Tauaofiaga Faavaomalo o le a Faia e Molimau a Ieova

Ua fuafuaina e le Vaega Pule o Molimau a Ieova e faia ni tauaofiaga faavaomalo i le 1998. O lenei faasilasilaga na talia ma le fiafia tele i le fono faaletausaga a le Watch Tower Bible and Tract Society of Pennsylvania, lea sa faia i le Maota o Fonotaga i Jersey City i le Aso Toonai, Oketopa 5, 1996.

Faatasi ai ma tauaofiaga itumalo e masani ai, o le a faia foi ni tauaofiaga faavaomalo i Amerika i Mātū i le vaitaimi faaogatotonu o le 1998. Ua faatalitalia o nei faatasiga o le a mafai ona paau atu i ai le faitau selauafe o Molimau mai le tele o atunuu o le lalolagi. Ina ia mafai ona toatele ni atunuu e auai ni o latou sui, o le a tuu atu ai i ofisa o le lālā o le Sosaiete o le Olo Matamata ua silia ma le 100 se aofaiga patino o sui, le avanoa e ō atu ai i se aai ua fuafuaina mo le tauaofiaga faavaomalo i Amerika i Mātū.

E mautinoa lava e lē o tagata uma e mananao e malaga atu i Amerika i Mātū o le a mafai ona latou faia faapea. Peitai ane, atonu e mafai e le faitau afe ona auai i se tauaofiaga faavaomalo e latalata ane i lo latou lava atunuu. O loo faia nei ni fuafuaga mo ni tauaofiaga faavaomalo ina ia faia i ni atunuu se lua pe tolu i Europa ma isi i Aferika, Asia, Amerika Latina, le Pasefika i Saute, ma le Atu Karipiane.

I se taimi e talafeagai ai, o le a faailoa atu e ofisa o le lālā o le Sosaiete i faapotopotoga o loo i o latou lava oganuu ia le aai po o aai o tauaofiaga o loo valaauliaina ai i latou. O le a tuuina atu foi ni faamatalaga e faatatau i aso o tauaofiaga ma fuafuaga o le filifilia o sui auai. O i latou o ē e mananao e talosaga atu e fia avea ma sui e filifilia mai, e mafai nei ona amata faaputu ni tupe auā le faamoemoe atu i nei tauaofiaga faapitoa.

O Molimau uma a Ieova i le lalolagi aoao e mafai ona tepa taulai atu ma le fiafia i mea o teuina mo i tatou i na faatasiga faavaomalo mo le 1998. O tauaofiaga itumalo i atunuu uma lava o le a faia ai se polokalame e tali tutusa faapea.