O le Iloaina o le Mataupu Silisili e Faaatagia ai le Taʻumatuaina
O LE feoai ma e amioleaga e leaga ai amio lelei. E te selesele i mea e te lūlū. (1 Korinito 15:33; Kalatia 6:7) Pe faaletino pe faaleagaga, o nei faamatalaga taitasi o se faataitaiga o se upu moni ua avea ma faavae—o se mataupu silisili—ma o nei faamatalaga taitasi ua avea ma se faavae mo tulafono. Ae peitai, e lē tumau tulafono, ma e tele ina faatapulaaina mo na o nisi. I le isi itu, e faalauaitele mataupu silisili ma e mafai ona tumau e faavavau. O lea, o loo faalaeiau i tatou e le Afioga a le Atua e manatunatu i mataupu silisili o loo aafia ai i so o se tulaga.
Ua faauigaina e le Webster’s Third New International Dictionary se mataupu silisili o “se upu moni ua avea ma se faavae ma e faalauaitele: o se tulafono faavae ma e malamalama ai, o se aʻoaʻoga, po o faaiuga ia e faavae aʻi pe fafau mai ai isi faaiuga.” Mo se faataitaiga, e mafai e se tasi ona avatu i se tamaitiiti le tulafono, “E lē tatau ona e paʻi atu i le ogaumu.” Ae ua lava ma totoe le faapea atu i se tagata matua, “E vevela le ogaumu.” Seʻi mātau, e lautele le faamatalaga lona lua. Talu ai e aafia i lenei faamatalaga a tatou mea e fai—atonu o le faia o se meaʻai po o le tapēina o le ogaumu—ua avea ai i se isi itu, o se mataupu silisili.
O mataupu silisili autū o le olaga e faaleagaga; latou te puleaina la tatou tapuaiga i le Atua ma lo tatou fiafiaga. Ae peitai, o isi e lē o faia ni taumafaiga moomia ina ia malamalama i mataupu silisili. E sili ona latou filifilia le faatulaga manino mai o se tulafono pe a fesagai ma se filifiliga. E lē poto lenei mea ma e tuufaafeagai ma le faataitaiga lea na faataatia e tane faamaoni anamua i taimi o le Tusi Paia.—Roma 15:4.
Tane na Tausisi i Mataupu Silisili Tauatua
Mai tane lē lelei atoatoa, e mafai ona taʻua Apelu o le tane muamua lava na tausisi i mataupu silisili tauatua. E foliga mai na mafaufau loloto o ia i le folafolaga e faatatau i le “fanau” ma na malamalama faapea o le faaolataga mai le agasala, e aofia ai se taulaga e faia i le toto. (Kenese 3:15) O lea na ia ofo atu ai i le Atua “uluai tama a lona lafu.” Ua faaalia e le faaupuga “o e pepeti ai lava,” le avatuina e Apelu ia Ieova o mamoe aupito sili ona lelei o lana lafu. Ae peitai, na faatoʻā faamanino mai e Ieova i le sili atu ma le luaafe o tausaga talu ona maliu Apelu, faamatalaga auiliili e faatatau i taulaga. I le tuufaafeagai ma Apelu lea na mataʻu i le Atua ma tausisi atu i mataupu silisili, o lona uso o Kaino na tau lava ina faataunuu o lana taulaga i le Atua. Na lei faamalie loto ona uiga, na iai se mea i lana taulaga na faaatagia ai le lē puleaina o lona loto e mataupu silisili.—Kenese 4:3-5.
O Noa foi o se tane na tausisi i mataupu silisili. E ui ina faaalia e faamaumauga a le Tusi Paia le faatonuina patino o ia e le Atua ina ia fauina se vaa, ae tatou te lē o faitau i se faatonuga ina ia talaʻi atu i isi. Ae o loo taʻua pea Noa o “le talaʻi le amiotonu.” (2 Peteru 2:5) E ui ina foliga na faatonu atu e le Atua Noa e talaʻi, ae e lē masalomia na uunaia foi o ia e lona malamalama i mataupu silisili ma lona alofa mo ona tuaoi. Talu ai o loo tatou ola i taimi e tai pei o taimi o Noa, seʻi o tatou faaaʻoaʻo atu la i lona uiga lelei ma lana faataitaiga.
I le lē pei o taʻitaʻi lotu i ona aso, na aʻoaʻoina e Iesu tagata ina ia manatunatu i mataupu silisili. O lana Lauga i luga o le Mauga e avea ma se faataitaiga. Na faasino atu lona uiga moni i mataupu silisili. (Mataio, mataupu 5-7) Na aʻoaʻo Iesu i lea auala, auā e pei o Apelu ma Noa i aso anamua, na ia iloa lelei le Atua. A o talavou, sa ia faatāuaina le upu moni na avea ma faavae: “E le na o mea e ʻai . . . a o mea uma e tulei mai i le fofoga o Ieova e ola ai tagata.” (Teuteronome 8:3; Luka 2:41-47) Ioe, o le ki i le avea ma sē e tausisi i mataupu silisili tauatua, o le iloa lelei lea o Ieova, o mea e finagalo i ai, mea e ʻinoʻino i ai, ma ana fuafuaga. Afai e pulea e nei mataupu silisili e faatatau i le Atua o tatou olaga, ona avea lea o ni mataupu silisili e aogā mo lenei olaga.—Ieremia 22:16, Eperu 4:12.
O Mataupu Silisili ma le Loto
E mafai ona usitaia se tulafono ma le musuā, atonu ona o le fefe i le faasalaga o le lē usiusitai. Ae peitai, o le gauai atu i se mataupu silisili, e alofia ai lenei uiga, talu ai o le agaga lea o loo iai i mataupu silisili, o le usitaia mai le loto. Seʻi mafaufau ia Iosefa, lea e pei o Apelu ma Noa, na ola a o lei faavaeina le feagaiga o le tulafono faa-Mose. Ina ua tau faamalosia o ia e le toalua o Potifara, na tali atu Iosefa: “Pe faapefea ona ou faia lenei mea leaga tele ma ou agasala ai i le Atua?” Ioe, na iloa e Iosefa le mataupu silisili lea e avea ai le tane ma le avā o se “tino e tasi.”—Kenese 2:24; 39:9.
Ua leai ni mataupu silisili amiotonu i le lalolagi i aso nei. Ua faaloloto tagata o le lalolagi e tai pei o se tagata ʻai tele, i sauāga ma amioga lē mamā. O le lamatiaga o le ono faaosoosoina ai se Kerisiano ina ia tofo, atonu i se tulaga faalilolilo, i meaʻai lava nei e tasi ia e lē aogā mo le tino—o ata tifaga, vitiō, po o tusi. O lea, maeu la le lelei pe afai e pei i tatou o Iosefa lea sa teena le faia o le leaga, ona o mataupu silisili ua māfua ai lo tatou ʻinoʻino i le leaga, ma le manatuaina e faapea e faasaoina e le Atua mai le “puapuaga tele,” na o i latou e faamaoni. (Mataio 24:21) Ioe, o le mea moni, o o tatou uiga pe a na o i tatou, ae lē o i le lautele, e iloa moni ai le ituaiga o tagata tatou te iai.—Salamo 11:4; Faataoto 15:3.
O lea la, afai e taitaia i tatou e mataupu silisili o le Tusi Paia, tatou te lē sailiili la mo ni avanoa e soli ai tulafono a le Atua e aunoa ma ni faasalaga; tatou te lē taumafai foi e vaai po o le ā le mamao tatou te oo i ai e aunoa ma le solia o se tulafono patino. O lea ituaiga o mafaufauga e lē aogā lea mo i tatou lava; tatou te iu ai i le leaga.
Iloilo le Mataupu Silisili o Loo Faavae Aʻi le Tulafono
O le mea moni, e matuā tāua tulafono i le olaga faa-Kerisiano. O ia tulafono ua tai pei o ni leoleo o loo fesoasoani e puipuia i tatou, ma o loo iai ni mataupu silisili tāua i lo latou faavae. O lo tatou lē malamalama i nei mataupu silisili e ono faaitiitia ai lo tatou talisapaia o tulafono o loo fesootai atu i ai. Na faataitaia e le nuu o Isaraelu anamua lenei mea.
Na avatu e le Atua ia Isaraelu Tulafono e Sefulu, o le uluai tulafono na faasaina ai le tapuai atu i se isi atua e ese mai ia Ieova. O le foafoaina e Ieova o mea uma lava ua avea ma se upu moni e faavae aʻi lenei tulafono. (Esoto 20:3-5) Faamata na ola aʻe le nuu e tusa ai ma lenei mataupu silisili? Ua tali mai Ieova lava ia e faapea: “‘O oe lo matou tamā’ [na faapea mai ai le nuu o Isaraelu] i se ogalaau ma [na latou alalaga atu] ‘Tinā’ i se maa. Ae ua ū mai ia te au [Ieova] o latou tua ma ū ese o latou mata.” (Ieremia 2:27, The New English Bible) Pagā le lē alofa ma le lē faavaea o na faiga valea! Ma pagā le faatiga ai o le finagalo o Ieova!—Salamo 78:40, 41; Isaia 63:9, 10.
O loo iai foi i Kerisiano tulafono mai le Atua. Mo se faataitaiga, latou te alofia le ifo i tupua, feusuaiga lē mamā, ma le faaaogāseseina o le toto. (Galuega 15:28, 29) Pe a e mafaufau i ai, e mafai ona tatou malamalama i mataupu silisili o loo faavae aʻi, e pei o ia: ua alagātatau i le Atua lo tatou tuutoina atoatoa; e ao ona tatou faamaoni i a tatou paaga; ma o Ieova o Lē na Foai maia lo tatou ola. (Kenese 2:24; Esoto 20:5; Salamo 36:9) Pe afai tatou te malamalama ma matuā talisapaia mataupu silisili o loo faavae aʻi nei faatonuga, ona tatou iloa lea e mo lo tatou lelei. (Isaia 48:17) O “poloaiga” a le Atua, “e le mamafa” ia i tatou.—1 Ioane 5:3.
Na lei amanaia e le fanauga a Isaraelu tulafono a le Atua i le taimi muamua, ae ina ua oo atu i aso o Iesu, na matuā suia e le au tusiupu, o a latou “tagata popoto o le tulafono,” lena tulaga. Na latou faia le anoanoai o tulafono ma uputuu ia na faanenefu ai le tapuaiga mamā ma natia ai mataupu silisili tauatua. (Mataio 23:2, NEB) Na lē maalofia le oo i tagata o lagona iuvale, le leai o se faamoemoe, po o faiga faafiaamiotonu. (Mataio 15:3-9) Ma o le tele o tulafono na fafau e tagata sa faia ma le lē alofa. A o lei faamaloloina se tamaloa sa gase lona lima, na fesili atu Iesu i le au Faresaio na iai: “Pe sa ea le agalelei i le sapati?” O lo latou lē mautali ane na matuā faaalia ai sa latou iloa e lē sa, lea ua oo ai ia Iesu le “tiga o lona finagalo, auā o latou loto ua maaa.” (Mareko 3:1-6) E ono laveai atu le au Faresaio i se manu (o se mea e toe maua mai ai se tupe) o loo lamatia lona ola po o manuʻa i le Sapati, ae e lē tāitai laveai atu i se tane po o se fafine—seʻi vaganā ua lamatia ai le ola o lea tane po o lea fafine. O le mea moni, ua latou matuā faatāuaina tulafono faaletagata ma auiliiliga o nei tulafono, tai pei o loi o loo fetolofi solo i luga o se ata, ua lē mafai ai ona latou iloaina le ata atoa—o mataupu silisili tauatua ia.—Mataio 23:23, 24.
Ae peitai, e oo i ē iti, afai e moni o latou loto, e mafai ona latou viiviia Ieova ona o lo latou talisapaia o mataupu silisili o le Tusi Paia. Na fesili le faiaʻoga a Repeka lea e 13 tausaga i le vasega po o ai e ono pelē tupe. O le toatele na fai mai latou te lē faia. Ae peitai, ina ua taʻua ni auala eseese e fai ai, na faapea uma mai latou te auai i pelēga tupe i nisi o nei tulaga, seʻi vaganā ai Repeka. Na fesili atu le faiaʻoga ia Repeka pe na te faatauina se pepa lūlū mo le 20 sene lea e mo se fuafuaga aogā. Na faapea atu Repeka e leai ma na ia avatuina ni mafuaaga faale-Tusi Paia e faaalia ai o se vala o le pelē tupe le faia faapea. Ona faapea atu lea o lona faiaʻoga i le vasega atoa: ‘O loʻu manatu, ua na o Repeka lava le tagata lea e iinei ua tausisi i le uiga moni o le upu “mataupu silisili.”’ Ioe, na ono faigofie ona tali atu Repeka e faapea: “E feteenai ma laʻu tapuaiga,” ae peitai na loloto atu ona mafaufauga nai lo lena; na mafai ona ia tali atu i le pogai e sese ai ma e lē auai ai i le pelē tupe.
Ua faaali mai ia i tatou e faataitaiga e pei o Apelu, Noa, Iosefa, ma Iesu ia auala tatou te maua ai aogā e ala i le faaaogaina o le “mafaufau” ma lo tatou “tofā mamao” i le tapuaiga i le Atua. (Faataoto 2:11; Roma 12:1, NW) E lelei mo toeaina Kerisiano ona faaaʻoaʻo atu ia Iesu a o latou “leoleo i le lafu mamoe a le Atua.” (1 Peteru 5:2) E pei ona faataitaia lelei mai e Iesu, o ē alolofa i mataupu silisili tauatua o i latou na e manuia i le pulega a Ieova.—Isaia 65:14.