Le Auala e Mafai Ona Fesoasoani Mai ai Agelu ia te Oe

UA FAAMAONIA mai e le Afioga a le Atua le iai o agelu. Ua taʻu mai ai faapea e faitau miliona nei foafoaga agaga. Na maua e le auauna a Ieova le Atua o Tanielu se vaaiga o mea faalelagi ia na ia tusi ai: “Ua afe ni afe o e auauna [i le Atua], e mano ni mano o e laulaututū i ona luma.”—Tanielu 7:10.

Seʻi mātau o le faamatalaga a Tanielu o loo taʻu maia ia i tatou isi mea na i lo le na o le taʻu mai e toatele agelu. O loo faailoa mai ai foi e faapea o loo auauna agelu i le Atua. O i latou o ana auauna. I le ogatusa ma lea tulaga, na pese ai le faisalamo e faapea: “Faamanū atu ia ia Ieova outou ana agelu o e malolosi tele, o e faia lana afioga, o loo faalogo i lona siufofoga. Faamanū atu ia ia Ieova outou ana ʻau uma lava, o outou ana auauna, o e faia lona finagalo.”—Salamo 103:20, 21.

Ua faamalamalama mai foi e le Tusi Paia e faapea sa lei amata mai olaga o agelu o ni tagata i le lalolagi. Na foafoaina e Ieova agelu i le lagi a o lei tāitai lava ona ia foafoaina le lalolagi. Ina ʻua faavaeina [e le Atua] le lalolagi, na alalaga fiafia atalii uma faaagelu o le Atua.’—Iopu 38:4-7.

O agelu, o foafoaga agaga ia—e lē vaaia, e malolosi, e popoto. I le Tusi Paia, o le upu faa-Eperu mal·ʼakhʹ ma le upu faa-Eleni agʹge·los ua faaliliuina “agelu” pe a faailoaina mai se foafoaga agaga. E toeitiiti atoa le 400 taimi ona iai ia upu i le Tusi Paia. E tutusa uma uiga o ia upu, o le “avefeau.”

Faaali Mai o Agelu

O agelu e mautinoa lava o avefeau. Atonu e te masani ma le tala a le Tusi Paia e uiga i le taimi lea na faaali atu ai le agelu o Kaperielu ia Maria. Na ia fai atu ia te ia e faapea e ui lava o ia o se taupou i le taimi lena, ae o le a ia fanau mai se tama tane e faaigoaina ia Iesu. (Luka 1:26-33) Na faaali atu foi se agelu i nisi o leoleo mamoe na i le fanua. Na ia faalauiloa atu e faapea: “O le aso nei ua fanau ai ia te outou i le aai a Tavita le Faaola, o ia o Keriso le Alii.” (Luka 2:8-11) Sa faapena foi ona faaooina atu e agelu feau ia Akara, Aperaamo, Lota, Iakopo, Mose, Kitiona, Iesu, ma isi o loo i faamaumauga a le Tusi Paia.—Kenese 16:7-12; 18:1-5, 10; 19:1-3; 32:24-30; Esoto 3:1, 2; Faamasino 6:11-22; Luka 22:39-43; Eperu 13:2.

E mataina le manatu e faapea o nei feau uma na faaooina atu e agelu, sa ogatusa ma le faagaoioia o fuafuaga a le Atua ae lē o fuafuaga a tagata na aofia ai. Na faaali atu agelu o ni sui o le Atua, e ogatusa ma lona finagalo ma lana faasologa o taimi. Sa lei faatalosagaina i latou e tagata e faia faapea.

Pe Tatau Ona Tatou Valaau Atu i Agelu mo se Fesoasoani?

Pe o se mea tatau le valaau atu i agelu i taimi o puapuaga? Afai o lea, e tatou te fia iloa la le igoa o le agelu e sili atu ona mafai ona fesoasoani mai ia i tatou. Ona o lena mea, ua tusia mai ai e nisi tusi o loo faatau atu ni igoafai o le tele o agelu, faatasi ai ma o latou tulaga, tofiga, ma o latou tiute. O se tasi tusi ua lisi mai ai le mea ua taʻua o “agelu e sefulu e sili ona maualuluga i le lagi,” o “agelu e silisili ona lauiloa i atunuu i Sisifo.” O loo sau ai i le lisi le fautuaga ina ia moeiini ou mata, taʻu ma toe taʻu lēmū le igoa o le agelu mo ni nai taimi, ia matuā mānava i totonu, mānava lēmū, ona “faaavanoa atu loa lea o oe i se fesootaiga e ono mafai ona fai ma i latou.”

I sona faaeseesega, e na o le toalua lava igoa o agelu faamaoni a le Atua, o Mekaeli ma Kaperielu ua aumaia e le Tusi Paia ia i tatou. (Tanielu 12:1; Luka 1:26) Atonu o le mafuaaga o le aumaia o ia igoa, ina ia faailoa mai ai o agelu taitasi o ni peresona agaga tutasi e tofu ma le igoa, ae ua lē na o ni malosiaga.

E mataina le iloa e faapea sa mumusu nisi agelu e taʻu atu o latou igoa i tagata. Ina ua fesili Iakopo i se agelu e faailoa mai lona igoa, sa ia lei faia faapea. (Kenese 32:29) Ina ua fesili atu e faailoa mai o ia, sa na ona faapea atu le agelu lea na faalatalata atu ia Iosua, o ia o le “ave ʻau a Ieova.” (Iosua 5:14) Ina ua fesili atu mātua o Samasoni i se agelu mo lona igoa, na ia faapea mai: “O le a le mea e te fesili mai ai i loʻu igoa, auā e silisili ese ia.” (Faamasino 13:17, 18) E ala i le lē aumaia o se lisi o igoa o agelu, ua puipuia ai i tatou e le Tusi Paia mai le avatua i agelu o se mamalu ma se tapuaiga e lē tatau ai. E pei ona o le a tatou vaaia, e lē o faatonuina mai ai foi i tatou e valaau atu ia i latou mo se fesoasoani.

Valaau Atu i le Atua

Ua taʻu mai e le Tusi Paia ia i tatou mea uma e ao ona tatou iloa e faatatau i le nofoaga agaga. Na tusi le aposetolo o Paulo e faapea: “O tusi paia uma lava e mai le Agaga o le Atua ia, e aoga foi ia e aʻoaʻo ai . . . ina ia atoatoa ona lelei ai o le tagata o le Atua, ia saunia lava ia i galuega lelei uma lava.” (2 Timoteo 3:16, 17) Pe ana fai e finagalo le Atua ia tatou iloa igoa o le toatele o agelu, semanū e na te faailoaina mai i lana Afioga, le Tusi Paia. Ma pe ana fai e naunau le Atua e aʻoaʻo i tatou i le auala e faafesootaia ai agelu ma talanoa atu ia i latou i le tatalo, semanū e na te aumaia na faamatalaga i totonu o le Tusi Paia.

Na i lo lena, na aʻoaʻo mai Iesu Keriso faapea: “Pe a e tatalo, ina ulu atu ia i lou afeafe, ma pupuni lona puipui, i le e tatalo ai i lou Tamā o i le mea lilo . . . O lenei, ia faapea outou ona tatalo, Lo matou Tamā e, o i le lagi, Ia paia lou suafa.” (Mataio 6:6, 9) O le vaaiga faale-Tusi Paia lenei: E tatou te lē valaau atu i agelu pe tatalo ia i latou, ae e tatau ona tatou faalatalata atu i le tatalo i Lē na Foafoaina agelu, o le Atua lea. E lē o faaliloina lona suafa, ma e lē tau manaomia ona vaaia se faaaliga ina ia faailoa mai ai. E ui i taumafaiga ua faia ina ia nanā ai le suafa o le Atua, ae ua maua e sili atu i le 7,000 taimi i faamaumauga a le Tusi Paia. Mo se faaaoaoga, o loo faasino atu agaʻi i le Tamā faalelagi upu ia na pese ai le faisalamo: “O oe, e ou le suafa o IEOVA, na o oe lava o le Silisili ese i le lalolagi uma.”—Salamo 83:18.

E lē tāitai ona pisi tele Ieova e lē mafai ai ona faalogo mai ia i tatou pe a tatou faalatalata saʻo atu ia te ia i le tatalo. Ua aumaia e le Tusi Paia le faamautinoaga lenei: “O fofoga o Ieova e fetaufetuliai i le lalolagi uma, na te fesoasoani ia te i latou o e ua sao o latou loto ia te ia.”—2 Nofoaiga a Tupu 16:9.

Agelu ma Amioga Tatau

E ese ai mai mea e masani ona taʻua mai i auala o faasalalauga, e lē faamasinoina e agelu tagata. E fetaui lelei lena mea, auā e lē o i agelu le pule e faamasinoina ai tagata. O Ieova o ʻle Faamasino o tagata uma,’ e ui ʻua ia tuu atu le faamasinoga uma lava i le Atalii,’ o Iesu Keriso. (Eperu 12:23, NW; Ioane 5:22) E ui i lea, o se mea sese le faapea e lē popole mai agelu i le auala o loo tatou ola ai. Na fetalai Iesu: “Ua faapea le olioli i luma o agelu a le Atua, ona o le tagata agasala e toatasi ua salamo.”—Luka 15:10.

Peitai, o agelu, e lē faapea ua na o ni ē e matamata mai ia i tatou. I taimi ua mavae, na auauna i latou o ni ē faaoosala, i le faaooina atu o faamasinoga a le Atua. Mo se faaaoaoga, na faaaogā e le Atua agelu faasaga i tagata Aikupito anamua. E tusa ai i le Salamo 78:49, “na ia faaoo ia te i latou o lona toasa mamafa, o le maʻemaʻeā, le toatamai, ma le puapuaga, i lona aauina atu o auauna [“agelu,” NW] e i ai mala.” Ua faapena foi ona lipotia mai e le Tusi Paia e faapea i le po e tasi, na fasia ai e le agelu le 185,000 o fitafita Asuria.—2 Tupu 19:35.

I se auala foi faapena, o le a faaumatia ai e agelu i le lumanai i latou ona o le mumusu e gauai atu i tapulaa amiotonu a le Atua ua lamatia ai le tulaga lelei o isi. O le a maliu Iesu “faatasi ma agelu o lona malosi, i le afi mumū, na te taui ma sui i e ua le iloa le Atua, ma ua le anaana i le tala lelei.”—2 Tesalonia 1:7, 8.

Ua faaalia ai e le Tusi Paia o agelu faamaoni a le Atua e latou te faia pea lona finagalo e ala i le faaooina atu o ana faatonuga ma tausisia ana tulaga amiotonu. O le mea moni lava, afai tatou te mananao i agelu a le Atua e fesoasoani mai ia i tatou, e manaomia ona tatou iloa po o le ā le finagalo o le Atua ma tauivi ma le naunautai ia faia.

Agelu e Leoleo Mai

Pe e manatu mai agelu i tagata ma puipuia i latou? Na fesili le aposetolo o Paulo: “E le o [agelu] e auauna ea i latou uma, ua aauina e auauna ona o i latou o e a maua le ola?” (Eperu 1:14) E manino lava, o le tali i le fesili a Paulo o le ioe.

Talu ai lo latou mumusu e ifo i le tupua auro na faia e le tupu Papelonia o Nepukanesa, na lafoina ai i se ogaumu matuā aasa lava tagata Eperu e toatolu o Sataraka, Mesako ma Apeteniko. Ae peitai, sa lei afaina i le afi na auauna faamaoni a le Atua. Ina ua autilo atu le tupu i le ogaumu, na ia vaaia ai “tagata e toafa,” ma ia faapea mai “ua tino mai lona toafa ua pei o se alo o le Atua.” (Tanielu 3:25) I ni tausaga mulimuli ane, na oo ai Tanielu i le lua o leona ona o lona faatuatua faamaoni. Na faasaoina foi o ia e aunoa ma le faamanuʻaina ma faailoa e faapea: “Ua auina mai e loʻu Atua o lana agelu, ua punitia ai gutu o leona.”—Tanielu 6:22.

Ina ua faavaeina le faapotopotoga o soo o Keriso i le uluai senituri T.A., na iloa ai foi agelu o loo faasaolotoina le au aposetolo mai le falepuipui. (Galuega 5:17-24; 12:6-12) Ma ina ua lamatia le ola o Paulo i le sami, na faamautinoa atu e se agelu ia te ia e faapea o le a taunuu saogalemu o ia i Roma.—Galuega 27:13-24.

Ua talitonu atoatoa auauna a Ieova le Atua i aso nei e faapea o le ‘au agelu lē vaaia a le Atua o loo iai moni lava ma e mafai ona latou saunia mai le puipuiga, e pei ona sa latou faia mo Elisaia ma lana auauna. (2 Tupu 6:15-17) O le mea moni, “e to lauapi le agelu a Ieova e siosiomia ai e o matatau ia te ia, e laveai foi o ia ia te i latou.”—Salamo 34:7; 91:11.

Le Feau o Loo Avatua e Agelu

A o manatu mamafa mai agelu i le lelei o i latou o loo auauna ia Ieova le Atua, ua latou aafia foi i le faamautinoaina o loo aʻoaʻoina tagata e uiga ia te ia ma ana fuafuaga. Na tusi le aposetolo o Ioane: “Na aʻu iloa foi le tasi agelu ua lele i le taulotoaiga o le lagi, ua ia te ia le tala lelei [e] faavavau e folafola atu i e nonofo i le lalolagi, i atunuu uma, ma ituaiga, ma gagana eseese, ma nuu, ua faapea atu ma le leo tele, ʻIa outou matatau i le Atua, ma avatu ia te ia le viiga.’”—Faaaliga 14:6, 7.

Pe e te fia silafiaina mea o iai i lea “tala lelei [e] faavavau”? Afai o lea, fesili atu i Molimau a Ieova. O le a o latou fiafia e fetufaai ma oe i lea tala lelei.

[Ata i le itulau 7]

O loo folafola e se agelu i le taulotoaiga o le lagi le tala lelei e faavavau. Pe e te fia silafiaina lea tala lelei?