Molimau a Ieova i le Lalolagi Aoao—Kolomepia

O KOLOMEPIA, o se atunuu e tulaga ese i Amerika i Saute. E siosiomia uma e le Vasa Atalani ma le Vasa Pasefika le talafatai o lenei atunuu e tele ai mauga mu. E fesuisuiai lava le tau, o le vevela o talafatai ma laufanua maulalalo o le teropika, e ese mai i le malūlū o tumutumu o Mauga o le Andes ua ufitia e le kiona.a

E ui e mataʻina Kolomepia i ona auro ma maataua, ae o tagata, o mea aupito sili ia ona tāua i le atunuu. I aso nei, ua faatumuina ai e Ieova lona fale faaleagaga i le mamalu. Ua gasolo atu i ai tagata tapuai manaomia ma matagofie, mai tuluʻiga uma o le lalolagi, e aofia ai ma Kolomepia.—Hakai 2:7.

Ua Maofa Pule o Pisinisi

I le Aso Sa, Novema 1, 1992, na faailogaina ai le faapaiaina o le ofisa o le lālā fou ma fale lomitusi o le Sosaiete o le Olo Matamata i Facatativá, e 26 maila [42 kilomitaa] i mātū i sisifo o Bogotá. O maimoaga sa faia i le lālā, sa matuā maofa ai tagata asiasi. Ina ua toe foi atu i lona fale faigaluega, i le mea e faigaluega ai, na uunaia ma le fiafia e se tagata sa asiasi atu lona pule ina ia ō atu e matamata i se faalapotopotoga e ‘matuā maofa ai ona o lona taulau manuia, maopoopo, ma e amio lelei ma faamaoni ona tagata faigaluega.’ I la latou maimoaga mulimuli ane, na faaalia e ē pule le matuā fiafia ma faia ai ni fesili se tele.

Sa mananao nei pule e aauina atu o latou pule lagolago, o ē vaavaaia galuega, ma fomeni—o le mea moni, o a latou tagata faigaluega uma lava—mo se matamataga. I vaiaso taitasi, sa faia ai sa latou faasologa e mai le 15 i le 25 tagata faigaluega mo le matamataga seia oo lava ina ō uma atu le aufaigaluega e 1,300 e maimoaina se faamaopoopoga ua faapea ona taulau manuia.

E faitau selau o a latou tagata faigaluega sa ō atu e maimoa i le lālā atoa, ma sa matamata ai i le ata vitiō Jehovah’s Witnesses—The Organization Behind the Name. Sa faafiafiaina i latou i le matuā telē o le faalapotopotoga ma le salalau atu o le galuega talaʻi o le Malo i le lalolagi aoao, sa maofa i latou i le maualuga o le tulaga o le poto i matatā eseese lea e faaaogāina i le faagaoioiga o le Sosaiete. Ina o le a toe foi atu, e toatele lava na faalogoina o faapea mai, e ia i latou se lagona e pei lava o le a ‘tuua le Parataiso ae toe foi atu i se lalolagi lē maopoopo.’

Ua Paʻia e le Upu Moni Ituaiga Uma o Tagata

Ua talaʻiina atu le tala lelei i tagata o ituaiga uma lava. (1 Timoteo 2:3, 4) Mo se faaaoaoga, o sē na uluai avea ma fatu pese ma taʻitaʻi o se faaili o le heavy-metal, na ia talia le upu moni o le Tusi Paia, faia suiga i lona olaga, ma e leʻi pine lava ae avea ma paeonia sauatoa. Mulimuli ane, sa tofia ai o ia e avea ma auauna o le faiva. E iai foi nisi sa avea ma sui o vaega sa taumafai e faatoilaloina faiga malo, ua aʻoaʻoina ina ia tuu atu lo latou mautinoa ma le faamoemoe i le Malo o Ieova. Ua faia nei ma le matuā tiotio so latou sao i le talaʻiina o le feau e uiga i se lalolagi fou filemu.

O tagata sa latou faaaogāina vailaau faasaina ma ē sa latou faatauina atu, ua liliu atu foi i latou i le upu moni. O se tasi tama talavou lea ua avea nei ma Molimau, sa ia faia se togalaau o laau faasaina ma faagaoioia se fale e gaosi ai le cocaine i le togavao mo le lima tausaga a o leʻi tuua e ia lena ituaiga o olaga. Ua fiafia o ia e aʻoaʻoina ma faatinoina mataupu silisili o le Tusi Paia. I se falepuipui na faagaeetia ai ni tagata na faasalaina i le fasioti tagata ona o se suesuega faamaoni na faia o le Tusi Paia, ma ua tatalo atu ma le naunautai ina ia faamagaloina e Ieova a latou agasala ma talia i latou e avea o ni ana auauna.

O lea, ua tali atu ai tagata o ituaiga uma i le feau o le Malo. I Kolomepia, e pei lava o isi nofoaga, ua faapena ona faatumuina ai e Ieova lona maota i le mamalu.

[Faaopoopoga i lalo]

[Pusa i le itulau 8]

O SE VAAIGA I LE ATUNUU

Tausaga Faaleauaunaga o le 1993

TUMUTUMUGA O Ē MOLIMAU ATU: 60,854

FAATATAUGA: 1 le Molimau i tagata e 558

Ē NA AUAI I LE FAAMANATUGA: 249,271

FAATATAUGA O PAEONIA: 8,487

FAATATAUGA O SUESUEGA FAALE-TUSI PAIA: 100,927

AOFAI O Ē NA PAPATISOINA: 5,183

AOFAI O FAAPOTOPOTOGA: 751

OFISA O LE LĀLĀ: FACATATIVÁ

[Ata i le itulau 9]

Tagata faigaluega i le ofisa o le lālā ma misionare i le 1956

[Ata i le itulau 9]

Vaaiga mai le ea i le ofisa o le lālā