Se Lalolagi e Sili atu ona Lelei—Pe ua na o se Miti?

ANA faapea o oe o se soʻo o Mazdaism e pei ona talaʻia e le perofeta Iran o Zoroaster, o lona uiga la o loo e faatalitali mo le aso o le a toe faafoisia ai le laueleele i lona matagofie sa iai i le amataga. Ana faapea sa e soifua i Eleni anamua, atonu la o e moe miti i le fia oo atu i le nuu matagofie o Motu o le Manuia, ia po o le fia vaai foi ua toe faafoisia le Vaitaimi Faaauro e pei ona faamatalaina e le tusisolo o Hesiod i lona valu o senituri T.L.M. E lē taumatea o loo sailia pea e se Initia Guaraní o Amerika i Saute le Nuu e Aunoa ma Mea Leaga. I le soifua ai i o tatou aso, atonu o e faamoemoe faapea o le a faaleleia le lalolagi ona o nisi o fuafuaga faapolotiki po o ni iuga o suesuega o le poto faasaienisi e uiga i le tagata ma lona siosiomaga.

O le Vaitaimi Faaauro, o Motu o Manuia, ma le Nuu e Aunoa ma Mea Leaga—o ni faaupuga ia mai le tele o isi faaupuga, na faaaogā e faamatala ai lea lava moomooga, le faamoemoe mo se lalolagi e sili atu ona lelei.

O lenei lalolagi, lo tatou lalolagi, o le mea moni, ua lē o se nofoaga lelei atoatoa. Ua faateleina soligatulafono sauā, taua e fasiotia ai e le tagata lava ia lona uso po o le tuafafine, i faiga sauā sa leʻi iloa muamua, le faaumatiaina o se vaega o lanu, ma atunuu, le lē manatu mamafa i mafatiaga o isi, le mativa ma le fia ʻai, le leai o ni galuega ma le lē autasi, faafitauli i le va o tagata ma meaola ma lo latou siosiomaga, faamaʻi ua lē mafai ona togafitia na o loo aafia ai le faitau miliona o tagata—e foliga mai e lē mafai ona muta le faasologa o auega. I le mafaufau i taua o loo tauina nei, na faapea mai ai se tusitala Italia: “O le fesili e masani ona tulai mai e faapea, pe e lē o le fetauai ea ua avea ma uunaiga malosi o faalogona i o tatou taimi.” Pe a mafaufau i lea tulaga, pe e te manatu o se mea tatau ona moomoo mo se isi mea e ese mai, se mea e sili atu ona lelei? Pe o sea faanaunauga mo se Nuu Matagofie (Utopia) ua na o se moomooga lē taunuu e pei o se miti? Po o tatou ola ea i se lalolagi e sili atu ona lelei na i lo o lalolagi uma ua mafai ona maua?

E lē o ni popolega fou nei. Mo le faitau senituri, sa moemiti ai tagata i se lalolagi o le a pulea i le sololelei, le faamasinotonu, le faatamaoaigaina, ma le alofa. I le faagasologa o taimi, na faamatala auiliili ai e ni tagata faifilosofia o latou manatu e uiga i ni Setete lelei atoatoa, ni lalolagi e sili atu ona lelei. Ae faanoanoa ai, ona e leʻi mafai lava ona latou faamatalaina mai po o le ā le auala e faagaoioia ai ma le manuia ia mea.

Po o aʻoaʻoina mai e lenei lisi ua leva o moomooga i Nuu Matagofie, ma faanaunauga o tagata mo se lalolagi e sili atu ona lelei, se mea ia i tatou?

[Ata i le itulau 3]

Po o le lalolagi ea lenei e sili atu ona lelei na i lo o lalolagi uma ua mafai ona maua?