‘O le a Faaiʻuina e le Atua Lou Aʻoaʻoina’
O SE TAGATA taalo o sauniuni atu mo se tausinioga tāua e tatau ona toleni malosi. E manao o ia ina ia atoatoa lelei lona tino ina ia oo atu i lena aso tele, ua ia tuuina atu le mea aupito sili ona lelei na te mafaia. E tatau foi i Kerisiano ona toleni malosi a e peitai e ese o tatou sini. Na faapea mai le aposetolo o Paulo: “A ia e faamasani i le amio Atua, e avea ma ou sini.”—1 Timoteo 4:7, NW.
O lea, e ao ai foi i se Kerisiano ona faamalosia faaleagaga lona tulaga. E pei ona famalosi e le tagata taalo lona tino, e tatau ai foi i le Kerisiano ona faatupu lona malosi faaleagaga ma le onosai. Na te faia lenei mea e ala i le suʻesuʻeina o le Afioga a le Atua le Tusi Paia, e ala i le tatalo, ma ia auau faatasi e le aunoa ma uso a Kerisiano, ma ia faalauiloa atu i le lautele lona faatuatua.
O le tagata taalo e masani lava ona i ia sona faiʻaoga, ma o Kerisiano foi e i ai so latou faiʻaoga. O ai? E leai se isi na o Ieova le Atua lava ia.! Na faasino mai e le aposetolo o Peteru le manatu o Ieova mo le polokalama o le toleniina o Kerisiano i lona tusi mai: “a o le Atua e ona le alofa tunoa uma lava . . . o le a ia faaiʻuina la outou tausinioga, o le a ia faatumauina ma faamalosia outou.” (1 Peteru 5:10, NW) O le ā le tausinioga ua tuuina mai e Ieova ia i tatou? E tele ituaiga, ma e tāua uma lava pe a tatou mananao e tumau o ni Kerisiano.
Aoaʻiga Tuusaʻo
Na maua foi e Peteru aoaiga mai ia Ieova. E tele mea e mafai ona tatou aʻoaʻoina mia i mea na oo i ai. O nisi taimi sa tiga aoaiga o Peteru. Seʻi manatu pe na faapefea faalogona o Peteru ina o ia taumafai e falotovaivaia Iesu mia le agaʻi atu i luma i le faataunuuina o fuafuaga a le Atua, a e tali atu i ai Iesu: “Satani e, ina alu ia oe i oʻu tua, ua fai oe ma mea ou te tausuai ai; auā e le o mea a le Atua ua e loto i ai, a o mea a tagata.” (Mataio 16:23) Manatua foi, pe o le ā lona lagona i le tele o tausaga mulimuli ane ona o lona fefe i tagata na taʻitaʻiina ai o ia e fai se gaoioiga valea. Na faataʻitaʻia e le aposetolo o Paulo le aoaiga a Ieova e tusa ai ma lena mea: “A ua alu atu Peteru i Anetioka, on ou matuā finau atu lea ia te ia i ona lava luma, auā ua tatau ona aoaiina o ia.”—Kalatia 2:11-14.
A e peitai, i nei mea uma sa aʻoaʻoina e Ieova Peteru. Na ia iloa faapea, “o aoaiga uma foi a o i ai, e le manatu i ai o se mea e olioli ai, a o le mea e faanoanoa ai; a e mulimuli ane e fua mia ai le fua o le amiotonu e manuia ai e ua aʻoaʻoina ai.” (Eperu 12:11) I le talia o na fautuaga malolosi e avea o ni aoaiga mai ia Ieova na fesoasoani ai ia Peteru e maua le vaaiga saʻo i mea ma aʻoaʻoina ai o ia i uiga taua faa-Kerisiano o le agamalu ma le loto maulalo.—Faataoto 3:34; 15:33.
Taulimaina o Tulaga
E aʻoaʻoina i tatou e Ieova e ala i le faatagaina o tulaga e faigat ona taulimaina ia tutupu aʻe—i nisi taimi e tutupu mai nei mea e oo lava i totonu o le faapotopotoga Kerisiano. A o tatou tutupu aʻe o ni Kerisiano ma a o tatou tatalo mo le taʻitaʻiga, ma faatino mataupu silisili mai le Tusi Paia na tatou aʻoaʻoina, ma iloa ai pe ua faapefea i le faatinoina o nei mataupu silisili ona avea pea o le auala e sili ona lelei.
Na auai foi Peteru i fevaevaeaiga faletagata na mapuna aʻe i totonu o aposetolo o Iesu. Pe a tatou faitauina le faamatalaga e uiga i lenei mea, e faaoso naunau le iloa pe na faapefea ona faaaogā e Iesu nei tauvaga—na mautinoa lava o ni iʻuga o le lē lelei atoatoa ma le leai o se poto masani ua avea ai ma avanoa e aoaiina ai ona soʻo i uiga tatau mo se Kerisiano o le alofa, loto maualalo, ma le loto faamagalo.—Mataio 18:15-17, 21, 22; Luka 22:24-27.
Na molimauina foi e Paulo uiga feteenai faaletagata. (Galuega 15:36-40; Filipi 4:2) Na ia faamatala mia foi pe ua faapefea i na faafitauli ona avatu ai i Kerisiano se avanoa e maua ai le aʻoaʻoina: “Ia fefaapalepaleai ma ia fefaamagaloai outou, pe afai ua agaleagaina se tasi e se tasi; faapei ona faamagalo mai (Ieova) ia te outou, ia faapea foi outou. A o le alofa, e luatua lea i nei mea uma, o le fusi lea e atoatoa ona lelei ai.”—Kolose 3:13, 14.
I le uluai senituri, na tupu ai se agasala mataʻutia i totonu o Kerisiano. Na lapataʻi mai Peteru e uiga i lenei mea: “Sa i ai foi i le nuu o perofeta pepelo, e pei ona i ia ia te outou, o aʻoaʻo pepelo, latou te fatupuina faalilolilo o vaevaega e fano ai, ma latou faafiti i le Alii na ia faatau mai ia te i latou, o i latou lava e oo mai ai ia i latou le malaia e vave mai lava. E toatele foi latou te mulimuli atu i a latou mea e fano ai, talu o i latou e upuleagaina ai le ala o le upu moni.” (2 Peteru 2:1, 2)
O lenei mea e iʻu ai i le faaumatiaga o “aʻoaʻoga sese e manaomia ai ona latou toe autalu mafuaaga mo lo latou faatuatua. A o latou vaaia iʻuga leaga o gaoioiga a “aʻoaʻo pepelo,” o le a sili ai ona faamalosia lo latou mautinoa o le upu moni faa-Kerisiano.—2 Peteru 3:3-7.
Mo se faaaʻoaʻoga, i se faapotopotoga na teena ai e Tioterifi le aposetolo matua o Ioane, o le tagata fiasili sa itiiti lona faaaloalo i le pule a Ioane ma na te le fia talia foi sāvali na aauina mai e Ioane ma sa oo lava ina ia taumafai e faatea i latou sa talia nei sāvali. Sa matuā tiga lenei mea i Kerisiano faamaoni uma o ē sa i le faapotopotoga lava lea e tasi ma Tioetifi. Peitaʻi na avatu ai ia i latou le avanoa e faaalia ai sa le o i latou o ni ē ‘faaaʻoaʻo o le leaga’ a ia maua le aʻoaʻoina auiluma o le faamaoni ia Ieova ma le pule a le au aposetolo.—3 Ioane 9-12.
I le Feagai ai Ma Ē e Le Ni Kerisiano
Na fetalai Ieau faapea o ona soʻo e lē ni o le lalolagi i latou. (Ioane 17:16) O le uluai faamaoni lava o se Kerisiano etuu atu ia Ieova ma lona Malo. Na e taumafai e tausia tulaga tau i amioga mamā, o lea e ese ai ona faanaunauga autu ma ona popolega mai tagata o le lalolagi. Peitaʻi o se Kerisiano e tatau ona ola i le lalolagi, ma e mautinoa lava o le a faapogaia e lenei mea ni omiga malolosi.
I le vaitaimi umi o le faiva a Peteru, atonu sa ia vaai ai i le tele o mea e faigata ai ona faia ni filifiliga a Kerisiano, i le taumafai e faapaleni manaoga o le lalolagi ma mea o loo taʻu atu e o latou loto fuatia ifo. I le tusi muamua a Peteru, na ia aumaia ai se fuatuaga aogā lelei ma le poto, i le pe faapefea ona faia lenei mea ina ia mafai ai e Kerisiano ona taofi “le loto fuatia ifo lelei.”—1 Peteru 2:13-20; 3:1-6, 16.
E moni, i le avea o ni Kerisiano, ua tatou vaavaai ai i luma i le taimi pe a tatou lē toe manatu ai i mea a lenei faiga o mea. A e o le taimi nei o loo aʻoaʻoina ai iatatou ia tumau ma e mafai ai ona faataʻitaʻia lo tatou faamaoni i le feagai ai ma tofotofoga ma uiga lē faale-Atua. A o tatou maua le poto masani i le faatinoina o mataupu silisil faale-Tusi Paia i le tele o tulaga eseese, ma gaoioi ai ma le loto tele i le auala ua tatou iloa e finagalo ai Ieova ia tatou gaoioi ai, ua aʻoaʻoina foi i tatou i le poto aogā ma le loto tele. Manatunatu po o le a le tele o le aʻoaʻoina o i tatou o le a tatou maua ona o loo tatou ola i lenei faiga o mea ma na manuia lo tatou taulimaina o faafitauli faigata!
I Lalo o Sauaga
Ina o tautala Peteru e uiga i le aʻoaʻoina o i tatou e le Atua, sa ia faasino faapitoa atu lava i sauaga. Na ia faaalia faapea e tatau i Kerisiano ona faatalitalia sauaga: “Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ʻaina e ia.”—1 Peteru 5.8; tagai foi i le 2 Timoteo 3:12.
Na agavaa Peteru e tautala i lenei mea auā sa ia tigaina foi ona o sauaga totino na oo ia te ia. I uluaʻi aso o le faapotopotoga Kerisiano, sa sasaina o ia faatasi ma isi aposetolo ma poloaiina ina ia ʻaua neʻi toe talaʻi. O ā o latou uiga i ai.? “Ona ō lea o i latou nai luma o le fono, ua olioli ina ua taʻuaogaina i latou ia faaleagina ona o lona suafa.”—Galuega 5:41.
O lea, na tautala Peteru mai mea na oo ia te ia, atoa foi ma lalo o faagaeeina, ina ua ia faapea mai: “A e faapei ona tofusia o outou faatasi i tiga o Keriso, ia outou olioli ai, ina ia fiafia outou ma le olioli tele pe a faaalia mai lona mamalu. Afai e upuleagaina outou ona o le suafa o Keriso, amuia outou; auā o loo tumau ia te outou le Agaga mamalu o le Atua.”—1 Peteru 4:13, 14.
Ioe, o sauaga tuusaʻo e mafai foi ona avea o se ituaiga o aʻoaʻoina. I lalo o lenei faiga, e mafai ai e se Kerisiano ona aʻoaʻoina ia matuā saili atu ona faalagolago i le agaga o le Atua. O lona faatuatua e tupu aʻe ai se “(uiga) tofotofoina.” (1 Peteru 1:7) Ua aʻoaʻoina o ia i le loto tele e faavae i le mana o Ieova. (2 Timoteo 1:17) Ua ia atiina aʻe le tutumau i le onosai, ma ua ‘aʻoaʻoina ai o ia ia usiusitaʻi ona o mea sa tiga ai,’ e pei lava o Iesu.—Eperu 5:8; 1 Peteru 2:23, 24.
E Faaiʻuina e Ieova lo Tatou Aʻoaʻoina
E moni, o faafitauli faigata, e aofia ai ma sauaga, e tatau i se Kerisiano ona tumau ai, e le sau mai le Atua. Ua fautua mai Iakopo: “A faaosoosoina se tasi, aua le faapea, Ua faaosoosoina aʻu mai le Atua; auā e le mafai ona faaosoosoina o le Atua i mea leaga, e le faaosooso atu foi o ia i se tasi.” (Iakopo 1:13) Atonu e mapuna aʻe faafitauli mai le tele o mafuaaga, e aofia ma le pe a faia e tagata ni mea sese po o le faia o ni mea leaga ona o o latou lava manao. A e peitaʻi, talu ai ona e tutupu mea faapena, ua faaaogā ai e Ieova na mea e aʻoaʻoina ai ana auauna ia uiga tāua faa-Kerisiano.
O auauna uma lava a le Atua i aso o le Tusi Paia e aofia ai Iopu, Ieremia, Peteru, ma Paulo, sa aʻoaʻoina uma lava i lenei auala. O i tatou foi pe afai tatou te fesagai ma ni tulaga eseese faigata, e tatau ona tatou vaai i ai o le puna o aoaiga ua faatagaina e Ieova. E ala i lo tatou feagai ai ma i latou i le malosi o Ieova, o le a aʻoaʻoina ai i tatou ia usiusitaʻi, ia atamai, loto maulalo, loto tele, alofa, ia faapalepale, ma ia faataʻitaʻia le tele lava o isi uiga.—Faatusatusa le Iakopo 1:2-4.
Ua faalototeleina foi i tatou e iloa lenei tulaga o lo tatou aʻoaʻoina faapea, i se aso ona faamuta lea. O lea, na faamafanafana ai e Peteru ona uso a Kerisiano, i lona faapea mai: “A o le Atua e ona le alofa tunoa uma lava, o le na valaauina i tatou ia iu atu i lona manuia e faavavau o ia Keriso Iesu, pe a tigaina outou i nai aso, ia faaatoatoaina outou e ia lava, ia faatumauina, ia faamalosia ma ia faavaeina outou.” (1 Peteru 5:10) Ua faatatauina foi nei upu ma le malosi e tatau ai i le “motu o tagata e toatele” o loo vaavaai atu i luma i le ola e faavavau i le Parataiso i le lalolagi.
O lena manatu o le a fesoasoani ia i tatou ia gauaʻi ma le onosaʻi i nei mea e tutupu e aʻoaʻoina ai i tatou, ina ia tatou maumauaʻi ina ia le faagutugutulua. O lea, o le a tatou tofo ai i le moni o upu faaleiau a Paulo: “Aua neʻi tatou faapalapala i le amio lelei; auā o ona po e tatau ai tatou te selesele mai ai, pe afai tatou te le faavaivai.”—Kalatia 6:9.