Pe E te Manatua?

Pe o e manatunatu ma le faaeteete i lomiga talu ai nei o Le Olomatamata? Afai o lea, o le a e naunau la e toe manatua mea ia o loo mulimuli mai:

▫ O le ā le eseesega sili i le va o tagata ma manu?

O le eseesega sili e faaautū i le fausaga, le malosi ma gaoioiga a le faiʻai. I manu, e toetoe lava o gaoioiga uma, e faapolokalamaina, i le mea ua taʻua o le atamai faalenatura. Ae lē faapena tagata. Na foai mai e le Atua i tagata le tomai e faia ai le filifiliga saoloto. (Faataoto 30:24-28)—4/15, itulau 5.

▫ O le ā le vaega a pesega na faia i le tapuaiga a tagata Isaraelu i le malumalu?

O musika, ae maise lava i tagata pepese, na latou faia se vaega tāua i le tapuaiga, e lē ina ia tamau ai mea e sili ona tāua o le Tulafono, ae ia saunia ai le agaga saʻo mo le tapuaiga. Sa fesoasoani lea ia Isaraelu e tapuai ai ia Ieova i se auala faagaeeina. (1 Nofoaiga a Tupu 23:4, 5; 25:7)—5/1, itulau 10, 11.

▫ O le ā le ituaiga o tausiga e manaomia e tamaiti mai lava a o tama meamea?

I le taimi e fanau mai ai se pepe fou, e matuā tāua le uaʻi totoʻa atu i ai o mātua. Na tusi mai Pauro e faapea: “Talu foi ina o e tama itiiti ua e iloa Tusi Paia, e mafaia ona faapoto ai ia te oe e iu ai i le ola.” (2 Timoteo 3:15) O lea, o le tausiga faamātua na maua e Timoteo mai lava a o tama meamea, sa avea foi o se tausiga faaleagaga.—5/15, itulau 11.

▫ O ā auala e fa e faamaonia ai o loo iai i le Tusi Paia le feau a le Atua mo tagata uma lava?

(1) O le mafai ona maua. O loo maua le Tusi Paia e le 98 pasene o le faitau aofai o le lalolagi. (2) Talafaasolopito. Ua iai i le Tusi Paia mea moni o le talafaasolopito, na i lo o tala faaanamua e lē faamaonia. (3) Aogā. O ana poloaiga ma mataupu silisili ua faaauivi mai ai se auala o le olaga e aumaia ai aogā ia i latou o ē usiusitai i ai. (4) Valoaga. O se tusi ua faamatala auiliili mai ai mea o le a tutupu i le lumanai.—6/1, itulau 8, 9.

▫ O le ā le tiute tauave e ō faatasi ma le iloa o le lotu saʻo?

Pe a tatou iloaina loa le lotu saʻo, ua tatau loa ona fausia aʻe ai o tatou olaga. O se auala lea o le olaga. (Salamo 119:105; Isaia 2:3)—6/1, itulau 13.

▫ Aisea e matuā alagatatau ai ona faia se suesuega totino o le Tusi Paia?

O auauna uma lava a le Atua, e manaomia ona faafouina lo latou olioli ma le malosi mai lea aso i lea aso e ala i le mauaina o vala fou ma le loloto o upu moni o le Afioga a le Atua. O le auala lenei e tumau ai ona uunaia faaleagaga i latou.—6/15, itulau 8.

▫ O le ā le uiga o le upu “agasala” e pei ona faaaogā ai i le Tusi Paia?

I le uiga faaveape, o le upu Eperu ma le upu Eleni e masani ona faaaogā e le Tusi Paia e faailoa ai le upu “agasala” o le uiga ua “misia,” e tusa ua misia po ua lē ausia se sini, faailoga, po o se taulaiga. Na lē maua e le uluai ulugalii le mamalu o le Atua, ua misia ai e i laua le fuafuaga na faia ai i laua i le faatusa o le Atua. I se isi faaupuga, na la agasala. (Kenese 2:17; 3:6)—6/15, itulau 12.

▫ Aisea e matuā lē atamai ai le faitau i lomiga faaaposetate?

O nisi o lomiga a aposetate, o loo aumaia ai faamatalaga sese e ala i “upu faaneenee” ma “upu pepelo.” (Roma 16:17, 18; 2 Peteru 2:3) O tusitusiga uma faaaposetate, e na o le faitio ma lepetia ai. E leai lava se mea e atiina aʻe ai.—7/1, itulau 12.

▫ Pe sa avea Eleni ma tupuga o le faatemokalasi?

I Eleni anamua, na faia ai le faatemokalasi i na o ni nai aai o le setete, ma e oo lava i nei aai, e na o tane sa mafai ona palota. O le uiga o lenei mea, o le fa vaelima o tagata na faaleamanaia. Sa faigata lava ona avea o se pulega mo le lelei lautele po o le faatemokalasi!—7/1, itulau 16.

▫ O le ā e pogai ai ona manuia se faaipoipoga faa-Kerisiano?

Pe a faaaloalo le tane ma le avā i le silafaga a le Atua i noataga o le faaipoipoga ma taumafai e ola e tusa ai ma mataupu silisili o lana Afioga. (Efeso 5:21-33)—7/15, itulau 10.

▫ E mafai faapefea ona maua le olioli i lau suesuega faaleaiga?

Taumafai e faaaofia uma ai le fanau. Ia mautinoa ma ia atiina aʻe ai, ia faamalo atu ma le mafana i lau fanau ona o le faia o sa latou sao. Aua le tau ina fai o le mataupu, ae taumafai ia pāʻia loto o lau fanau.—7/15, itulau 18.

▫ O le ā ua faailoa mai e le faaupuga lea: “Pe a latou fai ane: ‘Ua filemu ma saogalemu!’” (1 Tesalonia 5:3, NW)

Ia mātau e lē o faapea mai le Tusi Paia, o le a ausia e atunuu le “filemu ma le saogalemu.” Ae o le a na ona latou talanoaina i se auala mataʻina, e faaalia ai se faamoemoega sili mo le lelei ma talitonuga sa leʻi faapea ona lagona ai muamua. O le avanoa i le mauaina o le filemu ma le saogalemu e foliga mai ua matuā latalata mai nai lo muamua.—8/1, itulau 6.

▫ Taʻu mai ni auala se tolu ua faaalia ai e Ieova lona agamalu.

Na faaalia e Ieova i lona nofo sauni e faamagalo. (Salamo 86:5) Sa finagalo malie o ia e suia se gaoioiga na ia fuafuaina ina ua tulai mai ni tulaga fou. (Tagaʻi i le Iona, mataupu e 3.) Na faaalia foi e Ieova lona agamalu i le faatinoina o le pule. (1 Tupu 22:19-22)—8/1, itulau 12-14.