Auala e Faalautele Atu ai Lau Faiva

INA ua oo i le taimi e auina atu ai e Iesu ona soo o ni tagata talaʻi o le Malo, na ia fetalai atu iā i latou: “E telē le galuega o le seleselega, ae e toʻaitiiti le ʻaufaigaluega.” E tele galuega sa tatau ona fai, o lea na ia toe faapea atu ai: “Ia outou ʻaiʻoi atu ai i le Alii o le seleselega, ina ia auina mai se ʻaufaigaluega e faia le seleselega.” (Mata. 9:37, 38) Na faailoa atu e Iesu i ona soo le auala e faia ai le faiva. Na atagia atu i ana upu nei se uiga faanatinati: “E lē soo aai o Isaraelu iā te outou seʻia taunuu le Atalii o le tagata.”​—Mata. 10:23.

² E tele foʻi galuega e tatau ona faia i le faiva i le fanua i aso nei. E tatau ona talaʻiina atu le tala lelei o le Malo a o leʻi oo mai le iʻuga, ae ua utiuti lava le taimi o totoe. (Mare. 13:10) Talu ai o le fanua o le lalolagi lea, ua tatou fesagaʻi foʻi la ma se tulaga e talitutusa ma taimi o Iesu ma ona soo, ae i se tulaga e sili atu. E laʻitiiti lo tatou aofaʻi pe a faatusatusa atu i le faitau piliona o tagata i le lalolagi, ae e mafai ona tatou mautinoa o le a fesoasoani mai Ieova. O le a talaʻiina atu le tala lelei o le Malo i le lalolagi atoa, ma o le a oo mai le iʻuga i le taimi atofaina a Ieova. Po o le a tatou faamuamuaina le Malo o le Atua i o tatou olaga, ina ia faataunuuina atoatoa ai la tatou faiva? O ā sini i le auaunaga iā Ieova e mafai ona tatou aapa atu i ai, ina ia faataunuuina atoatoa ai la tatou faiva?

³ Na taʻua e Iesu mea e manaʻomia mai e Ieova i Ana auauna tuuina atu e faapea: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa, ma lou malosi atoa.” (Mare. 12:30) E manaʻomia ona faia ma le lotoatoa la tatou auaunaga. O lona uiga, ia faamaonia atu le loloto o lo tatou faamaoni i le Atua, ma le moni o lo tatou tuuina atu e ala i le faia o le mea silisili e tatou te mafaia i le auaunaga iā Ieova. (2 Timo. 2:15) E tele avanoa o loo tatalaina mai mo i tatou taʻitoʻatasi, e tusa ai ma o tatou tulaga ma mea e tatou te mafaia. Seʻi manatunatu i nisi o nei avanoa, ma filifili po o ā sini faaleagaga o le a e tuliloaina ina ia faataunuuina ai lau faiva.

AUAUNA O SE TAGATA TALAʻI O LE FAAPOTOPOTOGA

⁴ Ua maua e i latou uma ua talia le upu moni le faaeaga o le folafolaina atu o le tala lelei. O le galuega autū lea na tuu atu e Iesu i ona soo e fai. (Mata. 24:14; 28:19, 20) E masani lava, o le taimi lava e faalogo ai se soo o Iesu i le tala lelei, o le taimi foʻi lenā e na te faailoa atu ai i isi. O le mea lenā na faia e Aneterea, Filipo, Konelio ma isi. (Ioa. 1:40, 41, 43-45; Galu. 10:1, 2, 24; 16:14, 15, 25-34) Po o le uiga o lenei mea e mafai lava ona faailoa atu e se tagata le tala lelei i isi, e tusa lava pe e leʻi papatiso? Ioe. O le taimi lava e agavaa ai se tasi e avea o se tagata talaʻi e leʻi papatisoina i le faapotopotoga, ua tatala mai ai loa le avanoa mo ia, e faia ai sona sao i le talaʻia o le tala lelei mai i lea fale i lea fale. Ua mafai ai foʻi ona faia sona sao i isi vala o le faiva i le fanua, e tusa ai ma lona tulaga ma mea e na te mafai.

⁵ Pe a uma ona papatiso se tagata talaʻi, e lē taumatea e naunau o ia e faia le mea e gata ai lona mafai e fesoasoani ai i isi ina ia aʻoaʻoina le tala lelei. Ua maua uma e tane ma fafine le faaeaga o le faia o se sao i le galuega talaʻi. O se faamanuiaga le faia o so tatou sao i le faaauilumaina o manaʻoga o le Malo o le Atua, e tusa lava pe itiiti. O so o se tasi e mafai ona faalautele atu lana faiva ina ia faaaofia ai isi vala o le auaunaga, e mautinoa o le a faafiafiaina o ia.

AUAUNA I NOFOAGA O LOO TELE AI LE MANAʻOGA

⁶ Atonu o loo e iai i se faapotopotoga e galueaʻiina soo oganuu ma o loo avatu ai se molimau lelei. Pe afai o le tulaga lea, e te ono manatu la e mafai ona faalautele atu lau faiva, e ala i le siitia atu i se isi nofoaga o loo telē ai le manaʻoga i le fanua. (Galu. 16:9) Pe afai o loo e auauna nei o se toeaina po o se auauna o le faiva, atonu o loo iai se isi faapotopotoga o le a talisapaia lau fesoasoani. E ono maua mai i la outou ovasia o le matagaluega ni fautuaga, i auala e mafai ona e fesoasoani ai i se isi faapotopotoga i totonu lava o le matagaluega. Pe afai e te manaʻo e auauna i se isi vaipanoa o lou atunuu, e mafai ona maua nisi faamatalaga aogā mai i le ofisa o le lālā.

⁷ Pe e te manaʻo e te auauna i se isi atunuu? Pe afai o lea, e tatau ona e manatunatu lelei i lea fuafuaga. Aiseā e tou te lē talanoaina ai lenei mataupu ma toeaina o lau faapotopotoga? E mautinoa lava o na fuafuaga, o le a iai ni aafiaga iā te oe ma so o se tasi e tou te ō faatasi. (Luka 14:28) Ae pe afai e te lē o fuafua e nofo mo se taimi umi i se isi atunuu, atonu e sili atu ona lelei pe a e auauna i se vaipanoa i totonu o lou lava atunuu.

⁸ I nisi o atunuu, o toeaina o loo malaga atu e sili atu ona umi i le upu moni nai lo o toeaina o loo avea ma taʻimua i na atunuu. E lotomalilie uso lotomaulalo i na atunuu, e taʻimua toeaina e sili atu lo latou tomai ua ō atu i a latou faapotopotoga. Pe afai o oe o se toeaina ma o loo e fuafua e siitia atu i se atunuu faapena, ia teu pea i manatu e lē o lou sini o le suitulaga i uso i lenā atunuu. Nai lo o lea, o lou sini o le auauna faatasi lea ma i latou. Ia faalaeiau iā i latou ina ia aapa atu ma talia tiute tauave i totonu o le faapotopotoga. (1 Timo. 3:1) Ia faaalia pea le onosaʻi, pe afai e lē tutusa le auala o loo taulima ai nisi o mataupu e uso i lenā atunuu mai i lou lava atunuu. Ia faaaogā lou tomai o se toeaina e avea ma fesoasoani moni i uso. I se taimi mulimuli ane pe a manaʻomia ona e tuua lea atunuu ma toe foʻi atu i lou atunuu, ae ua lava saunia nei uso mo le tausiaina o le faapotopotoga.

⁹ A o leʻi faailoaina atu e le ofisa o le lālā ni faapotopotoga e mafai ona aogā i ai lau fesoasoani, e manaʻomia ona saunia e le Komiti o le Auaunaga a le Faapotopotoga o loo e iai se tusi e faatatau iā te oe. E manaʻomia lenei tusi e tusa lava pe o loo e auauna o se toeaina, se auauna o le faiva, se paeonia po o se tagata talaʻi foʻi. O le a lafoina atu e le komiti o le auaunaga a lau faapotopotoga le tusi e faatatau iā te oe, faatasi ai ma lau tusi talosaga mo ni faamatalaga i le ofisa o le lālā o le atunuu lea e te fia auauna ai.

TALAʻI ATU I SE ISI GAGANA

¹⁰ Ina ia faalautele atu lau faiva, atonu e te manaʻo e aʻoaʻoina se isi gagana lea e aofia ai foʻi ma se tasi o gagana fai taga. Pe afai o loo iai sou sini e talaʻi atu i se isi gagana, aiseā e te lē talanoa atu ai i toeaina ma le ovasia o le matagaluega? E mafai ona e maua mai iā i latou ni fautuaga ma ni faalaeiauga manaʻomia. I lalo o le taʻitaʻiga a le ofisa o le lālā, ua faatulaga ai e nisi o matagaluega ni vasega e aʻoaʻoina ai nisi o gagana, e toleniina ai tagata talaʻi ma paeonia agavaa ina ia mafai ona talaʻi atu i se isi gagana.

AUAUNAGA PAEONIA

¹¹ O tagata talaʻi uma e tatau ona malamalama i agavaa manaʻomia mo le auaunaga o ni paeonia lagolago, paeonia sauatoa, paeonia faapito po o se isi lava vala o le auaunaga faataimi atoa. O le paeonia, o se Kerisiano papatiso o loo avea ma faaaʻoaʻoga lelei. Ona o lona tulaga, ua mafai ai ona ia faaaluina se aofaʻi patino o itula i le talaʻia o le tala lelei. E faamaonia e le Komiti o le Auaunaga a le Faapotopotoga talosaga mo paeonia lagolago ma paeonia sauatoa, ae o paeonia faapito e tofia mai e le ofisa o le lālā.

¹² O paeonia lagolago e mafai ona tofia mo se masina se tasi, o ni masina faalausosoo, pe faaauau foʻi mo se umi e lē faatulagaina e fua lava i le tulaga o le tagata talaʻi. E olioli le toʻatele o tagata talaʻi o le Malo e auauna o ni paeonia lagolago, i taimi faapitoa e pei o le vaitaimi o le Faamanatuga po o le masina foʻi o le asiasiga a le ovasia o le matagaluega. O nisi e faaaogā masina ia e mālōlō ai e paeonia ai. O nisi tagata talaʻi papatiso o loo iai i aʻoaʻoga, e latou te faaaogā taimi o tuuaga e paeonia lagolago ai. E mafai e tagata talaʻi ona filifili e paeonia lagolago i le faatulagaga lea ua faaitiitia ai itula mo masina o Mati ma Aperila, ma i le masina foʻi o le asiasiga a le ovasia o le matagaluega. Po o le ā lava lou tulaga, ae afai o loo lelei lou tulaga tau amio ma au masaniga, mafai ona faatulaga lou taimi ina ia ausia itula manaʻomia, ma iloa e mafai ona e faaaluina se masina pe sili atu e auauna ai o se paeonia lagolago, o le a fiafia toeaina e iloiloina lau talosaga mo lea faaeaga mo le auaunaga.

¹³ Ina ia agavaa e avea o se paeonia sauatoa, ua tatau nei ona e iai i se tulaga e mafai ai ona e ausia itula e manaʻomia mo le tausaga atoa. I le avea ai ma paeonia sauatoa, o le a e manaʻo foʻi e galulue vavalalata ma lau faapotopotoga. E avea paeonia maelega ma faamanuiaga i le faapotopotoga, e faaosofia ai le naunau o isi mo le faiva i le fanua, ma e faalaeiauina ai foʻi isi e aapa atu i le auaunaga paeonia. A o leʻi talosaga atu e avea ma paeonia sauatoa, e tatau ona avea oe o se tagata talaʻi o loo fai ma faaaʻoaʻoga lelei, ma ia lē itiiti ifo ma le ono masina talu ona e papatiso.

¹⁴ O paeonia faapito e tele lava ina filifilia mai i paeonia sauatoa, o ē e taulau manuia ma uigā la latou faiva. E tatau ona latou lotomalilie e auauna i so o se vaipanoa lava e filifili le ofisa o le lālā e tofia i ai i latou. E tele lava ina auina atu i latou i oganuu maotua e leʻi tofia i ai se faapotopotoga, ina ia saʻilia tagata fiafia ma amataina ai se faapotopotoga. I nisi taimi, e tofia paeonia faapito i faapotopotoga o loo iai le manaʻoga mo le galueaʻiina o a latou oganuu. O nisi toeaina o loo avea ma paeonia faapito, ua tofia atu e fesoasoani i nisi o faapotopotoga toʻalaiti, e ui lava e lē o iai se manaʻoga faapitoa mo ni ē e galulue i le fanua. E maua e paeonia faapito ni alauni talafeagai mo le tausia o i latou. O nisi paeonia faapito e tofia mo se taimi e lē tumau.

MISIONARE I LE OGANUU

¹⁵ O le Komiti o le Auaunaga a le Vaega Pule, e latou te tofia i latou mo le auaunaga faamisionare i oganuu. Ona tofia lea e le Komiti o le Lālā i le atunuu lea ua tofia i ai nei misionare, i latou e auauna i oganuu e toʻatele tagata e nonofo ai. Ua latou faataunuuina le tele o mea lelei i le faamausalīina ma le faamalosia o le galuega talaʻi, faapea isi meafai a le faapotopotoga. E masani lava o i latou o loo auauna o ni misionare i le oganuu, na latou maua toleniga mai i le Aʻoga mo Tagata Talaʻi o le Malo. E saunia mo i latou ni fale e nonofo ai, faapea ma ni alauni talafeagai e totogi ai a latou tupe faaalu.

OVASIA MATAGALUEGA

¹⁶ O i latou ua tofia e le Vaega Pule e avea ma ovasia o le matagaluega, e latou te maua toleniga ma le tomai e ala i le avea muamua ma ni ovasia o le matagaluega suitulaga. O nei uso e naunau tele i le faiva, ma e alolofa i o latou uso. O i latou o ni paeonia maelega, o ni tagata aʻoga filigā o le Tusi Paia, o ni failauga ma o ni faiaʻoga uigā pe a aʻoaʻo atu. E mātaulia i latou o ni uso e faaalia le fua o le agaga, faaalia le paleni, e magafagafa ma e telē le faautaga loloto. Pe afai o se uso ua faaipoipo, o lana avā la o se paeonia o loo avea ma faaaʻoaʻoga lelei i lana amio, faapea le auala e feutagaʻi ai ma isi. O ia foʻi o se tagata talaʻi tomai. E malamalama lelei foʻi o ia i lana matafaioi o se avā Kerisiano e gauaʻi atu, ma e lē taumafai e tautala mo lana tane pe faumālō foʻi i se talanoaga. O uso o loo avea ma ovasia o le matagaluega ma a latou avā, e pisi tele a latou faasologa. O lea, o i latou e aapa atu i lea vala o le auaunaga e tatau ona lelei le tulaga o le soifua mālōlōina. E lē faia e paeonia ni talosaga e avea ai ma ovasia o le matagaluega. E na ona faailoa atu lava i la latou ovasia o le matagaluega o o latou faanaunauga e aapa atu i lenei vala o le auaunaga, ona ia saunia mai lea o nisi fautuaga mo i latou.

AʻOGA A LE FAALAPOTOPOTOGA

¹⁷ Aʻoga mo Tagata Talaʻi o le Malo: O loo iai se manaʻoga tele mo nisi tagata talaʻi o le Malo, e galueaʻiina oganuu e seāseā talaʻia ma avatu le fesoasoani faaleagaga i faapotopotoga. O lea, ua mafai ona talosaga atu uso nofofua, tuafāfine nofofua ma ulugalii faaipoipo, ina ia maua toleniga faapitoa mai i le Aʻoga mo Tagata Talaʻi o le Malo. Pe a uma mai le aʻoga, o i latou o le a faauu mai ai o le a auina atu e auauna o ni paeonia sauatoa, i vaega o loo tele ai le manaʻoga i o latou atunuu. Peitaʻi o nisi o loo mafai ona faaavanoa atu i latou, e ono tuuina atu i ai isi tofiga i o latou lava atunuu po o se isi foʻi atunuu. O se vaega toʻaitiiti o i latou, e ono auina atu e auauna o ni paeonia faapito e lē tumau pe tumau foʻi. O paeonia e fia auai i lenei aʻoga, e mafai ona latou iloa nisi o mea manaʻomia mo le aʻoga, i le fono lea e faia i le taimi o le tauaofiaga itumalo.

¹⁸ Aʻoga Faale-Tusi Paia a le Olomatamata o Kiliata: O uso nofofua, tuafāfine nofofua ma ulugalii faaipoipo e filifilia mo lenei aʻoga, e tautatala i le gagana Peretania, ma o loo auauna faapitoa faataimi atoa. O i latou nei ua iai le tomai e mafai ai ona faamalosia, ma faamaopoopo le galuega talaʻi po o ofisa o lālā. Ua uma ona faamaonia atu lo latou naunau e auauna mo o latou uso, ma fesoasoani i isi i se auala agalelei ina ia latou aʻoaʻoina taʻiala o le Tusi Paia ma taʻiala mai i lana faalapotopotoga, ma ola e tusa ai ma na taʻiala. E valaaulia e le Komiti o le Lālā i latou e ono agavaa mo lenei aʻoga e tuuina atu a latou talosaga. O i latou e faauu mai i lenei aʻoga e tofia e galulue i le fanua, pe galulue foʻi i ofisa o lālā i nisi atunuu po o ō latou lava atunuu.

AUAUNAGA I PETELI

¹⁹ O se faaeaga faapitoa le auauna ai i Peteli. O le uiga o le igoa Peteli o le “Fale o le Atua,” ma ua matuā fetaui lelei lenei taʻu mo nei nofoaga o loo fai ma taulaʻiga o galuega faaleagaga. O loo faia e uso ma tuafāfine o loo galulue i Peteli galuega tāua e fesootaʻi atu i le saunia, faaliliuina ma le tufatufaina atu o lomiga faale-Tusi Paia. E matuā tautele la latou auaunaga i le Vaega Pule, lea o loo vaavaaia ma saunia mai taʻiala mo faapotopotoga uma i le lalolagi aoao. O le toʻatele o tagata Peteli o loo galulue i le faaliliu, e nonofo ma galulue i vaega o le oganuu o loo i lalo o le vaavaaiga a le lālā, o loo tautatala i le gagana o loo latou faaliliuina. O le faia faapea, e mafai ai ona latou faalogo atu i le auala o loo faaaogā ai e tagata lea gagana i aso taʻitasi. Ua mafai ai foʻi ona latou iloa po o malamalama tagata i le auala o loo faaaogā ai le gagana i lomiga ua faaliliuina.

²⁰ O le tele o galuega e faia i Peteli o ni galuega mamafa. O lea la, o le tele lava o i latou e talia mo Peteli o ni uso talavou ua tuuina atu ma papatisoina, o loo lelei le tulaga i le soifua mālōlōina ma malosi le tino. Pe afai o loo iai se manaʻoga i le lālā o loo vaavaaia lou atunuu ma o loo e fia auauna i Peteli, e te maua faamatalaga atili i mea e manaʻomia ina ia e agavaa ai, mai toeaina o lau faapotopotoga.

AUAUNAGA I FAUGĀFALE

²¹ O le fausiaina o maota e faaaogā e le faalapotopotoga ma maota mo le tapuaʻiga iā Ieova, o se vala o le auaunaga paia e pei lava o le fausiaina o le malumalu o Solomona. (1 Tu. 8:13-18) E toʻatele uso ma tuafāfine ua faaalia le maelega e ala i le tauofo atu o o latou taimi, tomai, malosi ma meatotino, ina ia faia ai so latou sao i lenei galuega.

²² Po o talafeagai ma lou tulaga ona e fesoasoani atu? Pe afai o oe o se tagata talaʻi papatiso o loo naunau e faia sou sao i lea auaunaga, o le a talisapaia e uso o loo vaavaaia faugāfale o loo i lou vaipanoa lau fesoasoani, ma nofosauni e toleni oe e tusa lava pe e lē lava ou tomai. Aiseā e te lē faailoa atu ai i toeaina i lou vaipanoa o loo e avanoa e fesoasoani atu? Ua mafai foʻi e nisi tagata talaʻi papatiso ua agavaa, ona tauofo i galuega mo le fausiaina o maota e faaaogā e le faalapotopotoga ma maota mo le tapuaʻiga iā Ieova i isi atunuu.

²³ E tele avanoa e mafai ona faia ai se sao e auauna ai i faugāfale. O tagata talaʻi papatiso o loo avea ma faaaʻoaʻoga lelei, ma e iai ni nai tomai e mafai ona lagolago ai i galuega faufale e latalata i nofoaga o loo latou nonofo ai, e mafai ona auauna o ni tagata tauofo mai i le vaipanoa mo Faugāfale. O nisi e mafai ona lagolagoina mo se taimi faatapulaa galuega faufale e mamao nofoaga o faia ai, e tofia mai e le ofisa o le lālā e galulue o ni tagata tauofo mo faugāfale, i le umi e lua vaiaso i le tolu masina. O i latou ua tofia e auauna i galuega faufale mo se taimi umi, e taʻua o auauna mo faugāfale. O se auauna mo faugāfale ua tofia e auauna i galuega faufale o loo faia i isi atunuu, e taʻua o auauna mo faugāfale mo isi atunuu. O se Vaega mo Faugāfale, e faia aʻe i ē o loo avea o ni auauna mo faugāfale ma tagata tauofo mo faugāfale. E taʻimua le Vaega mo Faugāfale i galuega taʻitasi, ae e fesoasoani i ai tagata tauofo mai i le vaipanoa ma tagata tauofo mai i faapotopotoga o loo aofia ai i le galuega. E galulue faasolosolo le Vaega mo Faugāfale mo galuega i totonu o le oganuu a le lālā.

O Ā NI OU SINI FAALEAGAGA?

²⁴ Pe afai ua tuuina atu lou ola iā Ieova, o lou faanaunauga la o le auauna atu iā te ia e faavavau. Ae ina ia ausia lea tulaga, o ā ni ou sini faaleagaga o loo iai? O le iai o ni ou sini faaleagaga, o le a fesoasoani iā te oe e faaaogā ai ma le poto lou malosi ma au alāmanuia. (1 Kori. 9:26) O le faatutū o sini faapena e matuā aogā i lou tuputupu aʻe faaleagaga, ma fesoasoani iā te oe e taulaʻi atu ai i mea e sili ona tāua, a o e aapa atu mo nisi faaeaga o le auaunaga.​—Fili. 1:10; 1 Timo. 4:15, 16.

²⁵ Na faataatia e le aposetolo o Paulo se faaaʻoaʻoga lelei mo i tatou, e faaaʻoaʻo i ai i la tatou auaunaga i le Atua. (1 Kori. 11:1) Na finafinau Paulo i le auaunaga iā Ieova i le mea e gata mai ai lona malosi. Na ia iloa le tele o avanoa na saunia mai e Ieova mo ia. I lana tusi i uso i Korinito na ia faapea atu ai: “Ua faaavanoa mai iā te aʻu se faitotoʻa lautele e fai ai le galuega.” Pe e lē moni ea foʻi lea manatu mo i tatou i aso nei? Ioe, e anoanoaʻi avanoa ua tatou maua e auauna atu ai iā Ieova i le auaufaatasi ai ma le faapotopotoga, aemaise lava i le talaʻia o le tala lelei o le Malo. Ae e pei lava foʻi o le tulaga na oo iā Paulo, o le ulu atu i lenā “faitotoʻa lautele” e aofia ai le fesagaʻia o le ʻtoʻatele o tagata e tetee mai.’ (1 Kori. 16:9) Na lotomalie Paulo e pulea o ia lava. Ia mātau lana faamatalaga lenei: “Ou te tatuʻi loʻu tino e fai ma pologa.” (1 Kori. 9:24-27) Pe e faapena foʻi o tatou manatu?

²⁶ Ua faalaeiauina i tatou uma taʻitoʻatasi ina ia galulue e ausia ni sini faaleagaga, e tusa ai ma o tatou tulaga i le olaga. O nisi ua mafai nei ona auauna i nisi vala o le auaunaga faataimi atoa, talu ai na latou muaʻi faatutū nei sini faaleagaga i o latou olaga. E mai lava i le taimi a o lāiti, na faalaeiauina i latou e o latou mātua ma isi ina ia faatutū sini faaleagaga. O lea, ua avea ai le auaunaga iā Ieova o se galuega e faatamaoaigaina ai, ma e leai se mea e faanoanoa ai ona o lea filifiliga. (Faata. 10:22) O nisi sini tāua atonu e mafai ona faatutū, o lo tatou auai lea i le auaunaga i le fanua i vaiaso taʻitasi, amata ma faia se suʻesuʻega faale-Tusi Paia i aiga, pe faateleina foʻi le taimi e sauniuni ai mo sauniga. O le mea tāua, ia faaauau pea ona tatou tutūmausalī ma faataunuu ma le māeʻaeʻa la tatou faiva. Pe a tatou faia faapea, o le a tatou faamamaluina ai Ieova ma ausia ai foʻi lo tatou sini autū, o le auauna lea iā te ia e faavavau.​—Luka 13:24; 1 Timo. 4:7e, 8.