Faamafanafanaga mo i Latou o Loo “Loto Faanoanoa”

I ASO nei, ua “le lagona se mea” e le lalolagi a Satani. (Efeso 4:19; 1 Ioane 5:19) Ua matuā taatele le mulilua ma le faitaaga. I le tele o atunuu, o le 50 pasene po o le sili atu foi o faaipoipoga ua iu ina tatalaina. Ua taatele le taliaina o faiga faatauatane. O le faaleagaina i faiga sauā tau feusuaiga—tosoina faamalosi o tama ma teine (rape)—ua masani ona aumaia i tala fou o mea tutupu. O ata ma tusi o faiga lē mamā tau feusuaiga o se pisinisi ua piliona tālā tupe e maua mai ai.—Roma 1:26, 27.

O se tasi o ia faiga pito i sili ona matagā, o le faaleagaina i feusuaiga o nai fanau iti. E pei lava o le poto o le lalolagi a Satani, o le faaleagaina i feusuaiga o se tamaitiiti, o se faiga “faamanu, e faatemoni.” (Iakopo 3:15, NW) I le Iunaite Setete lava ia, ua fai mai ai le mekasini o le Time, “e silia i le 400,000 lipoti faamaonia o faiga leaga tau feusuaiga ua faamaumauina e le malo i tausaga taitasi, e faia e faiaʻoga ma fomaʻi.” Pe a avea nei tamaiti ua faaleagaina ma tagata matutua, o le toatele e iai pea lava lagona tiga, ma o na manuʻa o ni lagona moni lava! Ua fai mai le Tusi Paia: “O le loto [manatunatuga, faalogona loloto ma mafaufauga] o le tagata, na te faatoatoa ai lona maʻi; a o le loto faanoanoa [ua manuʻa, ua afaina], o ai se na te lavā onosai?”—Faataoto 18:14.

O le tala lelei o le Malo o le Atua o se mea e lelei i so o se ituaiga o tagata, e aofia ai “e loto momomo” ma i latou o loo “loto faavaivai.” (Isaia 61:1-4) E lē o se mea la e ofo ai le toatele o i latou o loo tiga o latou faalogona ua tali mai i le valaaulia e faapea: “O lē fia inu, ina sau ia, atoa ma lē manao i ai, ina ave fua ia le vai o le ola.” (Faaaliga 22:17) O le faapotopotoga Kerisiano e mafai ona avea ma nofoaga o faamafanafanaga mo i latou ia. Ua latou olioli i le iloaina, o puapuaga, o le a lē pine ae avea ma mea muamua ua mavae atu. (Isaia 65:17) Ae a o lei oo i lena taimi, e manaomia ona ‘faamafanafanaina’ i latou ma ‘fusifusia’ o latou manuʻa. Na talafeagai lelei ai ona fautuaina e Paulo ia Kerisiano e faapea: “Ia faamafanafana i e loto iti, ia fesoasoani i e o vaivai, ia outou onosai i tagata uma lava.”—1 Tesalonia 5:14.

“Manatunatuga Ufiufitia”

I ni tausaga talu ai nei, na “loto momomo” ai nisi i ni mafuaaga e faigata ona malamalama i ai isi. O i latou o ni tagata matutua, ae e faavae mai i le mea ua taʻua o “manatunatuga ufiufitia,” ua fai mai ai na faaleagaina tau feusuaiga i latou a o laiti.a O nisi, e lei mafaufau lava a mea na faaleagaina i latou, ae teʻi ua toe oo moni i ai ni mafaufauga o se mea na tupu ma “manatunatuga” i se tagata (po o ni tagata) na faaleagaina i latou a o laiti. Po o iai nisi i le faapotopotoga Kerisiano ua oo i ai ia mafaufauga e faapopoleina ai? Ioe, i nisi o atunuu o loo iai, ma o nei tagata tuuina atu ua oo i ai faalogona loloto o le loto tiga, ita, nofosala, mā, po o le tuua toatasi. I le pei o Tavita, ua latou lagona ai le matuā mamao ese mai le Atua ma fetagisi atu ai: “Ieova e, se a le mea e te tūtūmamao ai, ma e liliu ese ai i ona po e i ai le puapuaga?”—Salamo 10:1.

O le tele o vala o nei “manatunatuga” e lē o malamalama lelei i ai fomai popoto tau le soifua mālōlōina o le mafaufau. Ae ui i lea, o ia “manatunatuga” ua mafai ona aafia ai le tulaga faaleagaga o Kerisiano tuuina atu. O lea, tatou te vaai atu ai la ma le mautinoa i le Afioga a le Atua mo le taʻitaʻiga i le faafoeina o ia “manatunatuga.” Ua aumaia e le Tusi Paia “le loto matala i mea uma.” (2 Timoteo 2:7; 3:16) Ua fesoasoani foi ia i latou uma o aafia ai ia tuu atu le faatuatua ia Ieova, “o le Tamā e ona le alofa mutimuti vale, o le Atua foi e ana le faamafanafanaga uma; o le na te faamafanafanaina mai ia te i matou i lo matou puapuaga uma lava.”—2 Korinito 1:3, 4.

Pe na Tupu Moni Lava se Faaleagaina Tau Feusuaiga?

I le lalolagi, o loo tele ai le fefinauai po o ā ia “manatunatuga” ma le tele e iloa mai ai mea moni lava na tutupu. O Molimau a Ieova e “le ni o le lalolagi,” ma e leai sa latou vaega i ia fefinauaiga. (Ioane 17:16) E tusa ai i lipoti ua lomia, ua faamaonia ai i nisi taimi le saʻo o ni “manatunatuga.” O se faaaoaoga, ina ua “manatua” e Frank Fitzpatrick o lē na te suesueina mataupu tau inisiua, le faaleagaina o ia e se tasi patele, e toeitiiti selau isi na ō mai loa ma taʻua le faaleagaina foi o i latou e le patele lava lea. E tusa ai i lipoti, na faamaonia le faia e le patele o le faaleagaina.

Ae peitai, o se mea mataina se aofaiga o tagata taitoatasi na lei mafai ona latou faamaonia maia o latou “manatunatuga.” O nisi e afaina ai i lenei auala ua toe manatuaina moni i o latou mafaufau se tasi patino na faia se faaleagaina po o se faaleagaina na faia i se nofoaga faapitoa. E ui i lea, ua faamanino mulimuli mai le faamaoniga, e faapea o nei mea ua “manatua” e lē moni.

Saunia se Mapusaga

E ui lava i lea, e mafai faapefea ona avatua se faamafanafanaga ia i latou ua oo i ai se “loto faanoanoa” ona o ia “manatunatuga”? Ia manatua le faataoto a Iesu i le tuaoi Samaria. Na osofaia se tamaloa e le au faomea, sasaina o ia ma avea uma ana mea totino. Ina ua alu atu le tagata Samaria, na ootia lona loto i le tamaloa na manuʻa. O le ā na ia faia? Pe na mua ona ia fia faalogo atu ia maua uma auiliiliga o le fasiga? Po o le mea na maua mai e le Samaria se faamatalaga o foliga o le au faomea ma tuliloa atu loa ia i latou? E leai. Na manuʻa le tamaloa! O lea, na fusifusia lelei ai e le Samaria ona manuʻa ma aveina ma le alofa o ia i le faletalimalo e latalata ane e mapu i ai, lea na toe faafoisia ai lona malosi.—Luka 10:30-37.

O le mea moni, e iai le eseesega i le manuʻa moni o le tino ma se “loto faanoanoa” e māfua mai i le faaleagaina moni tau feusuaiga a o tamaitiiti. Ae o ia manuʻa uma e lua, e matuā ogaoga tiga e puna mai ai. O lea la, o le mea sa faia e le Samaria mo le Iutaia na manuʻa, ua faaalia mai ai le mea e mafai foi ona faia e fesoasoani ai i se uso Kerisiano ua aafia. O le fesoasoani muamua lava o le avatua o le faamafanafanaga alofa ma fesoasoani ia toe faafoisia lona tulaga malosi.

Sa faamanuʻaliaina le tagata faatuatua o Iopu e le Tiapolo, e foliga mai sa ia faia ma le mautinoa a lē o tiga tau i faalogona po o tiga o le tino o le a faaleagaina ai lona faamaoni. (Iopu 1:11; 2:5) Talu mai lava lena taimi, ua taumafai ai pea Satani e faaaogā puapuaga—pe na te faamafuaina mai tuusaʻo pe leai—ina ia faavaivaia ai le faatuatua o auauna a le Atua. (Faatusatusa i le 2 Korinito 12:7-9.) Pe e mafai la ona tatou masalomia le faaaogaina e le Tiapolo o le faaleagaina o tamaiti ma le “loto momomo” o le toatele o tagata matutua ua puapuagatia ai i lenei mea (po o le faapopoleina i “manatunatuga” o le aafia ai), e taumafai e faavaivaia ai le faatuatua o Kerisiano? I le pei o Iesu ina ua osofaia e Satani, e mafai ai ona fai atu se Kerisiano o tigaina ai ae o loo matuā musu e tuua lona faamaoni: “Ina alu ese ia oe Satani.”—Mataio 4:10.

Ia Tumau i le Malosi Faaleagaga

Ua lomiaina e “le auauna faamaoni ma le mafaufau,” ia faamatalaga e fesoasoani i le taulimaina o manuʻa faaleagaga ma tau i faalogona ua māfua mai i le faaleagaina a o tamaitiiti. (Mataio 24:45-47) Ua faaalia mai e mea tutupu e faapea e maua e lē o tigaina le fesoasoani pe afai e faalagolago i le ‘mana o le Alii ma le malosi silisili o lona mana,’ e ofuina ai le “ofutau atoatoa mai le Atua.” (Efeso 6:10-17) O lenei ofutau e aofia ai le ‘upu moni,’ o le Tusi Paia, lea e faaalialia mai ai Satani o se matuā fili leaga lava ua na faasalalauina le pogisa lea e galulue ai ma ana ʻau. (Ioane 3:19) Ona iai lea ma le “ufifatafata o le amiotonu.” O le tagata ua aafia e tatau ona tauivi ina ia pipii mau atu i tulaga amiotonu. O se faataʻitaʻiga, o nisi ua iai se uunaiga malosi ina ia latou faaleagaina i latou lava pe faia amioga lē mamā. O taimi uma lava latou te teteeina ai ia uunaiga, ua latou manumalo i se manumalo tele!

Ua aofia ai foi i le ofutau faaleagaga “le tala lelei o le filemu.” O le talanoa i isi e uiga i fuafuaga a Ieova e faamalosia ai le tagata o talanoa faapea foi ma so o se tasi o faalogologo i ai. (1 Timoteo 4:16) Afai o oe lea e “loto faanoanoa,” o loo faafaigata ia te oe ona talanoa e uiga i le tala lelei, taumafai e ō faatasi ma se isi Kerisiano a o ia faia lenei galuega tāua. Ma ia aua neʻi galo “le talipupuni [“tele,” NW] o le faatuatua.” Ia faatuatua e alofa Ieova ia te oe ma o le a ia toe faafoisia mai au mea uma ua leiloa. Ia matuā talitonu e aunoa ma le masalosalo e alofa foi Iesu ia te oe, ma na ia faamaonia maia lenei mea i lona oti e sui aʻi oe. (Ioane 3:16) E masani lava ona tuuaʻia sese e Satani faapea e lē o ano mai Ieova i ana auauna. O se tasi lena o ana pepelo matautia ma le fasioti tagata.—Ioane 8:44; faatusatusa i le Iopu 4:1, 15-18; 42:10-15.

Afai e faafaigata e lou loto tiga ona e talitonu ai o loo manatu mai Ieova ia te oe, o le a fesoasoani la lou auaufaatasi atu i isi o loo talitonu maumaututū o loo manatu mai o ia. (Salamo 119:107, 111; Faataoto 18:1; Eperu 10:23-25) Ia aua lava neʻi e faatagaina Satani e aveesea mai ia te oe le meaalofa o le ola. Ia manatua, o “le puloutau o le faaolataga” o le vaega o le ofutau; e faapena foi “le pelu a le Agaga.” Na faagaeeina le Tusi Paia e le agaga paia, lea e lē mafai e Satani ona faatoilaloina. (2 Timoteo 3:16; Eperu 4:12) O ana upu e mālōlō ai e mafai ona faamālūina ai faalogona tiga.—Faatusatusa i le Salamo 107:20; 2 Korinito 10:4, 5.

O le mea mulimuli e fai, ia e tatalo faatauanau e lē aunoa mo le malosi ia tumau ai. (Roma 12:12; Efeso 6:18) O le tatalo ma le loto atoa na faatumauina ai Iesu a o feagai ma faalogona tiga matuitui, ma e mafai foi ona fesoasoani ai ia te oe. (Luka 22:41-43) Pe e faigata ea ona e tatalo? Fai atu i isi ina ia tatalo faatasi ma oe po o le tatalo foi mo oe. (Kolose 1:3; Iakopo 5:14) O le a lagolagoina e le agaga paia au tatalo. (Faatusatusa i le Roma 8:26, 27.) E pei lava ona iai se maʻi tiga faaletino, o nisi o loo iai manuʻaga tiga tau faalogona atonu o le a lē faaleleia atoatoa i lenei faiga o mea. Ae peitai i le fesoasoani mai a Ieova, e mafai ai ona tatou onosai, ma o le onosai o le manumalo aʻiaʻi lea, e pei ona sa iai i le tulaga o Iesu. (Ioane 16:33) “Le nuu e, ia outou faatuatua ia [Ieova] i aso uma; ia outou momoli atu o outou loto i ona luma; o lo tatou malu o le Atua lea.”—Salamo 62:8.

Ae Faapefea Lē e Faapea na ia Faia le Faaleagaina?

O se tagata ua ia faaleagaina moni i faiga faaleituaiga se tamaitiiti, o le tosoteine po o le tosotama moni lava lea, ma e tatau ai ona taʻua faapea. O so o se tasi ua faaleagaina ai i lea faiga e iai lana aiā e mōlia ai lē na ia faaleagaina o ia. Ae ui i lea, o se moliaga e lē tatau ona faavavevavea pe afai o le faaleagaina na tele ina māfua mai i “manatunatuga ufiufitia.” I lenei tulaga, o le mea pito sili ona tāua o le tagata o loo tigā ai ina ia toe faafoisia le tulaga lelei e masani ai o ona faalogona. I le mavae atu o se vaitaimi, ona mafai lea ona toe oo o ia i se tulaga sili atu ona lelei e toe mafaufau ai i “manatunatuga” ma filifili ai, pe afai o iai ni manatunatuga faapea, po o le ā e manao o ia e faia i ai.

Seʻi manatunatu i le mea na tupu ia Donna. Na lipotia mai sa iai se faafitauli i le auala na ʻai ai o ia ma sa alu ai i se faufautua—e foliga mai o se tasi o fomaʻi e lē faamoemoeina. E lei umi ae tuuaʻia loa e Donna lona tamā i le faamalosia o ia e faia feusuaiga ma sa ave ai lona tamā i le faamasinoga. Sa lei faamaonia le moliaga ma sa lei faafalepuipui ai le tamā, ae sa ia totogia le $100,000 mo le faamasinoga. Mulimuli ane ina ua mavae na mea uma, ae taʻu atu loa e Donna i ona mātua sa lei faaleagaina moni o ia!

Na taʻua ma le poto e Solomona e faapea: “Aua neʻi e alu faataalise e fai le finauga.” (Faataoto 25:8) Afai e iai se mafuaaga tatau e masalomia ai le tagata moni faapea na faia le faaleagaina lea o loo ia faaleagaina pea tamaiti, e tatau ai la ona avatua se lapataiga. E mafai e toeaina o le faapotopotoga ona fesoasoani atu i sea tulaga. Ae i le isi itu, aua e te soona natinati. Atonu e oo mai lava le taimi e te faapea ai e sili pe a tuu lea mataupu. Ae afai, o e manao pea e faafesagaia le tagata moni lea e faapea na faaleagaina oe (ina ua uma ona e fetuutuunaia muamua ou faalogona e uiga i tali e ono aumai), e iai le aiā ia te oe e faia ai faapea.

I le faagasologa o le taimi o tau faalelei ai faalogona o se tasi o iai “manatunatuga,” e ono mapuna aʻe ai tulaga faigata. O se faaaoaoga, e ono toe tulai mai ai i mafaufauga o se tasi le faaleagaina o ia e se tagata o ia vaai i ai i aso uma lava. E leai ni tulafono o faataatitia mai mo le taulimaina o lea tulaga. “E taitasi ma ave i lana lava avega.” (Kalatia 6:5) I nisi taimi atonu e manatu ai se tasi faapea o loo aafia ai se tauaiga po o se sui o lona lava aiga e latalata atu ia te ia. Ia manatua le uiga masani lē saʻo o nisi o “manatunatuga ufiufitia” pe a oo ina faailoaina atu se tasi o masalosalo i ai na faia le faaleagaina. I sea tulaga, a o tumau pea ona iai le mataupu i se tulaga e lē o iloa moni le tonu, o le fesootai pea ma le aiga—i asiasiga faifaipea, tusi, po o le telefoni—o le a faaalia mai ai o loo taumafai lena tagata e mulimuli i se ala faale-Tusi Paia.—Faatusatusa i le Efeso 6:1-3.

O le ā e Mafai ona Faia e Toeaina?

Afai ua oo atu i toeaina se sui o le faapotopotoga o loo tupu ai le toe mafaufau i taimi ua teʻa po o “manatunatuga ufiufitia” o le faaleagaina a o laitiiti, e toalua toeaina e masani ona tofia e fesoasoani atu i ai. E tatau i nei toeaina ona faalaeiau atu ma le alofa i lē ua afaina ia taulai lona manatu i le taimi nei mo le faaleleia o ona faalogona tiga. O igoa o nisi ua “manatua” na faia le faaleagaina e tatau ona matuā puipuia mai le faailoaina.

O le matafaioi autū lava a toeaina o le gaoioi o ni leoleo mamoe. (Isaia 32:1, 2; 1 Peteru 5:2, 3) E tatau ai lava ona latou faaeteete ina ia “oofu [i latou] i le alofa mutimuti vale, ma le agalelei, ma le loto maulalo, ma le agamalu, ma le onosai.” (Kolose 3:12) Ia faalogologo atu i latou i se auala agalelei ma faaoo atu upu e mālōlō ai mai le Tusi Paia. (Faataoto 12:18) O nisi tagata ua afaina i “manatunatuga” tiga, ua faaalia mai lo latou agaga talisapaia mo toeaina na asiasi atu e lē aunoa pe telefoni atu e siaki po o ā mai i latou. O ia fesootaiga e lē tau alu ai se taimi tele, ae faaalia ai le manatu mamafa mai o le faalapotopotoga a Ieova. Pe a iloaina e lē ua afaina le alofa moni o ona uso Kerisiano ia te ia, e ono fesoasoani lea ia te ia e toe fetuutuunai ma toe paleni ai ona faalogona.

Ae faapefea pe afai ua manao lē o loo puapuagatia e fai se moliaga?b Ona fautuaina lea o ia e toeaina e toalua e faapea, i le ogatusa ai ma le mataupu silisili i le Mataio 18:15, e tatau ia te ia ona alu atu muamua i lē ua tuuaʻia tau o i laua, ma talanoaina le mataupu. Afai e mā lē ua tuuaʻia e talanoa faafesagai i lenei mea, e mafai la ona faia i le telefoni po o le tusiaina o se tusi. I lenei auala, e avatu ai i lē ua tuuaʻia le avanoa e faia ai sana faamatalaga i luma o Ieova i lana tali atu i le tuuaʻiga. Atonu e mafai lava ona ia aumaia faamaoniga e iloa ai na te lei faia le faaleagaina. Pe atonu foi e taʻutino mai e lē ua tuuaʻia lana agasala, ma faia ai se faaleleiga. E maeu se faamanuiaga o le a iai lena mea! Pe afai e faia se taʻutinoga, ona tauaaoina atili lea e toeaina e toalua ia mataupu, ia laugatasia ma mataupu silisili faale-Tusi Paia.

Afai ua faafitia le tuuaʻiga, e tatau i toeaina ona faamalamalama atu i lē ua faia le tuuaʻiga ia lē toe faia lava se isi auala faalefaamasinoga i lenei mataupu. Ma o le a faaauau ona avea o se tagata mamā lē ua tuuaʻia i le vaaiga a le faapotopotoga. Ua fai mai le Tusi Paia e tatau ona toalua pe toatolu ni molimau a o lei faia gaoioiga faafaamasinoga. (2 Korinito 13:1; 1 Timoteo 5:19) E tusa lava pe sili atu i le toatasi se tagata ua “manatua” le faaleagaina e le tagata lava lea, o le uiga o nei toe manatunatuga e matuā lē mautinoa, e lē mafai ona faavae ai ni faaiuga faafaamasinoga e aunoa ma nisi faamaoniga e lagolagoina ai. E lē o le uiga o lea mea o ia “manatunatuga” ua sese (pe ua saʻo foi). Ae tatau ona mulimuli i mataupu silisili o le Tusi Paia i le faamautuina o se mataupu faafaamasinoga.

Ae faapefea la, pe afai o lē ua tuuaʻia—e ui lava ina faafiti i le mea sese sa fai—e agasala moni lava? Pe e mafai ona ia “sola mai le faasalaga,” e pei ona iai nei? E mautinoa lava e leai! O le fesiligia o lona agasala po o lona taʻumamāina, ua iai lea i aao o Ieova. “E iloa tino agasala a isi tagata, e muamua atu i le faamasinoga; a o agasala a isi e mulimuli atu.” (1 Timoteo 5:24; Roma 12:19; 14:12) Ua fai mai le tusi o Faataoto: “O le faamoemoe o e amiotonu o le olioli lea; a o le faatuatuaga o e amio leaga, e iu vale lea.” “A oti le tagata amio leaga, ua fano lona faatuatuaga.” (Faataoto 10:28; 11:7) I le iuga lava, e faia ai e Ieova le Atua ma Iesu Keriso le faamasinoga e faavavau i le amiotonu.—1 Korinito 4:5.

Teteeina o le Tiapolo

Pe a onosaia e tagata tuuina atu ia tiga matuitui faaletino ma tau faalogona, e maeu se faamaoniga o le malosi o loo ia i latou ma lo latou alofa loloto mo le Atua! Ma e maeu se faamaoniga o le iai i le agaga o Ieova o le mana e faatumauina ai i latou!—Faatusatusa i le 2 Korinito 4:7.

Ua faatatau ia i latou na upu a Peteru e faapea: “Ia outou tetee atu ia [Satani], o mausali outou i le faatuatua.” (1 Peteru 5:9) O le faia faapea atonu e lē faigofie. O nisi taimi, atonu e faigata ai ona mafaufau lelei ma mafaufau saʻo. Ae aua le lotovaivai! E lē o toe umi, ae lē toe iai loa Satani ma ana gaoioiga taufaaʻoleʻole. O le mea moni, ua leva ona tatou mananao atu mo lena taimi, e “sōloiesea [ai] e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:3, 4.

[Faaopoopoga i lalo]