Pe E Te Manatua?

Po o e manatunatu ma le faaeteete i mataupu i lomiga o Le Olomatamata talu ai nei? Afai o lea, o le a avea la o se mea e faafiafiaina ai oe i le manatuaina o mea nei:

◻ Aisea e lē talafeagai ai le aʻoaʻoga e faatatau i iuga tuupoina?

Afai na muai silafia e le Atua ma poloaiina le paʻū atu o Atamu i le agasala, o lona uiga la o Ieova na faapogaia le agasala ina ua ia faia le tagata, ma e tatau la ona tuuaia o ia ona o mea leaga ma mafatiaga uma o tagata. Ua lē ogatasi lenei manatu ma le mea moni e faapea, o Ieova o le Atua alofa o lē e inoino i le amio leaga. (Salamo 33:5; Faataoto 15:9; 1 Ioane 4:8)—4/15, itulau 7, 8.

◻ I le faataunuuga o le Isaia 2:2-4, o le ā le mea o loo faia e tagata mai le tele o atunuu?

A o latou gasolo atu i le fale o le tapuaiga ia Ieova, ua latou tau mamao mai le ʻaʻoaʻoina o taua’ auā ua tuu atu lo latou faatuatuaga i le puipuiga a ʻau faalelagi a le Atua, lea ua fuafuaina e latou te faaumatiaina fili uma o le filemu.—4/15, itulau 30.

◻ O ai ʻau malolosi a le Atua ia o loo taʻua i le Ioelu 3:10, 11?

E tusa ma le 280 ona taʻua e le Tusi Paia le Atua moni e faapea, o “Ieova o ʻau.” (2 Tupu 3:14) O nei ʻau, o ʻau agelu malolosi i le lagi, o loo nofosauni e faataunuu le faatonuga a Ieova.—5/1, itulau 23.

◻ O le ā se lesona e mafai ona tatou aʻoaʻoina mai i le finagalo o Ieova ina ia tatalo Iopu mo i latou o ē na agasala atu ia te ia? (Iopu 42:8)

A o lei toe faafoisia le soifua maloloina o Iopu, sa finagalo Ieova ina ia tatalo Iopu e fai ma sui o i latou o ē na agasala atu ia te ia. Ua faaalia ai i lenei mea, e finagalo foi Ieova ina ia tatou faamagalo atu ia i latou o ē agasala mai ia i tatou ae tatou te lei ole atu mo le faamagaloina o a tatou agasala. (Mataio 6:12; Efeso 4:32)—5/1, itulau 31.

◻ O le ā na uiga i ai le tala a Iakopo ina ua ia faapea mai: “Ia atoatoa le galuega a le onosai”? (Iakopo 1:4)

E iai le matafaioi a le onosai e fai, o se “galuega.” O le galuega a le onosai, o le faaatoatoaina lea o i tatou i vala uma lava. I lea, o le tuu ai pea o puapuaga e aunoa ma le faaaogaina o auala e lē faale-Tusi Paia e vave foia ai, ua tofotofoina ai ma ua faamamaina ai lo tatou faatuatua.—5/15, itulau e 16.

◻ Aisea ua sāga faatali umi ai le Atua i le tuuina mai o se vaifofo mo faafitauli o le fanau a tagata?

O le silafaga a le Atua i le taimi, e ese mai i la tatou vaaiga. I le Atua e faavavau, o le vaitaimi e amata mai i le taimi na faia ai Atamu seia oo mai i aso nei, e pei lava e lei tāitai atoa se vaiaso. (2 Peteru 3:8) Ae po o le ā lava le manatu o ia i tatou e uiga i le taimi, ae o le mavae atu o aso taitasi, ua tatou latalata atu ai i le aso e faaeaina ai Ieova.—6/1, itulau 5, 6.

◻ O le ā o uunaia ai Molimau a Ieova?

O aʻoaʻoga a Ieova ua saunia ai se nuu tutasi, ua aʻoaʻoina ina ia fealofani ma ia alolofa atu i o latou tuaoi e pei o i latou lava. (Isaia 54:13) O le alofa ua uunaia ai Molimau a Ieova e faaauau pea ona talaʻi e ui lava i le lē āno mai ma le tetee o tagata. (Mataio 22:36-40; 1 Korinito 13:1-8)—6/15, itulau 20.

◻ O le ā ua faaalia i fetalaiga a Iesu e faapea: “Ia outou finafinau ina ia ulu atu i le faitotoa va apiapi”? (Luka 13:24)

Ua faaalia i fetalaiga a Iesu le manaomia ona faia o se tauiviga, ia tatou aapa atu. Ua faaalia foi i ana fetalaiga e faapea, atonu ua saili nisi ina ia ‘ulu atu i le faitotoa’ pe a talafeagai ma o latou tulaga, i le televave e manano lava latou i ai. O lea, e mafai e i tatou taitoatasi ona fesili ifo, ‘Po o oʻu filigā ma finafinau?’—6/15, itulau 31.

◻ O le a faapefea i ē o le a toe faatutuina mai ona “faamasinoina . . . i mea ua tusia i tusi, e tusa ma a latou amio”? (Faaaliga 20:12)

O nei tusi, e lē o ni faamaumauga o a latou gaoioiga i aso ua mavae; ina ua maliliu i latou, ua tuusaunoaina i latou mai āuga o agasala na latou faia i le taimi a o soifua i latou. (Roma 6:7, 23) Ae peitai, o tagata o le a toe faatutuina, o loo iai pea i le tulaga o le agasala tuufaasolo mai ia Atamu. O le uiga la o lenei mea, o nei tusi, o loo faataatitia mai ai ni faatonuga mai le Atua e tatau i tagata uma ona mulimuli ai ina ia maua atoatoa ai aogā o le taulaga a Iesu Keriso.—7/1, itulau 22.

◻ O ā lesona o loo iai mo i tatou i le faataoto a Iesu e uiga i le tuaoi Samaria? (Luka 10:30-37)

Ua faaalia i le faataoto a Iesu e faapea, o se tagata amio saʻo moni, o ia lea e lē gata ina usiusitai i tulafono a le Atua, ae faataitai atu foi i ona uiga. (Efeso 5:1) Ua faaalia ai foi i le faataoto e faapea, o le alofa i tuaoi, e tatau ona faasalafa atu e sili atu i va o atunuu uma, aganuu, ma papupuni faalotu. (Kalatia 6:10)—7/1, itulau 31.

◻ O ā vala e tolu e te ono iloa lelei ai lau fanau ma saunia ai taiala faamātua?

(1) Fesoasoani i lau fanau ina ia filifilia se ituaiga o galuega totogi talafeagai; (2) sauniunia i latou ina ia faafesagaia omiga tau i faalogona ootia i le aʻoga ma i falefaigaluega; (3) ia faailoa ia i latou le auala e faamalieina ai o latou manaoga faaleagaga.—7/15, itulau 4.

◻ Mo le ā le fuafuaga na mālōlō ai le Atua i le “aso fitu”? (Kenese 2:1-3)

E lei mālōlō le Atua ona e faapea ua vaivai. Nai lo o lea, na mālōlō o ia mai lana galuega faalelalolagi ina ia mafai ai ona tupu aʻe lana foafoaga ma oo i lona mamalu atoatoa, ina ia viia ai ma faamamaluina ai o ia.—7/15, itulau 18.

◻ O ā auala e tolu e mafai ona tatou faatinoina ai le faamasinotonu?

Muamua, e tatau ona tatou gauai atu i tapulaa tauamio a le Atua. (Isaia 1:17) Lua, e tatou te faatinoina le faamasinogatonu pe afai tatou te faia isi tagata i le auala tatou te mananao e feutagai ai Ieova ma i tatou. (Salamo 130:3, 4) Tolu, e tatou te faaalia le faamasinotonu a le Atua pe afai e tatou te auai ma le filigā i le galuega talaʻi. (Faataoto 3:27)—8/1, itulau 14, 15.