Pe E te Mulimuli i Faatonuga?

O SE tamā alofa o le a na faatonu lana fanau ina ia manuia ma fiafia o latou olaga pe a oo ina matutua. Ma o tamaiti o ē alolofa ma faaaloalo i o latou mātua o le a talia na faatonuga ona ua latou iloa e mo lo latou lava lelei. E faapena foi, lo tatou Tamā alofa faalelagi, o Ieova, ua na aumaia pea i ana auauna taʻiala, na e avatua ai ia i latou le manuia ma le olioli i o latou olaga. O le mea lea, e tāua lo tatou mulimuli i faatonuga ua aumaia e le Atua ia i tatou e ala i lana Afioga, le Tusi Paia, ma lana faalapotopotoga faalelalolagi.

I Totonu o le Aiga

E iai vaipanoa eseese ua aumaia ai ia i tatou faatonuga. O le tasi o totonu o le liʻo o le aiga. O le faaipoipoga ma le aiga o se amataga tauatua. Ua faapea mai le Tusi Paia na faafaaipoipoina e le Atua le uluai ulugalii ma fetalai atu ia i laua ina ia faia ni a la fanau. (Kenese 1:27, 28; 2:22-24) Ua saunia e Lē na Foafoaina Mea faatonuga mo tagata uma o le aiga e tusa ai ma tiute o tagata taitoatasi. Mo se faaaʻoaʻoga, o le tane ma o le tamā, o le ulu o le aiga, o lona uiga ua ia te ia le tiute tauave mo le saunia o faatonuga, meaʻai, lavalava, fale, le puipuiga, ma le aʻoaʻiga. O ia foi na te faia filifiliga tāua a le aiga. I le avea o se tane, e ao ona ia faaalia le magafagafa mo lana avā ma ia tuuina atu le faaaloalo ia te ia o se ipu e sili ona vaivai. (Efeso 5:22, 23; 1 Timoteo 5:8; 1 Peteru 3:7) O le avā e ao ona gauai atu i lana tane, faaalia le faaaloalo loloto ia te ia, ma ia avea o se fesoasoani, ma o se atoaga mo ia. Ua faasino mai foi e le Tusi Paia faapea o le fanau e tatau ona usiusitai i o latou mātua.—Kenese 2:18; Efeso 6:1-3; 1 Peteru 3:1, 2.

O le ā e tupu pe afai e lē amanaia nei faatonuga? E tupu le lē malilie ma le fefinauai pe afai e lē magafagafa tane mo a latou avā, ma pe a faaalia foi e avā le itiiti o le faaaloalo mo tulaga ulu o a latou tane. O le mea moni, o na mea ua faapogaia ai le malepelepe o le tele o faaipoipoga. O le lē usiusitai ma le fouvale o fanau ua aumaia ai le faanoanoaga tele i le tele o mātua. E masani foi, ona tuuaʻia tele mātua mo le lē tausia aʻe o a latou fanau i aʻoaʻiga saʻo ma i lea ua faatiga ai ia i latou.—Efeso 6:4.

E ui lava i le anoanoai o fautuaga eseese ua ofoina mai e tagata faufautua atamamai, tagata suesue o le mafaufau ma isi, i le pe faapefea ona feagai ma faafitauli i le aiga, ae leai lava se fautuaga e sili atu ona aogā na i lo faatonuga ua saunia i le Tusi Paia e Lē na Foafoaina le aiga. O le mulimuli i nei fautuaga e aumaia ai le fiafia moni ma le faamalieina.—Salamo 19:7-9.

I le Faapotopotoga

E ao ona tatou mulimuli i faatonuga na tuuina mai e le Ulu o le faapotopotoga Kerisiano, o Iesu Keriso, e ala i le vasega o “le auauna faamaoni ma le mafaufau,” o le auala tofia o fesootaiga a le faalapotopotoga a le Atua i inei i le lalolagi. (Mataio 24:45-47; Efeso 5:23) Ina ia maua le filemu ma le autasi i le faapotopotoga, e tatau i ona sui uma lava ona gaoioi ia ōgatasi ma le taʻiala ua tuuina mai. O se faataʻitaʻiga, o i latou o taʻimua i le aʻoaʻoina o le faapotopotoga ma i le fesoasoani atu i isi tagata, e manaomia ona pipii i taʻiala ua latou maua mai i le faalapotopotoga a Ieova. O lenei mea o le a saosaolaumea i le uigā o la latou galuega. O faatonuga o loo taʻua ai atonu i le pe faapefea ona auai i le galuega talaʻi, i le auala e feagai ai ma faafitauli i le faapotopotoga, pe faapefea ona avatu fautuaga ma faalaeiauga, pe faapefea ona faamafanafana i ē ua tigaina, ma isi mea faapena. E iai foi taʻiala i le pe faapefea ona sauniuni mo sauniga e faatonu ma atiina aʻe ai mo tagata uma lava o loo auai i le faapotopotoga Kerisiano.—Galuega 20:20; Roma 12:6-8; Kalatia 6:1; 1 Tesalonia 3:1-3.

E ao faapitoa lava i toeaina o le faapotopotoga, po o ovasia, ona faataatia se faaaʻoaʻoga lelei e tusa ai o lenei mea. E auina mai e le Vaega Pule faatonuga e ao i toeaina ona mulimuli ai ma le faaeteete ma le faamaoni. E ao ona latou pipii ma faatatau faatonuga i tulaga i totonu o le faapotopotoga. E tatau ona tatou manatua faapea o lē o loo taʻitaʻia le faapotopotoga Kerisiano o Iesu Keriso. Na te silafia lelei manaoga o faapotopotoga uma i le lalolagi aoao, ma ua ia saunia faalaeiauga ma fesoasoani manaomia. O le mea lea, e ao ai i toeaina ona lē faatalatu i le faatatauina o so o se taʻitaʻiga latou te maua mai i le faalapotopotoga faatiokarate a le Atua. O lenei mea o le a avea o se faaaʻoaʻoga lelei mo tagata uma i faapotopotoga taitasi ma o le a fesoasoani ia i latou ina ia autasi i latou lava ma faatasi ai ma le au uso Kerisiano uma i le lalolagi aoao.—Galuega 15:1-31; Eperu 13:7; Faaaliga 5:6.

Iʻuga e Olioli Ai

Pe a fausia e se kamuta se fale tele lava, e mulimuli o ia ma le faaeteete i ata a tagata tusiata ina ia tumau ai le mea o ia fauina. I aso o faiga sauā a o leʻi oo le Lolo, na faatonuina Noa ina ia fau se vaa. Na taʻu atu ia te ia pe faapefea ona fau le vaa ma po o ai tagata ma manu e aumaia i ai mo le faasaoina i le Lolo o loo sau. Na faapefea ona tali atu Noa? Ua fai mai le Tusi Paia: “Na faia foi e Noa e faapei ona poloai atu ai le Atua ia te ia i mea uma, sa faapea lava ona fai e ia.” Na o Noa ma i latou o ē na faatasi ma ia i le vaa na faasaoina i le Lolo. (Kenese 6:5, 13-22; 7:23) I aso nei, ua tatou ola ai i taimi e tutusa lelei lava ma aso o Noa, ma o le mafuaaga lenei o le a soloiesea ai e le Atua tagata amio leaga uma. Ua taʻu mai e le Tusi Paia ia i tatou laasaga e tatau ona tatou faia pe afai tatou te mananao ia iai faatasi ma ē faasaoina.—Mataio 24:37-39; 2 Peteru 3:5-7, 11.

O le mea lea, seʻi o tatou talia ai ma le agaga talisapaia ma faatinoina faatonuga ua tuuina mai e Ieova e ala i lana Afioga tusia ma i lana faalapotopotoga faalelalolagi. O le faia o lenei mea o le a aumaia ai le manuia ma le olioli ma o le a faasaoina ai foi o tatou ola.