoaina nei mataupu ma oulua ma le tagata aʻoga o le Tusi Paia. Pe afai e lē toʻatele ni toeaina i le faapotopotoga, e ono faia lea talanoaga e se toeaina ma se auauna o le faiva agavaa. O uso ua filifilia mo lea talanoaga, e tatau ona taumafai malosi e vave faataunuu lea vala e aunoa ma le faatuai. Pe a iloa e toeaina i le taimi o le sauniga se tagata aʻoga ua faaalia lona faanaunauga e fia talaʻi, e ono mafai ona la talanoa faatasi ma oe ma le tagata aʻoga pe a uma le sauniga. E tatau ona toʻafilemu le siʻomaga e faia ai le talanoaga. A o leʻi faamaonia se tagata aʻoga e avea ma tagata talaʻi e leʻi papatisoina, e tatau ona ia talitonu ma faia mea nei:

1. (1) Ua talitonu o ia o le Tusi Paia o le Afioga a le Atua.​—2 Timo. 3:16.

2. (2) Ua ia iloa ma talitonu i aʻoaʻoga faavae o le Tusi Paia, ma pe a fesiligia o ia, o le a ia tali atu e ōgatusa ma le Tusi Paia, ae e lē tusa ai ma aʻoaʻoga sesē a lotu po o ona lava manatu.​—Mata. 7:21-23; 2 Timo. 2:15.

3. (3) O loo ia utagia le poloaʻiga o loo i le Tusi Paia ina ia faapotopoto faatasi ma tagata o Ieova i sauniga a le faapotopotoga, pe a mafai ona ia faia faapea.​—Sala. 122:1; Epe. 10:24, 25.

4. (4) Ua ia iloa ma o loo ola e ōgatusa ai ma aʻoaʻoga a le Tusi Paia e faatatau i le faia o feusuaʻiga e tagata e leʻi faaipoipo e aofia ai le mulilua, tele o toʻalua, tauatane ma le tauafafine. Afai o loo nonofo faatasi o ia ma se tasi o le isi itupā e lē o sona tauaiga, ma e iai se la faiā faaleulugalii, e tatau ona la faaipoipo lelei faaletulafono.​—Mata. 19:9; 1 Kori. 6:9, 10; 1 Timo. 3:2, 12; Epe. 13:4.

5. (5) E na te utagia le lapataʻiga a le Tusi Paia e faatatau i le onā, ma e taumamao o ia mai i le ola faalagolago i fualaau e aunoa ma ni māfuaaga faafomaʻi, po o isi lava mea e faaleagaina ai le mafaufau.​—2 Kori. 7:1; Efe. 5:18; 1 Pete. 4:3, 4.

6. (6) E na te iloa le tāua o le ʻalofia o aumea leaga.​—1 Kori. 15:33.

7. (7) Ua motusia atoatoa ana sootaga ma faalapotopotoga a lotu sesē, lea atonu sa ia auai ai. E lē o toe auai foʻi i sauniga a na lotu ma lagolago pe auai foʻi i a latou mea fai.​—2 Kori. 6:14-18; Faaa. 18:4.

8. (8) E lē o toe faia foʻi sana vaega i faiga faapolotiki a le lalolagi.​—Ioa. 6:15; 15:19; Iako. 1:27.

9. (9) E solitū o ia mai i le aafia i faigātaua i le va o malo pe auai foʻi i vaegaʻau.​—Isa. 2:4.

10. (10) Ua manaʻo moni lava e avea o ia o se Molimau a Ieova.​—Sala. 110:3.

⁹ Pe a lē mautinoa toeaina i manatu o le tagata aʻoga e faatatau i nisi o nei mataupu, e tatau ona la toe fesili atu iā te ia, atonu e faaaogā ai mau o loo sii mai e talanoa atu ai. E tāua ona malamalama le tagata aʻoga, o i latou e auaufaatasi ma Molimau a Ieova i la latou galuega talaʻi, e tatau ona ola e ōgatusa ma mea o loo manaʻomia mai i le Tusi Paia. O ana faamatalaga o le a fesoasoani i toeaina e iloa ai po ua ia malamalama i mea e manaʻomia mai iā te ia, ma po ua ia ausia agavaa i se tulaga talafeagai e amata ai ona ia auai i le faiva i le fanua.

¹⁰ E tatau i toeaina ona vave faailoa atu i le tagata aʻoga po ua agavaa o ia e talaʻi. I le tele lava o taimi, e faia faapea pe a māeʻa le talanoaga. Pe afai ua agavaa le tagata aʻoga, ua mafai e toeaina ona faailoa atu ma le māfana ua avea nei o ia o se tagata talaʻi. (Roma 15:7) E tatau ona faalaeiauina o ia e amata ona auai i le faiva i le fanua i le vave e mafai ai, ma ia tuuina atu lana lipoti o le auaunaga i le fanua i le faaiʻuga o le masina. E mafai ona faamatala atu e toeaina pe a agavaa se tagata aʻoga e avea ma tagata talaʻi e leʻi papatisoina, ma lipoti mai lana auaunaga i le fanua mo le taimi muamua, o le a saunia mo ia Faamaumauga mo le Tagata Talaʻi a le Faapotopotoga, ma teu i faamaumauga a le faapotopotoga. E maua mai e toeaina nei faamatalaga mai le tagata talaʻi ina ia mafai ai e le faalapotopotoga ona vaavaaia lelei galuega faale tapuaʻiga a Molimau a Ieova i le lalolagi aoao ma mafai ai e le tagata talaʻi ona faia se sao i galuega faaleagaga, ma ia mauaina le lagolagosua faaleagaga. E faamanatu atu foʻi e toeaina i le tagata talaʻi fou, o soo se faamatalaga lava e faatatau iā te ia, e taulima e tusa ai ma aiāiga faaletulafono i le Global Data Protection Policy of Jehovah’s Witnesses i le jw.org.

¹¹ O lo tatou faamasani atili i le tagata talaʻi fou, ma faaalia atu i ai lo tatou naunau i lona agaʻigaʻi i luma, e mafai ona iai se aafiaga lelei iā te ia. E ono uunaʻia ai o ia e faia e lē aunoa lana lipoti mo le auaunaga i le fanua i masina taʻitasi, ma faia taumafaiga e sili atu mo le auaunaga iā Ieova.​—Fili. 2:4; Epe. 13:2.

¹² Pe afai ua faia le faaiʻuga a toeaina ua agavaa le tagata aʻoga e auai i le faiva i le fanua, e latou te faamautinoa ua maua e le tagata aʻoga lana lava kopi o le tusi Ua Faamaopoopo Ina ia Faia le Finagalo o Ieova. Pe a māeʻa ona faaoo mai lana uluaʻi lipoti o le auaunaga i le fanua, ona faia lea o se faasilasilaga puupuu i le faapotopotoga e faapea, ua avea o ia o se tagata talaʻi fou e leʻi papatisoina.

FESOASOANI I FANAU ITI

¹³ E mafai foʻi ona agavaa le fanau iti e avea ma tagata talaʻi o le tala lelei. Na talia e Iesu tamaiti ma faamanuia atu iā i latou. (Mata. 19:13-15; 21:15, 16) E patino atu i mātua le tiute tauave o le vaaia o a latou lava fanau. Ae e ono fia fesoasoani atu foʻi isi o le faapotopotoga i le fanau iti, o ē o loo naunau moni mai i o latou loto e faia se sao i le galuega o le talaʻia o le Malo. Pe afai o oe o se matua, o le a telē se aogā o lau faaaʻoaʻoga lelei i le faiva i le fanua, e faalaeiauina ai lau fanau e faaalia le maelega i le auaunaga i le Atua. Pe afai o loo avea se isi o le fanau ma faaaʻoaʻoga lelei i ana amio, ma ua iai se faanaunauga mai i lona loto e faailoa atu lona faatuatua i isi, o le ā se isi fesoasoani e mafai ona ofo atu mo ia?

¹⁴ Ua talafeagai loa ona faailoa atu e le matua i se toeaina o loo i le Komiti o le Auaunaga a le Faapotopotoga, ina ia mafai ai ona faatulaga se talanoaga ma lana tama e iloa ai po ua agavaa e avea ma tagata talaʻi. O le a faatulaga e le sooupu a le ʻautoeaina ni toeaina se toʻalua (o se tasi o i laʻua o se sui o le komiti o le auaunaga), e talanoa faatasi ma le tamaitiiti ma le matua po o mātua talitonu, po o se tagata talitonu o vaaia le tamaitiiti. Pe afai ua iai i le tamaitiiti le poto faavae i upu moni o le Tusi Paia ma ua faamaonia mai lona manaʻo moni e faia se sao i le faiva, o faailoga na e iloa ai o le a ia faia se agaʻigaʻi i luma. E tatau ona iloiloina e toeaina nei vala faapea foʻi ma nisi o mataupu e pei ona talanoa ai ma tagata matutua. O le faia faapea, o le a mafai ai e toeaina e toʻalua ona iloa po ua agavaa le tamaitiiti e avea ma tagata talaʻi e leʻi papatisoina. (Luka 6:45; Roma 10:10) Pe a faia le talanoaga ma le fanau iti, e lē manaʻomia ona talanoaina nisi o mataupu lea e tatau ona talanoaina ma tagata matutua, ae e lē fetaui ma tulaga o fanau iti.

¹⁵ I le taimi o le talanoaga, e tatau i toeaina ona faamālō atu i le tamaitiiti mo lona agaʻigaʻi i luma, ma faalaeiau o ia e faatū se sini mo le papatisoga. E tatau foʻi ona faamālō atu i mātua, ona o loo laʻua galulue mamafa e totō le upu moni i le loto o le la tama. Ina ia fesoasoani i mātua e fesoasoani atili atu i le la tama, e tatau i toeaina ona faasino i laʻua i le faaopoopoga “O se Feʻau mo Mātua Kerisiano” o loo maua i le itulau 179-181.

TUUINA ATU MA LE PAPATISOGA

¹⁶ Pe afai ua oo ina e iloa Ieova ma e alofa iā te ia, tausia mea o loo ia faafinagaloina ma faia sou sao i le faiva i le fanua, ua manaʻomia la ona faamausalī la oulua faiā ma ia. E faapefea? E ala i le tuuina atu o lou ola iā Ieova ma faailogaina e ala i le papatisoga i le vai.​—Mata. 28:19, 20.

¹⁷ O le tuuina atu, e uiga atu i le tuuesea mo se fuafuaga paia. O le tuuina atu i le Atua e uiga atu i lou faailoa atu lea iā Ieova e ala i le tatalo, ma tautō atu e faaaogā lou ola mo lana auaunaga ma savali e tusa ai ma ona ala. O lona uiga, o le tapuaʻi atu tau lava o ia seʻia oo i le faavavau. (Teu. 5:9) O se mataupu lenei e fitoitonu iā te oe lava, ma e lē mafai ona faia e se isi tagata mo oe.

¹⁸ Peitaʻi, e iai se isi mea e manaʻomia nai lo o le tau ina faailoa atu iā Ieova ua e manaʻo e ofoina atu lou ola mo ia. E manaʻomia ona e faailoa atu i isi, o lea ua uma ona e faia se tuuina atu i le Atua. E te faia faapea e ala i le papatisoga i le vai, e pei ona sa faia e Iesu. (1 Pete. 2:21; 3:21) Pe afai ua e filifili e te auauna iā Ieova ma manaʻo e papatisoina oe, o le ā e ao ona e faia? E tatau ona e faailoa atu lou faanaunauga i le sooupu a le ʻautoeaina. O le a ia faatulagaina ni toeaina eseese e tou te talanoa, ina ia faamautinoa ua e ausia agavaa e manaʻomia e le Atua mo le papatisoga. Mo nisi faamatalaga, faamolemole ia tilofaʻia le vaega “Se Feʻau mo le Tagata Talaʻi e Leʻi Papatisoina” o loo maua i itulau e 182-184 o lenei tusi, ma “Fesili mo Ē e Fia Papatiso” o loo maua i itulau e 185-207.

LIPOTI O LE AGAʻIGAʻI I LUMA O LE FAIVA

¹⁹ A o faagasolo mai tausaga, ua avea lipoti e faatatau i le salalau atu o le tapuaʻiga moni i le lalolagi aoao, ma puna o faalaeiauga mo tagata o Ieova. I le taimi na fetalai atu ai Iesu i ona soo o le a talaʻia le tala lelei i le lalolagi atoa, na matuā naunau Kerisiano moni i le auala e faataunuuina ai lenei mea.​—Mata. 28:19, 20; Mare. 13:10; Galu. 1:8.

²⁰ Na naunau uluaʻi soo o Iesu e faalogo atu i lipoti e faatatau i le taulau manuia o le galuega talaʻi. (Mare. 6:30) O loo taʻua i le tusi o Galuega, pe tusa ma le 120 tagata na iai ina ua liligi ifo le agaga paia i soo i le Penetekoso 33 T.A. E leʻi umi ae faateleina le aofaʻi o soo i le pe ā ma le 3,000 ma oo atu ai i le pe tusa ma le 5,000. Na maua se lipoti e faapea ʻua faaopoopo atu e Ieova iā i latou i aso taʻitasi o ē ua faaolaina,’ ma ʻe toʻatele faitaulaga ua usiusitaʻi i le faatuatua.’ (Galu. 1:15; 2:5-11, 41, 47; 4:4; 6:7) Maʻeu le faalaeiauina o le ʻausoo ona o nei tala e faatatau i le faatelega! E lē taumatea na matuā uunaʻia i latou i nei lipoti fiafia ina ia agaʻi pea i luma i le galuega na tofia atu e le Atua, e ui i sauāga ogaoga na faapogaia e taʻitaʻi lotu Iutaia.

²¹ Pe tusa o le 60-61 T.A., na taʻua ai e Paulo i lana tusi i Kerisiano i Kolose e faapea, ʻua fua mai e le tala lelei ni fua ma ua faateleina i le lalolagi uma,’ ma ua “talaʻiina atu i foafoaga uma i lalo o le lagi.” (Kolo. 1:5, 6, 23) Sa usiusitaʻi uluaʻi Kerisiano i le Afioga a le Atua. Na faamalosia foʻi i latou e le agaga paia ina ia faataunuu se galuega talaʻi tele, a o leʻi oo ane le iʻuga o le faiga o mea a Iutaia i le 70 T.A. Maʻeu le faalaeiauina o nei Kerisiano faamaoni, a o faalogo atu i lipoti o mea na faataunuuina!

²² I aso nei, o loo faia ai galuega ina ia faataunuu ai le Mataio 24:14 lea o loo faapea mai: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.” I se tulaga talitutusa ma mea na faia i le uluaʻi senituri, ua faapena foʻi ona taumafai le faalapotopotoga a Ieova i aso nei e faia faamaumauga o nei galuega. I le avea ai o i tatou ma auauna tuuina atu a le Atua, ua iā i tatou la se galuega faanatinati e tatau ona fai. E tatau iā i tatou taʻitoʻatasi ona naunau moni e faia le mea sili e tatou te mafaia, ina ia faataunuuina ai ma le māeʻaeʻa le faiva a o leʻi oo mai le iʻuga. O le a faamautinoa e Ieova e faataunuuina lenei galuega. Pe afai o loo faia ai so tatou sao, o le a tatou maua le finagalo malie o Ieova.​—Eseki. 3:18-21.

LAU LIPOTI O LE AUAUNAGA I LE FANUA

²³ O ā tonu lava mea e tatau ona tatou lipotiina? O loo iloa i le pepa Lipoti mo le Auaunaga i le Fanua ua saunia mai e le faalapotopotoga po o ā mea e tatau ona lipoti. Ae atonu o le a fesoasoani faamatalaga pupuu o loo mulimuli mai e tatou te iloa ai le auala e faia ai lipoti.

²⁴ I lalo o le ulutala “Lomiga na Tufaina (Lomia pe Kopi Mai i le Initaneti),” tusi i lalo le aofaʻiga atoa o lomiga na lomia pe kopi mai i le initaneti, lea na e tuuina atu i tagata e lē o ni Molimau papatisoina. I lalo o le ulutala “Vitiō na Faaalia,” tusi ai le aofaʻiga o taimi na e faaalia ai se tasi o a tatou vitiō.

²⁵ I lalo o le ulutala “Toe Asiga,” ia tusi ai le aofaʻi o toe asiga na e faia ina ia atiaʻe ai le naunau na muaʻi faaalia e se tagata e lē o se Molimau tuuina atu ma papatisoina. O le toe asiga e lē na o le toe asia lea o se tagata fiafia i lona fale, ae e aofia ai foʻi le tusi atu o se tusi, valaau atu i le telefoni, lafo atu se feʻau tusitusia po o le imeli, pe tuu foʻi i lona fale nisi o a tatou lomiga. O taimi uma e faia ai se suʻesuʻega faale-Tusi Paia, e tatau foʻi ona faitau o se toe asiga. E mafai e se matua ona faitau le toe asiga e tasi i vaiaso taʻitasi, pe a ia faia le Tapuaʻiga a le Aiga a o iai se tasi o le fanau e lē o se tagata papatiso.

²⁶ E ui e masani ona faia se suʻesuʻega faale-Tusi Paia i vaiaso taʻitasi, ae e na o le faatasi ona lipoti lenā suʻesuʻega mo le masina. E tatau i tagata talaʻi ona lipoti le aofaʻi o suʻesuʻega faale-Tusi Paia eseese na faia a o faagasolo le masina. O suʻesuʻega faale-Tusi Paia e mafai ona lipotiina, e aofia ai suʻesuʻega o loo faia ma i latou e lē o ni Molimau tuuina atu ma papatisoina. E mafai foʻi ona faitau se suʻesuʻega faale-Tusi Paia o loo faia ma se tagata ua lē toe talaʻi, pe a faatonuina oe e se sui o le komiti o le auaunaga e faia le suʻesuʻega. E mafai foʻi ona faitau se suʻesuʻega faale-Tusi Paia o loo faia ma se tagata fou faatoʻā papatiso, e leʻi uma ona suʻesuʻeina le tusi, Se Olaga Fiafia e Faavavau!

²⁷ E tāua tele ona saʻo aʻiaʻi le lipotiina o “Itula.” O lona uiga, o le taimi lea o loo e faaaluina i le talaʻiga mai i lea fale i lea fale, faia o toe asiga, faia o suʻesuʻega faale-Tusi Paia, po le molimau i se tulaga fuafuaina po o le molimau lē fuafuaina iā i latou e lē o ni Molimau tuuina atu ma papatisoina. Pe afai e galulue faatasi ni tagata talaʻi se toʻalua, e mafai e i laʻua uma ona faitauina le taimi, ae e na o le toʻatasi e na te faitauina toe asiga ma suʻesuʻega faale-Tusi Paia o le a la faia. O mātua o loo faia uma so la sao i le aʻoaʻoina o le fanau i le taimi o le Tapuaʻiga a le Aiga, e mafai ona la faitauina uma le taʻitasi itula i le vaiaso. E mafai e uso ona faitau le taimi e na te faia ai se lauga lautele. E mafai foʻi e sē o loo faaliliuina se lauga lautele ona faitau le taimi o le lauga. E iai isi gaoioiga tāua e lē faitauina ai le taimi, e pei o le sauniuni mo le talaʻiga, auai i le faatasiga mo le talaʻiga, faia o nisi o feʻau masani ma isi mea.

²⁸ O tagata talaʻi taʻitasi uma e faaaogā lelei o latou lotofuatiaifo ua aʻoaʻoina i le Tusi Paia, e fuafua ai pe e faapeʻī ona faitauina le taimi lea na ia faaaluina e molimau atu ai. O nisi tagata talaʻi o loo galulue i nofoaga e toʻatele ai tagata, ae o nisi o loo talaʻi atu i nofoaga e tau leai ni tagata, ma e manaʻomia ona malaga mamao atu i ai. O lea, e eseese tulaga o oganuu, ma e lē tutusa foʻi le vaaiga a le ʻautalaʻi i la latou faiva. E lē o faaaogā e le Vaega Pule o latou lotofuatiaifo e taʻu mai ai i le faapotopotoga i le lalolagi aoao, pe e faapefea ona faitauina taimi e faaaluina e tagata talaʻi i le faiva i le fanua. E leʻi tofiaina foʻi se tasi e na te faia filifiliga i lenei mataupu.​—Mata. 6:1; 7:1; 1 Timo. 1:5.

²⁹ O taimi e faaaluina i le auaunaga i le fanua, e tatau ona lipoti i itula atoatoa. Seʻi vaganā ai tagata talaʻi e faatapulaa mea e latou te mafaia ona o le soifua matua, ua aafia i se gasegase tumau ua lē mafai ai ona fealuaʻi, o loo tausia i fale mo tagata matutua, pe e lē atoatoa foʻi le malosi o le tino. O tagata talaʻi na e mafai ona latou lipotiina le taʻi 15 minute. E tusa lava pe e na o le 15 minute na faaaluina e molimau atu ai i le masina, ae e tatau lava ona lipoti lenā taimi. O le faia faapea, o le a avea ai pea o ia o se tagata talaʻi e talaʻi pea. E aofia ai foʻi i lenei faatulagaga tagata talaʻi ua faatapulaa mea e latou te mafaia mo se taimi e lē tumau, atonu ua lē mafai ona fealuaʻi mo se masina po o ni nai masina, ona ua aafia i se maʻi tigāina po o se manuʻaga tugā. O lenei faatulagaga e mo na o i latou lava e matuā tapulaa mea e latou te mafaia. O le komiti o le auaunaga e latou te filifilia po o ai tagata talaʻi e fetaui ma lea faatulagaga.

FAAMAUMAUGA MO LE TAGATA TALAʻI A LE FAAPOTOPOTOGA

³⁰ O au lipoti o le auaunaga i le fanua mo masina taʻitasi, e faamauina i Faamaumauga mo le Tagata Talaʻi a le Faapotopotoga. O nei faamaumauga e ana e le faapotopotoga. Pe a e fuafua e te siitia atu i se isi faapotopotoga, ia faamautinoa e te faailoa atu i toeaina. E faamautinoa e le failautusi ua maua e lau faapotopotoga fou au faamaumauga. O le faia faapea, o le a faigofie ai i toeaina o le faapotopotoga ona faafeiloaʻia oe, ma saunia fesoasoani faaleagaga o loo e manaʻomia. Pe afai e te tuua lau faapotopotoga mo se umi e itiiti ifo i le tolu masina, ia faaauau pea ona auina atu lau lipoti i lau faapotopotoga masani.

LE POGAI E LIPOTI AI LA TATOU AUAUNAGA I LE FANUA

³¹ Pe e fai ma galo iā te oe ona auina atu lau lipoti o le auaunaga i le fanua? E lē taumatea e tatou te manaʻomia uma ni faamanatu mai i lea taimi i lea taimi. Ae pe afai e tatou te atiaʻe le vaaiga saʻo e faatatau i le faia o lipoti, ma malamalama i le māfuaaga e tāua ai le faia faapea, atonu o le a faigofie ai ona manatua le faia o a tatou lipoti.

³² Ua tuufesili nisi e faapea: “Talu ai o loo silafia e Ieova mea o loo oʻu faia i le auaunaga iā te ia, aiseā la e manaʻomia ai fua ona ou faia se lipoti?” O le mea moni, e silafia e Ieova mea o loo tatou faia. E na te silafia foʻi po o faia ma le lotoatoa la tatou auaunaga, pe e na o sina vaega o loo tatou faataunuuina e ui lava e tele mea e mafai ona tatou faia. Ae manatua, na faamauina e Ieova aso na iai Noa i totonu o le vaa, faapea foʻi ma tausaga na malaga ai le nuu o Isaraelu i le vao. Na faamauina foʻi e Ieova le aofaʻi o ē na faamaoni ma ē e leʻi usiusitaʻi. Na ia faamauina foʻi le faasolosolo ona faatoʻilaloina o le nuu o Kanana, ma mea na faataunuuina e faamasino faamaoni o Isaraelu. Ioe, e tele faamatalaga e faatatau i gaoioiga a ana auauna na ia faamauina. Na ia faagaeeina faamaumauga tusia o mea na tutupu, ma ua ia faailoa manino mai ai lana silafaga i le faia o ni faamaumauga e saʻo aʻiaʻi.

³³ O mea na tutupu i le talafaasolopito o loo tusia i le Tusi Paia, ua faaalia ai le saʻo aʻiaʻi o lipoti ma faamaumauga sa teuina e tagata o Ieova. I le tele o tulaga, e lē mafai ona maua le uiga atoa o faamatalaga o loo i le Tusi Paia, pe ana lē lipotia mai ai ma ni fuainumera patino. Ia tilofaʻia nisi o nei faataʻitaʻiga: Kenese 46:27; Esoto 12:37; Faamasino 7:7; 2 Tupu 19:35; 2 Nofoaiga a Tupu 14:9-13; Ioane 6:10; 21:11; Galuega 2:41; 19:19.

³⁴ E ui e lē o faaaofia i a tatou lipoti mea uma lava o loo tatou faia mo le tapuaʻiga iā Ieova, ae o loo iai sona fuafuaga aogā mo lana faalapotopotoga. I le uluaʻi senituri, ina ua toe foʻi mai le ʻauaposetolo mai i la latou galuega talaʻi, na latou lipoti atu iā Iesu “mea uma na latou faia ma aʻoaʻo atu.” (Mare. 6:30) I nisi o taimi, o lipoti e ono mātaulia ai nisi o vala o le faiva e manaʻomia ona uaʻi patino atu i ai. E mafai ona faaalia mai i fuainumera, e ui ina iai se faatelega i nisi vala o le galuega, ae e iai nisi vala e manaʻomia ona uaʻi atu i ai, e pei o le leai o se faatelega o le ʻautalaʻi. E iloa ai atonu o loo manaʻomia ni faalaeiauga, pe o iai foʻi ni faafitauli e manaʻomia ona faaleleia. O le a mataʻituina e ovasia nei lipoti, ma taumafai e faasaʻo so o se tulaga e ono faavaatuʻia ai le agaʻigaʻi i luma o tagata taʻitoʻatasi, po o le faapotopotoga atoa.

³⁵ E aogā foʻi lipoti i le faalapotopotoga, i le fuafuaina po o fea tonu nofoaga o loo tele ai le manaʻoga mo se ʻautalaʻi. O fea oganuu o loo fua tele mai? O fea o loo itiiti ai le agaʻigaʻi i luma? O ā lomiga e manaʻomia ina ia fesoasoani ai i tagata e aʻoaʻoina le upu moni? E fesoasoani lipoti i le faalapotopotoga, e fuafua ai lomiga e manaʻomia mo le galuega talaʻi i vaipanoa eseese o le lalolagi, ona sauniuni mamao lea mo na manaʻoga.

³⁶ E avea foʻi lipoti ma faalaeiauga mo i tatou. Pe e lē faafiafiaina ea i tatou pe a faalogo i tala o galuega o loo faia e o tatou uso, mo le talaʻia o le tala lelei i le lalolagi aoao? O lipoti o faatelega, ua fesoasoani iā i tatou e​—malamalama atoatoa ai i le tuputupu aʻe o le faalapotopotoga a Ieova. O tala i mea na tutupu ua faamāfanafanaina ai o tatou loto, ma faatumulia ai i tatou i le maelega, lea e uunaʻia ai i tatou e faateleina se sao i le galuega talaʻi. (Galu. 15:3) O lea la, e tāua tele la tatou lagolagosua e ala i le tuuina atu o a tatou lipoti mo le auaunaga i le fanua. E faaalia ai foʻi lo tatou manatu mamafa i o tatou uso o loo i so o se vaipanoa. O lenei auala, e faailoa atu ai foʻi lo tatou gauaʻi atu i faatulagaga a le faalapotopotoga a Ieova.—Luka 16:10; Epe. 13:17.

FAATULAGA SINI O LE TAGATA LAVA IA

³⁷ E leai se māfuaaga e tatou te faatusatusa ai fua la tatou auaunaga i le fanua i isi tagata. (Kala. 5:26; 6:4) E matuā eseese lava tulaga o tagata taʻitoʻatasi. I le isi itu, e mafai ona tatou maua le tele o aogā e ala i le faatū e le tagata lava ia o ni sini e mafai ona ia ausia, e fua i ai po o tatou agaʻigaʻi i luma i le faiva. O le ausiaina o na sini, e tatou te maua ai le faamalieina ona o mea ua tatou faataunuuina.

³⁸ Ua matuā manino mai o loo faatelevaveina e Ieova le aoaoina mai o i latou o le a ia puipuia mai i le “puapuaga tele.” Ua tatou ola nei i le taimi ua faataunuuina ai le valoaga lenei a Isaia: “O le a avea lē e toʻaitiiti ma toʻaafe, e avea foʻi lē e faatauvaa ma se atunuu malosi. O aʻu o Ieova ou te faavave ona fai i ona aso.” (Faaa. 7:9, 14; Isa. 60:22) Maʻeu se faaeaga o le avea ai ma faifeʻau o le tala lelei, a o faagasolo nei taimi iloga o aso e gata ai!​—Mata. 24:14.