Aiseā ua Sāga Onosai ai le Atua?
TAGAI atu i mata faanoanoa ma le mafatia o se tamaitiiti ua matelaina. Tagai i lona tino paeʻe ma lona manava īī. Seʻi manatu i lona matuā mafatia i le manao i se meaʻai, ma seʻi vaai atu i le ipu o loo umia e leai se mea o iai. Atonu ai o vaavaai atu i ai lona tinā ma ona mata ua oomo i totonu, ua faaalia mai ai i ona lava foliga mafatia le leai o se faamoemoe. Ona taumafai lea e aua e te faanoanoa—ioe, taumafai e aua e te tagi.
O lenei vaaiga e faitau miliona ona faia pea lava pea i totonu o le vaifanua e 2.3 miliona maila faatafafā ua taia i oge e lauiloa o Sahel. E taatia faalava i le sili atu i le 3,000 maila [4,800 km] i totonu o Aferika i le itu i saute o le Toafa o Sahara, mai Senegal i le Talafatai o le Atalani e oo atu i Aitiope i le Sami Ulaula. E moni, ua faamataʻuina foi e oge le anoanoai o tagata i isi atunuu. Ua lipotia mai e le World Health Organization faapea, e tusa ma le 1.1 afe miliona tagata i le lalolagi atoa ua matuā mamaʻi tigaina po ua maua i le maʻi paee ona o le leai o ni meaʻai paleni.
O le fiaʻai, o le mea moni ua na o se tasi lea vala o le mafatia o tagata. Ua faaoonaina e le tagata le lalolagi, ma ua aafia ai i tatou uma lava. O le faamaonia o le lē faamasinotonu o faiga faapolotiki ma faigā taua faapea ua aumaia ai puapuaga ma le oti i le toatele. Aiseā ua faataga ai e le Atua na mea? Po o manatu mai o ia ia i tatou?
O loo Manatu mai le Atua!
Ioe, o loo manatu mai Lē na Foafoaina i tatou ia i tatou. E tele faamaoniga o loo iai o lenei mea ma lona tomai e faia ai mea ina ia galulue faatasi mo lo tatou lelei, ma mo le ōgatasi ai o ana foafoaga uma lava. Mo se faataʻitaʻiga, seʻi vaai atu i le ata lena o se pī o loo asiasi atu i se fugalaau mātala i luga o se laau o iai ni ona fua. E faalagolago le pī i le fugalaau mo le mea suamalie na te manaomia mo se meaʻai. I le isi itu, o le laau o loo vaaia i inei e faalagolago atu i poleni o loo tauaveina e le tino o le pī mai se isi foi laau faapena. I lenei auala, ua faafeusuai ai le fugālaau ina ia tupu ai le fua. E lē o laau uma e ʻaina o latou fua e faafeusuai i lenei auala, ae mautinoa lava na faatulaga e le Atua mo se felagolagomai e lē masani ai i lenei itu. Ma ona o lona agalelei, ua iʻu ai ina maua le fua ina ia mafai ona tatou aai ai ma le fiafia ma aogā mo i tatou.
O le pī lava ia, o se vaega o se faamoegapī e sili atu i le 30,000 pī ua faamaopoopoina lelei. O nisi e leoleoina le faamoega, o isi latou te faamamāina le faamoega. A o isi latou te faaputuina le meli ma le poleni, fafaga le lāva, pe saili foi le mea e maua ai nisi meli fou. Ua faapena ona faatulaga e le Atua lava ia mea ina ia aogā mo i tatou e pei ona saunia e na pī le mea suamalie ma le meli e fai ma meaʻai e faafiafiaina ai la tatou tofo.
O le vavega o le felagolagomai i le va o pī ma laau, ma i le va o mea fetolofi lava latou, ua na o le tasi lea o faamaoniga mai le anoanoai o faamaoniga faapea, e matuā tomai ma lelei atoatoa lava Lē na Foafoaina Mea i le faia o meaola ia felagolagomai o le tasi i le isi. Ona o lena itu, ua avea ai le “Atua, e lē o le Atua o le lē maopoopo, ae o le filemu.” (1 Korinito 14:33, NW) Ae aiseā la ua ia faatagaina ai le fanau a tagata ia iai i lenei tulaga lē maopoopo, ma iʻu ai i le faanoanoa mo le toatele? Afai o manatu mai le Atua ia i tatou, aiseā ua ia sāga faatali umi ai mai le faasaʻoina o lenei tulaga? O le mea moni, aiseā ua sāga onosai ai le Atua?
O le Afioga a le Atua, le Tusi Paia, ua na taliina na fesili. Ua taʻu mai e lenei tusi ofoofogia ia i tatou faapea e iai se mafuaaga lelei ua sāga onosai ai Ieova le Atua. O le ā lena mafuaaga? Ma o le ā le umi o totoe mo le onosai o le Atua?
[Ē Ana le Ata i le itulau 2]
Cover photo: Frilet/Sipa