Molimau a Ieova i le Lalolagi Aoao—Nigeria

O NIGERIA, o loo i totonu o le taviʻo i le itu i lalo o le ʻosoʻoso i sisifo o Aferika. O loo taatia i le Vaifagaloa o Guinea, e i le itu i mātū o le ekueta, ma e sili atu i le 88 miliona tagata e aināina.a

Talu mai tausaga faaleauaunaga e lua ua mavae, na uaʻi faapitoa atu ai le ofisa o le lālā o le Sosaiete o le Olo Matamata i Nigeria, i le au talavou. Na faaalia i se sailiiliga na faia i faapotopotoga a Molimau a Ieova e faapea, e 80 pasene o i latou o ē na amata ona talaʻia le tala lelei i Nigeria i le vaitaimi o le 1992, sa i le va o le 10 ma le 20 tausaga le matutua. I a i latou na papatisoina i lena tausaga, o le 63 pasene e i le vaega lea lo latou matutua.

Talavou ua Auai i le Paeonia

E toatele tagata talavou ua auai i le galuega o le talaʻi faataimi atoa i le avea ma paeonia. Ua fai mai se paeonia e igoa i a Hannah: “Ina ua lata ina uma laʻu aʻoga, sa ou asiasi atu ai i a i latou na auai i le Aʻoga o le Auaunaga Faapaeonia, o inā na matou feiloai ai ma ni tuafāfine matutua se toalua. Sa ou faapea ifo, ‘Afai e mafai e le toalua lena ona paeonia, aisea ou te lē mafaia ai?’

“O lea, ina ua uma laʻu aʻoga, sa avea loa aʻu ma paeonia. Ina ua mavae le tolu masina mulimuli ane, sa ma feiloai ai ma Josephine e 26 ona tausaga, o sē e tapuai i le juju. Na ia faapea mai: ‘O Molimau a Ieova o ni tagata leaga. Tou te lē faamanatuina le Kirisimasi pe faaaogā tapui.’ Sa ou tali atu, afai na te faatagaina aʻu e faia sa ma suesuega faale-Tusi Paia, ona ia iloa ai lea o le mafuaaga matou te lē faia ai na mea. Sa ia valaaulia aʻu ina ia ou toe foi atu. E leʻi pine lava ae amata ona ia auai i sauniga, ma faia le tele o suiga i lona olaga. I a Tesema 1990 na papatisoina ai o ia. Talu mai Aokuso i le 1991, na avea ai Josephine ma paeonia. Ina ua auai o ia i le Aʻoga o le Auaunaga Faapaeonia i le tausaga ua mavae, sa ia faafeiloai atu aʻu i ana uo i le aʻoga e faapea o lona tinā faaleagaga!”

Le Vitio ma le Maota o le Malo

O se tasi o lipine vitio a le Sosaiete, na fesoasoani i se faapotopotoga laitiiti e maua ai le fanua mo se Maota o le Malo. I le sailia o se fanua e faatau, na ō atu ai ni uso se toʻafā i le Onojie, le pule i fanua faaleaganuu o lena vaipanoa. Na ia ofoina atu i a i latou se fasi fanua mo le 20,000 naira ($1,025, U.S.). Sa lē gafatia e le faapotopotoga lena tau, ona e na o le 17 le au talaʻi e faatupeina lea fuafuaga. Sa faapea mai le Onojie, o le a ia mafaufau mo se isi fanua.

I ni masina mulimuli ane, na asiasi atu ai se tasi o toeaina o le faapotopotoga i le fale o le Onojie. Sa matamata le Onojie i se lipine vitio na puʻe ai lona faauuga. Na faapea atu le toeaina: “E iai saʻu vitio ou te manao e te matamata ai. E faaigoaina: Jehovah’s Witnesses—The Organization Behind the Name.”

Mulimuli ane, na fesili atu le toeaina i le Onojie po o le ā sona manatu i le vitio. Na faapea atu le Onojie: “E faalima ona ou matamata i le ata.” Na faamanatu atu e le toeaina i le Onojie e uiga i Maota o le Malo na ia vaaia i le vitio, ma faamatala atu o se fale faapena lea e mananao la latou faapotopotoga e fau. Ona talosaga atu lea o le toeaina pe mafai e le faapotopotoga ona faatau se fanua e sosoo atu i le fasi fanua lea ua i a i latou. Na tali atu le Onojie e faapea: “O anapo ina ua uma ona ou matamata i le vitio, sa faapena foi le mea na ou mafaufau i ai.” O lea la, na ia fuaina atu ai le fanua e 20 futu (po o le 6 mita) le lautele e sosoo ma le fanua totino a le faapotopotoga. Na ia faapea atu: “E mafai ona ave ma outou le fanua lea. O le umi, e pule lava outou po o le ā le umi tou te manaomia. Ia sauni pepa faamaumau e faamaonia ai, ma o le a ou saini ai.”

[Faaopoopoga i lalo]

[Pusa i le itulau 9]

FAAMAUMAUGA O LE GALUEGA I LE ATUNUU

Tausaga Faaleauaunaga o le 1993

TUMUTUMUGA O Ē O MOLIMAU ATU: 174,582

FAATATAUGA: 1 le Molimau i le 507 tagata

Ē NA AUAI I LE FAAMANATUGA: 473,245

FAATATAUGA O PAEONIA: 19,777

FAATATAUGA O SUESUEGA FAALE-TUSI PAIA: 242,028

AOFAI O Ē NA PAPATISO: 8,888

AOFAIGA O FAAPOTOPOTOGA: 3,289

OFISA O LE LĀLĀ: BENIN CITY, EDO STATE