Po o Faasolo Ina Mou Atu le Uiga o le Upu “Kerisiano”?
O LE ā le uiga o le avea o se tasi ma Kerisiano? O le a faapefea ona e tali? O le fesili tonu lena na fesiligia ai se vaega na filifilia o tagata i atunuu eseese, ma o se faaaʻoaʻoga lenei o tali na latou tuuina mai:
“Ia mulimuli ia Iesu ma faataʻitaʻi ia te ia.”
“Ia avea ma tagata lelei ma tufa atu mea i isi.”
“Ia talia Keriso e avea ma Alii ma Faaola.”
“Ia alu i le Misasā, lau le Rosalio, ma tali le Taulaga Paia.”
“Ou te lē talitonu e tau manaʻomia fua ona e alu i le lotu ina ia avea ai oe o se Kerisiano.”
E oo foʻi i lomifefiloi ua latou aumaia le tele o ni faamalamalamaga e matuā lavelave lava. O le isi lomifefiloi, e sefulu lelei ni uiga eseese i lalo o le upu “Kerisiano,” e amata mai lava i le uiga o le “talitonu i le po o le auai atu i le lotu a Iesu Keriso” e oo atu i le uiga faapea “o se tagata amiolelei po o se tagata amio talafeagai.” E lē faateʻia ai la i le toʻatele o i latou o loo faigatā ona latou faamatalaina le uiga o le avea o se tasi ma Kerisiano.
Se Faiga Tuufau
I aso nei, i ē ua faapea mai o Kerisiano—e oo lava ia i latou e lolotu i le falesā e tasi—e mafai ona maua ai e se tasi ni manatu e matuā eseese i mataupu e pei o le faagaeeina tauatua o le Tusi Paia, le aʻoaʻoga o le evolusione, le auai o lotu i faiga faapolotiki, ma le tufa atu e se tasi o lona faatuatuaga i isi. O mataupu i amioga tatau, o mataupu e pei o le faapaʻūtama, le tauātane, ma ulugalii e nonofo faatasi e aunoa ma le faaipoipoina, e masani lava ona faapogaia ai ni fefinauaʻiga ogaoga. E mautinoa o lenei mea o se faiga tuufau.
Mo se faataʻitaʻiga, talu ai nei lava na palota ai se fono fai filifiliga a se lotu Porotesano ina ia lagolagoina le aiā tatau a le lotu “e filifilia ai se toeaina o loo lauiloa lona tulaga tauātane e avea o se sui o la latou fono faatonu,” e tusa ai o le lipoti mai le mekasini o le Christian Century. E iai ni tagata e suʻesuʻe i mataupu faalotu ua latou faaali mai se manatu faapea o le faatuatua ia Iesu e lē o se manaʻoga sili ona tāua lea mo le faaolataga. Ua latou talitonu faapea, o tagata Iutaia, tagata Musalimi, ma isi “atonu o le a latou ulu atu i le lagi [e pei lava foʻi o Kerisiano],” ua fai mai ai se lipoti i le The New York Times.
Seʻi faaāta i lou mafaufau pe afai e te mafai, se tagata na te faaauilumaina faiga faakomunisi ae o loo lagolagoina faiga tau tamaoaiga e pulea e tagata taʻitoʻatasi, po o se tagata e auai i faiga faatemokalasi ae o loo lagolagoina pulega faatautalatasi, po o se tasi e manatu mamafa i le siʻosiʻomaga ae o loo ia lagolagoina le tāina o le vaomatua. E te ono faapea mai: “E lē mafai ona avea moni lena tagata o se tasi e auai i pulega faakomunisi po o se tagata e auai i faiga faatemokalasi po o se tagata e manatu mamafa i le siʻosiʻomaga”—ma o le a saʻo lou manatu. Peitaʻi, pe a e iloiloina le anoanoaʻi o manatu eseese o loo iai i tagata i aso nei o ē ua faapea mai o Kerisiano, e te maua ai talitonuga e matuā feeseeseaʻi lava ma e masani ona feteenaʻi ma mea na aʻoaʻo mai e Lē na Faavaeina le Faa-Kerisiano, o Iesu Keriso. O le ā se mea e taʻu mai i lena eseesega o manatu i la latou ituaiga o Faa-Kerisiano?—1 Korinito 1:10.
O le faanaunauga e suia aʻoaʻoga faa-Kerisiano ina ia ōgatusa ma le vaitaimi o loo soifua ai, o se mataupu ua autausagā o fai, e pei ona o le a tatou tilofaʻia nei. O le ā se finagalo o le Atua ma Iesu Keriso i na suiga? Pe mafai e lotu o loo lagolagoina aʻoaʻoga e lē o faavae mai ia Keriso, ona latou taʻua ma le tonu i latou o ni Kerisiano? O fesili nei o le a talanoaina i le mataupu o loo sosoo mai.