Le Mafuaaga e Tatau ai ona E Naunau
‘NAUNAU i le ā? I le suiga sili lea o le a faia i le tala faasolopito o le fanau a tagata! O se pulega fou atoatoa o fausaga a le Atua lea ua toeitiiti nei ona pulea le lalolagi. (Tanielu 2:44) O lea pulega o le a aafia ai tane uma, fafine, ma tamaiti—pe mo le lelei po o le leaga. O lenei suiga ofoofogia o le a oo mai lea i le tupulaga e pei ona taʻua i le Mataio 24:34. O lea, o le feau e uiga i lena suiga e manaomia ai le naunau faamaoni ma le pulunaunau o tagata uma. O le mea moni lava, e sese pe a e faapea mai, ‘E leai soʻu naunau i ai.’
Pe a Faaalia e le Toatele se Lē Naunau
O ō tatou aso, ua lē o se uluai taimi lea na alagaina ai se feau tāua ma le faanatinati lea e tatau ona faatupu ai le naunau o i latou o ē na valaaulia e faalogo i ai. Sa faapena aso o Noa. Ona o uiga leaga o le tagata, amioga lē mamā, ma le sauā i lena vaitaimi, na fuafua ai e Ieova le Atua o le a faaumatia le fanau a tagata i se lolo faalekelope. (Kenese 6:5-7,13) A e peitai, a o ia leʻi gaoioi e faaumatia tagata faalematau, sa ia faatulagaina mo Noa, o lē talaʻi le amiotonu, ina ia lapataia i latou faatatau i le oo mai o le Lolo ma gaoioiga o auala e manaomia ona latou tausia ina ia faasaoolaina ai i latou. A e o le mea tāua e pei o le tāua o lea feau, o tagata lautele ia o ē sa faalogo i ai a e “na le iloa” foi e i latou. (Mataio 24:39; Luka 17:26,27; 2 Peteru 2:5) Sa leʻi i ai ni o latou lagona, sa faalotolotolua—sa leʻi naunau! Ona o lenei mea, na leiloa ai a latou mea uma.
E faapena moni lava le tulaga na i ai i aso o tagata sa nonofo i aai sa logologoā i le amio leaga o Sotoma ma Komoro. E ui lava sa lapataia e uiga i lo latou faaumatiaga o loo faaloloi mai ona o lo latou leaga tele, a e sa latou leʻi faalogo i ai. Sa leai foi so latou naunau i so o se tasi sa faalavelave i auala masani o ō latou olaga. Na o Lota lava le tagata na ese mai ai.—Kenese 18:20-30; 19:1-29; Luka 17:28-30
O lea, sa leʻi lauiloa le feau i tagata sa nofoia nei aai. Atonu sa sili ona latou manatu mamafa e uiga i manatu o ō latou tuaoi e faatatau ia i latou pe afai latou te faaalia le naunau. Pe atonu na latou fefefe ina neʻi o latou faia ni suiga i o latou olaga a e latou te lē o naunau i ai e faia. E foliga mai, sa latou olioli lava i o latou olaga saoloto e faia mea latou te loto i ai. (Iuta 7) O lea e oo lava i le aso na oo mai ai lo latou faaumatiaga, sa latou leʻi masalomia lava se mea e tasi o le a oo mai ma latou te leʻi iloa le mea o le a tupu.
I Latou sa Leʻi Naunau i Aso o Iesu
Ina o i ai le Alo o le Atua, o Iesu Keriso i luga o le lalolagi, na ia aauina atu ona soʻo e folafola le tala lelei e uiga i le pulega faalelagi a le Atua. (Mataio 10:7) O le mea moni, sa ia faatonuina ona soʻo i auala e tatau ona latou taulimaina ai lenei feau tāua ma e lē masani ai i fale taitasi ma o ā laasaga e faia pe afai e lē taulau ona faaalia mai e i latou e ona fale le naunau moni. Faalogo a o faagasolo lona aʻoaʻoina o ona soʻo: “A outou ulufale atu i se aiga, ia outou ofo alofa atu i ai. Pe afai foi ua tatau lea aiga, ia oo atu i ai la outou faamanuia; a e afai ua le tatau, ia toe foi mai ai ia te outou la outou faamanuia. Ai se le talia outou, pe le faalogo i a outou upu, a outou o atu nai lea fale po o lea aai, ia outou tūtū atu le eleele nai o outou vae.”—Mataio 10:12-14.
Matau na faatonu atu e Iesu i ona soʻo ina ia “tūtū atu le eleele nai o [latou] vae” pe a ō ese atu mai lea fale po o lea aai a e matuā lē faaalia lava se naunau fiafia moni i le Malo o Ieova. O le ā sa ia uiga i ai faatatau i lenei fautuaga? O le tūtū ese o eleele mai vae o se tasi e faaalia ai le lē tuuaʻia o le tiute tauave po o le lē faitauina i āuga o le a tigā ai lē ona le fale ona o le leai o se naunau i le feau a le Atua. Sa faaalia ai sa ō ese ma le filemu soʻo o Iesu ma tuua ai lena fale po o le aai i iʻuga o le a aumaia e le Atua mulimuli ane.
Ia Faaali le Naunau—E Tāua mo Lou Ola!
E fiafia e matauina faapea na faatusatusa e Iesu Keriso tali i o tatou aso ma na o aso o Noa, ma Sotoma ma Komoro. (Mataio 24:37-39; Luka 17:26-30) Sa taatele le faia o amioga lē mamā ma le sauā i aso o Noa ma i aso foi o Lota. O le mea moni, sa tiga ma faanoanoa le tagata amiotonu o Lota i lona vaavaai atu i amioga faalemataʻu ma le faaatuatuvale o tagata Sotoma ma Komoro.—2 Peteru 2:6-8.
Ae peitai, ina ua faasino atu e Iesu i aso o Noa ma aso o Lota, ua ia faataulaʻi atu ai o tatou manatu, e lē i amioga lē mamā ma le sauā i na aso, a e na i lo o lea, i mataupu o aso taitasi—o le aai, feinu, faaipoipo, tuuina atu i le faaipoipoga, faatau mai, faatau atu, fauina o fale, ma le totoina o faatoaga. Sa ia faaalia faapea e toatele o le a lē tali mai i le feau o le tala lelei o le Malo o le Atua, a e o le a mua ona pupū i mea o le olaga i aso fai soo ma o le a lē faaalia ai se naunau i mea ua fuafuaina e Ieova e fai. O le feau e tāua tele e mo le ola po o le oti. O le lē taulau ona faalogo o le a tele sona tau. O le lē utagia po o le faaalia o le leai o se naunau o se agasala mataʻutia tele lena.—Faatusatusa le Mataio 6:31, 32.
O le ā lona mataʻutia? Sa faaauau ona faamatala mai e Iesu: “I le Aso Faamasino, o le a faaalia e le Atua le tele o lona alofa tunoa i tagata o Sotoma ma Komoro na i lo o tagata o lena aai” o ē sa leʻi faalogo pe faaalia se naunau. (Mataio 10:15, Todayʻs English Version) Afai e faaalia e se tagata le naunau, faalogo, ma talitonu i le feau, e tusa lava pe sa amio leaga ma sauā, e mafai lava ona suia ona uiga faaletagata ma fiafia mai i ai Ieova e taʻuagavaaina e avea o se tagatanuu o le Malo, e pei ona sa faia e uluai Kerisiano i Korinito.—1 Korinito 6:9-11.
I ana talanoaga uma lava ma ona soʻo, sa uunaʻia ai i latou e Iesu Keriso ina ia faalogo, ia uaʻi atu, ia faaalia le naunau i le feau tāua o le Malo o le Atua. Ina ia faatupu le uaʻi mai o ē na sa ia talanoa atu i ai, na ia apoapoai atu: “Pe faapefea la outou faalogo.” O le ua i ai taliga e faalogo ai, ina faalogo mai ia o ia.” “Faalogo uma mai ia outou ia te au, ma ia outou lagona.” “Faalogo mai ia, ma ia outou lagona.”—Luka 8:18; Mareko 4:9; 7:14; Mataio 15:10.
O lea la, afai e toe asiasi atu se tasi o Molimau a Ieova i lou fale, o le a sili ona e maua aogā pe a e faapea atu: ‘Susū mai i totonu, ou te naunau e faalogo.’