Pe Moni ea o le Tusi Paia o se Meaalofa Mai le Atua?
“OU TE talitonu o le Tusi Paia o le meaalofa silisili lea ona lelei ua foaiina mai e le Atua i tagata.” O le faamatalaga lena a Abraham Lincoln, le peresitene lona sefuluono o le Iunaite Setete.a Sa lē na o ia ua talisapaia lenei tusi ua au tausagā.
Na taʻua e se tagata maualuga o Peretania o lē na soifua i lona 19 o senituri o William E. Gladstone e faapea: “Ua faailogaina le Tusi Paia faapea e iai sona Amataga Faapitoa, ma se eseesega lē ma faatusalia ua faaesea ai mai isi tusi uma lava.” E faapena foi manatu o se tagata maualuga i Amerika o lona 18 o senituri o Patrick Henry o le na faapea mai: “Ua sili ona aogā le Tusi Paia na i lo o isi tusi uma lava na lomia.” Ona o lona talisapaia o le Tusi Paia, na fai mai ai le emeperoa Falani o Napoleone Ponapate e faapea: “O le Tusi Paia, e lē na o se tusi e faatauvaa, ae o se Mea Faiola, e iai se mana e faatoilaloina ai mea uma e faasagatau atu i ai.”
Mo nisi, ua avea le Tusi Paia o se puna o fesoasoani ma faamafanafanaga mo i latou. Na taʻua e le taʻitaʻiau o le Autau Soofaatasi a Amerika e igoa ia Robert E. Lee e faapea: “I oʻu fememeai ma puapuaga uma, e leʻi mafai lava ona lē taulau le Tusi Paia i le aumaia ia te aʻu o le malamalama ma le malosi.” Ma ona o lona talisapaia o lenei tusi, na faapea mai ai le peresitene o le Iunaite Setete o John Quincy Adams: “E tele tausaga sa fai ai ma aʻu masani le faitauina o le Tusi Paia atoa e faatasi i tausaga uma.”
Afai ua tuuina mai e Lē Silisili ona Maualuga le Tusi Paia i le fanau a tagata, e ao la ona iai se faamaoniga faapea ua faagaeeina e le Atua. E ao ona sili atu na i lo o so o se isi lava tusi. Ma ina ia avea le Tusi Paia o se puna moni o le malosi ma faatonuga, e tatau la ona matuā maufaatuatuaina atoatoa. O lea la, o loo i ai pea le fesili, Pe moni ea o le Tusi Paia o se meaalofa mai le Atua? Seʻi sosoo ai la ona tatou sailia le tali i lena fesili.
[Faaopoopoga i lalo]
a O le mea moni, o loo i ai se meaalofa aupito sili atu ona lelei—o Iesu Keriso.—Ioane 3:16.
[Ata i le itulau 3]
William. E. Gladstone
[Ē Ana le Ata]
Ata a le U.S. National Archives
Abraham Lincoln
[Ē Ana le Ata]
Ata a le U.S. National Archives
Patrick Henry
[Ē Ana le Ata]
Harper’s U.S. History
Napoléon Bonaparte
[Ē Ana le Ata]
Tusia e E. Ronjat
John Quincy Adams
[Ē Ana le Ata]
Harper’s U.S. History
Robert E. Lee
[Ē Ana le Ata]
Ata a le U.S. National Archives