Le Pusa Meaʻai na Auala atu ai se Molimau

I NI nai aso ina ua mavae le mafuie i Kobe, i Iapani, ia Ianuari na teʻa nei, sa faigata mo tagata o le vaipanoa lea na afaina ona maua ni meaʻai. Ae na faaauau pea e Molimau a Ieova i inā ona maua mea manaomia, e faafetaia ai i le lagolagosua ma le agalelei o o latou uso. I uluai aso e lua pe tolu ina ua mavae le mafuie, na kukaina ai ma auina atu araisa e faapotopotoga lalata ane. E lei umi, ae auina atu e le au uso loto foai ni pusa o loo iai meaʻai. Na faapipii atu i nei pusa meaʻai le tele o tusi e taʻu atu ai lagona o manatunatuga mamafa mo i latou na afaina. Na taʻua e ē na mauaina meaʻai e faapea, na “faamasimaina e loimata” meaʻai uma ona sa lē mafai ona taofia o latou loimata a o faitauina tusi na avatu.

Na tufatufa atu e Molimau a Ieova a latou meaʻai i isi o ē sa fia aai. O se tasi Molimau sa fai lana tausamiga a o malaga faatasi o ia i se taavale ma se tagata e lē o se Molimau, ae la te faigaluega faatasi. Ona ia vaeluaina lea i ai o se tasi o pusa meaʻai na ia mauaina.

“O fea na faatau ai lau pusa meaʻai?” o le fesili lea a le tamaloa. Na faamatala atu e le uso le galuega laveai a Molimau. “Ua leva aso ou te lei toe ʻai i ni fualaau ʻaina. Seʻi faatotoe ni nai mea ia e ave mo loʻu aiga,” o le tala faafetai lea a le tamaloa.

O le faatolu ona tupu o lenei mea, na tuuina atu ai e lenei tagata tupe Iapani e 3,000 yen (e tusa ma le $35 Amerika) i le Molimau ma faapea atu: “Ua ou masani ma le tou galuega, o lea faamolemole seʻi tuuina atu laʻu foai mo le tou galuega. Ou te talisapaia le tofusia faatasi ma oe i lau tausiga. O le mea moni, o au uo uma o ni tagata alolofa.”