Tala Lelei o le Parataiso i Tahiti

TAHITI! E foliga mai o loo taʻu mai e le igoa se faatosinaga mautinoa e lē masani aʻi. Ua lauiloa e ala i tagata tusiata ma tusitala e pei o Paul Gauguin, Lopati Lui Sitivenisoni, ma Herman Melville, o ē e ona ata ma tusitusiga e uiga i le matagofie o atunuu o le teropika ma le toafilemu o Motu o le Sami i Saute ia na tosina mai ai mafaufauga o le toatele.

O Tahiti o le motu e pito sili ona telē i motu e sili atu ma le 120 o motu o le French Polynesia, lea e i le Pasefika i Saute. E ui o lenei motu o le Sami i Saute e toetoe lava pei o se parataiso i mafaufau o le toatele o tagata, ae manaomia lava e tagata Tahiti ona faalogo i se isi parataiso ua toeitiiti oo mai. (Luka 23:43) O Molimau a Ieova i Tahiti i aso nei, e 1,918 le aofai, o loo pisi i le taʻuina atu i tagata e 220,000 le tala lelei o le Malo o le Atua ua toeitiiti ona aumaia lea o se tulaga faaparataiso moni e lē na o Tahiti ae faapena foi i le lalolagi atoa.—Mataio 24:14; Faaaliga 21:3, 4.

Mo le tele o tausaga sa vaavaaia ai le galuega talaʻi i Tahiti e le ofisa o le lālā a le Sosaiete o le Olo Matamata i Fiti, pe ā ma le 2,200 maila [3,500 kilomita] le mamao ese. O āuga o le vavamamao na faafaigata ai le tulaga o mea, ma tuai ai le agaigai i luma. O lea, ia Aperila 1, 1975, na faavaeina ai le ofisa o le lālā i Tahiti, ma na iloga ai le suiga i gaoioiga a Kerisiano moni i lenei oganuu. O le ā na faapogaia ai lenei suiga ma na faapefea ona amataina le galuega talaʻi i Tahiti?

O se Amataga Itiiti

O le tala lelei o le Malo na muai faalogoina i Tahiti mai i se vaitaimi o vaitausaga mai le 1930, ma o le toatele o tagata o le motu o ē e matuā faatāuaina le Tusi Paia, na tali mai ma le fiafia tele. Peitai ane, ona o le faasaina e le malo ma isi faasasaaga, na tumau ai pea le leai o ni Molimau i le motu i tausaga faaiuiu o vaitausaga mai le 1950. I lena taimi, o Agnès Schenck, o se tagatānuu Tahiti na nofo i le Iunaite Setete, na filifili e toe foi atu i Tahiti ma lana tane ma lana tama tama. Ua ia faamatalaina le auala na tutupu ai nei mea uma.

“I le tauaofiaga itumalo i Los Angeles i le 1957, o le uso o Knorr [le peresitene o le Sosaiete o le Olo Matamata i lena taimi], na ia faamatalaina faapea o loo iai se manaoga tele mo ni tagata talaʻi o le Malo i Tahiti. Ua atoa le tausaga talu ona ou papatiso i lena taimi, ma sa ou faapea atu ma le leotele, ‘Ia tatou ō loa i Tahiti!’ E lua aiga, o le au Neill ma le au Carano, o ni a matou uo lelei, na lagona mai aʻu. Sa latou faapea mai ia i matou latou te mananao e matou te ō faatasi, ae e lē tele ni a matou tupe. Na maʻi laʻu tane mo se taimi umi, ma sa laitiiti tele laʻu tama. O lea sa faafaigata ai mo i matou ona ō ese. Na ona faalogo lava o a matou uo i faapotopotoga tuaoi e uiga i lo matou sini, ona latou auina mai lea ia i matou ni tupe ma ni mea mo lo matou aiga. Ma ia Me 1958 na matou folau atu ai loa i Tahiti faatasi ai ma isi mea, e aofia ai ie afu e 36!

“Ina ua matou taunuu i Tahiti, sa pei aʻu o se tagata ese ona ua atoa le 20 tausaga talu ona ou alu ese mai ma le motu. Na amata ona matou talaʻi, ae sa tatau ona matou faaeteete lava ona sa faasā la matou galuega faa-Kerisiano. Na matou nanāina a matou mekasini, ae matou faaaogā na o le Tusi Paia. I le taimi muamua sa matou molimau atu ai na o tagata sa fai a latou tusiga o mekasini o Le Olomatamata ma le Ala Mai!

“Na faatasi mai ia i matou Clyde Neill ma David Carano ma o la aiga, ina ua maeʻa le tauaofiaga faava-o-atunuu i le aai o Niu Ioka i le 1958. Sa matou talaʻi faatasi ma valaaulia tagata e ō mai e faalogologo i lauga na faia lava i fale o le au uso. Na faasolosolo mālie ona faamaopoopoina le tulaga o mea, ma matou amataina ai se suesuega faale-Tusi Paia i vaega ma tagata e toʻa 15. Ina ua mavae masina e tolu ona tuumuli loa lea o le au Neill ma le au Carano ona ua uma o latou visa. O lea na filifili ai loa uso a o latou lei ō ese atu, o le a latou papatisoina tagata fiafia uma ua agavaa. Na maua loʻu faaeaga e avea ai o sē e faaliliu mo le uluai lauga o le papatisoga. I lea sauniga e toavalu tagata lava o le motu na faailoaina atu lo latou tuuina atu ia Ieova e ala i le papatisoga. O lea na toe foi atu ai loa le au Neill ma le au Carano i le Iunaite Setete.

“Na faaauauina pea le galuega talaʻi. Na matou faamaopoopoina i matou i ni vaega toaitiiti ma asiasi atu i tagata i afiafi. E masani ona oo atu le umi o talanoaga e faia ma i latou o ē e fiafia i le valuāpo. Na iai taimi na oo lava ina auai mai faifeau Porotesano i le talanoaga. I le 1959 na faatuina ai le uluai faapotopotoga. Ma o lo matou fiafiaga sili, i le 1960 na aloaia ai e le malo le sosaiete o Molimau a Ieova. O na uluai tausaga na faatumulia i le olioli ma tumutumuga faaleagaga. Na matuā faamanuia moni lava e Ieova la matou filifiliga e siitia atu i le mea o loo tele ai le manaomia.” O le tuafafine o Schenck ua 87 nei ona tausaga, ma o loo ia auauna pea ma le faamaoni ia Ieova i lana faapotopotoga.

Na Agaigai i Luma le Galuega

I le 1969 na tofia atu ai ni Molimau se toalua mai Falani, o Jacques ma Paulette Inaudi, i Tahiti e avea o ni paeonia faapitoa. Ua manatua pea e Jacques e faapea: “Ina ua ma taunuu i Tahiti, e na o le 124 tagata talaʻi, tasi le faapotopotoga i Papeete, ma paeonia faapitoa e toalua i Vairao, i le penisula.” E fesootai le penisula ma Tahiti i se ogaeleele lauiti. E lei umi lava ae faia loa le Tauaofiaga Faava-o-atunuu o le “Peace on Earth” (Filemu i le Lalolagi). Na toe faapea mai Jacques: “O loʻu taimi muamua lena i le faamaopoopoina o se tauaofiaga. Sa matou fuafuaina se polokalame i le gagana Peretania mo tagata asiasi mai isi atunuu, saunia se faaili mo pese o le Malo, ma faataitai tala e lua. O nei galuega uma na faataunuu ma le na o le 126 tagata talaʻi. Ou te talitonu na faataunuu e Ieova le vaega tele o na fuafuaga.” O se fiafiaga mo tagata o le motu le aofia e 488. Mo le toatele o i latou, o le taimi muamua lea ua feiloai ai ma Molimau mai i isi atunuu.

E lei leva mulimuli ane ai, ae tofia loa Jacques Inaudi o se ovasia femalagaai. A o ia asiasi atu i motu eseese, na ia vaaia ai le toatele o ē fiafia ae toaitiiti tagata talaʻi o le Malo e atiaeina. Na faamatalaina mai faapea e Jacques: “O le mafuaaga lena na ou faalaeiauina ai le toatele o aiga e siitia atu i nei motu e auauna ai i nofoaga o loo tele ai le manaomia. I le faasolosolo mālie atu lava, na salalau atu ai le tala lelei i na atumotu.” O le uso o Inaudi na auauna o se ovasia femalagaai mai le 1969 i le 1974, ma o ia o se toeaina i se tasi o faapotopotoga i Tahiti i le taimi nei.

O se tasi o i latou ia na tali atu i faalaeiauga a le uso o Inaudi o Auguste Temanaha, o se tasi o i latou e toavalu ia na papatiso i le 1958. Ua ia toe taʻua le mea na tupu. “I le 1972 na faalaeiauina ai e le ovasia o matagaluega o Jacques Inaudi i matou e manatunatu i le siitia atu e auauna i Huahine, o se tasi o motu o le Pasefika i Saute lea e pulea e Falani. Na ou tau faaletonu ona sa na o faitauga Tusi Pa ia sa ou faia i le faapotopotoga ma sa ou lagona le lē agavaa e tausia na tiute tauave. E ui i lea, na taʻu mai pea lava pea e le uso o Inaudi ia te au, ‘Aua e te popole, e mafai ona e faia!’ Ina ua mavae sina taimi ona mautū ai loa lea o loʻu mafaufau. O lea, i le 1973, na ma faatauina atu ai mea uma ae matou siitia atu loa ma le ma fanau laiti e toatolu i Huahine.

“I lo matou taunuu atu, na ou iloaina ai e tatau ona ou amataina mea uma—le Suesuega o Le Olomatamata, Aʻoga o le Faiva Faatiokarate, ma isi mea. Sa lē faigofie, ae na matou iloaina le puipuiga ma le fesoasoani a Ieova. I nisi o taimi e fesoasoani ai o ia ia i matou ina ia maua se nofoaga matou te nonofo ai. Ma ina ua taumafai se vaega o tagata tetee e aveesea Molimau mai le motu, na tulai atu ai se sui o le malo ma puipuia i matou. E moni, na tausia pea i matou e Ieova i taimi uma.” O lenei, ua lua faapotopotoga i totonu o Huahine—o se faapotopotoga Falani e toʻa 23 tagata talaʻi ma le faapotopotoga Tahiti e toʻa 55 tagata talaʻi.

I le 1969, na tofia ai Hélène Mapu e galue o se paeonia faapitoa i le penisula. Na faapea mai Hélène: “E ese le fiafia o tagata o i le penisula, ma i sina taimi puupuu lava, ae ou amataina le tele o suesuega faale-Tusi Paia.” E lei leva ae faia se faapotopotoga laitiiti i Vairao, ae na iai se manaoga mo ni toeaina. I lena taimi, o Colson Deane, o lē sa nofo i Papara e 22 maila [35 kilomita] le mamao ese, sa mafai ona saunia se fesoasoani. Na toe taʻua e Deane e faapea: “Sa tatau ona matou matuā maopoopo lelei ina ia auauna ai i Vairao. Sa ou faigaluega i Faaa, e 45 maila [70 kilomita] mai Vairao i le isi itu o le motu. Pe a mānava mai le galuega, e tatau ona ou faanatinati i le fale, e aumai loʻu aiga ma ō atu loa i Vairao. Mulimuli ane ona matou siitia atu loa lea i Faaa ona o laʻu galuega. Pe o le a mafai pea ona matou fesoasoani atu i le Faapotopotoga i Vairao? Na matou matuā mananao lava e fesoasoani atu i uso iina, o lea na matou filifili ai e faaauau pea. E faatoʻā matou taunuu lava i le fale i le valuāpo i po o aso sauniga ona o le laʻuina o i latou e leai ni a latou taavale i o latou aiga. Na matou faia lenei mea mo le lima tausaga. O se fiafiaga sili i le taimi nei le vaai atu i faapotopotoga e fa i lenei vaega o le motu, ma o loo matou manatua pea mea e fiafia ai mai na aso.”

Avea Tahiti ma Lālā

E oo ane i le 1974, ua faatupulaia ai le faitau aofai o tagata talaʻi o le Malo i Tahiti i le 199. I le tausaga na sosoo ane ai ina ua asiasi atu i ai N. H. Knorr ma F. W. Franz, o le peresitene ma le sui peresitene o le Sosaiete o le Olo Matamata i lena taimi i French Polynesia, na la iloaina ai e sili atu ona aogā le faatonutonuina o le galuega talaʻi i French Polynesia, e lē mai Fiti lea e silia ma le 2,200 maila [3,500 kilomita] le mamao ese, ae ia faatonutonuina i Tahiti lava ia. O lea, ia Aperila 1, 1975, na amata ai ona faavae le lālā i Tahiti, ma o le ovasia matagaluega, o Alain Jamet, na tofia e avea ma ovasia o le lālā.

I tausaga e lua ua tuanai, sa mafai ai ona toe faamatala mai e le uso o Jamet faamanuiaga ofoofogia mai ia Ieova. “Talu mai le 1975 na faia ai ni taumafaiga e sili atu ina ia faaoo atu ai le tala lelei i motu uma ma atumotu i la matou oganuu, lea e pei lona telē o Europa i Sisifo. O le iuga e faafiafiaina ai. I le 1983 na faatuputupulaia ai le numera o tagata talaʻi i le 538. I lena lava tausaga na fausiaina ai se fale mo se ofisa o le lālā ma le Aiga Peteli i Paea. O le taimi nei, e tusa ma le 1,900 tagata talaʻi o loo salalau i faapotopotoga e 30 i Motu o loo pulea e Falani, e tasi le faapotopotoga ma le vaega e mamao ese i Motu o Austral, e tasi foi le faapotopotoga ma vaega e lua e mamao ese i Marquesas, ma nisi vaega mamao ese i Tuamotu ma Motu o Gambier. E tele Maota fou o le Malo na fausia—tolu i Marquesas ma le fitu i Tahiti—mo le tausiaina o le aofaiga faatuputupulaia o ē fou o loo gasolo mai i sauniga. I le 20 o tausaga ua mavae atu, ua matuā faamanuiaina e Ieova a matou taumafaiga i le atiina ae o le oganuu i Tahiti.”

O Loo Tele Pea Galuega e Fai Faamaeʻa

O le faamoemoe mo le tuputupu aʻe o le galuega i French Polynesia e matuā lelei lava. Ia Mati 23, 1997, e 5,376 tagata na auaufaatasi ma Molimau a Ieova i French Polynesia atoa mo le Faamanatuga o le maliu o Iesu Keriso. Ina ia faafetaiaia le manaoga faaleagaga o nei tagata fiafia, ua maua ai a tatou lomiga faale-Tusi Paia i nisi o gagana o le vaipanoa lava ia. E faaopoopo atu i le gagana Tahiti, na saunia lomiga i le gagana Paumotu, lea e tautatala ai Atumotu o Tuamotu, ma le gagana Marquesas i Mātū ma Saute.

O le tuputupu mālie aʻe ma mea lelei na tutupu ua fesoasoani lea i tagata talaʻi o le Malo i Tahiti e talisapaia atoatoa le alofa ma le onosai o Ieova, “o lē finagalo ina ia faaolaina o tagata uma lava, ma ia oo ina iloa lelei le upu moni,” e oo lava i motu mamao ese o le Sami i Saute. (1 Timoteo 2:4) O Molimau a Ieova i Tahiti ma isi motu o le French Polynesia e faatuatua atoatoa i le folafolaga a Ieova: “E faatalitali mai ia te au o nuu tu matafaga, latou te faamoemoe foi i loʻu lima.”—Isaia 51:5.

[Faafanua i le itulau 26]

(Tagaʻi i le lomiga mo le ata atoa)

O le lālā i Tahiti e tausia manaoga o French Polynesia

AUSETALIA

[Ata i le itulau 25]

Mai le itu tauagavale i le itu taumatau: Alain Jamet, Mary-Ann Jamet, Agnès Schenck, Paulette Inaudi, ma Jacques Inaudi

[Ata i le itulau 27]

Ofisa o le lālā i Tahiti