Faatulagaga mo Nofoaga o le Tapuaʻiga

UA POLOAʻIA tagata tapuaʻi moni o Ieova ina ia faapotopoto faatasi mo le mauaina o faatonuga, ma ia fefaalaeiauaʻi le tasi i le isi. (Epe. 10:23-25) O le nofoaga muamua lava mo le tapuaʻiga mo tagata filifilia o le Atua o Isaraelu, o le “faleʻie paia, o le faleʻie lea o le feiloaʻiga.” (Eso. 39:32, 40) Mulimuli ane, na fausia e Solomona le atalii o Tavita se maota, po o le malumalu e mo le viiga o le Atua. (1 Tu. 9:3) Ina ua faatamaʻia le malumalu i le 607 T.L.M., na faapotopoto ai tagata Iutaia i maota e taʻua o sunako e tapuaʻi ai i le Atua. I se taimi mulimuli ane, na toe fausia le malumalu ma na toe avea ai ma nofoaga autū o le tapuaʻiga moni. Na aʻoaʻo atu Iesu i sunako faapea foʻi ma le malumalu. (Luka 4:16; Ioa. 18:20) Na faia foʻi e Iesu se faatasiga i luga o se mauga.​—Mata. 5:1–7:29.

² Ina ua mavae le maliu o Iesu, na faapotopoto ai Kerisiano i fale e faia ai sauniga lea e mafai ona auai ai tagata lautele faapea fale o aiga ina ia aʻoaʻoina ai Tusitusiga Paia, ma maua ai faatasitasiga ma isi tagata talitonu. (Galu. 19:8, 9; Roma 16:3, 5; Kolo. 4:15; File. 2) I nisi taimi, na manaʻomia ona potopoto uluaʻi Kerisiano i nofoaga tuufua, ina ia ʻalofia ai le iloa o i latou e ē na sauāina i latou. Na faanaunau moni lava auauna faamaoni a le Atua i aso ua mavae, e potopoto faatasi i nofoaga mo le tapuaʻiga ina ia “aʻoaʻoina [ai] e Ieova.”​—Isa. 54:13.

³ I aso foʻi nei, o loo faaaogā maota eseese ma fale o aiga mo sauniga faa-Kerisiano. E tele lava ina faaaogā fale o aiga mo faatasiga mo le talaʻiga. O i latou o loo faaavanoa atu o latou fale mo nei faatasiga, e vaai i ai o se faaeaga. E manatu le toʻatele o le faaavanoaina atu o o latou fale mo lea fuafuaga, ua latou maua ai ni aogā faaleagaga.

MAOTA MO SAUNIGA

⁴ O le nofoaga autū e faia ai sauniga a Molimau a Ieova, o le Maota mo Sauniga. E masani lava, e faatau se fanua ona fausia ai lea o se Maota mo Sauniga fou, pe toe faaleleia foʻi se fale o loo iai i lenā fanua. Pe afai e talafeagai, ma ina ia faaitiitia tupe faaalu ma ia aogā le faaaogāina o se maota, e ono mafai e faapotopotoga eseese ona faaaogā se maota se tasi. I isi vaipanoa, e talafeagai ona totogi se maota e faaaogā mo sauniga. E talafeagai ona faia se sauniga mo le tuuina atu mo Maota mo Sauniga fou, faapea ni galuega tetele e toe faaleleia ai se Maota mo Sauniga. Ae afai e itiiti ni mea na toe faaleleia o se Maota mo Sauniga, e lē manaʻomia la ona faia se sauniga mo le tuuina atu.

⁵ E lē tatau ona pei Maota mo Sauniga o ni fale e matuā lavelave lona fausaga ina ia faaofo ai isi. E ui e eseese fausaga o Maota mo Sauniga mai i lea vaipanoa i lea vaipanoa, ae o le fuafuaga ia fetaui lelei ma lenā atunuu. (Galu. 17:24) E fua i le tulaga o le vaipanoa, e tatau ona avea le maota ma nofoaga talafeagai ma fetaui lelei mo sauniga faa-Kerisiano.

⁶ E faia e faapotopotoga uma a Molimau a Ieova ni meaalofa tauofo mo tupe faaalu, i le faaaogāina ma le tausiaina o Maota mo Sauniga o loo faaaogā e a latou faapotopotoga. E leai ni peleti e aoina po o ni suʻegātupe e faia. O loo iai se pusa mo meaalofa tauofo, ma o ē uma e auai i sauniga e ono mafai ona foaʻi se meaalofa tauofo, auā le totogiina o tupe faaalu i le faaaogāina o le maota. E latou te faia faapea ma le lotofiafia.—2 Kori. 9:7.

⁷ O i latou uma i le faapotopotoga e manatu o se faaeaga le faia o se sao mo le tausia o le Maota mo Sauniga e ala iā latou foaʻi tautupe, ma tauofo atu foʻi i le faamamāina ma le tausia lelei o le maota. E tele lava ina faatulaga se toeaina po o se auauna o le faiva e faia se faasologa mo lenei galuega. E masani lava ona faatulaga le faamamāina o le maota i vaega mo le talaʻiga, ona taʻimua ai lea o le ovasia o le vaega po o lona fesoasoani i le galuega faamamā. O le foliga atu i fafo faapea totonu o le Maota mo Sauniga, e tatau ona faaatagia atu ai Ieova ma lana faalapotopotoga.

⁸ Pe a sili atu ma le tasi le faapotopotoga e faaaogāina se Maota mo Sauniga, e tatau i toeaina o nei faapotopotoga ona faia aʻe se Komiti e Vaaia Maota mo Sauniga e vaavaaia le tausiaina o le maota ma le fanua. E filifili e nei ʻautoeaina se uso e avea ma sooupu o le komiti. A o galulue ai lenei komiti i lalo o le taʻitaʻiga a ʻautoeaina, e latou te vaavaaia ma faamautinoa ua faamamā lelei le maota, o loo lelei ona tausia ma ia lava pea mea e manaʻomia. O lea, e manaʻomia tele ai le felagolagomaʻi o faapotopotoga o loo aofia ai.

⁹ Pe afai e faaaogā e ni faapotopotoga eseese se Maota mo Sauniga se tasi, e ono manaʻomia ona fai ma fesuiaʻi taimi e faia ai a latou sauniga. E faia e toeaina lenei faatulagaga i se auala e atagia atu ai le manatu mamafa i isi ma le alofa faaleuso. (Fili. 2:2-4; 1 Pete. 3:8) E lē tatau i se faapotopotoga se tasi ona faia se filifiliga mo isi faapotopotoga. Pe a asia e le ovasia o le matagaluega se faapotopotoga o loo faaaogāina lea Maota mo Sauniga, o le a fetuunaʻi e isi faapotopotoga le taimi o a latou sauniga i lenā vaiaso pe a manaʻomia.

¹⁰ E mafai ona faaaogā le Maota mo Sauniga mo faaipoipoga ma maliu, pe a maua le faatagaga mai i le Komiti o le Auaunaga a le Faapotopotoga. E iloiloina totoʻa e toeaina talosaga taʻitasi, ma faavae a latou faaiʻuga i taʻiala ua saunia mai e le ofisa o le lālā.

¹¹ O i latou e maua le faatagaga e faaaogā ai le Maota mo Sauniga mo fuafuaga faapea, e tatau ona gaoioi i se auala e talafeagai ma Kerisiano moni. E lē tatau ona faia so o se mea i le Maota mo Sauniga o le a lē fiafia ai le faapotopotoga, pe faalumaina ai Ieova ma le igoa lelei o le faapotopotoga. (Fili. 2:14, 15) I lalo o le taʻitaʻiga a le ofisa o le lālā, e ono mafai foʻi ona faaaogā Maota mo Sauniga mo nisi faatasiga faaleagaga, e pei o le Aʻoga o le Faiva o le Malo ma le Aʻoga mo le Auaunaga Paeonia.

¹² E tatau i le faapotopotoga ona faaalia le faaaloalo i taimi uma e faaaogā ai lenei nofoaga mo sauniga. O laʻei, teuga, ma le auala e amioaʻi ai e tatau ona atagia atu ai le mamalu o le tapuaʻiga iā Ieova. (Fai. 5:1; 1 Timo. 2:9, 10) O le faatatauina o fautuaga ua tatou maua e faatatau i lenei vala, e faaalia ai lo tatou talisapaia o a tatou sauniga faa-Kerisiano.

¹³ E tāua ona faatumauina le tulaga sologa lelei i taimi o sauniga. O lea, e fautuaina ai le nonofo faatasi o fanau ma o latou mātua. E mafai ona faalaeiauina mātua e iai a latou fanau iti, e nonofo i vaega e lē ono faalavelave ai i isi, pe afai e manaʻomia ona ave tamaiti i fafo e faatonu ai pe e mo nisi māfuaaga.

¹⁴ E tofia uso agavaa e auauna o ni tautua i taimi o sauniga i le Maota mo Sauniga. E tatau i nei uso ona mataʻalia, ia faaleuō ma ia iai le faautaga loloto. O lo latou tiute tauave e aofia ai le faafeiloaʻia ma le māfana o tagata fou, fesoasoani i ē tuai mai ia maua ni nofoa, faamau le aofaʻi o ē auai i le sauniga, ma faamautinoa ua talafeagai le māfanafana ma le mālū o le ʻea o le maota. Pe a manaʻomia, e faamanatu atu foʻi e le ʻautautua i mātua le vaavaaia lelei o a latou fanau, ina ia ʻalofia ai le taufetuli solo a o leʻi amata pe māeʻa le sauniga, pe taaalo foʻi i luga o le pulelaa. I se auala agalelei ma le faautauta, e mafai ona talosaga atu se uso tautua i se matua pe a ulavale lana tama, ina ia ave i fafo e ʻalofia ai le faalavelave i le aofia. E tele aogā o le galuega o loo faia e le ʻautautua, i le mauaina e tagata uma o le fiafia i taimi o sauniga. E lelei pe a faaaogā toeaina ma auauna o le faiva mo le ʻautautua.

FAUSIAINA O MAOTA MO SAUNIGA

¹⁵ O nisi o Kerisiano sa iai i le uluaʻi senituri, na sili atu o latou tulaga tau tamaoaiga nai lo o isi. O lea na tusi atu ai Paulo: “Ia avea lo outou tamaoaiga i le taimi nei e fesoasoani i lo latou lē tagolima, ma e fesoasoani foʻi lo latou tamaoaiga i lo outou lē tagolima i se aso, ina ia tutusa ai avega a tagata uma.” (2 Kori. 8:14) I aso nei, o loo faia foʻi se faatulagaga talitutusa ina ia “tutusa ai avega a tagata uma.” E tuufaatasi meaalofa tauofo mai i faapotopotoga i le lalolagi aoao, ona saunia ai lea o le fesoasoani tautupe mo le fausiaina po o le toe faaleleia o Maota mo Sauniga. E matuā talisapaia le agaga foaʻi o le ʻauuso i le lalolagi aoao e le faalapotopotoga, faapea faapotopotoga ua maua aogā mai i nei meaalofa tauofo.

¹⁶ E fua i le tulaga o se vaipanoa, e faatulaga ai e le ofisa o le lālā faapotopotoga e faaaogāina Maota mo Sauniga patino. E filifili foʻi e le ofisa o le lālā po o afea ma o fea foʻi e fausia ai ni Maota mo Sauniga fou, pe faaleleia foʻi ni maota o loo i le atunuu po o atunuu o loo vaavaaia e lea lālā. Pe a tulaʻi mai ni mala, e faia faatulagaga mo le toe faaleleia o Maota mo Sauniga ua faaleagaina, ma i nisi taimi o fale o uso.

¹⁷ O le ofisa o le lālā e faamaopoopoina tagata tauofo e fesoasoani i le faatauina o fanua, tusia o ata o Maota mo Sauniga, talosagaina o pemita mo le faatagaga e faia ai galuega, faapea le fausiaina ma le tausia lelei o maota. Ona o le telē o le manaʻoga mo Maota mo Sauniga i le tele o atunuu, ua manaʻomia ai le toʻatele o le ʻautauofo. E faalaeiauina tagata talaʻi papatiso uma ua agavaa ma o loo iai se faanaunauga e fia fesoasoani atu, ina ia faatumu se pepa talosaga mo ē tauofo, ma tuuina atu i le Komiti o le Auaunaga a le Faapotopotoga o loo iai. E oo foʻi i tagata talaʻi e leʻi papatiso, e mafai ona latou fesoasoani i le fausiaina po o le toe faaleleia o Maota mo Sauniga a ā latou lava faapotopotoga.

MAOTA MO FONOTAGA

¹⁸ Na masani ona potopoto uluaʻi Kerisiano i ni vaega toʻalaiti. Ae i nisi taimi, na faapotopoto ai o se “motu o tagata.” (Galu. 11:26) I se tulaga talitutusa, e faapotopoto foʻi tagata o Ieova i aso nei i ni faatasiga tetele i taimi o fonotaga matagaluega ma tauaofiaga itumalo. E masani ona totogi ni maota i le vaipanoa mo nei fuafuaga, ae afai e lē talafeagai pe e lē mafai foʻi ona faia faapea, e ono faatau pe fausia se nofoaga mo le tapuaʻiga e taʻua o le Maota mo Fonotaga.

¹⁹ O nisi taimi, e faatau mai ai se fale ma toe faafou ina ia fai ma Maota mo Fonotaga. Ae o le tele lava o taimi, e faatau mai se fanua ona fausia ai lea o se Maota mo Fonotaga. E eseese le tetelē o Maota mo Fonotaga e fua lava i manaʻoga o le vaipanoa. E faatoʻā faia e le ofisa o le lālā se faaiʻuga mo le faatauina o se fanua ma fausia ai se Maota mo Fonotaga, pe a uma ona latou iloilo totoʻa le tau ma le tele e faaaogā ai.

²⁰ E tofia e le ofisa o le lālā ni uso e vaavaaia le tausiaina o nei Maota mo Fonotaga. E faia faatulagaga mo matagaluega ina ia faamamā le maota i taimi uma e faaaogā ai, faamamā e faalua ona fai i le tausaga, faapea siaki masani ina ia iloa ai vaega e manaʻomia ona faaleleia. E aogā i tagata talaʻi le tauofo e faatino nei galuega. O lea, e faalaeiauina ai faapotopotoga ina ia lagolagoina ma le lotoatoa nei faatulagaga.​—Sala. 110:3; Mala. 1:10.

²¹ I nisi taimi, e mafai foʻi ona faaaogā Maota mo Fonotaga mo nisi faatasiga faaleagaga, e pei o aʻoga faale-Tusi Paia ma isi sauniga faapitoa mo ovasia o le matagaluega. E pei o le Maota mo Sauniga, ua tuuina atu foʻi Maota mo Fonotaga mo le tapuaʻiga. E pei lava ona tatau ona tausia le mamalu i le auala e tatou te amioaʻi ai, o tatou laʻei ma teuga pe a auai i le Maota mo Sauniga, e faapena foʻi pe a tatou potopoto i se Maota mo Fonotaga mo le tapuaʻiga.

²² E toʻatele tagata fou ua lolofi mai i le faalapotopotoga a le Atua i le siʻui o nei aso e gata ai. O se faamaoniga lea o faamanuiaga a Ieova. (Isa. 60:8, 10, 11, 22) O lea, e tatou te mananaʻo e lagolagoina faatulagaga mo le mauaina ma le faatumauina pea o le mamā ma le lelei o nofoaga mo le tapuaʻiga. O le faia faapea, e faaalia ai lo tatou talisapaia o le aogā o nei nofoaga, i le fesoasoani lea iā i tatou e fefaalaeiauaʻi ai le tasi i le isi, ma ia sili foʻi ona faia faapea auā ua tatou iloa o le aso o Ieova ua matuā latalata mai.