Autasi o le Lalolagi—O le a Oo Mai Faapefea?

E FAAPEI o se fale ua amata ona malepe ua matuā faaleagaina lava e tagata sa nonofo ai e aunoa ma le tausia lelei, ua faapena foi i le faiga o mea a lenei lalolagi, e na o le tasi lava le mea ua fetaui ona fai i ai—ia faatamaia ma toe faia. Ua lē na o se manatu lenei o ni tagata latou te valoiaina mala o loo fotuai mai. E tusa ai ma fa a le Tusi Paia, ua na o lena le manatu moni o loo iai. Aisea?

Ua lē o saogalemu faavae o le faiga o mea a lenei lalolagi. O le fale atoa ua pūpū solo i le atiatia e manu ninii ma ua faasolo ina pala laupapa. Ua elea le fausaga uamea. O puipui o taofiofia ai ua vaivai. Ua tau paʻū i lalo le taualuga. Ua mama paipa o loo faasau ai le suavai. Ua sioti uaea eletise ma ua lamatia ai ola. O loo faaauau pea ona fetauai tagata o loo nonofo ai ma atili faapogaia ai faatamaiaga matautia i le fale atoa. O le fale atoa ma mea uma o loo siosiomia ai ua nonofo solo ai meaola ninii ma ua iai i se tulaga lamatia e ono oo i le oti po o ni manuʻaga matuia.

‘Ua Fesagai ma le Faaumatiaga’

Talu ai le faifai pea o feteenaiga faapolotiki, le matapeapea, le fia pulepuletutū, ma feitagaiga ua mauaa i le va o tagata ona o eseesega o ituaiga po o lanu, ua faapea mai ai Gwynne Dyer, “ua fesagai nei tagata uma lava ma le faaumatiaga.” I le lalolagi atoa, o vaega laiti o loo faia gaoioiga malolosi—vaega o loo taumafai e taaʻina tagata ma le faiga malo ina ia suia mea, o ē o loo finau mo lo latou saolotoga, o au a tagata solitulafono, o tagata faatupu faalavelave i le va o atunuu, ma isi lava—o loo saili ina ia taulau manuia a latou lava fuafuaga manatu faapito, ma e foliga mai o loo mafai ona latou faaleagaina so o se mea e ono maua ai se filemu i le lalolagi. I le pei lava o tagata faaleagamea ia sa nonofo i le fale, ua mafai foi faapena ona latou faaleagaina le olaga mo isi uma tagata.

Peitai e tusa ai ma taofi o le toatele o le au faimanatu, o vaega tetee ma tagata lē pulea, e lē na o i latou o loo taofia le autasi o le lalolagi. O le papupuni sili lava ona telē o le malo lava ia. O malo tutoatasi e tusa ai ma se faamatalaga a le tusitala o faiga taua o S. B. Payne, Jr., o loo iai i “se tulaga o le leai o se mautu faavaomalo.” Latou te faia mea o loo sili ona manuia ai le latou faiga malo, ae tau lē amanaia po o le matuā lē amanaia lava o isi. O le iuga, talu mai lava le gasologa o talafaasolopito, ‘ua na o le leaga lava o loo maua e le tagata mai lona puleaina o ia lava.’—Failauga 8:9.

E moni, o loo iai sina taulau manuia o faiga malo a nisi atunuu a o latou taumafai e tetee i faamasinoga lē tonu ma faiga sauā o loo faia i o latou lotoifale, ma ua tau oo atu foi i se tulaga faavaomalo. Ua mafai ona latou faavaeina mai lea taimi i lea taimi sina autasi faavaomalo. Peitai, e tusa lava pe auaufaatasi ni malo e tetee atu i se malo e tasi o loo fia pulepuletutū, ae iai lava le masalosaloga pe mata o latou gaoioi mo le mauaina o ni o latou lava lelei nai lo le gaoioi mo se manuia moni o isi. O le manatu moni lava la, e lē o iai i faiga malo a tagata se vaifofo aogā ma tumau i le lē autasi o loo iai le lalolagi. Ua faapea mai Gwynne Dyer: “O le manatu faapea o le a auaufaatasi malo uma o le lalolagi e taofia pe faasalaina faiga pulepuletutū o loo faia e se atunuu fia faatuiese, ua na o se manatu manaia, ae o ai se malo e mafai ona iloaina po o ai le malo o loo pulepuletutū, ma o ai na te totogia i tupe ma ola o tagata le tau atonu e manaomia ina ia taofi ai faiga pulepuletutū a lena malo?”

O le mea moni, o faiga pulepuletutū a so o se malo e faasaga atu ai i le isi malo, e faatoʻā mafai lava pe afai e lē o tetee le toatele o ona tagatānuu i lena faiga pulepuletutū. Ua faaalia soo e talafaasolopito e faapea e lē na o nisi “atunuu fia tutoatasi” o loo lagolagoina e ona tagatānuu o latou taʻitaʻi, i mea saʻo ma mea sese. O le mea moni, o le toatele o tagata o loo aināina le lalo-lagi ua latou faia lena mea. Ua faaupu mai faapea e le mekasini o le Time, ua latou mulimuli atu ma le pogisa i “pepelo, o faiga faaituau ma faamatalaga e faaleaga ai nisi,” a le toatele o taʻitaʻi faapolotiki ma taʻitaʻi lotu.

O le lotonuu ua sasao aʻe ai lagona lotoa o tagata o ē na semanū e avea o nisi e magafagafa ma alolofa mutimutivale, ma ua faapogaia ai i latou e faia ni solitulafono sili ona leaga i tane, fafine, ma fanau a isi atunuu. Mo se faataitaiga i se faamatalaga na faia e le tusitala o talafaasolopito o J. M. Roberts e faatatau atu i le Taua Muamua a le Lalolagi, ua ia taʻua ai: “O se mea e uigaese sa tupu i le 1914 e faapea, i atunuu taitasi, e anoanoai le aofai o tagata, mai vaega faapolotiki uma, lotu ma tagata eseese, e foliga mai o se mea e maofa ai, o lo latou auai i le taua i le lotomalie ma le fiafia.” Po ua aʻoaʻoina ea e tagata sa latou lesona talu mai na taimi? E leai! O le manufeai o “faiga faalotonuu pogisa,” e pei ona faaigoa ai e le tusitala o Rod Usher, o loo faaauau pea ona ia talepeina so o se avanoa mo se autasi o le lalolagi.

O Loo Galulue Foi Isi Malosiaga

Peitai, o loo iai foi se isi papupuni tele i le autasi o le lalolagi. Ua faaalia e le Tusi Paia e faapea, o loo galulue foi isi malosiaga. Ua mataulia i latou, o Satani le Tiapolo ma ana au lagolago, o temoni. E tusa ai ma le Tusi Paia, o Satani o ‘le atua o le lalolagi nei o loo ia faatauasoina manatu o i latou o ē lē talitonu,’ ina ia lē uigā ia i latou “le tala lelei i le mamalu o Keriso.”—2 Korinito 4:4; Faaaliga 12:9.

E mautinoa, o lenei mea e lē tuumāmāina ai tagata taitoatasi i le tali atu mo a latou lava gaoioiga. Ae o loo faamatalaina mai le mafuaaga e lē tāitai ai e faiga malo a tagata ona latou faavaeina se lalolagi e autasi moni. Po o le ā lava le umi e faaauau ai ona iai Satani le Tiapolo, o le a faapena foi ona ia taaʻina tane ma fafine ina ia atiina ae le mea o loo taʻua e le Tusi Paia o “galuega a le tino,” e aofia ai le ‘feitagai, femisai, finau vale, ma fevaevaeaiga.’—Kalatia 5:19-21.

O se Faiga Malo a le Lalolagi Uma

O le ā la, le vaifofo? E tusa ma le fitu selau tausaga ua mavae, na faasino mai ai le tali e Dante, o se tagata Italia e lauiloa i ana fatugasolo ma ana filosofia. Sa ia faapea mai, e na o se faiga malo a le lalolagi uma e mafai ona ia faamautinoa maia le filemu ma le autasi o tagata. I le toatele o tagata, o le faamoemoe i so o se ituaiga o faiga malo a le lalolagi uma ua na o se miti, e lē o se mea e mafai ona tuu atu i ai se faatuatuaga moni. Ua faaiu mai manatu o le tusitala lea sa muai taʻua o Payne: “Ua lē toe faitaulia se faiga malo a le lalolagi uma i le taimi lenei o talafaasolopito.” Aisea? Auā e so o se faiga malo a le lalolagi o loo sologa lelei, e tatau ona faamautinoa pe latou te gafatia mea e lua ia e foliga e matuā lē oo i ai se tomai o le tagata, e faapea, “o le a faaiuina taua e se faiga malo a le lalolagi uma, ma o le a lē fia pule sauā se faiga malo a le lalolagi uma i le aoao o mea.”

E mautinoa e leai se faiga malo a tagata latou te mafaia lenei mea. Peitai ane, o le Malo o le Atua i le pule a Iesu Keriso, e mafai ma o le a ia aveesea taua. (Salamo 46:9, 10; Mataio 6:10) E mautinoa lava, o le a ia aveesea i latou uma o loo faatupuina taua. Ua faaalia e le perofeta o Tanielu e faapea i le iuga o taimi ua atofaina a le Atua ina ia pule ai tagata i le lalolagi, o le a faamaonia ai le “vaevaeina” o pulega a tagata e pei o le “uamea ua filogia ma le omea.” (Tanielu 2:41-43) O le a iu lenei mea i le malepe o faiga faapolotiki ma feteenaiga lē maalofia. Peitai, ua faapea mai Tanielu o le Malo o le Atua o le a ia “tuʻimomomoina ma faaumatia ia malo [lotonuu ma le lē autasi] uma lava,” po o pulega a malo, ae suia i lona Malo ua leva ona tatalia, e ala mai i le pule a Iesu Keriso.—Tanielu 2:44.

E leai se aogā o le faatulagaina o se siosiomaga manaia mo tagata pe afai e aināina pea le lalolagi i tagata faaleagamea o loo latou faafaigataina pea le olaga mo isi. Ae peitai, o le a “faaumatia o e fai amio leaga.” (Salamo 37:1, 2, 9, 38; Faataoto 2:22) Ona aveesea ai lea e Keriso tagata uma o loo tetee ma le loto i ai i tapulaa a le Atua po o ē o loo lagolago atu i pule faalelalolagi o loo faaleagaina mea. O le a ia faaumatia i latou uma o ē o loo faafanoina lenei paneta. Ua folafola mai e le Atua le ‘faafanoina o i latou o e o loo fano ai le lalolagi.’—Faaaliga 11:18.

O le a lē pei lenei mea o se pule sauā i le lalo-lagi aoao. O le a gaoioi Iesu Keriso “ona o le upu moni, ma le agamalu, ma le amiotonu” a o ia tuueseesea le lelei mai le leaga. (Salamo 45:3, 4; Mataio 25:31-33) O lenei foi gaoioiga e lē o se gaoioiga sese e faaleagaina ai, po o se faaaogā sese o le pule. E leai! E lē faapei o se fale matagofie mai aso anamua o le a faaleagaina e ni tagata matapeapea ina ia fau ai fale fou e faatau atu. O le a pei o se faatamaiaga o se fale telē ua pala, ina ia faaavanoa ai le fanua mo se siosiomaga mamā ma le manaia i le silasila.

Ae faapefea isi malosiaga ia sa faapogaia lena lē autasi i taimi ua tuanai? Po o le a latou sao-loto ea e faaleaga lenei faiga fou o mea ina ia toe amata ai foi e i latou o loo aināina se isi faiga faaleagamea, le fetauai ma isi tagata o loo latou nonofo faatasi, ma faafaigata ai le olaga mo tagata taitoatasi? E mautinoa lava e leai. O lenei aveesea faamalosi ma le toe faafouina o le mea mulimuli lava lea e faia ma faia maeʻaeʻa. “E le tupu faalua mai le puapuaga.”—Nauma 1:9.

Ua faatusaina e le Tusi Paia le faaumatiaga aʻiaʻi o Satani, e pei o le susunuina o se lapisi. Ua faapea mai, o “le tiapolo foi o le na faasese [i ē o loo aināina le lalolagi], ua lafoina o ia i le lepa afi ma le teio.” (Faaaliga 20:10) Maeu se faailoga malosi! Seʻi tau ina manatu, ua faatusaina le faaumatiaga e lē i sina tamai tafunai, ae ua faatusa i le lepa afi, o loo susunu ma aveesea ai mai le toe iai o mea leaga uma lava ma mea e faatamaia ai. E leai se isi, leai se tagata, leai foi se temoni, o le a faataga ina ia faaauau pea ona faia ni mea e faamataʻuina ai le faatulagaina o mea i le vateatea, lea e solia ai tapulaa a le Atua i mea e saʻo ma sese, po o mea e faapogaia ai le tiga i isi o latou uso a tagata. O le a aveesea uma lava i latou o loo talepeina le autasi!—Salamo 21:9-11; Sefanaia 1:18; 3:8.

Tagata Autasi Mai Atunuu Uma

O tagata e faasaoina mai lenei faamamāaga tele, o le a faia aʻe ai “le motu o tagata e toatele mai atu nuu uma, ma aiga, ma nuu, ma gagana eseese.” (Faaaliga 7:9) O le a latou lē fevaevaeai ona o ni feeseeseaiga tau atunuu ma ituaiga e tupuga mai ai. O le a latou aʻoaʻo ina ia ola faatasi i se autasi filemu. (Isaia 2:2-4) O le mea e sili atu ona ofoofogia, o le a aufaatasi atu ia i latou nei, tagata sa aināina muamua le paneta o ē o le a toe faafoisia mai e nofoia le lalolagi mamā e ala i le sauniuniga ofoofogia o le toetu.—Ioane 5:28, 29.

Pe e te fia soifua ai ea i lena lalolagi? E na o i latou o ē utagia mea e faafinagaloina e le Atua o le a latou faia faapea, ma o loo manino ona faatulaga mai i le Tusi Paia mea na te faafinagaloina. (Ioane 17:3; Galuega 2:38-42) O le a fiafia Molimau a Ieova e fesoasoani ia te oe e aʻoaʻoina mea o loo faafinagaloina e le Atua, ina ia mafai ona e maua le faamoemoe e olioli i le ola e faavavau i se lalolagi autasi moni.

[Ata i le itulau 7]

O le a faamautinoa mai e le faiga malo i le pule a Iesu Keriso le iai o se lalolagi autasi