Fesili Mai le Au Faitau

Ona o Iesu e tupuga mai i a Iese ma Tavita, aisea na taʻua ai o ia “o le aa” o ona tamā o Iese ma Tavita?

E masani lava ona e mafaufau i se aa o se laau, po o se laau totō e muamua ona oso mai lona aa na i lo o le tafuʻe po o lālā. O lea e foliga mai o Iese, (po o lona atalii o Tavita) atonu o loo tautala i ai e faapea o le aa na tupu mai ai mulimuli ane Iesu. Ae na valoia mai i le Isaia 11:10 e faapea, o le Mesia o le a afio mai, o le “Pogai o Iese,” ma ua faatatauina e le Roma 15:12 lenei valoaga ia Iesu Keriso. Mulimuli ane na taʻua ai o ia i le Faaaliga 5:5 “o le Leona o le itu aiga o Iuta, o le Aa o Tavita.” E iai mafuaaga mo nei faailoaga.

E masani ona faaaogā e le Tusi Paia se laau totō, ia po o se laau, e aumaia ai ni tala faatusa. I nisi taimi, o lenei mea e taulai atu i le mea moni e faapea, a o totogo se fatu ma tupu, e muamua lava ona tupu le aa na i lo o lālā, o isi o lālā, po o fua e taofiofia uma lava e aa. Mo se faaaoaoga, ua faitauina faapenei le Isaia 37:31: “O e totoe o le aiga o Iuta ua sao, e toe sosolo i lalo o latou aa, ma fua mai ni fua i luga.”—Iopu 14:8, 9; Isaia 14:29.

Afai e afaina le aa, e aafia ai le laau atoa. (Faatusatusa i le Mataio 3:10; 13:6.) Na tusia foi faapena e Malaki: “E susunuina foi i latou i le aso o le a oo mai, ua fetalai mai ai Ieova o ʻau; e le faatoeina ai mo i latou se aa po o se la laau.” (Malaki 4:1) E manino lava le uiga—e matuā aveesea atoatoa. O mātua, o (aa), o le a aveesea atoatoa, faapea ma a latou fanau, o (la laau).a Ua faatāuaina ai i lenei mea le tiute tauave a mātua i a latou fanau laiti o loo i lalo o la latou vaavaaiga; o le lumanai e faavavau o fanau laiti e mafai ona fuafuaina, i le tulaga o ō latou mātua i le silafaga a Ieova.—1 Korinito 7:14.

O le gagana o loo faaaogāina i le Isaia 37:31 ma le Malaki 4:1, ua aumaia le mea moni e faapea o lālā, (ma fua i isi lālā) latou te maua le ola mai i le aa. O le manatu autū lenei e maua ai le malamalamaga i le faapefea ona avea o Iesu ma “Pogai o Iese” ma le “Aa o Tavita.”

I se auala faaletino, o Iese ma Tavita o ni tuaā o Iesu; o i laua o aa, o ia o le tatupu po o le lālā. Na faapea mai le Isaia 11:1 e uiga i le afio mai o le Mesia: “Ae tupu mai le la laau i le pogai o Iese, e tupu ae foi le tatupu i ona aa.” E faapena foi i le Faaaliga 22:16, ua taʻua ai e Iesu ia lava “o le fanau a Tavita.” Ae ua faaupuina foi e ia o ia lava “o le Aa o Tavita.” Aisea?

I le tasi itu, o Iesu o le “Aa” o Iese ma Tavita ona e faapea, e ala ia te ia, o loo faaauau ai pea ona faatumauina lo la gafa. E leai se tagata i aso nei e mafai ona faamaonia e faapea o ia e mai le ituaiga o Levi, o Tanu, e oo lava ia Iuta, ae ua mafai ona tatou mautinoa, o loo faatumauina pea le gafa o Iese ma Tavita, auā o loo soifua nei Iesu i le lagi.—Mataio 1:1-16; Roma 6:9.

Ua maua foi e Iesu le tulaga o se Tupu faalelagi. (Luka 1:32, 33; 19:12, 15; 1 Korinito 15:25) O lenei tulaga ua iai se sootaga i lana faiā e oo lava i ona tupuaga. Na taʻua faavaloaga e Tavita i a Iesu o lona Alii.—Salamo 110:1; Galuega 2:34-36.

I le iuga, ua tuuina atu ia Iesu le pule e avea ai ma Faamasino. I le taimi o le Meleniuma i le lumanai, o le a faasalafa atu ai foi aogā o le togiola a Iesu ia Iese ma Tavita. O o la ola i le lalolagi i lea taimi, o le a faalagolago atu ia Iesu lē o le a auauna o lo la “Tamā o le Faavavau.”—Isaia 9:6.

Mulimuli ane, e ui lava ina tupuga mai Iesu i le gafa o Iese ma Tavita, ae o le tulaga ua i ai nei o ia, o le a taʻuagavaaina ai e taʻua “o le Pogai o Iese” ma “le Aa o Tavita.”

[Faaopoopoga i lalo]

[Ē Ana le Ata i le itulau 31]

Pictorial Archive (Near Eastern History) Est.