Autasi o le Lalolagi—Po o le a Oo Moni Mai Ea? — Lomiga Faale-Tusi Paia I LE INITANETI

Autasi o le Lalolagi—Po o le a Oo Moni Mai Ea?

“PE AFAI tatou te taulau manuia i augatupulaga ia o loo lumanai mai, i le faaliliuina o le lalolagi o malo tutoatasi eseese o loo tatou nonofo ai i se ituaiga o nuu moni faavaomalo, . . . e tatau la ona tatou matuā faatamaia foi le faatulagaga ua leva o faiga taua . . . Ae peitai, pe afai o le a tatou lē taulau, atonu la o le a . . . lē toe iai ni tagata o soifua mai.” O le faamatalaga lena a le tusitala o talafaasolopito i faiga faafitafita o Gwynne Dyer i lana tusi ua faaulutalaina War.

Ua taʻua e Dyer faapea, ua tumu tusitusiga o talafaasolopito i tala o malo ma isi vaega malolosi sa saili atu i taua mo le foiaina o o latou feeseeseaiga. O lo latou lē autasi ua matuā faaleagaina ai ola o le faitau miliona o tagata. O loo fetaui pea i aso nei le faamatalaga a le tupu o Solomona lea sa ia faamatalaina ai le auala na aafia ai tagata i ona vaitaimi ona o lenei mea. Na ia tusi: “Ona ou toe manatunatu lea i sauaga uma ua faia i lalo o le la; faauta foi i loimata o e ua sauaina, ua leai foi se na te faamafanafanaina i latou; ua lima malosi foi e na saua ia te i latou; a ua leai se na te faamafanafanaina i latou.”—Failauga 4:1.

I aso nei, e pei ona faasino mai e le tusitala na muai taʻua, e ese mai le mutimutivale o le alofa i “loimata o e ua sauaina,” ae o loo iai foi se isi mafuaaga mo le saili atu i nisi auala ina ia liliuina ai le lalolagi o malo tutoatasi eseese, e avea o se nuu moni faavaomalo: Ua matuā lamatia lava le faasaoina o le soifuaga masani! Ua faamautinoa mai e faiga taua le faatamaia ai o malo taitasi uma o loo auai, ae aunoa ma se tasi e manumalo.

Po o Tau Iloa Atu se Autasi o le Lalolagi?

O ā ni faamoemoega mo le autasi o le lalolagi? Pe mafai e le sosaiete faaletagata ona foiaina malosi feteenai ia o loo faamataʻuina ai le faasaoina o le lalolagi? O le manatu lena o nisi. Ua tusi mai John Keegan, o le faatonu o le nusipepa Peretania, le Daily Telegraph, e tusitusia mataupu tau vaegaau ma faiga taua, e faapea: “E ui lava i le fenuminumiai ma le lē mautonu, ae foliga mai ua mafai ona tepa vave atu i le fo-tuai mai o se lalolagi e aunoa ma ni taua.”

O le ā ua mafai ai ona avatu ia te ia lenei vaaiga mautinoa mo le lumanai? Aisea e toatele ai ua foliga e iai so latou faamoemoe e ui lava i le talafaasolopito umi o faiga taua a tagata ma le foliga mai e lē o iai se tomai i le tagata e pulea ai ma le manuia o ia lava? (Ieremia 10:23) ‘O loo agaʻi i luma tagata. Ua faaalia e talafaasolopito se faasologa o atinae o loo faaauau ona agaigai i luma’ o le finau mai lea a nisi i se tasi taimi. E oo lava i aso nei, e toatele ua talitonu faapea, e foliga mai o uiga lelei i loto o tagata o le a iu ina manumalo mai ai i mea leaga. Po o se faamoemoe moni ea lena? Po ua na o se manatu taufaasee o le a iuvale ai le faamoemoe? I lana tusi Shorter History of the World, na tusi ai e le tusitala o talafaasolopito o J. M. Roberts ona mafaufauga saʻo e faapea: “E faigata lava ona faamatalaina le lumanai o le lalolagi faapea ua saogalemu ma malupuipuia. E lē o iloa atu foi se iuga i puapuaga o tagata, po o se isi lava faavae mo le talitonu i ai.”

Po o iai ea ni mafuaaga moni mo le talitonuina faapea o le a matuā foia lava e tagata ma malo o latou lē fetalitonuai ma eseesega feteenai? Pe faamata e manaomia se isi mea e sili atu nai lo o taumafaiga a tagata? O le a talanoaina nei fesili i le mataupu o loo sosoo mai.

[Ē Ana le Ata i le itulau 2]