Po o Iai Sau Agelu o Leoleoina Oe?

PO O e manatu o loo iai sau agelu o leoleoina oe? E toatele tagata latou te manatu faapena. Ona o lena la manatu, ua taʻua ai faapea o loo iai i se tasi o fafine i Kanata i sisifo se meaalofa faapitoa e fesootai atu ai i agelu. Afai e te avatu ia te ia lou igoa atoa, faatasi ma se $200 Kanata, ona ia faapea mai lea o le a ia faafesootaia oe ma lau agelu e leoleoina oe. Muamua, e manatunatu loloto o ia e ala i le sioa atu i le mumū a se molīgaʻo. Ona sosoo lea ma lona iloaina o se vaaiga lea e faailoa ane ai e lau agelu ia te ia se feau e faaoo atu ia te oe. O se mea faaopoopo i le feau, e aumaia e le fafine se ata na ia tusia o le tino mai o lau agelu.

I nisi tagata, e foliga mai o lenei mea e tutusa ma le talafatu e faatatau i le tupu Falani o Louis IX. Sa ia faatauina ni fulu manu sili ona taugata ma lona manatu faapea na paʻūū mai ia fulu mai apaau o le Agelu Sili o Mikaele. E ui e masalomia le moni o lena tala, ae e toatele tagata e talitonu i mea o fai mai ai le fafine Kanata.

Naunautaiga i Agelu

I tausaga e lei mamao tele atu, ua aliai mai ai le naunautaiga tele i agelu. I televise ma ata tifaga, o tusi, mekasini ma tusi o tala fou, ua faamatala mai ai ia i tatou ni tala i agelu e latou te faamafanafanaina ē o loo tigaina i maʻi, faamafanafana i ē loto faavauvau ona ua maliliu ē pele ia i latou, avatu le poto i se tasi, ma faasaoina tagata mai le oti. I le Iunaite Setete, e tusa ma le 20 miliona le au maimoa latou te matamataina se polokalame faalevaiaso i le televise e faailoa mai ai le aafia o agelu i olaga o tagata. O se tasi o faletusi ua lisi mai ai le sili atu i le 400 tusi o loo taulai atu i agelu.

Ua taʻua mai e se tusi e lei leva ona tusia, mea tutupu e uiga i le auala ua faasaoina ai e agelu o fai ma leoleo ola o fitafita i le taua. O faamatalaga o loo faapipii i taavale o loo taʻua ai faapea o loo puipuia avetaavale e agelu o loo fai ma leoleo. Ua uunaia e faalapotopotoga, o fonotaga, ma semina le suesueina o agelu ma fai atu ni faamatalaga e fesoasoani ai i tagata ina ia fesootai ma i latou.

O Eileen Freeman o le tusitala o tusi e tolu e faatatau i agelu ma o ia foi o loo faasalalauina atu i le lautele se lomiga o loo faaautu atu i agelu. Ua maumauai o ia i lona faapea mai: “Ou te manatu o agelu taitasi i le lagi e faapena foi ona iai agelu taitasi e fai ma leoleo i luga o le Lalolagi, o sē o ona tiute e lē mātele e viiviia le Atua i le vanimonimo i le lagi ae i le tausia moni o tagata ma isi ituaiga o ola o loo i luga o le Lalolagi. Ua tofia mai ia i tatou taitoatasi se agelu e fai ma leoleo ia i tatou pe a amata afuafuaina i tatou ma leoleo mai i lo tatou tuputupu aʻe i le manava, i lo tatou fananau mai, i lo tatou olaga i lenei lalolagi, seia oo ina taitaia i tatou e le agelu mai le saisaitiaga o lenei lalolagi agaʻi atu i le mamalu faalelagi.” O lenei faamatalaga ua faamatala lelei mai ai le vaaiga taatele e faatatau i agelu o fai ma leoleo.

I nei taimi o tiga ma faigata, ua taliagofie ai le manatu faapea o loo iai sa tatou lava agelu o fai ma leoleo, o lona tiute o le puipuia lea o i tatou. O le ā ua fai mai le Afioga a le Atua, le Tusi Paia, e uiga i lenei mea? Pe e tatau ona tatou taumafai ina ia faafesootaia agelu? Pe o latou manatu mai ea i o tatou tulaga tau amio ma o tatou talitonuga tau tapuaiga? O le ā se fesoasoani e mafai ona tatou faatalitalia mai ia i latou? O nei fesili o le a taliina i le mataupu o loo sosoo mai ai.