Talisapaiaina le Meaalofa Tautele o le Ola

LE OLA—maeu se mea e sili ona tāua ua maua! Ana aunoa ma le ola, e leai se mea e mafai ona tatou faia. Pe a mavae la le ola, e lē mafai lava e so o se auala faaletagata ona toe faafoisia mai. Pe a lamatia lo tatou ola, tatou te faia mea uma lava e mafaia ona o le manao ina ia faasaoina. Ioe, o nisi o le a oo lava ina saili atu mo se fesoasoani e sili atu ona malosi na i lo le tagata pe a oo i mafatiaga!

Ua faamanatu mai ai ia i tatou le faamatalaga a le Tusi Paia e uiga i se vaa na fetaiaʻi ma se afā matuā malosi lava i le sami. Ina ua tau malepe le vaa, “ona matatau ai lea o le auvaa, ma latou taitasi ma valaau i lona atua.” Mulimuli ane ona latou valaau faatasi uma lava lea i le Atua moni e toatasi: “Ieova e, aua neʻi fano i matou.” Ua faapea mai foi le faamatalaga a le Tusi Paia: “Ua latou lafo foi le oloa na i le vaa i le sami, e faamāmāina ai.”—Iona 1:4-6, 14; faatusatusa i le Galuega 27:18, 19.

Sa oo lava ina nofo sauni lena auvaa e faataulagaina a latou mea faitino faapelepele ona o le taumafai e faasaoina o latou ola. E mafai ona tatou toe maua nisi mea faitino—a o le ola, e lē mafai ona toe maua. Ma talu ai tatou te matuā faapelepele moni i o tatou ola, tatou te aloese ai mai mea mataʻutia. Tatou te fafaga, faalavalava, ma faapelepele i o tatou tino. Tatou te sailia togafitiga faafomaʻi pe a tatou mamaʻi.

Ae peitai, e sili atu mea o loo manaomia mai ia i tatou e le Foai Ola na i lo o le na ona mulimuli i auala o o tatou faalogona e puipuia ai i tatou. I lo mea uma lava, o le ola o se meaalofa e lē mafaatauina, ma ua foaiina mai e le Peresona aupito sili ona tāua i le vateatea aoao. Ona o le talisapaia faamaoni uma o Lē na foaiina mai faapea ma le meaalofa, pe e lē ao ai ea la ona tatou faapelepele i le ola? Ma pe e lē aofia ai ea i lena mea le manatu mamafa mo ola o isi?

O lea la, e lē tatau ona tatou ofo i lenei mea, ona o le Tulafono a Ieova le Atua na tuuina atu i le nuu o Isaraelu, sa aofia ai ma poloaiga sa fuafuaina ina ia puipuia ai ola ma le soifua malōlōina o isi. (Esoto 21:29; Teuteronome 22:8) E ao foi i Kerisiano i aso nei ona manatu mamafa faapena mo le saogalemu. Mo se faaaʻoaʻoga, afai e iai sau fanau laiti i lou fale, pe e te faatalalē i le faataatitia solo o mea laiti e pei o lopa o ʻula, pine faamau ofu, pine faamau ulu, e mafai ona maua e tamaiti—po o mea maamaai e pei o pine saulupo, nila suʻisuʻi ma isi mea e ono āfaina ai se tamaitiiti o loo taaloalo ai e aunoa ma le iloaina pe oo foi ina folo? Po o teu vailaau ma fualaau mataʻutia i se nofoaga e malupuipuia ina ia aua neʻi tagofia e tamaiti? Pe a masaa ni vai i luga o le fola, pe e te vave soloina ina ia puipuia le tupu mai ai o se faalavelave faafuaseʻi? Pe e te toe vave faafouina ni uaea eletise ua leaga i mea faaeletise o faaaogā i lou aiga? Po o ave e lē aunoa lau taavale e siaki, tausia ma toe faafou? O oe ea o se ave taavale e ave ma le faaeteete lau taavale? Afai e te talisapaia moni le tāua o le ola, o le a uunaia ai oe e faia laasaga uma ma le faaeteete ma le magafagafa i nei mea po o isi mea faapena.

E ui i lea, e faanoanoa lava ona ua oo ina faaaogāsese e nisi o latou lava ola. Mo se faaaʻoaʻoga, o ai i aso nei e lē o iloa faapea o le ulaula e lē lelei mo le soifua malōlōina? Ae e faitau miliona o loo faapologaina i lea masani, o loo faaleagaina o latou soifua malōlōina i taimi taitasi latou te mitiia ai le asu oona. O isi ua faaaogāsese vailaau, a o isi o le ʻava malosi, mo le faaleagaina ai o i latou lava. O le FFP [AIDS] o se faamaʻi fasioti tagata ona e leʻi iloa lava sona togafitiga. Ae e toatele lava e ono mafai ona aloese mai i le pisia ai i le faamaʻi pe ana latou teena feusuaiga lē mamā, isi ituaiga o vailaau faasāina, ma tuigā toto. Pagā se matuā lē talisapaia o le ola!—Roma 1:26, 27; 2 Korinito 7:1.

E Mafai ona Suia!

O i latou o ē talisapaia Lē Sili na Foafoaina i latou, o Ieova, ua iai se mafuaaga malosi e manatu ai i le ola o se mea e matuā tāua. O le ola, o lana meaalofa paia. O le mea lea, ua latou loto malilie ai e faia so o se suiga tatau e tausia ai le ola, o se meaalofa mai le Atua. Seʻi manatu i le mea na tupu ia Kwaku, o se faiaʻoga i Ghana. O sē e inutele i le ʻava malosi ma le leai o se mafaufau, ma sa ia faamaimau lona ola.

Ua toe manatua e Kwaku faapea: “Sa ou taumafai e faamalosia laʻu avā ina ia faaaloalo mai ia te aʻu, ma sa masani lava ona oo ai i ni fefinauaiga ma ni tauaifusuga aasa, ae maise lava pe a ou onā. Ona o le inu tele i le ʻava malosi, sa masani ai ona ou mativa sa leai ni aʻu tupe, ma sa lē taulau ai ona ou aumaia pea tupe e tausi ai le aiga. E pei ona malamalama i ai, sa matuā ita tele ai laʻu avā. Pe a leai ni aʻu tupe (ma e masani lava ona tupu o lenei mea), sa ou faia so o se mea ina ia lagolagoina ai pea laʻu amio. I se tasi taimi, sa matuiā lava le mea na ou oo i ai ma ou faaaogāina ai mo aʻu lava tupe na ou aoina mai tamaiti o laʻu vasega mo le lesitalaina o i latou mo se suega a tamaiti aʻoga. Sa faaauau pea laʻu masani o le soona inu ma sa ou faatauina foi ni fagu pia ma aʻu uō. Na oo mai le aso na ou maua ai le taui i laʻu mea na fai. Ana lē fesoasoani mai loʻu pule aʻoga, semanū e tuli ai aʻu ma laʻu galuega.

“Sa matuā leaga le tulaga o loʻu olaga. Sa ou lagona le masiasi, ae sa vave lava ona teʻa ma aʻu na mafaufauga. I lea, na amata ai loa ona oo mai ia te aʻu manatu faapea o le a ou pule i loʻu ola ona sa oo ia te aʻu le manatu ua leai soʻu aogā i le olaga. Ae sa tumau pea ona lē mafai ona ou saoloto mai le ʻava malosi. Ae i se tasi aso i le falepia, sa ou aafia ai i se misa a ni tagata onanā ma sa tui ai aʻu e se tasi i se naifi, sa oo mai le manatu tiga ia te aʻu faapea, e oo lava ina ou oti ai i se aso ona o loʻu fiafia i lenei mea o le ʻava malosi.

“I le faagasologa o na taimi uma, sa asiasi mai ai pea i lea taimi ma lea taimi Molimau a Ieova i lo matou aiga, e taumafai ina ia faatosina lo ma naunau i le Tusi Paia. Sa masani i maʻua ma laʻu avā ona taumafai e aloese mai ai ona sa ma manatu faapea o i latou o ni tagata faasoesa. O lea, i se tasi aso na ou filifili ai e faalogo ia i latou ona o loʻu alofa. O le faia o se suesuega faale-Tusi Paia na vave ai lava ona pupula oʻu mata i le faamoemoe ofoofogia o le ola e faavavau i le faiga fou a le Atua. O le tele o loʻu suesueina o le Tusi Paia faatasi ma le fesoasoani a Molimau a Ieova, o le loloto foi lea o le tupu o loʻu talisapaia mo Ieova lo tatou Foai Ola ma lana meaalofa o le ola, o le sili atu foi lea ona faafiafiaina ai o aʻu ona o le patino o le fautuaga a le Tusi Paia. O lenei mea na atili faalototeleina ai aʻu ina ia faamamā loʻu olaga. Sa lē faigofie lenei mea, a o faaauau pea ona ou taumafai e tetee atu i le ʻava malosi faapea foi ma aʻu uō. Sa silafia e Ieova o Lē faafofoga i tatalo le faanaunauga o loʻu loto ma faafofoga mai ai ia te aʻu.a

“O laʻu avā, e ui lava e lē o se tasi o Molimau a Ieova, ae ua ia faaeaina nei aʻu ma laʻu lotu i se tulaga sili ona maualuga ona o le faaliliuga sili ua ia matauina i loʻu olaga ma la ma faiā faalefaaipoipoga. Ua lē o toe manaomia ona ō mai o ma tuaoi e pupulu a ma misa ma laʻu avā. Ou te faapelepele i le filemu o le mafaufau ua ou olioli ai nei. E mautinoa lava, o le talisapaia o Ieova e avea o lo tatou Foai Ola, o le talia o lona finagalo e uiga i le matuā tautele o le ola, ma le usiusitai i ana poloaiga e faatatau i le auala e ola ai, ua na o lea le auala e aogā mo le ola.”

Le Folafolaga a le Atua mo le Ola e Faavavau

E faitau afe, e pei o Kwaku, na mauaina ni fesoasoani mai Molimau a Ieova ina ia “oofu . . . i le tagata fou ua faia e foliga i le Atua, i le amiotonu ma le amio lelei e faamaoni.” (Efeso 4:24) Ua latou talisapaia e lē gata i o latou olaga i le taimi nei ae faapea foi le faamoemoe o le ola e faavavau i se lalolagi parataiso. Ua folafola mai e le Tusi Paia faapea i lena Parataiso o le a faia e le Atua, o le a leai se tasi e mau ai i le lalolagi e toe oo i ni tiga matuitui o le fia ʻai, auā “e faia e Ieova o ʻau . . . mo nuu uma le faigaai o mea lelei.”—Isaia 25:6.

I le taimi nei, o le ola, e ui lava o se meaalofa ofoofogia, ae e mo na o sina taimi. O loo fesagaʻi tagata uma ma le oti, ma pagā se ta e ootia ai faalogona e iai le oti! I le vaavaai atu i le mou ese atu o sē e pele ia te oe mai tagata ola, ae ō i le tuugamau taaligoligoa, o se mea e matuā mafatia ai. Ae i lalo o le Malo o le Atua, e pulea e Keriso, o le a faataunuuina ai le folafolaga a Ieova: “E leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:4.

I lena taimi o le a faasalafa atu ai le meaalofa o le ola i se auala ofoofogia. O ē o le a faasaoina atu i le puapuaga tele faaiʻu i luga o lenei lalolagi, o le a maua le avanoa e ulu atu ai i le atoaga o le ola. Ma i lea, ona o le toe faafoisia o le ola e ala i le toetu, o le a toe faafoisia ai e Ieova le Atua lana meaalofa e lē mafaatauina o le ola ia i latou o loo momoe i le oti. (Ioane 5:24, 28, 29) O le uiga o lenei mea, o le toe faafoi mai lea o ē pele na maliliu, faapea ma tagata matataʻu i le Atua o aso ua mavae!

Po ua lelei nauā nei mea uma e faigata ai ona talitonuina? E leai, auā “e leai lava se mea e tasi e le mafaia e le Atua.”—Luka 1:37; faatusatusa i le Iopu 42:2.

E lē gata i lea, ua saunia e Ieova lava ia mo le fanau a tagata se faamaoniga faapea o nei mea uma lava o le a faia. Faapefea? E ala i le faataulagaina o lona Alo pele e toatasi o Iesu Keriso, e pele i lona finagalo, e togiolaina i tatou mai le agasala ma le oti. Ua faamautinoa mai i tatou e le Roma 8:32 e faapea: “O ia lava [Ieova le Atua] sa na le faasaoina lona lava Alo, a ua tuuina mai o ia e sui aʻi i tatou uma lava, e le foai fua mai ea e ia ia te i tatou mea uma lava faatasi ma ia i se a?” Ua taʻu mai e le Tusi Paia ia i tatou faapea e aofia ai i lenei mea le faamamāina o le fanau a tagata mai le amioleaga ma soloiesea so o se ituaiga o faamasinoga lē tonu uma, solitulafono, ma faiga sauā. (Isaia 11:9) E lē taitai ona toe manatu māmā i le ola o se mea taugofie.

E oo lava i le taimi nei, e mafai ona avea le ola o se mea e olioli ai e ui lava o loo tatou iai i lalo o tulaga lē lelei atoatoa. E iai ea se tasi e lē fiafia i le manogi sasala o meaʻai, le faalogoina o le savili mālū i se aso mafanafana, le vaai atu i se mauga telē, se la goto felanulanuai, se ālia tafe lemū, fugalaau felanulanuai e maofa ai, le leo o pesega mālie, po o le tausani mai o manufelelei? Seʻi faatali lava mo sina minute. Mafaufau, o le a faapeī le olioli e faavavau o le a maua i na mea?

Po o se mea tatau la le lafoaia o le faaeaga tautele o le ola e faavavau, ona o se fiafiaga mo sina taimi puupuu ua ofoina mai e ala lē mafaufau ma le manao tele o le olaga? (Faatusatusa i le Eperu 11:25.) Ua apoapoaia ma le atamai i tatou e le Tusi Paia ‘ina ia faaaogā taimi o totoe o lo tatou olaga e ola ai e lē mo tuʻinanau o tagata, a o le finagalo o le Atua.’ (1 Peteru 4:2) Matou te fiafia ina ia faalaeiau ia te oe, ioe, uunaia oe, ina ia faia faapea e ala i le suesueina o le Afioga a le Atua, le Tusi Paia, ma ia faatino i lou olaga mea ua e aʻoaʻoina. (Ioane 13:17) I lea, o le a e maua ai se faiā lelei ma Ieova, o le Atua ua tumu i mea lelei ma le alofa mutimutivale, o lē na te mafaia ona tauia oe i le ola e faavavau!

[Faaopoopoga i lalo]

[Ata i le itulau 5]

Po o faaalia i le auala o lou olaga e te talisapaia le ola?

[Ata i le itulau 7]

O le a faatagaina i tatou e le lalolagi fou a le Atua ina ia olioli i fiafiaga o le ola e faavavau!